Petrus
Ponekori Mome Toro Pibogha Phendepne
Petrusti kipsiogha
1
Na Simon Petrus wamnange,
Yesus Kristus ponekori na wepto pogneogpa,
eldi arukna wamnari,
mome toro palilamna.
Yesus Kristusna,
eldamne Allah wamlange poneko nu taulba uhiropne wamla.
Allahri wana porogne agha ulamla ane sembe,
Kristusag wana paliro seneragnange nunag tatsiog saog uro,
a'unag babe tatsiog andarina,
a'undi babe elag wana paliro seneraglamlomne nubu sirik wamla.
A'un sembe mome nene toro palilamna.
2 A'un Allahap nu Saelba Uhiropne Yesusap nimi pali nenep tangto el uro wamlomne toman agha,
“Allahri a'unag wana yororo walia maiknoro ulamsileri,
a'un wana aingnibahinepne mauptangto yabihilul,”
senelamnari a'un sembe molbarelamsin.
Allahri nimi wepto yopsiropne sembe ambatsiogha
3 Eldamne ot wana walingeap,
imang wareropneap wamlangeag agha nu yopsiog.
Nu elap nimi pali nenep tangto el uro wamapne toman agha el memne mikipneri nunag nia mangkina tarelamsil.
Tarelamsil andarina,
nuri ul piroba Allahri senenne sunsunum uro ul palamnep.
4 El wana walingeap,
imang wareropneap wamlangeag agha eldi salag pairoba nubu sirikne nunag tatsiogpa,
nuri wanaag paliag nenero seneraglamap.
Tatsiog andarina,
nunag salag pibogne toman agha mog so'oag nimiri,
“Uahane,”
seneropneri loba nenep taneba libeberi,
el wamla saog uro nu babe elap nhon mem nimi wamukap.
5 Ni aneko nunag tatsiog ane sembe,
a'undi elag wana paliro seneraglamloma aneko sol wali uro o'olamlulom.
O'olapmundi elag wana paliropne tanekoag wana walinge poa leknebalulom.
Wana walinge neneag el tangtoba leknebalulom.
6 El tangtoba neneag iba luknuro seneragtopne leknebalulom.
Iba luknuro seneragtopne neneag wana khaptopne leknebalulom.
Wana khaptopne neneag Allahri senenne ul piroba leknebalulom.
7 Allahri senenne ul piroba neneag a'unkabo tangtop nimi o'ona senehiropne leknebalulom.
A'unkabo tangtop nimi o'ona senehiropneag nimi ni o'ona senehiropne leknebalulom.
8 Ni lemnange taneko a'unag ua ulamleri,
mauptangto yabalamle tanena,
nu Saelba Uhiropne Yesus Kristusap nimi pali nenep tangto el uro wamlomneag a'un saeri ul pin koma wamnep kom.
Apna a'unag agha wana mauro lag tangto yabinepneog wamlul.
9 Ot ni lemnange taneko nimi nhonag ua urop kom tanena,
nimi eneko weag wamnange imna koma haing urop nimi saog wamnep.
Eldi samenag malia uropne Allahri lupto kom nembaogne sembe ekon tanep.
10 Ane sembe nangkabo,
nen ma'aro wanaag agha ul palapmundi,
Allahri a'un wepto yopsiogne a'undi wanaag,
“Ya'ag uro meptalul,”
aro ul palamlulom.
Ni lemnange taneko ulapmun tanena,
a'un Allahri wepto yopsiog ina toman agha ik nhon babe eba tiniro phukul ingkilulom kom.
11 Allahri wepto yopsiog ina toman agha nari lemnange ul palapmun tanena,
nu taluro Saelba Uhiropne Yesus Kristus ponekori ya'ag uro saelba uhirobag,
“Wa'ilulom,”
aro a'un maikno uro tatto kipsilul.
12 Ane sembe a'undi wana khapto salelamlom yubu sikne el uro wamlom aghana,
nari sik yubu lemnange neneko sembe papna koma a'unag el nenero ambarelamsinun.
13 Na kalun ae wamloa saog nong eneag ua ulamnari,
ko'o eneag nari sik uro ulamnepneog senelamnangena,
“A'un ekon tamunagti,
el nenero ambarelamsinun,”
senelamna.
14 Samenag nu Saelba Uhiropne Yesus Kristus ponekori nanag lag nenero ambatneog yubu sunsunum uro,
na el uro wamnangena,
ko'o we uro wamna komag na kalun aeag wamloa saog nong ene kwiripto tebanun.a
15 Ane sembe na yeng uro wero ulamnari,
a'unag el nenero ambarelamsin andarina,
na mog so'oag agha lambanneag babe,
nari lemnange nene ekon tan koma a'un sop-sop el uro wamlulom.
Samenag Allahri yubu silimu tiptop nangdi Kristus sembe ambatsieka
16 Nu Saelba Uhiropne Yesus Kristus mikip wamlangeap,
el amik yalulneap sembe a'unag ambarelamsibo.
Ambarelamsibo yubu enekona,
wana hektop nimiri kom neptop yubuag nelepto a'unag tipto ambarelamsibo kom.
Ora nimiri yubu ambatsibo kom aghana,
mikipne el ponekoag lag nenep taogne nundam nimiri haingdi ililamuburi ambarelamsiap.
17 Elag lag nenep taog nena,
Ili Allah Mikipne Imang Wareropne ponekori Elme paliag nenero kiplamogti,
imang wareropne elag tarelamogti,
yubu lelamogne toman agha,
“Anena na Name,
nari wanaag me o'ona senelamnange wamla.
El sembe wana awi ulamnel,”
seog.b
18 Nu elap nhon mem yimag aniko wamububa,
Imagne ponekori yubu lilim lebogha aneko nundam nimi aori ka'ebabu.
19 Apna sin Allah yubu silimu tiptop nimiri yubu sik sembanepneog wamlange samenag ambarelamsiekne neneko nunag babe wamlaba,
salelapmundi wali wamlulom.
Nimi inibinag wamnaba,
tibin wareroba nhon wareptanba ililamna paghabog,
heng waelbanba haingdi imnep.
Ane saog uro sik sembanep yubu eneko salelapmun paghabog,
heng walelingkirobag sip imberea aneko a'undi wanaag walel ingkilul.
20 O'omne el talulom nena,
Allahri yubu silimu tiptop nimiri ambatsirop yubu ni mome toro pibekne neneko nimiri a'ero-a'ero seneragnangeag agha lag tangtop kom.
21 Nimiri samenag,
“Yubu mipto lepsene,”
senenneag agha ik nhon babe Allahri yubu silimu tipto ambarelamsiek kom.
Mog so'oag nimi wamek aghana,
Allah Eldamneri Yame Walingeri sin enero poa yalamsiogne toman agha eldi sinag ambatsiog yubu tipto ambarelamsiek.