Amik Uro Yabinepne Sembe
Yohanes Whingag
Lag Taogha
El nenerop yubu palilamap
Yohanes Whingag Lag Taogha yubu nene mome toro pibog sum eneko Roma nimiri tala-tala yingkiamek mog so'oag wamek nimiap mal tangtopneag agha luknuro saelbamsiek. Roma nimiri mog so'o tanekoag wamek nimi ni mikip uro saelbamsiekti, Roma nimi sembe yubu sia lenne nubunge Kaisar agha, “Nu Saelba Uhiropne wamla,” aro Roma nimiri el mema phalamlonga saog uro omeklamek. Undo omeklamekpa, Kristen nimiri Yesusag wana paliro, “Yesus nu Saelba Uhiropne wamla,” aro lag phoro lelamekne sembe Roma nimi nubunangdi, “Opsukap,” aro ulamsiek.
Roma nimiri, “Sin seklebaik,” aro ulamsiek sum eneko Allah yubu silimu tiptopne nhon si Yohanes ponekori yubu nene Yesusag wana palirop nimi sembe mome toro pibog. El mome toro pibog sum eneko Roma nimiri el weag mog so'o mag longo kanektobag toro toboghamekpa, nimi oroghag mog so'o si Patmos anekoag wamogti, yubu nene mome toro pibog. Yohanes ponekori likiptop yubuag agha, “Yesusag sikne aro wana palirop nimi wana mikip nembahineba, wana khapto wamukang,” aro eldi whingag uro yabalamloa saog uro lag taogne sembe nebatsiog. Likiptop yubuag agha ambatsiogne neneko sin samenag Allah yubu ekon nimi el tanep komne aghana, Allah yubu ka'erop nimiri el tanep yubuag agha amik uro yabinepne sembe likipto wenero ambatsiog.
Yohanes ponekori whingag lag tangto uro yabalamloa saog uro, “Imno,” alamog nena, a'ero-a'ero nebarelamsiog aghana, seneragna nikne mikip nenero ambatsiog. Kekneba nhon saog, nhon saog ambarelamsiogne toman agha seneragna nikne sap sarikto ambarelamsiog. Mome toro pibogne nene yubu kiki telekto el tangtopne toman agha seneragna nhon-nhon el tanep. Aghana seneragna o'omnena, “Allahap aisa neneroba ni wamangne amik sum Allahri nu Saelba Uhiropne Yesus Kristus pere agha ni luknubahileri, elap ma'ap tangtop nimi ni toro kipto imap so'oap wendogneag ya'ag uro paiamsilul,” aro ambatsiog. Ambatsiog yubu anekori nu wana mikip nenero wenelamsilne pere agha nuri babe, “Wana khabamnaba, walinge tipto ulamneri, amik wali wamnun,” seneropne agha nang-nangaro tiro wamnep.
Mome toro pibog yubu alnirobag Allahri Yesusag amik uro yabinepne sembe ambarogpa, Yesusti imagnang malaikat nhon Yohanesag pogholaogne toman agha ambarogne sembe Yohanesti nebatsiog. Imagne ponekori Yohanesag ambarelamogti, “Yesusag wana palirop nimi as saekpare Asia so'oag ubu paiamang asag winil dalamang nimi sembe mome a'ero-a'ero toro piplulam,” aro ambarogne sembe Yohanesti nebatsiog. Mome amikag nena, Allahap ma'ap tangtop nimiap, Allah aisa nenerop nimiap ko'o we uro mal talamlonga saog uro Yohanes whingag lag tangtopne ibogha nebatsiog. Mome komoptobag, Allah aisa neneropne nubunge phia sikini Satanas nenekoap, elap ma'ap tangtop nimiap Allahri luknubahileri, imap so'oap wendogneag Allahap ma'ap tangtop nimi ya'ag kamag uro el imang warerobag nikag wamukapne sembe Yohanesti ibogha nebatsiog.
Yohanes Whingag Lag Taogha yubu lomag wamlange
1:1-8 - Yubu alnirobag Yohanesti el nenerop yubu pibogha
1:9—3:22 - Yohanesti ibogha Asia so'oag ubu paiamek as saekpare Yesusag wana paliro winil dalamek nimi sembe mome toro pibogha
4:1—8:5 - Mome toro pairoba wa'amogtopne nhonag kekneba sae werero pairoba saekpareri mome serektopne wamogha
8:6—11:19 - Ma'i pho aroba trompet saekpare imagnang malaikatti pho alameka
12:1—13:18 - Allah aisa nenero wamekneri ulameka
14:1—16:21 - Allahri paia uhiropne babe, tam karepto pelengehiropne babe ibogha
17:1—20:15 - Allah aisa nenerop nimi oro luknubahiogha
21:1—22:5 - Allahri nia mangkina wendog nembahiogha
22:6-21 - Yubu komobanebag wana awi uro wamnepne sembe salag pairopneap, wenehirop yubuap pibogha