Petrus
Ponekori Mome Toro Pibogha Selekne
Petrusti kipsiogha
1
Na Petrus wamnange,
Yesus Kristus ponekori na wepto pogneogpa,
wamnange ponekori mome toro palilamna.
A'un Allahri wepsiog nimi wamlom nimi talup tangka palamlumdi,
Pontus so'oag,
Galatia so'oag,
Kapadokia so'oag,
Asia so'oag,
Bitinia so'oag sekelanan nimi wamlom nimi sembe mome toro palilamna.
2 Nuni Allahri anamag el wamogti,
a'un wepto,
“Naringe wamikti,
walingeog taukang,”
aro eldi Yame Walingeri a'unag ulamsiog.
A'unag ulamsiog andarina,
Yesus Kristusti eneng a'unag yamoro iksiropneag agha a'undi wana seneragnaag malinge wa'epto naghi agha yag lambaleba,
a'undi Yesusti yubu ka'ero ulamlulom.
“Allahri a'unag wana yororo walia maiknoro ulamsileri,
a'un wana aingnibahinepne mauptangto yabihilul,”
senelamnari a'un sembe molbarelamsin.
“Ya'ag kamag uro wamukap,” aro nang-nangaro tilamnepne sembe ambatsiogha
3 Nu Saelba Uhiropne Yesus Kristus Ili Allah wamlange ponekori nu sembe maiknoro yareag senelamsilne sunsunum uro nen wendog mangap tangtop nimi nenelamsil.
Nu wendog mangap tangtop nimi nembamsil andarina,
Yesus Kristus teptop nimiag agha kamag taogne toman,
“Nu amik ya'ag uro kamag wamukap,”
aro tiro nang-nangalamapti,
Nuni Allah wali aro omeklamap.
4 Nu wendog mangap tangtop nimi sembe polbanep komne ya'ag uropne tatsilul.
Tatsilul nena,
sembenga kaolban komne wali uro imag pipsiogne a'unag tatsilul.
5 A'undi elag sikne aro wana palilamlomne toman agha Allahringe mikipne enekori a'un yae paiamsil andarina,
eldi wero paia ulamlari,
wali nembahineba komoptop sum lag nembatsilul.
6 Eldi amik a'un wali nembahineba sembe a'unag wana awi ulamsil.
Ot wene a'unag sesog sembe mipsiropne nhon-nhon ulamsilba,
seklebanepneog wamlom.
7 Seklebanepneog wamlom andarina,
a'undi elag sik tapto wana palilamlomne lag tanep.
A'undi elag sikne aro wana palilamlomne nenekona tup nembahinepne paliag sirikne wamla.a
Nimiri emas tomnari,
aukag taro mipnari,
malinge pinba,
nimiri kamna kaptoba paliag sirikne agha tomnep.
Ot emas aneko kom tanep aghana,
a'undi Kristusag wana palilamlomne eneko nen paliag sirikne wamla.
Yesus Kristus lag tale sum eneko elag tapto wana palilamlomne sembe a'un omekahileba,
paliag nembahileri kiplamsilul.
8-9 Elag sikne aro wana palilamlomne ponekona,
a'un wene wamlomag a'undi el haingdi imnep kom aghana,
elag o'ona senelamlom.
A'undi elag,
“Wali nembahilul,”
aro wana palilamlomne toman agha wene babe sunup tangto uro yabalamlaba,
a'undam nimi wali nembahilul.
Ane sembe wana awi senelamlomne nimiri yubuag agha lemnep komne a'un wanaag loloro ulamsilba,
awi paliag sirikne senelamlom.
10 Eldi wali nembahinep ina anekona,
samenag Allah yubu silimu tiplamek nimiri Allah Yubu kiki telekto,
“El tahabe,”
aro ulamekti,
Allahri a'unag wana yorolamsilne sembe anamag yubu ambarelamsiek.
11 Kristusti Yameri sinag ambatsiogne toman Kristus seklebanepne sembe babe,
amik kipto paliag tanepne sembe babe anam uro yabin komag sinag ambatsiog.
Sinag ambatsiog yubu eneko sindam nimiri,
“Etsum uro yabilulneap,
welaro uro yabilulneap sembe lebog,”
senelamekti yubu kiki telekto,
“El tahabe,”
aro elamek.
12 Sinag lag tangto yabiog nena,
sindam nimi sembe yeptangto ambarelamsiek kom aghana,
a'un nimi amik wamnep nimi yepto ambarelamsiek.
Ambarelamsiekne uro yabiogpa,
ambatsiek yubu eneko ora nimiri tipto yubu walinge neneko Allah Eldamne Yame Walinge imag agha pogto tatsiogne toman a'unag ambarelamsiek.
Yubu walinge lomag wamlange sembe Allah arukna malaikatti babe,
“Tam lelekto kemero el tahabe,”
senelamang.
Allahri kelmabo meri elag nelepto walingeog ulamnepne sembe ambatsiogha
13 Ane sembe wana whi uro wea ulapmundi,
wali uro seneraglamlulom.
Amik Yesus Kristus lag tangto yale sum eneko eldi a'unag wana yorolamsilne agha tatsilul.
Ane sembe a'undi wanaag elag to'opto nang-nangaro tilamlulom.
14 A'undi ulapmun nena,
sikin nong nimiri yubuag neleptop mabo saog uro wamlulom.
A'un samenag ekon uro wamlumag,
“Malia uahane,”
senelamlumneag nelepto ulamseng kom.
15 Malinge ulamseng kom aghana,
eldi a'un yopsiogne poneko sembenga orogne wamla saog uro talapmundi,
elag nelepto a'undam nimiri sembenga wa'epto naghi agha walingeog ul palamlulom.
16 Tam nene sembe nimi nhondi Allahri yubu lebogne mome toro pibog nena,
“Na sembenga orogne wamna ane sembe a'undina sembenga wa'epto naghi agha walingeog ul palamlulom,”
aro lebogne mome toro pibog.b
17 A'undi,
“Nuni,”
aro engero yoplamlomne ponekona,
tam kemero kareplamlange wamla.
Nimi whing kembahin koma nimiri a'ero-a'ero ulamangne sembe sunsunum uro tam karebarelamsil.
Ane sembe,
a'un tane sekelingirop nimi saog uro wamlomag,
“Tam kemero karebatsilul,”
aro log senenneag agha walinge ul palamlulom.
18 A'un el uro wamlom nena,
a'unisag yabori samenag ul palamekne a'unag ambatto tatsiekpa,
yepsinep komneag nelepto ul palamlum.
Aghana yepsinep komne ulamlumneag agha a'un kiliro kamna top tangto taulbahiog.
Kamna top tangto taulbahiog nena,
emas to,
perak to,
kom taneba wali-waliaba toman agha kamna top tangto taulbahiog kom.
19 Ot Kristus walingeog pham domba malinge orogne saog uro wamla.
El poneko Allahri wanaag wamla aghana,
eldi eneng eneko lanaro tebaogne pere agha a'un sembe kamna top tangto taulbahiog aro el uro wamlom.
20 Mog so'o ene anam sunuro pimna komag,
Allahri el webogti,
“Kamna top talul,”
aro el uro wamog aghana,
weneog uro yabalamog ko'oag agha a'un sembe el nenero lag nembatsiog.
21 El tebaogneag agha Allahri kamag nembaogti,
paliag nembaog.
Allahri elag undo uaog ane sembe,
el pere agha a'undi Allahag sikne aro wana palilamlomdi,
tiro nang-nangalamlom.
22 Sik yubu ene ka'elamlomdi,
ulamlomne toman agha malinge a'undam nimiag wamogne wa'epto naghi agha Allahringe nenep taom.
Andarina a'unkabo tangtop nimi wanaag agha tapto o'ona senel dalamlom.
Amik sum babe nen tipto wana awi uro o'ona senel dalamlulom.
23 A'un wendog mangap tangtop nimi taom nena,
tebanep yinac pere agha nen mangap talum kom aghana,
Allah Yubu ya'ag uro kamag urop yubu pere agha tebanep komne enekori a'un wendog mangap tangtop nimi nembahiog.
24 Ya'ag urop yubu ene sembe mome toro pairopne wamlangena,
“Nimi nong ni o'olaba saog uro wamlaba,
nimi wali kemeropne ni pongoroba es aba saog uro wamla.
O'olaba ul tanepba,
pongoroba es aba lulupna agha timbanep,
25 aghana nu Saelba Uhiropneri yubu ya'ag uro wamlul,”
aro mome toro pibog.d
Mome toro pibog yubu enena,
a'unag ambarelamsibo yubu wamla.