1 Petrus 2

Ane sembe ni yongeap, haing kumbahinepne niap, “Nimiri wali sembanukang,” aro lero uropneap, “Ora nimiringe naringe taho,” seneropneap, nimi san tilipsiropne niap kwiripto laploplulom. 2-3 Nu Saelba Uhiropne ponekoag mipna agha, “El poneko wana walinge wamla,” aro el taom tanena, Allah yubu nimi haing kumbahinep kom yubu ene, “Saelbahane,” senelamsut. Olog mabori, “Maum tehene,” aro elamang saog uro a'undina, “Allah yubu el tahane,” senelamlulom andarina, eldi wali nenero taulba uhiropneag nubu tangto wana whi uro wamlulom.

Kamag kirikap Allahri wepsirop nimiap sembe ambatsiogha

4 Nu Saelba Uhiropne poneko kirik kamagne wamla aghana, mog so'oag nimiri wa'epto laplobek. Wa'epto laplobek aghana, Allahri webogne poneko eldi wanaagne wamla. Elag yingkina tiptangto wamlomne toman 5 a'undam nimi babe kirik kamagne saog talomneag agha Allahri Yame ua urop ae nhon soro towalengelamsil. A'un soro towalengelamsil andarina, memnang Allah sembe palirop nang o'om nimi talapmundi, Allah wana yeng nembaneba omektoba Yesus Kristus pere agha el sembe palilamlulom. 6 Tam nene sembe Allahri yubu lebogne nimiri mome toro pibog nena,

“Kembahut! Nari ae soroba tipto solingkinep kirik

yangarop kirik o'omne nhon wepsiri,

Sion so'o tanekoag kirik mebiamna.

Nimi etneri elag sikne aro wana palilamle tanena,

ali talul kom,”

seogne mome toro pibog. 7 Ane sembe a'undi elag wana palilamlom nimi sembe el a'undi wanaagne wamla. Aghana sin elag sikne aro wana palirop kom nimi sembe,

“Ae sorop nangdi kirik nene mali aro toboghaek aghana,

kirik neneko yangan kirik o'omne yangap tao,”

aro mome toro pibog.

8 Apna,

“Nimi palamikag kirik anekoag puri tikto phukul ingkinep kirik wamla,” aro mome top taog.

Kirik enekoag puri tiknep nena, sin nimi taneko sik yubu ka'elamang kom. Ane sembe, Allahrina sinag pimnepneog wamlangena, “Puri tikto phukul ingkukang,” aro pibog.

9 Aghana a'unna, Allahri wepsiog nimi sisa wamlom. A'unna memnang Allah yubu sia lenne poneko sembe palirop nang wamlom. A'unna Allahri wepto, “Nari nimi taikti, sembenga orog nimi taukang,” aro taulbahiog nimi wamlom. Wepto taulbahiog andarina, a'un inibinneag agha yopsiogti, tibin haing omom uropneag enero poa yahiogne poneko kiptopne lag phoro yubu ambarelamsululom.

10 Samenag a'un nikag ma'ap tanep nimi wamlum kom aghana,

wene Allahri ma'asin nimi taom.

Samenag eldi yareag senehinne a'un ekon aghana,

wene a'un yareag senehinneag agha yepsiog.

Allahri awe torop nimiri ulamnepne sembe ambatsiogha

11 Nari wanaag wamlom nimi, a'un ora nimiri so'oag sekelanan saog nimi mog so'o eneag wamlom. Mog so'oag nimiri seneragto ul piropne a'undi wanaag, “Uahane,” seneropne neneri a'undam nimiag mal nenep taloa saog wamla. Ane sembe nari a'unag wenero mololamsin nena, mog so'oag nimiri seneragto ul piropne nene laploplulom. 12 Tala-tala urop nimi whingag ulapmunne ni walingeog ulamlulom. Andarina sindi a'unag minirop yubuag, “Malinge ulamang,” alamika babe, walinge ulapmunneag kembi agha Allah yale sum eneko el omeklamukang.

13 Nu Saelba Uhiropne poneko umag wamlom ane sembe, mog so'oag nimiri saelba uhirop nang sekililamsiang nimi umag nenel dalamlulom. Mog so'oag nimiri, “Yubu sia lenne paliag wamlul,” alamikne babe, 14 mog so'o saelba uhirop nang gubernur babe, Allahri sin saelba uhirop nimi sembe, “Nimiri malia uropne lunuro olamsiikti, walia urop nimi kiplamsukang,” aro wepto pogsiog. Wepto pogsiogpa, sin umag nenel dalamlulom. 15 Wene, “Ulamlulom,” aro lemnange nene Allah wana yeng nembanepne wamla. El yeng senelamlangena, a'undi walia ulapmunne neneri ekon nimiri ekon sapsabi lemnep yubu kom nembalul. 16 A'un arukna tangtop kom nimi wamlomne sunsunum uro ul palamlulom. Ot a'un arukna tangtop kom nimiri ulapmunne toman, “Malia uahane,” aro tognoro ulamseng kom. Aghana, “Allahri arukna wamneri, el sembe awe tomnun,” aro ulamlulom. 17 Nimi ni kipsinepne sunsunum uro a'ero-a'ero kiplamsululom. Kristusag wana palirop nimi a'unkabo tangtop nimi taneko o'ona senelamsululom. Allah sembe log uro omeklapmundi, a'un sembe yubu sia lenne babe kiplamlulom.

18-19 A'un arukna tangtop nimi wamlomdi, ora nimiri ae lomag awe tolamlom tanena, a'un aruksirop nimi kiplamsimundi, sindi yubu umag nenep tangkamlulom. Sin wana wali nimi win-win aro lerop nimiri yubu babe, arikal uro lerop nimiri yubu babe umag nenep tangkamlulom. Yog nimiri Allahag seneragtop nimiag sik komne uanba, wana khapna agha seklelamna tanena, seklebanep nimi enekoag Allahri wana yorobanep. Ane sembe, a'un aruksirop nimiri arikal uro aruklamsina babe, a'undi sin kipto umag nenep tangkamlulom. 20 Aghana a'undi malia ulapmunne sembe nimiri a'un lunuro opsileba, a'un wana khapto seklelapmun tanena, Allahri a'un sembe, “Walia ualam,” senep te? Undopne sembe lemna kom. Ot a'undi walia ulapmunne sembe wana khapto seklelapmun tanena, Allahri a'unag wana yororo kipsinep. 21 Anena eldi a'un, “Walinge ulamlulom,” aro yopsiogne agha a'un seklebanep. Kristus babe a'un sembe seklebaogti, a'unag sunumna nhon tatsiog andarina, a'undi elag nelepto seklero ulamnep.

22 “Eldi malia ulamog komdi,

eldi pamag agha miniropne nhon babe lebog kom.”

23 Nimiri elag san tiliplamekpa, samoro san tilibahiog kom. Seklelamogti nimi lunuro opsinepne sembe wabahiog kom aghana, eldamne tam porog uro karebanepne ponekori saeag paip tangto wamog. 24 Kalag siplobekne toman nuri malia uroba eldamne nongag taog. Sa'obaog andarina, nuri malia uropne neneko kom nembaogneag agha nu wana porog uro kamag wamnep. Meneng eldi nongag taogne toman agha a'un wali taom. 25 A'un wamlum nena, pham domba ekel ina yabiropne saog uro wamlum aghana, wene pham domba paia uropneri a'un nong ningki paia ulamsilne ponekoag samoro yaomdi wamlom.