1 Petrus 3

Top tangtop nengaboap kelaboap sembe ambatsiogha

1-2 Ane saog uro a'un nengabori toamsiang kelabo wamlom tanena, a'una'ange yabo a'ero-a'ero kiplamsimundi, yubu ka'elamlulom. Ana'ange Allah yubu sik senerop kom nimi babe wamnep aghana, a'una'ange yabo a'ero-a'ero kiplamsimundi, yubu ka'elapmunba kemelamukang. Kemelamsiikpa a'undi malia uan koma walinge og ulapmundi, kiplamsimunne neneri a'undi yubu lemna koma a'una'ange yabo wana tomnep andarina, sik sembaukang. 3 Mog so'oag nimiri kibiang towalengelamang nena, hong sangalo yarelamangdi, emas agha sunuroba wangalamangdi, ag walinge enekel dalamang. Ot a'undina sinag nelepto, “Haingdi kembaneikti kiplamnukang,” aro ulamseng kom. 4 Aghana nimiri wanaag tognorobag wamlange Allahri whingag lag talamla. Allahri wali sirik senelamlangena, nimiri wana mamnaba, win-win aro ulamlange nene wali kemeroba kom tanep komne wamla. 5 Sunumnana, sin samenag Allahri wepsiog kelabori elag wana paliro tilamek. Sin kelabo tanekori babe sikina'ange yabo a'ero-a'ero kiplamsiekti, yubu ka'elamsiekne toman agha wali kemerop kelabo nenel dalamek. 6 Sin kelabo nhonna, Sara kel enekori ela'ange Abraham sembe, “Na saelba ulamnelne,” alamogti eldi yubu ka'elamog. A'un log kom uro wapmundi, walingeog ulapmun tanena, a'un Sara elmangkelabo taomne neneko lag nenel dalamlulom.

7 Ane saog uro a'undi kelabo toamsilom nang wamlom tanena, a'undi kelaboap nikag ua ulamdomne toman sin pesa uropne seneragto el uro kiplamsululom. Allahri a'unag kamag tatsiropne neneko sinag babe wana yororo tarelamsil. Ane sembe a'undi Allahag moloro mololapmunne angap taleag aro a'undi kelabo kipto walia ulamsululom.

Walia urop nimi seklebanepne sembe ambatsiogha

8 Nari lemnange sirikag nena, a'un nimi ni seneragna nhonog uro ma'al dalamlulom. Wana nhonog uro a'unkabo tangtop nimi o'ona senel dalamlulom. Wanaag yareag senel dalapmundi, wana marop nimi wamlulom. 9 Nimiri a'unag malia ulamsiik tanena, a'undi sinag lunuro malia ulamsiseng kom. Nimiri a'un san tiliplamsiik tanena, a'undi samoro san tilibahiseng kom. A'unna, “Nimiag walia lero ulamsululom,” aro Allahri a'un yopsiog. Ane sembe a'un san tilipto malia ulamsiik nimiag samoro walinge lero ulamsimun andarina, wali uro wamnepne a'unag tatsileba wamlulom. 10 Tam nene sembe mome toro pibogha wamlangena,

“Nimi etneri kamag uro unne walinge yeng sirikti,

‘Na amik wamnenge wali wamnun,’ senelamla tanena,

‘Malinge lemneag,’ aro togtangka

orolenange eldi pamag agha yubu lemnep komneog wamla.

11 Nimi eneko malinge laplobi agha saombaleri, ina walingeog ul palamlul.

Nimiap ma'abahinep ina elamleri, ina aneag nelebel pinepneog wamla.

12 Tam nene sembe, imap so'oap Saelba Uhiropne ponekori sin wana porog nimi haingdi kemelamsildi,

sindi elag molona mololamangne ka'elamsil.

Aghana sin malia urop nimi sembe imap so'oap Saelba Uhiropne ponekori haing sek uro kemelamsil,”

aro mome toro pibog.

13 A'undi wana yeng uro walinge ulapmun tanena, nimi nhondi a'un karongdi malia ulamsinep te? 14 Aghana a'undi wana porogneag agha ulapmunne sembe seklelapmunneag babe, wana yeng uro wamlulom. “Sin nimi tanekori log seneropne sembe ‘Yaghe,’ aro log sembaheng kom.” 15 Aghana a'undi wanaag wepmundi, “Ot Kristus mori na Saelba Uneropne wamla,” aro o'omne nenelamlulom. A'undi elag tiro nang-nangaro seneraglamlomne sembe nimiri hailamsiikpa, anamag sop-sop weapmundi, sin nimi niag samoro tibin nenero yubu ambarelamsululom. Ot yubu ambarelamsimunne toman win-win aro kiplamsimundi ambarelamsululom. 16 A'undi wanaag, “Kristusap ma'arop nimiri sikneog ulamnep,” senenne sunsunum uro ulapmun andarina, a'undi walia uropne sembe minirop yubu lebik nimiri san tilipsiropne toman agha ali talamukang. 17 A'undi walia uropne sembe nimiri a'un neplamsiikpa, seklelapmunne Allahri yeng sembale tanena, a'un seklero wali wamnep. Aghana a'undi malia uropne ya'ag mali wamnep. 18 Kristus babe ik nhonog nimiri malia uropne sembe seklero tebaog. El wana porogne aghana, wana porog kom nimi sembe tebaog andarina, a'un Allahag poa yahilul. El mog so'oag nimi nongag tebaog aghana, Allah Yameri kamag nembaog. 19 Kamag tangom agha sin yame kaupsirop nimiag Allah yubu poa ambarel pihiog. 20 Sin yame kaupsirop nimi tanekona, samenag Nuh poneko wamog liag wamekti, Allahri yubu, “Sik komne,” aro ka'elobek. Ka'elolamekpa Nuh ponekori kabong wero solingkilamogpa, Allahri wana maropneag agha lipsiog. Nimi ologha kabong lomag wa'iek nimina, ot nimi linbare wa'iek. Magti nimi opsiogneag agha wa'iek nimi taneko taluro pipsiog. 21 Ni uro yabiogne nenena, sunumna nhon a'un maghag pelengehiropne toman agha Allahri a'un babe wali nenelamsilne sembe sumbarelamsil. Sembenga nongag a'alep tanepne sembe lelamna kom aghana, a'undi Allah whingag wanaag walingeog seneragtopneag agha, “Yesus Kristus kamag taogne ponekoap ma'ap tanam,” aro salag pairopne sembe lemna. 22 Kristus kamag taogti, imag waelbaogti, Allah sae sirik sip wamla. Imagnang malaikatap, yubu sia lennangap, ni mikipnangap el umag taekpa, saelba ulamsil.