Ibrani
Nimiag Yesus Sembe
Tibin Nenero Wembahiogha
Allahri Elme pere agha yubu ambatsiogha
1
Samenag Allahri nunisag yaboag yubu ambarelamsiogti,
ik nhon-nhon eldi yubu silimu tiplamek nimiri a'ero-a'ero yubu lelamekne pere agha yubu ambatsiog.
2 Yubu tiplamek nimi pere agha samenag sinag yubu ambatsiog aghana,
wene wamap ko'ona Elme pere agha nunag yubu ambareamsil.
Allahri nia mangkina sumbahiogne Elme pere agha imagneap so'oagneap sumbahiogti,
Elmeri saeag nia mangkina pibog.
3 Allahri imang wareropne nenekoag agha Elmena imang wamla.
Allah Eldamne wamla saog uro Elme babe wamla.
Eldi yubu mikipne pere agha Elmeri nia mangkina salero o'olamla.
Nimiri malia uroba lubogti,
Elme poneko imag walero Nubu Wali Sirikne sae sirik sip pulingkiog.
4 Nene agha Allahri arukna imagnang malaikat paliag wamangne elap sunsunum komdi,
ot Elme agha Allahri paliag sirik nenero,
“Name,”
aro engero pibogne sunsunum uro Allah arukna imagnang paliag nembaog.
Allahri arukna imagnang malaikat Elme umag wamangne sembe
5 Samenag Allahri,
“Anna Na Name.
Na sumene andi nai tan,”
aro ambarog.a
Nen nhon yubu ambarog nena,
“Na el sembe Ili taneba,
el na sembe nari me wamlul,”
aro yubu lebogne neneko eldi arukna imagnang malaikat nhon sembe undo lebog kom.b
6 Nen nhon Allahri el yandonge poneko mog so'oag sekirogti,
pibogne sembe yubu lebog nena,
“Allahri arukna imagnang malaikat ni tanekori
el yan tamag u amupto malingkina omeklamukang,”
“Eldi malaikat phoana pho aroba nembahiog.
Eldi arukna imagnang auk pog nembahiog,”
“Nuni Allah andi Saelba Uhiro puka ulamlama aneko
ya'ag uro wamle paghabog wamlul.
Apna andi yubu sia lenneri kame saelbamlamne neneko
wana porogne agha saelba ulamsilam.
9 Sikne andi wanaag paliag nenelamlam aghana,
irikna ingisaploropne an karong.
Ane sembe andi Naiyong Allahri an wepkeogti,
zaitun wana lolterop mag usoghag pelaghi agha
wana awi uro an sae tiptangtop nimi paliag sekitkeog,”
seog.e
10 Nen mome toro palilamogti,
“Imap so'oap Saelba Ulamsilamne,
alniro sunulamlumag
mog so'o sumbanebag yangana yangaro piplum.
Apna im babe an saeri sumbalum.
11 Ot an mo ya'ag wamlulam aghana,
nimiri wangarop ag loba tanep saog uro imap so'oap kom tarukang.
12 Wangaro pelengerop ag wa'amogto pairop saog uro imap so'oap wa'amogto piplulam.
Nimiri enektop ag kwiriplamang saog uro imap so'oap andi kwiripto lumbalulam.
Ot an wamlamne a'eropne tanep komdi,
an hengkun-kunne wamlumne wamlamdi,
wamlulamne komobanep kom,”
aro mome toro pibog.f
13 Allahri Elme sembe yubu lebog nena,
“Na sae sirik sip pulamena kekman,
andi aisanang andi yan mombolag nembahinun,”
seog.g
Seogne eneko ik nhon babe el arukna imagnang malaikat nhonag undo yubu lebog kom.
14 Allahri arukna imagnang malaikat ni tanekona,
Allahri sin,
“Awe tol pululom,”
aro poglamsil yameh wamang.
Sin poghol alamsil awena,
Allahri mog so'oag nimi sembe,
“Sin taulbahineri tatsinun,”
senelamsil nimi sembe,
“Yepsukang,”
aro Allahri malaikat poglamsil.