Yakobus 2

“Nimi nhon paliag, nhon mombolag nenep taheng kom,” aro ambatsiogha

Nangkabo, nu Saelba Uhiropne mo paliag tanepne poneko Yesus Kristusag wana palirop nimi wamlomdi, nimi nhon paliag, nhon mombolag nenel dalamseng kom. 2 A'undi Allah yubu lero winip tangtop ae anekoag tup nimi nhonap, saeagha orog nimi nhonap wa'alanep. Tup nimi enekori emas agha sunuroba sae ma'alag tobongkamnari, nongag enektop ag walinge eneklamna aghana, saeagha orog nimi eneko ag malinge wangalamnari, a'un nusamag babe wa'alanep. 3 Ot tupne ag walinge enektop nimi eneko wali kiplamsomdi, “Puna walinge aneag pulalulam,” aro lemnep. Aghana saeagha orog nimi enekoag kipna koma, “Ano sip mo sekamlulam to, nari yan tamag aneko ae usaag mo pulalulam to,” aro lemnep. Undo lemnepne toman agha, 4 a'undi sik uro nhon paliag, nhon mombolag nenero ulamnep te? Undo unulapmun tanena, yo urop nimi wana sengkwanekto tam kareptop nimi saog talapmunagti, undo unulamseng kom.

5 Nangkabo, a'un nari wanaag wamlom nimi ka'eamsut. Allahri samenag, “Na sembe o'ona senerop nimiag nari saelba ulamnangeag agha tatsineri saelbamsinun,” aro salag pibog. Salag pibogti, Allahri mog so'oag saeagha orog nimi weplamsiogti, “Wana maikno nanag palilamnukang ane sembe, na o'ona senerop nimiag tatsinepne sinag tatsinun,” aro saeagha orog nimi wepsiog. 6 Aghana a'undi saeagha orog nimi kipsin koma ali nenelamsilom. Saeagha orog nimi ali nenelamsilom aghana, nimi etneri a'un sae kiliro tam kareptop nimi whingag yo uro pabalamsiangne sembe seneraglamsut. Tup nimiri a'un tam kareptop nimi whingag pabina luknulamsiang. 7 A'un Kristus si walingeag si kekhaekto wamlom aghana, tup nimi tanekori si walinge neneko sembe san tiliplamang.

8 Samenag aruksirop yubuag mome toro pibog yubu, nu salero yubu sia lelamlange ponekori ambatsiog yubu enekona, “Andam nang nong ningki o'ona seneptangkamlam saog uro andi mog so'oag nimi babe o'ona sembamsululam,” aro arukahiog. Yubu neneko sunsunum uro ni wali uro ulamnari, komobi ulamnep tanena, ulamlomne ni walingeog wamnep. 9 Aghana a'undi nimi nhon paliag, nhon mombolag nenero urop tanena, malinge urop. Allahri arukahiog yubu ingisapto philamlomne neneri a'undi Allahri aruksirop yubu sunsunum uro ulamlom komne keknel dalamla. 10 Allahri arukahiog yubu ingisaplorop nena, Allahri arukahiog yubu orange ni wali uro ul pinep aghana, ot yubu tam nhonog sunsunum uro uan kom. Allahri arukahiog yubu tam nhonag phukul ingiro malingeag pirop tanena, Allahri nimi enekoag tam palilamnepne, “Nari arukahisi yubu ni sunsunum uro uitna koma ingisaplopla,” aro tam pimnep. 11 “Ingisaplopla,” aro lemnep nena, eldi samenag, “Ora nimiri nengabo kelabo haogha topsiseng kom,” seogne ponekori nen nhon babe, “Nimi ya'ag opsiseng kom,” aro arukahiog. A'un nimi nhondi ora nimiri nengabo kelabo haogha tohirop kom aghana, nimi ya'ag ohirop tanena, nimi enekoag, “An aruksirop yubu ingisapto phiropne wamlam,” senep.

12-13 Allahri, “A'un o'ona senel dalamlulom,” aro aruksirop yubu, nimi sae lopsinep yubu eneko sunsunum uro nuri ulamapne tam karebalul. Yareag senehirop kom nimi sembe Allahri yareag sembahin koma tam karebalul. Ane sembe a'undi lero ulamlulom nena, “Nunag tam pipsileag,” aro yubu lelapmundi, ul palamlulom. Yareag senehiropne neneko nubu tangto talamlari, nimi tam karepto palihinne nikniro luknubanep.

Sik seneropneap, ul piropneap sembe ambatsiogha

14 Nangkabo, nimi nhondi yubu lemnep nena, “Allahag sik senelamna,” senep aghana, nimi enekori sik senenne sunsunum uro ul pirop kom tanena, sik senenne neneri nimi eneko wali nembanep te? 15 Sunumna nhon sumbatnuahin. A'un nimi nengabo to, kelabo to a'unkabo tangtop nimi sin nongag enektoba enekto amna komdi, sumene kwaneng teneba orogha wamnep. 16 Undo wamnep aghana, a'un nimi nhondi ipsindi, sinag teko ulamsilenge tatsin koma sinag yubu lelamnari, “Wali pimundi, sondi habuklapmunagti, nongag kalup tamundi, mon og uro kwaneng telamlulom,” aro yubu mo ambatsinep. Undo ambatsinep aghana, saeri tatsin koma yubu lemna tanena, sin yepsinep te? 17 Ane saog uro sik senenne mo wamnaba, saeri ul piropneap ma'arop kom tanena, lebe arop komne teptopne mo wamla.

18 Aghana nimi nhondi yubu lemnep nena, “Andi sik senelamlamba, nari saeri ul palamna,” aro lemnep. Undo lemnep aghana, nari samoro haibanep nena, “Andi saeri ul pin koma sik senelamlamne lag nembatsinep te?” aro haibanep. Ot nari sik senelamnange na saeri ul palamnange ina agha lag nembatsinun. 19 Andi sik senelamlam nena, “Ot Allah nhonog wamla,” aro sikne wali senelamlam. Aghana phia maiknori babe, “Allah nhonog wamla,” aro sik senelamangdi, pet-pet aro log senelamang.

20 A'un nimi nhon limituk nimiri senerop nena, “Nimi saeri ul pin koma wanaag sik seneropne mo wamnep,” sembanep. Limituk nimi nhondi undo sembanep ane sembe, nari nen sunumna tol pina, “Nimi saeri ul pin koma wanaag mo sik senerop tanena, ot lebe arop komne mo wamla,” aro el nembanun. 21 Nunisag Abrahamdi elme Ishak, “Allah sembe oro aukag tamnebag pimnun,” aro uaog. Abrahamdi uaogne sembe Allahri ililamogti, “Abraham wana porog nimi wamla,” sembamog. 22 Undo uro yabiogne seneraghi agha an el tanep nena, Abrahamdi sik senelamogneap, el saeri ul palamogneap a'eptangto wamnep komdina, ot nhonog ma'ap tangto uropti, Abrahamdi uaog. El saeri ul palamogne neneri eldi sik seneropne ningki nenero lag nembaog. 23 Tanena ni uro yabiogne neneko sembe mome toro pibek nena, “Allahri lebogne nene sembe Abrahamdi, ‘Ot sik uro lepla,’ aro elag wana palilamogpa Allahri, ‘El wana porogne,’ sembaog,” aro mome toro pibekne sunup taog. Apna Abraham sembe, “Allah elkae,” aro engero yabiog. 24 Yubu eneag agha a'un el tanep nena, nimi wanaag mo sik seneropne ina agha wana porogne lag nenep talul kom aghana, nimi saeri ul piropneag agha wana porogne lag nenep talul.

25 Ane saog uro, Rahab kel eneko samenag mog so'o Yerikho wamogti, kamna sembe nengaboap salik-malik walep tangtop kel wamog. Undo wamog aghana, Israel nimi phende abenekori, Yerikho nimi mipto kemero poa wa'irek. As Yerikho wa'irekpa, Rahab kel enekori wali kipsiogti, yepsiog andarina, wali tognoro lambarek. Yepto kipsiogne sembe Rahab kel eneko babe wana porog kel aro engero yabiog. 26 Nu el wamap nena, nimi nong nhon wamnep aghana, yame orog tanena, nimi nong eneko lebe senep komne teptopne mo wamnep. Ane saog uro nimiri Allahag sik sembanep aghana, saeri ul pin kom tanena, lebe arop komne teptopne mo wamnep.