1 Yohanes 2

Yesusap nimiap nimi pali nenep tangtopne

Namabo, “A'undi malia ulapmunag,” aro yubu ene a'un sembe mome toro palilamna. A'undi malia ulamseng kom aghana, nimi nhondi malia uale tanena, Yesus Kristus ponekori nimi eneko tiro Allahag molbatsinep. Yesus Kristus wana porogne ponekori Nuni Allah whingag nu sembe yepto molbarelamsil. 2 Ot el tebaogne pere agha nuri malia uropne tam orog nembanep. Nundam nimi mo sembe kom aghana, mog so'oag nimi ni sembe babe, “Sindi malia uropne tam orog nembahane,” aro tebaog. 3 Elap nimi pali wamapne keknep tanep nena, eldi nunag aruksirop yubu ka'ero ulamebe tanena, “Elap tapto nimi pali wamap,” aro el tanep. 4 Ot eldi aruksirop yubu eneko nimi nhondi ingisaplorop aghana, pamag agha, “Elap nimi pali wamnamdi, el uro wamna,” alamle tanena, nimi enekori sikne salerop komdi, orolenange agha lerop. 5 Aghana nimi etneri eldi yubu sunsunum uro saelba ul palamle tanena, “Allahri o'ona senehinne nimi enekoag mauro whi tangto yabil,” sembanep. Undo nunag keknep tale tanena, elap ma'ap tangto wamapne sembe el uro wamukap. 6 Nimi etneri yubu lelamleri, “Nanap Kristusap ma'ap tangto wamnam,” aro lelamle tanena, nimi enekori ul pinep nena, Kristusti ul palamog saog uro ul palamnepneog wamla.

Yohanesti, “Kristus yubu mo tipto ambarelamsin,” seogha

7 A'un nari wanaag wamlom nimi, nari a'unag mome toro palilamnange, “Undo-undo ulamlulom,” aro aruksirop yubu wendogne agha nen ma'aro palilamna kom. Nari mome toro palilamnange eneko samenag agha Kristus ponekori ul palamogti, “Undo-undo ulamlulom,” aro arukahiog yubu sunsunum uro mome toro palilamna. Eldi, “Undo-undo ulamlulom,” aro arukahiog yubu samenag agha saelba ulamlum yubu eneko a'undi ka'elamlom. 8 A'undi ka'elamlom yubu eneko wendogne kom aghana, inibinneag tibin wareroba sikne warelamlaba, inibinne kwelekel dalamla. Sikne neneko elag warelamla saog uro a'unag babe warelamsil ane sembe, “Kristusti ul palamog saog uro ul palamlulom,” aro aruksirop yubu eneko wendog yubu ambatsilo saog yubu ambarelamsin.

9 Nimi nhondi pamag agha, “Tibin wareropneag ul palamna,” aro lerop aghana, elkae Yesusag wana paliropne hausag senerop tanena, nimi eneko wene babe inibinag ul piropne wamla. 10 Nimi etneri elkae Yesusag wana paliropne o'ona senerop tanena, nimi eneko tibin wareropneag ul piropne wamla. Elkae o'ona senero tibinneag ul pirop tanena, nimi enekoag puri tikto phukul ingkinepne elag wamnep kom. 11 Aghana elkae Yesusag wana paliropne hausag senerop nimi eneko inibinag uropti, inibinneri haing ubanba, ul piropne babe haingdi imnep komdi, ina yabinepne ekon.

12 Namabo, a'unag mome toro palilamnange,

“A'un elap si kekhaektop nimi talomne sembe a'undi malia uropne tam wailag nembatsiog,” aro mome toro palilamna.

13 Naiyabo, a'unag mome toro palilamnange,

“El yum-yum samenag agha wamogne ponekoap nimi pali wamlomdi, el uro wamlom,” aro mome toro palilamna.

A'un kabuni wamlomne, a'unag mome toro palilamnange,

“Phia yonge neneko luknubaom,” aro mome toro palilamna.

14 Nari wanaag mabo, a'unag mome toro pimnange,

“Nuni ponekoap nimi pali wamlomdi, el uro wamlom,” aro mome toro pimna.

Naiyabo, a'unag mome toro pimnange,

“El yum-yum samenag wamogne ponekoap nimi pali wamlomdi, el uro wamlom,” aro mome toro pimna.

A'un kabuni wamlomne, a'unag mome toro pimnange,

“Mikip uro wamlomba, Allah Yubu a'unag ua ulamlaba, phia yonge neneko luknubaom,” aro mome toro pimna.

15 Mog so'oag nimiri seneragto ul piropne nelepto, “Ul pehene,” aro wana yeng uro seneragseng kom. Apna mog so'oag nimiri, “Topsene,” aro sarekereplamangne neneko, a'undi wana maikno uro, “Topsene,” aro seneragseng kom. Nimi nhondi mog so'oag nimiri seneragto ul piropne nelepto, “Ul pehene,” aro wana yeng uro seneragtop tanena, Nuni Allahri o'ona senehinne nimi enekori wanaag wamnep kom. 16 Nuni Allahri o'ona senehinne nimi enekori wanaag wamnep kom nena, mog so'oag nimiri, “Ul palamseberi topsebe,” seneropne neneko Nuni Allahri seneropne agha senelamang kom. Mog so'oag nimiri, “Ul palamseberi topsebe,” senelamang nena, sindam nimi yeng nenero, “Uahane,” aro seneropneap, nimiri haingdi iliropba, “Bobonge agto yaboho,” seneropneap, nimiri saeagha uropne sembe maiptangtopneap, mog so'oag nimiri, “Ul palamseberi topsebe,” senelamang. Undo senelamang nena, Allahri seneropne agha senelamang kom aghana, sindam nimi mog so'oag nimiri seneropne agha seneragto ul palamang. 17 Mog so'oag nimiri, “Ul palamseberi topsebe,” seneropne neneko babe, mog so'oag wamlange babe, kom tanepneog wamla aghana, nimi etneri Allahri wana yeng seneropne sunsunum uro ul palamle tanena, nimi eneko ya'ag kamag wamlul.

“Kristusap aisa nenerop nimi sembe yae togtangkamlulom,” aro ambatsiogha

18 Namabo, komobanep ko'o wene wamap. A'undi yubu ka'ebalumba, “Kristusap aisa neneropne yanual,” alameka ka'ebalum. Yubu ka'ebalumne neneko sunsunum uro komobanep ko'o wene wamabag aneko babe Kristusap aisa nenerop nimi maikno lag talamong. Kristusap aisa nenerop nimi maikno lag tangto yabalamlange toman agha komobanep ko'o wene wamapne el taap. 19 Nu Yesusag wana paliro winil dalamap nimiap nikag wamong nimi etpare a'ep taongdi, nu wail ibare agha lambaong. Lambaong aghana, nunap tapto ma'ap tan koma lambaong. Nunap sinap tapto ma'ap tahabe tanena, sin lamban koma wene babe sinap nunap ma'ap tangto ya'ag wamsebe. Aghana a'eptangto lambaongne neneag agha lag taoba, “Sinap nunap tapto ma'ap tabo kom,” aro el tabo.

20 Lambaong aghana a'unna, Memne ponekori, “Naringe,” aro a'un wepto mikipne pipsiog andarina, sikne nene a'un ni el uro wamlom. 21 Nari a'unag mome toro palilamnange nenena, “A'un yubu sikne ekon uro wamlom,” aro mome toro palilamna kom. Nari mome toro palilamnange nenena, “A'un yubu sikne el uro wamlomba, yubu orolenange ambatsirop yubu eneko ni sikne agha lag tangto yabirop kom,” aro a'un sembe mome toro palilamna. 22 Orolenange ambatsirop nimina, “Etne,” aro seneragsut! Yesus el Allahri wepto poghogne Kristus wamla aghana, nimi etneri yubu sikne nene torapto, “Yesus el Allahri wepto poghogne kom,” alamla tanena, nimi enekori orolenange ambatsirop nimi wamla. Nimi etneri, “Yesus el Allahri wepto poghogne kom,” alamle tanena, Kristusap aisa neneropne wamla. Nimi enekori Nuni Allahap, Elme Yesusap ni phende yubu torapto wa'eplamsil. 23 Nimi etneri Allah Elme sembe, “Elap ma'ap tangkamnam kom,” alamle tanena, Ili Allahap babe ma'ap tanep kom. Aghana nimi etneri Allah Elme sembe, “Elap ma'ap tangkamnam,” aro lag phoro lelamla tanena, Ili Allahap babe ma'ap tangtopne wamla.

24 A'unna, Yesus yubu samenag ka'ebalumne neneko a'undi tipto saelba ul palamlulom. Samenag agha ka'ebalum yubu eneko saelba ul palapmun tanena, Allah Elmeap Ili Allahap ma'ap tangto wamlulom. 25 Elap ma'al dalamap tanena, salag pibog nena, “Ya'ag uro kamag unne tatsinun,” aro nunag salag lero pibog.

26 Nari a'un sembe mome toro palilamnange nenena, nimiri a'un haing kunuro ambarelamsiang yubu, “Sik sembaheng kom,” aro yubu nene mome toro palilamna. 27 Kristusti a'un sembe, “Naringe,” aro wepto mikipne a'unag pipsiog. Mikipne pipsiogpa, a'unag wamla andarina, nia mangkina ambarelamsil. Ni ambarelamsil ane sembe, nimiri a'un ambatsin koma babe a'un el tanep. Eldi a'unag mikipne pipsiogne neneko orolenange kom aghana, ot sikne wamla. Ane sembe ambarelamsilne sunsunum uro elap ma'ap tangto wamlulom.

Allah elmabo wamapne sembe ambatsiogha

28 Namabo, wene ambarelamsin nena, elap ma'ap tangto wapmun andarina, el nen samoro yaleri, lag tale sum eneko nu ali semban koma log kom uro el whingag wamukap. 29 “El wana porogne wamla,” aro el uro wamlom. Ane sembe nimi etneri wana porogneag agha sikne ulamla tanena, nimi eneko sembe, “El wana porogne poneko agha mangap taogne wamla,” aro el uro wamlom.