Yakobus 1

Yakobus

Ponekori Mome Toro Pibogne

Yakobusti nimi kipsiogha

Na Yakobus wamnange, Allahap nu Saelba Uhiropne Yesus Kristusapti arukna wamna. A'un Yahudi nimi sisa aobare talup tangto tala-tala talum nimi kiplamsin.

Eraruk urobag nimi wana kiliro mipsinepne sembe ambatsiogha

2 Nangkabo, sa'a-sa'ari a'un miplamsileba, eraruk uro wapmun tanena, a'undi wanaag, “Na mo wana awi aghabog senelamnun,” aro seneragto wamlulom. 3 A'un mipsiropne sembe el uro wamlom nena, “Kristusag wana palilamnange otsikne lag nenep tangto yabalamla,” senelapmunne agha a'undi wana khapto wamnep. 4 Wana khapto wapmundi, wana whi uro seneragto ul pinep. Wana whi uro ul pin tanena, Allahri ni a'unag tatsinepne a'unag taleba, ni sunsunup taleri, nhonne babe orog wamnep kom. 5 Aghana a'un nimi nhondi wana hekto seneragtopne orog tanena, Allahag mololapmendi, “Wana hekanululam,” aro molbalulam. Elag molorop nimi wabahin koma Allah wana waliri nimi niag maiknoro tarelamsilne ponekori anag babe tatkelul. 6 Aghana Allahag molbanep nimi enekori wana wag neneptan koma, elag wana paliropneag agha mololamleba tatlul. Ot wana wag nenep tangtop nimiri seneragnep nena, khaori mag alip toman pho alamloba, mag kula'epto tara sip pang, tara sip yang ulamloa saog uro wanaag seneraglamla. 7-8 Wana wag nenep tangtop nimi enekori tara sip pang, tara sip yang ulamloa saog uro ul pirop. Ane sembe, nimi nhon wana phende nenep tangtop tanena, “Nu Saelba Uhiropne ponekori nanag tatnelul,” sembaheng kom.

9 A'un mombolag urop nimi, Kristusag wana palilamlomba, Allahri a'un paliag nembamsilne sembe wana awi senelamlulom. 10 Aghana tup nimiri wana awi uro sindam nimi, “Mombolag nenep tahane,” aro seneraglamukang. Tup nimina, pongoroba es aba timbaloa saog uro tup nimi babe amik kom tanep. 11 Heng bobori pongoroba es aba halo aro ul tandi, lulupto timbanep. Es aba lulupto timbanba, nimiri kembi agha wali sembanep kom. Ane saog uro tup nimina eldi, “Undo unuahane,” aro seneragto ul piropne babe kom talul.

12 Nimi nhondi Allahag wana paliro o'ona senelamnaba, orabari el mipnaba, eraruk uro wamna aghana, wana khapto wamnep. Nimi etne wana khapto wamnep tanena, Allahri nimi enekoag kamna tatnepne tatleba, toplul ane sembe wana awi uro wamlul. Allahri salag pibogne sunsunum uro elag wana paliro o'ona senerop nimiag tatsinep nena, Allahri kwiria nimi eneko usoghag elektoba elekahileba, ya'ag kamag uro wamukang.

13 Nimi nhondi el wanaag, “Malia uahane,” senelamle tanena nimi enekori, “Allahri na wana aluktop yubu agha miplamnel,” aro yubu lemnep kom. Undo lemnep kom nena, Allah eldamneri, “Malinge uahane,” senerop komdina, ora nimi babe wana alukto, “Malinge ualulam,” aro mipsirop kom. 14 Ot nu nimi a'ero-a'ero, “Malinge uahane,” senerop nena, nundam nimi wanaag agha, “Nanag taho,” seneropne neneri nundam nimi wana kiliro selbel werobag nenelamsil. 15 Tanena, “Nanag taho,” seneropne neneag agha malinge uropne lag tanep. Lag tanepti, malinge uropne nubu tangto maubanep nena, tepnange agha lag nenep tanep.

16 Nangkabo, a'un nari wanaag nimi wamlom. A'undam nimi haing kunup taheng kom. 17 Sa'a-sa'a nunag talamlange, ni walingeap, ningki uropneap, ot el mog so'o tibin nenenne sumbaogne ponekori tai siba tarelamsil. El tibin sumbaogne poneko a'ero tanep komne wamlari, el kanero palamlea babe yame inibinne lag tangto yabinep kom. 18 Eldi nu sembe, “Nari mabo taheng,” seneropne sunsunum uro sik yubu pere agha eldi kelmabo me nembahiogpa, wendog nimi mangap taloa saog uro tabu. Eldi kelmabo me tabu andarina, nia mangkina eldi sumbaogneag agha nu eldi o'om nimi tabu.

Sik yubu ka'ebi agha ul pinepne sembe ambatsiogha

19-20 Nangkabo, a'un nari wanaag wamlom nimi, el uro wamsut. A'un nimi ni wamlulom nena, elem uro wana yo uro wabahin koma, elem uro yubu lemna koma wapmundi, “Yubu ka'eptangto wamsebe,” aro wero wamlulom. Nimiri wana yongeag agha urop nena, Allahri wana porog uro seneropne sunsunum uro nimi enekori ulamnep kom saog wamla. 21 Ane sembe a'undam nimi wanaag sembenga kaluro paip tangtopne ni anekoap, “Yonge uahane,” senero loloropneap kwiripto toboghamlulom. A'undi wana mamleba, a'undam nimi wali nenero taulbahinep yubu, a'undi wanaag pibog yubu eneko wali saelbamlulom.

22 Allahri yubu eneko aori mo ka'elopmun tanena, a'undam nimi haing kunup tangtop nimi wamnep. Allah yubu eneko a'undi ka'ero salelapmundi, sunsunum uro ul palamlulom. 23 Allah yubu eneko sunsunum uro uan koma aori ka'elorop nimi sembe sunumna nhon sumbatnuahin. Nimi nhon whing kemeptaneba kaca cerminag eldi whing kemeptanep. 24 Eldi whing ibom agha kemel dalamnari, “Nari whing undo-undo saog wamla,” senel dalamnep. Aghana nimi eneko la'imbom agha, “Nari whing wela saog uro kemban,” seneropne ekon tanep. 25 Ane saog uro nimi etneri Allahri aruksirop yubu kop-kop tagto kemelamleri, Allah yubu eneko ka'elamlenge ekon tan koma sunsunum uro ul palamle tanena, ul palamlengeri nimi eneko wana awi nenep talul. Allahri aruksirop yubu ot walingeog urop yubu enekori nimi sae lopsinep. Nimi etneri Allahri yubu eneko ul palamle tanena, wana awi wamlul.

26 Nimi nhondi eldamne sembe senel dalamlari, “Na Allah omektopne wamna,” seneptanep. Undo seneptanep aghana, eldi pamag agha lanarop yubu wali uro yae up tangkamnep kom tanena, eldamne wanaag ina selepne toman yarel dalamla. Nimi enekori Allah omekto ul palamlange ni sembe lobange sembanep. 27 Nimiri Allah omekto ul piroba taptopne Allahri yeng seneropne ulamnep nena, kaldam kelaboap, me mo'osinneap eraruk uro wamnaag nimiri sin yae paia ulamsinep. Apna nimirina, “Mog so'oag nimiri seneragto ul piropne nanag taleagti, a'eptangka walingeog ulamnun,” aro yae up tangkamnep. Nimiri Allah omekto ul piroba abeneko wali uro ul palamnep tanena, Allahri yeng seneropne ul pirop.