Allahri seneropneag nelepto ulamneba
4
Kristus nongag seklebaog ane sembe,
a'undam nimi wanaag seneragtopne babe wea ulamlulom.
Nongag seklerop nimina,
“Malia uroba laplomna,”
aro seneragtopne elag wamogpa,
a'undi babe elag nelepto seneraglamlulom.
2 Undo seneraglapmun andarina,
nen mog so'oag nimiri,
“Uahabe,”
seneropne ul palamlulom kom.
Aghana a'un amik mog so'oag urop nongag wapmunne ot Allahri seneropne agha nelepto ul palamlulom.
3 Allah ekon nimiri,
“Uahabe,”
senelamangne ik maiknoro ulamlum.
Samenag a'undi wanaag,
“Bobonge agto yaboho,”
seneropne agha nengabo kelabo salik-malik salep tangto ulamlumdi,
mag yonge along terogha nenek salehiro ulamlumdi,
Allahri teba'en senenne mema phalamlum.
4 Wene sin loba nenep tanebag salik-malik uro sarekereplamang saog uro a'undi sinag nelepto merelamlom kom.
Ane sembe sindi a'un sembe,
“Nari nimi kom,”
aro san tiliplamsiang.
5 Ot sindi ulamangne sembe tam kareptopne poneko wero wamla.
Sin nimi taneko el whingag lag taikti,
kamag urop nimiap teptop nimiap sembe tam kemero karebatsilulne ponekoag sindam nimiri tibin nembarukang.
6 Sin samenag tebaek nimiag babe Allah yubu walinge ambarelamsiek.
Ambarelamsiek andarina,
sindi nongag uropne mog so'oag nimiri ul piropne sunsunum uro tam karebatsinep aghana,
sindi yame Allahri ul pinepne sunsunum uro kamag wamnep.
7 Nia mangkina komobaneba peramag wamla.
Ane sembe a'undi,
“Allahag molbarelamsinun,”
aro wana whi uro wapmundi,
wali uro seneraglamlulom.
8 Nimi o'ona senehinne nubu sirikti,
malia uropne niknibanep.a
Ane sembe a'un mamun wanaag agha o'ona seneptangtopne whingag nenelamlulom.
9 Toro kiptangto unne sembe pam mali lemna koma a'un mamun toro kibil dalamlulom.
10 Allahri a'unag,
“Wali uro paia o'olamsukang,”
aro a'ero-a'ero wana yororo tatsiogpa,
sunsunum uro a'un mamun yebel dalamlulom.
11 Tatsiogneag agha nimi nhondi yubu lelamle tanena,
Allahri lag nenerop yubu lemnepne sunsunum uro lelamlul.
Nimi nhondi ora nimi yeplamsile tanena,
Allahri mikipne tatsilengeag agha yeplamsilul.
Eldi tatsilengeag agha lero yeplamsimun andarina,
nia mangkina uro yabinepne toman Yesus Kristus pere agha Allah sembe omektoba nubu talul.
Kibiang towalep tangtopneap mikipneap elag wamlange wamleri,
ya'ag wamle paghabog wamlul.
Sikne agha lebap.
Kristusag wana paliropne sembe sekleroba
12 Nangkabo nari wanaag wamlom nimi,
a'un mipsiropne aukti yo'obahiloa saog uro a'unag uro yabalamlange sembe,
“Nunag uro yabinep kom,”
aro lo'om seheng kom.
13 Lo'om seheng kom aghana,
Kristus seklebaogne pogto a'unag tanepne sembe wana awi senelamlulom.
Awi senelapmun andarina,
amik el sembe kibiang towalengeropne lag tale sum eneko babe a'un wana awi uro lolo'oplamlulom.
14 A'un Kristus siag kekhaekto wamlomne sembe nimiri a'un yubu loloro san tiliplamsiik tanena,
wana awi uro wamlulom.b
Awi uro wamlulom nena,
Allahri Yame imang wareropne a'unag ua ulamlange sembe awi uro wamlulom.
15 Nimi ohiropne sembe,
haogha toropne sembe,
malia uropne sembe,
keme-keme sae tolongoropne sembe nimi sunsunum uro seklebanep.
Aghana a'un wene seklelamlom nena,
malinge neneko uan koma seklero wamlulom.
16 A'un Kristen nimi wamlomne sembe seklelapmun tanena,
ali sembaheng kom.
Ot a'un Kristus siag kekhaeksiropne agha Allah paliag nenelamlulom.
17 A'un wene seklenne seklelamlom nena,
Allahri alniro eldamneri mabo kelmaboap tam karebarelamsil.
Wene nu sam alniro tam karebarelamsilne toman agha seklero wamap tanena,
Allah yubu walinge sik senerop kom nimiag amik komopto tam karebatsinep sum eneko nen ikin phelektopne pipsinepneog wamla.
18 Nimiri samenag mome toro pibog nena,
“Wana porog nimi eraruk uro wali tanep tanena,
sin Allah omektop kom nimiap,
malia urop nimiap abenekoag amik uro yabinepne sembe seneragsut,”
aro mome toro pibog.c
19 Ane sembe nimi etne Allahri seneropne sunsunum uro seklerop tanena,
seklerop nimi tanekori babe walia ulamseng.
Sin sumbahiogne poneko sikne wamla ane sembe,
walia uropneag agha sindam nimi nong ningki eldi saeag paip tangkamukang.