Pamag agha lanarop yubu yae up tangkamnepne sembe ambatsiogha
3
1-2 Nangkabo,
nu nimi niri yubu maikno ogto lelamnep.
Nimi nhon ot wana walingeog wana whi urop nimi wamnepti,
eldam nong ningki yae up tangka ot ina walinge toman mo yarel dalamnep taneogna,
nimi eneko mori ogto lepso kom.
A'un el uro wamlom nena,
nun nimi niri ogto lemnepba,
tam kareptop sum eneko nu yubu amohirop nimiri ogto yubu leropne sembe nunag tam karepto paliropne ikin sirikne tanep.
Ane sembe a'un nimi maiknori,
“Yubu amoro ambatsisene,”
sembaheng kom.
3 Pamag agha lanarop yubu sembe sunumna sumbatnuahin.
Nimiri pham kuda yagto pabalamnari,
kudari si sapsiroba silomag haing kerekto kuda u o'olamnari,
usog kiliro sae sirik sip to,
sae waneng sip to nenelamnaba,
pham kuda aneko nelepto pinep.
4 Nen sunumna nhonna,
nimiri kabong nubu sirikne mag alip toman pabalamnep.
Khaori kabong ko'oro pabalamnaba,
kabong pabirop nimiri kal la'asi ologne saelbi agha,
“Kabong pilul,”
senenag nubu sirik kabong u o'olamnep.
5-6 Ane saog uro nimi yan sae ni nongag wamlangeap silimu nhon ologne mo wamla aghana,
silimuri pamag agha lambanep yubuna,
nubu nenep tangto maiptangtop yubu maikno lanaro lemnep.
Silimuri pamag agha lemnep nena,
auk pog saog uro wamla.
Auk pog ologne singkaleri,
nubu nenep tangto kal pai nubungeag harep tenep.
Nimi yan sae ni nongag wamlangeri malia uanep aghana,
silimu ane mali sirikne wamla.
Mog so'oag nimiri malia seneragto ul piropne sunsunum uro yubu leropne ina agha nimi nong ningki mali nenep tanep.
Silimuri pamag agha lanarop yubu enekona,
nimi teptobag ua urop phiari nimi wana alukto auk lolbanepne agha yubu lanaro lemnep.
Lanaro lemnep yubu enekori nimi pinepne ina walinge selep nembanepti,
aukag pinep ina yarebatsinep.
7 Nari lelamnange sunumna undo.
Lebe aroba ni tala-tala wamangne nimiri hae salero wana keyagman nenero mo'osirop.
Winangap,
paghaeap,
maghag uropneap nimiri hae salero wana keyagman nenero mo'obahinep.
8 Ot silimuri pamag agha yubu lanaro lemnepne nenekona,
nimiri wana keyagman nenep tanep kom saog wamla.
Silimuri pamag agha lanarop yubu enekoag nimi ya'ag opsineba to'opto wamlaba,
malinge nene nimiri salero o'obanep kom saog wamla.
9 Silimuri pamag agha lanarop yubu agha Nuni Allah nu Saelba Uhiropne poneko omeklamap.
Aghana silimuri pamag agha lambanep nena,
Nuni Allahri el yameap sunsunum uro sumbahiog nimiag lanarop yubuag nen yo'olamsiap.
10 Nangkabo,
nimiri pam nhonag agha Allah omektop yubuap,
nimiag yo'osirop yubuap nikag lanaropne nene mali.
Undo lero ulamseng kom.
11-12 Nimiri pamag agha lanaropne sembe sumbatsinun.
Mag lu nhon wamnaba,
sao maghap,
sek maghap mag lu nhonag siriro lambanep te?
Mag lu nhon wamnaba,
sao maghap,
sek maghap mag lu nhonag siriro lambanep kom.
Nangkabo,
ane saog uro nen sunumna nhonna,
kal ara nhon pongolamnari,
zaitun wana mauro lag tanep kom.
Ot kal ara wana agha mauro lag tanep.
Apna haing anggur meamnaba pongolamnari,
ara wana maubanep kom.
Ot anggur wana agha mauro lag tanep.
Imagne ponekori nimi wana hekahinepne sembe ambatsiogha
13 A'un nimi etne wana hekto el tangtop nimi wamlom tanena,
a'un wana hekto seneragtopne agha wana mamleba,
win-win aro walinge ul piropne toman lag nenep tangkamlulom.
14 Aghana a'undi wanaag,
“Nubunge tahaneri,
ora nimiringe naringe taho,”
aro mon sek senelamlom tanena,
a'undam nimi maibil dalamseng kom.
A'undam nimi maibil dalamlomne pere agha sik uropne sembe orolenange lepseng kom.
15 Nimiri eldamne maiptangtop tanena,
Allah Yameri senenne sunsunum uro seneragtop kom aghana,
mog so'oag nimiri seneropne sunsunum uro phiari nimi wana aluktopne agha seneragtop.
Nimiri undo seneragtop tanena,
Imagne ponekori nimi wana heksiropne agha seneragtop kom.
16 Phiari nimi wana aluktopne agha,
“Nubunge tahaneri,
ora nimiringe naringe taho,”
aro seneragtop tanena,
salik-malik uro ul piropneap,
nia mangkina malinge ul piropneap mo wamnep.
17 Aghana Imagne ponekori wana hekto seneragnepne tarelamsilne neneko sembe samenag lemnep nena,
malinge nhonne babe wamnep kom.
Apna Imagneri wana hekto seneragnepne tarelamsilne neneko nimiap nimiap ma'ap tanepneog wamla.
Imagneri senenne sunsunum uro seneragtop nimina,
wana win-wina urop,
wana maro ka'ebandi seneragtop,
yareag to'opto senehiropne agha walia uroba maikno lag nenep tangtop,
“Nimi ologne to,
nubunge to,”
semban koma wanaag agha sikne mo ul pirop.
18 Nimiap nimiap ma'asirop nimiri ma'alamsilne pere agha wana porogne lag tangto yabirop.