Yohanes
Ponekori Mome Toro Pibogha Selekne
Nimi kamag nenehirop Yubu sembe ambatsiogha
1
Nangkabo!
Wene mome toro palilamnangena,
nia mangkina wamna komag el yum-yum samenag agha wamog Yubu nimi nongag taogne sembe mome toro palilamna.
Eldi ua ulamogha haingdi ililamuburi,
nu saeri po'oro saelbamuburi,
aori ka'elamubu.
Kamag nenehirop Yubu eneko sembe mome toro palilamna.a
2 Kamag nenehiropne poneko lag nenep taogpa,
nuri haingdi ibubu.
Nuri haingdi ibubunge neneko sembe nuri ambarelamsiap.
Nuri a'un ambarelamsiap nena,
ya'ag kamag nenehinne poneko Nuniap nhon wamogha nunag lag nenep taogne sembe ambarelamsiap.b
3-4 Nunag lag nenep taogpa,
haingdi ibuburi,
aori ka'ebabunge neneko agha nuri babe a'un ambarelamsiap.
Nunna Nuni Imagne ponekoap,
Elme Yesus Kristusap nhon sae tiptangto wamapti,
“A'un babe nunap nhon sae tiptangto wamukap,”
aro yubu ene ambarelamsiap.
“Sae tiptangto wamsebeba,
nuri wanaag yeng maikno loloro teknep tahiso,”
aro yubu ene mome toro palilamap.
Allah eldamne tibin wareropne uroba
5 Yubu lenne ponekori yubu ka'ebaburi,
a'un tipto ambarelamsiapne neneko ane.
Allah tibin warerop sirikne wamlaba,
elagna inibinne babe orog wamla.
6 Elag inibinne orog wamla ane sembe,
nu inibinneag ul pinep kom saog wamap.
“Elap sae tiptangto wamap,”
sebe aghana,
inibinneag ul palamebe tanena,
yuburi babe saeri babe sikne lerop kom nimi wamapne lag nenep taukap.
7 Aghana nun agha Allah tibinne wamla saog uro tibinag mo ul palamebe tanena,
nungkaboap sae tiptangto wamapne lag nenep taukap.
Tibinag mo ul palamebe tanena,
nuri malia uropne ni Allah Elme Yesusti enengag agha a'elelamsilne babe lag nenel dalamap.
8 Nuri lelameberi,
“Nunna malia urop kom nimi,”
sebe tanena,
nunag sikne orogti,
nundam nimi haing kunul dalamapne lag nenep taukap.
9-10 Allahri nimi ni sembe,
“Malia ulamang,”
aro yubu lebog aghana,
nimi nhondi,
“Na malia urop kom nimi,”
aro yubu lerop tanena,
Allahri lebogne sunsunum uro urop komne lerop.c
Undo lemnep tanena eldi wanaag,
“Allahna orolena yubu leropne,”
senelamloa saogne agha yubu lerop.
Ane sembe nuri lelamebeberi,
“Nu malia urop kom nimi,”
sebe tanena,
nunag agha eldi yubu nunag urop komne lag nenep taukap.
Aghana Allah el wana porogne wamlari,
“Uanun,”
aro salag lero pairopne sunsunum uro sikne ulamnepneog wamla.
Ane sembe nuri elag lag phoro ambarelameberi,
“Nari undo-undo malia uan,”
aro ambarelamebe tanena,
eldi nuri malia uropne tam wailag nembatsileri,
nuri wana porog komne a'alero lupsilul.