Yudas 1

Yudas

Ponekori Mome Toro Pibogne

Yudasti kipsiogha

Na Yudas, Yakobus ilipsae wamnangeri mome nene toro palilamna. Allahri wepto poghogne Kristus Yesusti arukna wamnari, mome nene palilamnangena, Nuni Allahri o'ona sembamsildi wepto yopsio nimi, Yesus Kristus ponekori paiamsil nimi sembe mome toro palilamna. 2 “Nuni Allahap, Yesus Kristusap abenekori yareagti yeplangkirikpa, a'un wana aingniro wamnepneap, a'un mamun o'ona seneptangka unneap mauptangto yabihilul,” senelamnari a'un sembe molbarelamsin.

Sengkwanektop yubu ambatsirop nimiag tam ikinne pelengkanepne sembe lebogha

(2 Petrus 2:1-17)

3 Nangkabo nari, “O'ona sembamsin nimi,” aro kiplamsin. Nari samenag seneraglamnori, “Allahri a'unap nanap wepto talulamsilne sembe mome ane toro pimnun,” senelamno. Na wana yengag agha, “Nu taulbahiropne sembe mome toro pimnun,” senelamno aghana, wenena na wanaag, “A'un wembahisene,” senelamnange nenekori weplamnelba, mome aneag agha a'un wenero ambatnuahin. Allahri nu sembe, “Namabo taukang,” aro wepsiori, eldi wepto pogholaogne Yesusag sikne aro wana palilamapne toman talulamsil. Yesus yubu sikne neneko nu elmabori saeag ya'ag uro paiamsilba, sik senelamapti, yubu sikne neneko yae paia ulamap. Nuri saeag paiamsilba, wenero ambarelamsin nena, “Yubu sikne neneko pelepto sik uro ambarelamsululom,” aro wenelamsin. 4 A'undi seneragna komag agha nimi nenne Allahri senenne sunsunum uro seneragtop kom nimi a'un nusamag yoghol ingkiong. Nu mog so'oag nimiri mali-malia uropne sembe Allahri wana nunag yorolamsilne sembe tam wailag nembanep. Aghana sin yoghol ingkiong nimi tanekori seneraglamang nena, “Mali-malia ulamebeba, Allahri mo tam wailag nembatsilul ane sembe, mali-malia ulamukap,” aro seneraglamang. Wene aro seneraglamangdi, sindi wanaag bobonge walelamsilne sembe, “Agto yaboho,” aro ulamang. Sin nimi tanekori nu Saelba Uhiropne Yesus Kristus nu sembe yubu sia lenne nhonog wamlange poneko wa'epto naghi agha ul palamang. Allahri sin undo unulamang nimiag tam ikinne pelengkahinepne sembe samenag agha Allah Yubu mome toro pairopneag mome toro pibek.

5 Ni ambatnuahinne nene a'un ni el wamlom aghana, ekon tamunag aro nen sap sarikto el nenelamsinun. Nu Saelba Uhiropne ponekori Israel nimi taluro Mesir mog so'oag agha poa lambahiog. Sin taulbahiog aghana, amik sum sin wamek nimi anabiag agha elag sikne aro wana palirop kom nimi kom nembahiog. 6 Sin nimi taneko kom nembahiogne saog uro, Allah arukna imagnang malaikat pogtopne babe luknubahiog. Allahri samenag ni arukna malaikat sumbahiogti, “Saelbamlulom,” aro sindi saeag awe pipsiog. Sindi saeag awe pipsiog aghana, sin anabiag agha Allah arukna imagnang malaikat pogtop nena, phia uro ulamekti, sindi ua urobag laploa piekne sembe Allahri sin luknubahiog. Luknubahiogti Allahri sin loptanep kom haing agha ya'ag kauplopsiogti, inibin sogmondo arobag pipsiogpa wamang. Sin wamangag aneko sin sae haing kaupto paiamsil paghabog wamikpa, “Ni tam porog uro karebanun,” aro yalamle sum eneko sinag tam ikinne pelengkatsilul. 7 Tam ikinne pelengkahinepne sembe sunumna nen nhon wamla. Allahri nimi sumbahiog sum eneko, “Ela'angeap elkelap nong nhon, sop nhon wamtukang,” aro kelabo nengabo sumbahiog. Wene aro sumbahiog aghana, as Sodomap Gomoraap as soro kalurop as peramag wamek nimiri Allahri senenne laplobi agha irikna philamek. Sindi ulamekne sinag bobonge walelamsiogne sembe, “Agto yaboho,” aro salik-malik uro kabuniap-kabuniap, kelaboap-kelaboap kel nenge saog nenep tangka walel dalamek. Sindi Allah yubu irikna philamekne sembe Allahri auk pog pelengero opsiogpa, nimi etneri sin opsiogne sembe el talamik tanena, “Allah yubu ingisaptop nimi sembe auk tebanep komneag ya'ag seklero wamnebag pipsilul,” aro el uro seneraglamukang.

8 Sin samenag Allah yubu semban koma, “Undo unuahane,” aro seneragto ulamek saog uro, nu nusamag yoghol ingkiong nimi taneko lenda polan uro malamangdi, mali-malia ulobi agha sindam nimi nongag sembenga kalup tangkamloa saog ulamang. Sin lenda polan uro malamangdi, haing irop nimi aghana, mog so'oag nimi Saelba Uhiropne poneko wa'epto naghi agha ulamangdi, Allahri imang wareroba tatsiog nang babe san tiliplamsiang. 9 Imagnang san tiliplamang aghana, Allah arukna imagnang malaikat sikindo nubunge Mikhael sol walinge malaikat ponekori phia sikini nubungeap yubu tam karepto lel dalamdekneag agha phia imag wamangne sembe Mikhael ponekori metmereng aro san tiliplamog kom. Allah arukna malaikat sikindo Mikhaelap phia sikini nubungeap abenekori yubu lel dalamdek nena, “Yahudi nimi nubunge Musa nong teptoba taluro tobukap,” aro ul dalamdeka sembe babe Mikhael eldamneri phia sikini nenekoag san tilibom koma tam ikinne pelengero karepto lebog kom. Mikhaeldi phia sikini san tilipto waban koma eldi lebog nena, “Nia mangkina Saelba Uhiropneri wenero wabaghelul,” seog. 10 Mikhaeldi undo lebog aghana, sin a'un nusamag yoghol ingkiong nimi tanekona, nia mangkina sindi seneragnep komne sembe san tiliplamsiang. Sin nimi tanekori ulamang nena, phamdi wanaag seneragtop komne saog uro ulamang. Seneragna koma ulamang aghana, sindi wanaag mo olog el uro wamangneag agha ulamangne neneri sindam nimi loba nenel dalamang. 11 Sin seklero wamukang. Sindi ul palamangne Kain ilipsae obogne neneko nelepto ul palamang. Sindi ulamangne, Bileam ponekori samenag Allah elmabo luknuro orolena ambatsiogne saog uro sin nimi tanekori babe, “Kamna saelbahabe,” aro wana yeng uro malia ulamang. Samenag Korah ponekori, “Allah yubu Musa pere agha ambatsionge ka'ebanun kom,” seogpa Allahri Korah elkaboap opsiog saog uro sin nimi taneko babe Allahri opsilul.

12 Sin nimi taneko a'unap ma'al dalamlomne kembi agha kikleka malinge saog wamla. A'un Yesusag wana palirop nimiri kwaneng nhon telamlomne nimi o'ona senehinneag agha kwaneng tarel dalamlom. Kwaneng tarel dalamlomneag, sindi a'unap ma'al dalamangdi, yog nimi paia uro yepsinep aghana, nimi yepsin koma ali semban koma sindam nimi agha seneraghal dalamangdi, aboap uro kwaneng telamang. Sin ua ulamang nena, toa pololong alamlaba nimiri, “Mag telul,” sembanep aghana, khaori toa pabiropba, mag telamla komne saog uro wamang. Sin nimi taneko kal agha yarengap telban kal aneko ul tangtopne saog wamangdi, kal wana maurop liag kal wana maurop komne saog uro wamangdi, teptop nimi saog wamang. 13 Mag nubu uro longorop magti nimi tehineba saog uro kula'epto yalamlari, kamola makel alamla ane saog uro sin nimi tanekori ulamangne babe kamola maglamlari, alinge ulamang. Sin nimi taneko imberea tapto nhonag ikamna koma uropne saog wamangba, sin ya'ag wamnebag inibin sogmondo arobag kolo weroba wamla.

14 Adamdi mangkahiogne lik-lik nimi likna saekne nenekoag agha Henokh likto yabiog. Henokh ponekori sin nimi tanekoag uro yabinepne sembe samenag Allah yubu silimu tipto mome toro pibog. Henokhti yubu lero pibog nena,

“Kembalulom! Nia mangkina Saelba Uhiropne ponekoap, eldi arukna imagnang malaikat sol walinge teng-tengneap yaikti,

15 nimi ni sembe, ‘Tam karebanun,’ aro yaukang.

Kulukul yaikpa mog so'oag nimiri Allahri senenne semban koma

salik-malika lero ulamang nimi ni wembahileri, tam karebalul.

Sindi Allahri senenne semban koma malia urop nimiri pamag agha arikal uro elag san tilipto lerop yubu

nimiri whingag lag nembaleri, tam karebalul,”

aro Henokhti undo uro yabinepne sembe yubu lero pibog. 16 Nimi tanekori sop-sop paksua yabiro warop yubu lelamangdi, nimi orange sembe mali alamsiang. Sin ua ulamang nena, sindi wanari, “Uahabe,” senenneag agha yongeap malingeap ul palamang. Nimi tanekori sindi yubu maiptangtopne agha lelamangdi, “Tup tananne nunag tatsiseng,” aro nimi orangeag emem arop yubu agha nimiri wana toro lelamang.

“Wana khapto wapmundi, undo-undo ulamlulom,” aro wembahiogha

17 Aghana nangkabo, nari o'ona sembamsin nimi, a'un el uro wamlulom. Nu Saelba Uhiropne Yesus Kristusti wepto pogsiog nangdi amik uro yabinepne sembe ambatsiek yubu ekon taheng kom. 18 Sindi a'un samenag ambarelamsiekti, “Nu wene wamap mog so'o amik kom tanep sum peram taleba, yog nimi a'undi Yesusag sikne aro wana paliropne sembe pam kwerekto og sohirop nimi yaukang. Sin yaik nimi Allahri senenne semban koma sinba sindi wanari, ‘Uahabe,’ aro seneragtopne sunsunum uro ulamukang,” aro ambatsiek. 19 Sin nimi tanekori wene ulamangneri nimi teleklamangdi, a'un Yesusag seneragtop nimi wana nhon wamlomne agha a'ero nenelamsiang. Sin nimi tanekoag Allah Yame wamsil kom aghana, seneragna koma sindi wanaag mo wamlange agha ulamang. 20 Aghana nangkabo, nari o'ona sembamsin nimi, a'un mamun yeptangto Allahri wepto pogholaogne ponekoag sikne aro wana palilapmunne toman agha elag pongkapmundi sekamlulom. A'undi Allahag molona mololapmundi, Allah Eldamne Yame Walingeri yubu a'undi wanaag piplenge sunsunum uro elag mololamlulom. 21 Allahri o'ona senelamsilneag meptangto wapmundi, yae paip tangkamlulom. A'undi nang-nangkamlulom nena, “Nu Saelba Uhiropne Yesus Kristus ponekori nu yareag senelamsildi, nu elap nhon ya'ag kamag uro wamnebag pabahilul,” aro nang-nangaro wamlulom.

22 Ora nimi wana phende tangom agha, “Yubu nene sik to, kom to,” aro seneragtop nimiag a'undi yareagha ulamlulom. 23 Ora nimi sembe, “Sindi malia ulamangne sembe aukti tehileag,” aro taluro toro lambi uhiro ambarelamsululom. Ora nimiri mali-malia along ulamangne sembe, “Sindi sa'a-sa'a salelamangne sindi loba nembahinep,” aro log senelamlulom. Ulamangne sembe logti, karong senelamlulom aghana, sin sembe yareag senelamsimundi ulamsululom.

Allahag moloro omeklamogha

24-25 Wene nu Allah omeklamap nena, el aghabog mikipne nu opsinebag agha taulba uhinepne poneko omeklamap. Allahri a'un yae paiamsileri, a'un eba timbanebag agha taulbahilul. Eldi wepto poghogne Yesus Kristus nu Saelba Uhiropne poneko pere agha malinge nuri wanaag wamlange kom nembahileri, nu wana yeng nenelamsilul. Undo unualeri, nu poa eldamne imang wareropne whingag nu sekitsileba, nimi nhondi babe a'unag tam pipsinep kom. Allah nu Saelba Uhiropne Yesus Kristus pere agha talulamsilne poneko omeklamap nena, el yum-yum samenag agha ot nhonog nubu wali sirikne, mikip phelektopne, nu Saelba Uhiropne wamlange poneko ya'ag uro omeklamebe paghabog omeklamukap. Sikne agha lebap.

Abenda.