Yakobus 4

Allah whingag wana mombolag nenep tangtopne sembe ambatsiogha

A'un nimi mamun mal tangtopneap optangtopneap lag nembahinepne sembe seneragsut. A'un nimi mamun mal talamlomdi, ol dalamlom nena, a'undam nimiri, “Nanag taho,” senenne wanaag agha kilim weanga ulamlomne sembe a'un mamun optangtopne lag talamla. Sikne agha lemna te? 2 A'undi wanaag, “Nanag taho,” senelamlom aghana, a'undi saeag orog. “Naringe taho,” aro nimi ya'ag olamsilom aghana, a'undi salero tomnep kom. A'undi Allahag molban koma ulamlom ane sembe, a'undi saeag orog. 3 Mololamlomne babe, “Nadamne wana yeng seneropne agha topsene,” aro wana malingeag agha mololamlom ane sembe, a'unag tatsinepne saelbaneba salelamlom kom. 4 A'un Allah wail ibare agha urop nimi wamlom. A'un ekon uro wamlom te? Mog so'oag nimiri seneragto ul piropneap sae tiptangto wana yeng uro neleplamna tanena, Allahap sae tiptan koma aisa nenerop. Nimi etneri mog so'oag nimiri seneragto ul piropneap sae tiptangka nelepto ul pirop tanena, Allahap aisa nenep tangtop nimi wamla. 5 Allah Yubu mome toro pibekneag, Allahri Yame nunag ua ulamlangeri, “Naringe mo wamseng,” aro wana maikno uro senelamsil. Allah Yameri seneropne sembe mome toro pibek yubu ene, “Salik-malik uro mome toro pibek,” senelamlom te? 6 Aghana Allahri nen ma'aro wana yorolamsildi tarelamsilne poneko wamla. Allah Yubuag mome toro pibog nena,

“Metmereng arop nimiag Allahri aisa nenelamsil,

aghana wana mombolag urop nimiag wana yorolamsil,”

aro mome toro pibog.

7 Ane sembe, Allah umag nenel dalamlulom. Undo unulapmundi, phia sikini neneko wa'epto epmunba, a'un laplobi agha merero pilul. 8 “Allahap sae tiptangto wamnunam,” aro elag yamunba, el babe a'unag yalul. A'un malia urop nimiri malinge yagto sae wali nenel dalamlulom. Wana phende senelamlom nimi a'undi wanaag malinge wa'epto, “Allahringe mo wamnun,” aro nenel dalamlulom. 9 Malinge ulamlomne sembe haum alapmundi, amang pairo engelamlulom. Wana awi uro og soro ulamlomne liapmundi, wana ikin uro amang pairo engelamlulom. 10 Nu Saelba Uhiropne poneko whingag wana mombolag nenel dalapmunba, a'un kiliro paliag nembahilul.

Nimi nhondi elkae tangtop nimiag tam karepto pelengkanepne sembe ambatsiogha

11 Nangkabo, a'un mamun san tilibil dalamseng kom. A'un nimi etneri a'unkae san tiliplamlom to, a'unkaeag tam pelengelamlom to tanena, “O'ona senel dalamlulom,” aro aruksirop yubu neneko babe mombolag nenero yubu toraptangto tam kareplamlom. Aruksirop yubu nenekoap yubu toraptangto tam kareplamlom tanena, aruksirop yubu sunsunum uro ulamlom kom aghana, aruksirop yubu neneko sembe tam karebi agha mombolag nenelamlom. 12 Eldi aruksirop yubu lemnepti, tam karebanepne poneko ot nhonog wamlari, nimi yogne taulbahinepti, yogne kom nembahinep. Aghana andi mog so'oag nimi mombolag nenero tam pelengelamlam tanena, “Etne wamna,” senelamlamdi tam karepto ankaeag tam pelengkanep?

Nimiri eldamne maiptangto yubu lemnepne sembe

13 A'un maiptangtop nimiri ka'ebahut! A'undi yubu lelamlomdi, “Ambuhum to, amni to as soro kalurop as nhonag agha nhonag piberi, hengkun nhon kamna kapto tolameberi, tup nenep taukap,” alamlom. 14 Wene aro yubu lelamlom aghana, ambuhum uro yabinepne babe a'un ekon uro wamlom. A'un kamag uropne sembe seneraglamsut! A'un kamag wamnepne iba saog wamlom. Iba sesog sembe keknep aghana, ko'o olog wamleba, kom tanepneog wamla. A'un kamag uropne babe undo wamlom. 15 A'undam nimi maiptangto lemna koma a'undi yubu wali lelamnep nena, “Nu Saelba Uhiropne ponekori yeng sembaleba, nu kamag wameberi, awe ene to, awe nene to tol palamukap,” aro yubu lemnep. 16 Undo yubu lemnep aghana, wene a'undi metmereng aro a'undam nimi maibil dalamlom. Metmereng aro yubu lanarop yubu ni lelamlomne eneko malinge lero ulamlom. 17 Ane sembe nimi etneri senelamlari, “Nari walinge ene uanep,” aro el wamna aghana, walinge nene uan koma lipla tanena, nimi enekori malinge ulamla.