Allah elmabo wenehirop nangap, kabuniap wenero ambatsiogha
5
Ane sembe a'un Allah elmabo wenehirop nang wamlom nimi a'unag ambatnuahin.
Nana Kristus seklebaogha haingdi ipsiri,
eldi amik imang wareroba lag nembatsilenge nanag babe pogto tatnelulne wamna.
Na Allah elmabo wenehiropne wamnangeri a'unag babe moloro ambatnuahin.
2 Nimiri pham domba paia ulamsilonga saog uro Allahri elmabo a'undi saeag pibog nimi wali uro paia ulamsululom.
A'unag ikinne wamloa saog uro ulamseng kom aghana,
Allahri seneropne sunsunum uro a'undi wanaag agha paia ulamsululom.
A'undi,
“Tup tahane,”
seneropne agha ulamseng kom aghana,
wana yeng uro paia ulamsululom.
3 A'undi saeag pibog nimi taneko sembe,
“Arukna nenero saelbamsisebe,”
seneropne agha ulamsiseng kom aghana,
Allah elmabori kembahisengdi,
ulamnepne sunumna sunuro nenel dalamlulom.
4 Tanena nu Paia Uhiropne Nubunge amik lag tale sum eneko kibiang towalengerop kwiria usoghag elektoba kom tanep komne a'unag talul.
5 Ane saog uro a'un kabuni wamlom nimi,
sin Allah elmabo wenehirop nang umag nenel dalamlulom.
“Metmereng arop nimiag Allahri aisa nenelamsil aghana,
wana mombolag nenep tangtop nimiag wana yorolamsil.”a
Ane sembe a'un mamun nimi pali nenel dalapmundi,
a'un ni a'ero-a'ero,
“Wana mombolag nenep tanun,”
seneropne a'unag lekneamsileba ulamlulom.
6 A'undam nimi Allah sae mikipne umag wana mombolag nenel dalapmun andarina,
eldi wali senelamle sum a'un paliag nembahilul.
7 A'un sembe o'ona senelamsil ane sembe,
a'undi wana ikin uro seneragtopne ni elag pobililamlulom.
8 Haing whi uro wali uro seneragto ulamlulom.
Phia sikini nubunge a'un aisa nenehiropne nenekona,
si yoaba singari,
“Tehinun,”
aro elamsilori,
kau alamlonge saog uro wamla.
A'un aisa nenehiropne nenekori ero yabalamlari,
“Kom nembahinun,”
aro ulamla.
9 A'undi Allahag sikne aro wana palilapmundi,
khapto sekapmunneag agha phia sikini neneko wa'epto eplulom.
A'un el uro wamlulom nena,
tala-tala mog so'oag wamang nimi a'unkabo tangtop nimi taneko babe a'un seklelamlomne saog uro wana khapto seklelamang.
10 El nimi niag wana yororo ni tarelamsilne poneko Allah wamlaba,
a'un nen olog seklelapmun tanena,
a'un o'obahilul.
A'un Kristusap ma'ap taomneag agha a'un wepsiogti,
“Nari imang wareroba ya'ag uropneag wa'ilulom,”
aro yopsiog.
Eldamne ponekori a'un mikip nenelamsileri,
wana khaplamsileri,
ikto sekililamsilul.
11 Mikipne elag wamlange ya'ag wamle paghabog wamlul.
Sikne agha lebap.
Komobanebag kipsiogha
12 Nari yubu ologha abene mome toro palilamnange Silwanusb pere agha a'unag palilamna.
El poneko sembe,
“Nungkae sikne wamla,”
aro seneraglamna.
Allahri wana nunag yorolamsilne nene,
“Sikne wamla,”
aro wana mikip nenehirop yubu ene a'unag mome toro palilamna.
Allahri wana nunag yororop yubu eneag wana khapto sekamlulom.
13 Allahri wepsiog nimi as Babelagc winip tangtop nimiri a'un kiplamsiang.
Naba name Markusti babe a'un kiplamsil.
14 A'unkabo tangtop nimi o'ona senehinneag agha a'un mamun togtog aro kibil dalamlulom.
A'un Kristusap ma'ap tangtop nimi ni sembe,
“Allahri wana aingnibahilul,”
aro a'un sembe elag molbarelamsin.
Abenda.