Petrus
Ponekori Mome Toro Pibogha Phendepne
El nenerop yubu palilamap
Petrusti mome toro pibog yubu phendepne nenena, Kristusag wana paliro winil dalamek nimi sembe mome toro pibog aghana, sin tala wamek nimi sembe lag nemban koma mome toro pibog. Nu el uro wamnep nena, Yesusti wepto pogsiek nangdi ambarelamsiek yubu sembe nimi taneko el wamek. Aghana sin wamekag orolenange ambatsirop nimiri sindam nimi sembe, “Allahri yubu silimu tiptop nimi wamap,” aro yubu orolenange ambarelamsiek. Sin orolena yubu ambatsirop nimiri Yesusti wepto pogsiog nangdi ambarelamsiek yubu toraplamsiekti, “Yesus nen samoro yalul kom,” aro ambarelamsiek. Orolena ambarelamsiek yubu eneko ka'elamekti, nimi nhon-nhondi sik yubu laplobekti, “Nunag tam pelengkatsilul kom,” aro salik-malik uro malia ulamek. Undo uro yabalamogpa, Petrusti ka'ebaogti seneraglamogti, “Tebanep saog wamna aghana, anam teban komag nari haingdi ililamsinge sik uro ambatsinun,” sembaogti mome nene toro pibog. Yubu lilim mome eneag wamlange, Yudasti mome toro pibog yubu saog wamla aghana, Yudasti mome toro pibogne olog purun wamlaba, Petrusti mome nene olog we saog wamla.
Mome toro pibog yubu eneag nimiri salik-malik uro malia ulamekne sembe wenero el nenelamsiog. Sin, “Allahri yubu silimu tiptopne wamna,” aro orolena yubu ambatsirop nimi walamsiogti, Yesusti wepto pogsiog nangdi ambatsiek yubu sikne so'opto ambatsiog. Yesus sik uro samoro yanepne sembe tibin nenero ambarelamsiogti, “Yesus anam yan komag nimiri malia uroba limnepne sembe Allahri yareag senenneag agha ko'o tarelamsil,” aro ambatsiog. Ane sembe nuri ulamnepne, Yesus anam samoro yan komag, “Nuri malia uroba libeberi, Allahri seneropne salero ulamukap,” aro wembahiog.
Petrusti mome toro pibogha phendepne lomag wamlange
1:1-2 - Petrusti kipsiogha
1:3-21 - Allahri wepto yoplamsil nimiri ulamnepne sembe ambatsiogha
2:1-22 - Sengkwanektop yubu ambatsirop nimi sembe ambatsiogha
3:1-18 - Kristus nen samoro yanepne sembe ambatsiogha