Yubu Tam Amohiropne
Abraham - Abraham Allahri anam yopna komag el si Abram Ibraninge wamog (Sumbaogha 14:13). Allahri samenag Abramag, “Anenge asap, ankaboap, anenge so'oap laplobi agha, nari mog so'o ambatkenenge nhonag pululam. Andi mangarobari mangkahyikne tanekori mangkahyikne maikno taukang,” aro ambarog (Sumbaogha 12:1-2). Wene aro ambarogti, amik sum babe Allahri el wendog si, “Abraham,” aro engkaogti ambarelamogti, “So'o Kanaan ane an nimi sekelananne saog uro wamlam aghana, an anisag yabo sembe so'o ane, ‘Ngai taukang,’ aro tatsineri, sin sembe Sikini Allah wamnun,” aro salag lekto ambarog (Sumbaogha 17:3-8). Ambarog yubu ane sik uro yabiogpa, sin maikno taekti, mog so'o anekoag wamek.
Allahri Abramap yubu nikne lero salag pibogne toman agha Allahri elag, “An pere agha nimi mog so'oag tala-tala wamikne ni sembe walingena tatsinun,” seog (Sumbaogha 12:3; 18:18; 22:18). Salag pibogne neneko mog so'oag nimi taulba uhiropne Mesias poneko amik yanepne sembe lebog (Galatia 3:8).
Agripa - Yubu sia leropne Agripa ponekona, samenag yubu sia leropne nubunge Kaisarti elag, “Palestina mog so'oag mag luag sip as wamogne saelbamsululam,” aro sekirogpa, saelbamsiogne wamog (Pogsiog Nang 25:13--26:32).
Allah Eldamne Yame Walinge - Nimi nhonog wamnep nena el nongap, yameap, wana seneragnaap wamla saog uro Allah wamlangena, Eldamne Allahap, Allah Elmeap, Allah Yame Walingeap wilindi wamang aghana, ot nhonog uro wamla (Sumbaogha 1:26). Allahri imap so'oap sumbahiog sum eneko magti mog so'o nikniamogpa, ot Allah Yameog mag alip toman lebe alamog (Sumbaogha 1:2). Yum-yum samenag agha Allahri Eldamne Yame Walinge wamogti, nia mangkina Allahri senenne sunsunum uro ulamogti, nimi mikip nenero yeplamsiog (Keluaran – Lambaeka 31:3; 35:31). Yesus anam mog so'oag mangap tan komag, Allahri Eldamne Yame Walinge nimi nhonag ya'ag uro ua urop kom aghana, ik nhon-nhon agha mikip nenelamsiog (Bilangan – A'iliroba 11:17-29; Hakim - Tam Kareptop Nang 3:10; 6:34; 14:19). Allah Yameri nimi wanaag yubu amohiropne babe el nenero ambarelamsiog (2 Tawarikh – Ukuma 24:20). Allah Yameri el amik mog so'oag nimi taluro saelba uhiropne yanepne sembe Israel nimi el nenero ambarelamsiogpa, Yesaya ponekori tipto ambarelamsiogti, “Imap so'oap Saelba Uhiropne Yame elag wamlul,” seog (Yesaya 11:2).
Amik sum Yesus mangap taogpa, mog so'oag wamogti, Allahri Eldamne Yame walinge Yesusag pelengero pibog (Matius 3:16-17; Markus 1:10-11; Lukas 3:21-22; Yohanes 1:32-34). Amik sum Yesusti nimiag yubu ambarelamsiogti, “Imap so'oap Saelba Uhiropne ponekori Yame Walinge nanag mikipne paiamnel,” seog (Yesaya 61:1-2; Lukas 4:18-19). Yesus kalag sipto obek sum peram taogpa, eldi yubu ka'ero neleptop nimiag ambarelamsiogti, “Na pin kom pagha tanena, a'un sembe tiro yebelan ahinne poneko a'unag yanep kom. Na pine taneogna, a'un sembe tiro yebelan ahinne poneko pogholanun. Ane sembe, ‘A'un wali wamlulom,’ aro na wene pinuan… Aghana el Yame Walinge sikne agha tibin uro ambarelamsinepne poneko yale tanena, a'undi sikneag nelepto palapmunne ni sembe a'un menangaro pabalamsilul. Eldi a'unag ambatsilulne eldi wanaag agha mori miptopne agha ambatsilul kom. El moringe kom aghana, eldi aori ka'eropne a'un ambarelamsileri, amik uro yabinepne agha a'un ambarelamsilul. Eldi a'un ambarelamsilul nena, naringe aba elag talengeag agha a'unag tipto ambatsilul ane sembe, eldi na paliag wamnea kiptopne lag nembatsilul,” aro ambatsiog (Yohanes 16:8, 13-14).
Yesusag sikne aro wana palirop nimi sembe Pentakosta sum eneko Allah Eldamne Yame Walinge kulukul aog (Pogsiog Nang 2:1-4). Yesusag sikne aro wana palirop nimi sembe Allah Yame Walinge sinag ya'ag uro ua ulamsildi, yeplamsil andarina, nimi tanekori Allahri senenne sunsunum uro ul palamnep (Roma 8:9). Nimi eldamneri mikipneag agha Allahri senenne sunsunum uro ul pinep kom wamla. Aghana Allah Yame Walingeri senenne nimi wanaag meptaleba, Allahri senenne sunsunum uro ul piroba pongoro wana maubanepneog wamla (Galatia 5:22-23).
Nimi nhondi Yesusag sikne aro wana palilamleba, Allahri Eldamne Yame Walinge nimi enekoag piplul. Eldi Yame Walinge nimi enekoag piple andarina, eldi nunag, “Amik ya'ag kamag uro wamlulom,” aro salag pibogne neneko sembe el nenelamsileba, “Ot sikne agha lero pibogti, uro yabilul,” aro keknep talul (Roma 8:11; 2 Korintus 1:22; Efesus 1:13-14).
Allahri Mem Ae - Allahri Mem Ae anam wamna komag, Israel nimi pai aldesag Allah omektop ae kalun ae nhon kwerekto poa pang-yang ulamek. Yubu sia lenne Daud ponekori Allahag mololamogti, “Ae nhon Yakub paia uropne Allah ua unag nhon an sembe sobanun,” aro molbaog (2 Samuel 7:1-2). Molbaogpa Allahrina, “Molbanelam aghana, andi sobalulam kom. Anme Salomori nari ae sobalul,” seog (1 Raja - Yubu Sia Lennang 6:1-38; Pogsiog Nang 7:46-47). Yubu sia leropne Salomori lelamogti, “Etneri ae soro, ‘Allah ae aneag aghabog wamlul,’ aro ae nhon sobanep? Imag babe, imag alibagne babe, to'op wamlaba, ‘Allahringe keleng teptobag tane aghabog wamlul,’ senep kom. Ane sembe, nari babe, ‘Allah ane wamlul,’ aro ae sobanep kom. Ot ae sobanunne Allah sembe mhong towalengerop ae Allah omektop ae sobanun,” seogti sobaog (2 Tawarikh - Ukuma 2:6).
Allahri Mem Ae mog so'o Israel as soro kalurop as nubunge Yerusalem anekoag nhonog wamog. Ae ane kembi agha nubu sirik ae wamog. Allahri Mem Ae lom anekoag ae lom maikno wilniro sobaekti, mem aeag tipto sorop ae babe, aramag sip imag soroba babe maikno uro sobaek. Ot Yahudi sisa nimi aghabog Allahri Mem Ae aramag wa'alamek. Yahudi sisa kom nimi Allahri Mem Ae peagmanag seka ulamek aghana, Yahudi sisa nimiri leka solingkieka Yahudi sisa kom nimi iriklamsiek. Yahudi sisa kom nimiri, “Allahri Mem Ae peramag wa'inun,” aro irikna ane philamek tanena, Yahudi nimiri ya'ag olamsiek (Pogsiog Nang 21:28).
Allahri Mem Ae lomag babe, ag nubunge ina siramag siliplengkibekne nhon wamog. Siliplengkibek ag mem ae lom wilniroba neneko, “Salik-malik urop nimi mem usa ae lomag Allah whingag wa'aikag,” aro sibek (Matius 27:51; Markus 15:38; Lukas 23:44-45). Yesus tebaog sum eneko Allahri Mem Ae lom wilnirop ag neneko tai siba serero tau sip payangkaogti, phende taogpa, Allah whingag wa'inep ina nhon nu sembe yarebatsiog (Ibrani 6:19; 9:3; 10:20).
Nimiri, “Allahag moloro omeklamukap,” aro Allahri Mem Ae aramag palamekti, wali-waliaba Allah sembe tarel palamek. Allahri Mem Ae anekoag memnang Allah sembe palirop nangdi wali-waliaba Allah omekto aukag talamek. Ibrani Nimiag Yesus sembe Tibin Nenero Wembahiogha mome toro pibog sum eneko, Allahri Mem Ae wamogpa, memnang sikini nubungeri anam lebe aroba olamogti, Allah sembe palilamog (Ibrani 13:11). Amik sum Yesusti, “Undo uro yabilul,” aro ambatsiog yubu sunsunum uro Roma nimiri Allahri Mem Ae kwerekto yaombaek (Matius 24:2; Markus 13:2; Lukas 21:6). Musari aruksirop yubu sunsunum uro memnangdi Allah sembe pimnepne ot Allahri Mem Aeag mo pimnep (Ulangan - Sariktoba 12:1-28). Ane sembe Roma nimiri Yahudi nimi talup lambahiekti, mem ae kwerekto yaombaek sum enekoag agha memnang Allah sembe palirop nangdi nen lebe aroba Allah sembe oro pimnep kom wamla.
Allahri yubu silimu tiptop nimi - Allahri yubu silimu tiptop nimi wanaag Allah Eldamne Yame Walingeri peket yubu ambarelamsilba ka'elamangdi, nimiag tipto ambarelamsiang. Nimi taneko sembe Indonesia yubuag “nabi” alamang.
Allahri Israel nimiag, “Nari aruksirop yubu ka'eamlulom!” aro ambatsiog aghana, ka'ebaek kom. Ka'ebaek komne sembe Allah eldamneri yubu silimu tiptop nang Israel nang anabiag agha weplamsiogti, “A'unkaboag pimundi, ‘A'undi mali-malia seneragto ulamlomne lipsimundi, Allah yubu ka'eamlulom,’ aro ambarelamsululom,” aro pogsiog. Pogsiog aghana, Israel nimiri Allah yubu silimu tiptop nangdi samenag ambarelamsiek yubu ka'elamek komdi, nimi nenne mali-malia ulamsiekti, nimi nenne ya'ag olamsiek (Matius 23:37; Lukas 11:47-51; 13:34; Pogsiog Nang 7:52). Israel nimiri samenag Allah yubu silimu tiptop nang ka'eban koma mali-malia ulamsiekne sembe babe, Allah Elme omnepne sembe babe, Yesusti Israel nimi nubunangag sunumna yubu nhon ambatsiog (Markus 12:1-12).
amin - Yahudi nimiri, “Amin,” aro lerop nena, “Sikne agha saekag lebap,” senenneag agha lerop.
arukna - Samenag ul palamek nena, nimi arukna tanekori kamna tomna koma yog nimiringe awe tolamek. Roma nimi nubunangdi yubu sia pibekne sunsunum uro, ora nimiri nimi arukna nene pham to, kam to nenelamsiloa saog uro sae kaupto kamna kapto torobag palilamsiekpa, “Nari awe tolamukang,” aro arukna nene kamna kapto tolamsiekti, sikini taek. Sikiniri arukna nene sembe, “Ya'ag obukap,” sembaho tanena, arukna neneko tebahoba, Roma nimi nubunangdi yubu sia pibekne sunsunum uro, nimi nhondi babe arukna neneko pelebanep kom.
Ayub - Ayub ponekona, yum-yum samenag Allahag wana palilamogti omeklamog nimi tupne nhon wamog. Phia sikini nubungeri Allah whingag Ayub sembe lolorop yubu payalamogti, “Maiknoro seklebale tanena, an Allah tipto omeklangkelul kom,” aro phia nubungeri Ayub sembe yubu lolbaog. Yubu lolbaogpa, Allahri phia sikini nubungeag samoro ambarelamogti, “Hae, andi el miplapmenba, seklebalea na sae limnelul kom,” aro ambarogpa, phia sikini nubungeri Ayub poneko mibog. Miplamogti khao yalamogti, ae kwerekto piogpa, Ayub ponekori kelmabo wilindiap, me saekpareap ni tebaek. Eldi pham teng-tengne mo'olamsiog aghana, nimiri ni haogha taluro tobek. Haogha tobekpa, Ayub nong babe sorog seklelamog (Ayub 1:1--2:10). Maiknoro seklelamog aghana, Allah sae limna koma Allah omekto wana khaplamog (Yakobus 5:11). Amik sum Allahri Ayub kembi agha yareag senelamogti, phelekto ma'aro tarogne pere eldi kelmabo wilindiap, me saekpareap nen mangap taek. Mangap taekpa, eldi pham babe nen mangaro pilili seekpa, nen tupne phelektopne taog (Ayub 42:10-17). Elag uro yabiogne sembe Allahri Yubu Nikne Samenneag mome toro pairoba nhon si Ayub wamla.
Baal - Yubu tam, “Baal,” nenekona, Kanaan nimiri yubuag, “Ngai,” aro yubu lelamek aghana, sin Kanaan nimiri phalamsiek mema sikini nhonne sembe, “Baal,” aro si engero yabiog. Israel nimi Kanaan so'o wa'iekpa, hengkun taibuka taubuka uro yabalamogpa, Israel nimi maiknori babe Allah wail ibare agha Baal nenekoag nelepto phalamek (1 Raja - Yubu Sia Lennang 19:18; Roma 11:4).
Beelzebul - Filistin nimiri mema phalamekne nhon si Beelzebul wamog. Yubu lilim Beelzebul neneko, “Pom saelba uhiropne,” aro lelamek. Aghana Yahudi nimi sembe phia sikini nubunge Satanas sembe si nhon babe, “Beelzebul,” aro engero lelamek (Matius 12:24-28; Markus 3:22; Lukas 11:15-20).
Daud elme - Sin Yahudi nimi agha Musari yubu amohirop nangdi samenag ambarelamsiekne, “Allahri, ‘Saelbamsululam,’ aro wepto pogtopne Kristus poneko Daud sisange mangap talul ane sembe, ‘Daud elme,’ aro engeropne yabalamla,” aro ambarelamsiek (Matius 22:42-45; Markus 12:34-37; Lukas 20:40-44). Ane sembe sin Yesusag, “Daud sisange mangap talumne,” alamek nimina, Allahri Yesus wepto poghol aogne sembe, “Kristus wamla,” aro seneraglamekti lebek (Matius 9:27; 12:23; 15:22; 20:30-31; 21:9; Markus 10:47-48; Lukas 18:38-39).
Epikurosti seneragtopne - Yunani nimi Epikurosti seneragtopne saelbamek nimiri seneraglamek nena, “Nundam nimi nong sembe seneraghal dalamukap. Nimiri samenag mema phalamekne orogti, sa'a-sa'a phalamukap kom. Sa'a-sa'a, ‘Nu yeng,’ sembaberi saelbaukap,” aro seneraglamek (Pogsiog Nang 17:18).
Farisi nimi - Farisi nang tanena nimi sisa kom. Sindi seneragna nhon salero ul pirop nimi kong nhon wamek. Sin Yahudi nimi sembe nubunang Farisi nimiri seneraglamek nena, “Nimi yame wamlange nimi teptopneag agha kamag tanep. Allah arukna imagnang malaikat babe wamang,” aro seneragtop nimi wamek (Pogsiog Nang 23:6-8).
Allahri Musaap, Allah yubu silimu tiptop nangap pere agha eldi aruksirop yubu Israel nimiag ambarelamsiog yubu el talamekti, yubu kiki telekto, “Sunsunum uro ulamukap,” aro ul palamek. Undo ul palamek aghana, amik sum sindi, “Nen ma'aro undo-undo ulamlulom,” aro yubu maikno babe ma'aro ambarelamsiek. Farisi nimiri sop-sop, “Undo-undo ulamlulom,” arop yubu ene saelba ul palamekti ambarelamsiekpa, yog nimiri sin Farisi nimiri ul piroba kemelamsiekti maiplamsiek.
Yesusti sin Farisi nimiag, “A'unna, ‘Wali sembanukang,’ aro lero urop nimi wamlom,” aro wenelamsiog (Matius 23:13-32). Yesusti sinag ambarelamsiogti, “Nimiri, ‘Undo-undo unualulom,’ aro ambatsiropne mikip uro saelba ulamlom aghana, Allahri aruksirop yubu irikna philamlom,” seog (Matius 15:1-12; Markus 7:6-8). Allahri aruksirop yubu irikna phiro ulamek nena, Allahri arukahiogne o'om yubu neneko, “Porog uro tam karebatsinepneap, yareag senehinneap, Allahag wana paliropneap uan koma lililamlom,” aro Yesusti sinag wenero ambatsiog (Matius 23:23).
Ibrani - Yubu lilim, “Ibrani,” neneko ik selek sum Allah Yubu mome toro pairopneag lag taog nena, Abram Ibraninge wamogne sembe nimiri mome toro pibog (Sumbaogha 14:13). Ibraninge aropne neneko sembe nimi maiknori seneraglamang nena, Eber poneri likto pirop nimi sembe lerop (Sumbaogha 11:17-26; Lukas 3:34-35). Ane sembe, Yahudi nimiap, Israel nimiap Abraham ponekori likto pirop nimi wamekne sembe sin babe, “Ibrani nimi,” aro engero yabiog (Sumbaogha 39:14-17; 40:15; 43:32; 2 Korintus 11:22; Filipi 3:5). Sindi lelamek yubu babe Ibrani yubu wamla.
Israel - Abraham Ibraninge ponekori mangarobari mangkahiek nimi Ibrani nimi wamek. Abraham ilisag Yakub wamogpa, amik sum Yakub sembe Allahri elag si nhon Israel engero pibog ane sembe, Yakub ponekori likto pirop nimi sembe Israel nimi alamsiek (Sumbaogha 32:22-32). Allahri samenag Abrahamag, “So'o Kanaan ane anisag yabo sembe tatsinun,” aro salag pibogpa, amik sum ngai taek mog so'o aneko, “Mog so'o Israel,” alamap (Sumbaogha 17:8; Matius 2:20-21). Israel elmabo aobare wamek nimina, ot Yehuda nimi sisa agha tapto Yahudi nimi wamekpa, elkabo ko'olombare nang sembe nimi sisa sunsunum uro samenag agha, “Yahudi nimi,” alamsiek kom. Aghana Allah poneko Israel paia uhiropne wamogpa, Yahudi nimiri el omeklamek saog uro Israel nimiri babe Allah omektop nimi sembe amik sum Yahudi nimi alamsiek (Lukas 1:68; Roma 2:28-29).
Kaisar - Kaisar anena nimi si kom. Ane nimi sisaag. Roma nimi sembe yubu sia leropne nubunge sembe, “Kaisar,” alamek. Kaisar samenne teban tanena, nimi nubunge nhon lunuro el si lunumna Kaisar waelbanep.
kere kon kareptop nimi - Yahudi nimi sembe nengabo kon karepnange ul palamek nena, sikin mabo mangap taekpa, ik linbare wamekpa, mabo kere sirikag kon kareplamek. Allahri Abrahamag ambarekne sunsunum uro sindi seneraglamekti, “Nu Yahudi nimiap Allahap ma'ap tangto wamap,” aro kere kon sirikag kareplamek (Sumbaogha 17:10-14). Kere sirikag kon kareplamekti, Israel nimiap Yahudi nimiap nengabo sembe, “Allahringe wamna,” senenne kekneba ya'ag taog.
Yahudi nimiri yog nimi kon kareplamsiek kom nimi sembe, “Allahap ma'ap tangto urop kom nimi,” senelamek. Yahudi sisa kom nimiap nimi pali nenep tangto ulamek kom (Pogsiog Nang 10:28; 11:3). Paulus elkae Timotius ili Yunaninge wamog ane sembe, kere kon kareptop kom nimi wamog. Yahudi nimiri, “Kon kareptop kom nimiri Allah yubu ambarelamsiika sunsunum kom,” senelamek ane sembe Paulusti, “Tam elag waelbaleag aro, kere kon karebaikpa, elap nhon ambatto poa palamsukap,” seog (Pogsiog Nang 16:3).
kerub - Allahri arukna imagnang malaikat nhon saog wamang. Imagnang malaikat kerub taneko ol yagnang Allah whingag ua urop nang wamang (Lambaeka - Keluaran 25:18-20; Ibrani 9:5). Imagnang malaikat kerub taneko Allahri Eden so'oag anekoa heng walelingkirobag sibag, “Yae ulamukang,” aro sekitsiog (Sumbaogha 3:24).
Kristen nimi - Kristus ponekoag sikne aro wana palirop nimi sembe, “Kristen,” aro engero yabalamsil. Yum-yum samenag as Antiokhia asag Yesusag wana palirop nimiri maiknoro, “Kristus,” alamekpa yog nimiri sin sembe, “Kristen,” aro engelamsiek. Wene babe Kristusag wana palirop nimi sembe, “Kristen nimi,” aro engero yabalamsil (Pogsiog Nang 11:26; 12:28; 1 Petrus 4:16).
Kristus - Kristus alamapne nimi sisa kom aghana, Allahri nimi nhonog wepto, “Mog so'oag nimi agha taulbahimendi saelbamsululam,” aro pogtopne sembe alamap. Yesus anam mangap tan komag Allahri samenag Yahudi nimiag, “Mog so'oag nimiri mali-malia uropne sembe, ‘Opsineag,’ aro na Allahri nimi nhon pogneba, el ponekori mog so'oag nimi taulbahileri saelbamsilul,” aro salag lebogne Yesus amik yalulne sembe salag pibog (Sumbaogha 49:10; Bilangan - A'iliroba 24:17-19; Sepna 2:7-9; Yesaya 42:1-4; 53:1-12). Allahri, “Pognun,” aro lebogpa, nimi ene yanepne sembe Yahudi yubuag, “Mesias,” aro engero yabiog aghana, Yunani yubuag, “Kristus,” aro engero yabiog.
kwaneng roti walerop komne telamek ko'o - Allahri Israel nimi ambatsiogne Musari mome toro palilamog nena, “Wal selekne, tanggal 14 sum eneko heng purukanebag alnilamlulom nena, Allahri Israel nimi opsin koma Mesir nimi opsiogha sembe seneraglapmundi, Allah omeklamlulom. Kwelekalea tanggal 15 sum eneko kwaneng roti walerop komne teropne alnibamunna, ik saekpare tero wapmuna, tanggal 21 sum eneko tero komoplamlulom,” aro mome toro pibog (Imamat - Memnang 23:5-6). Yahudi nimiri, “Wal selekne,” alamangneap nuri, “Wal selekne” alamapneap, nika-nika kom. Yahudi nimiri, “Wal selekne sina Nisan,” alamangba wilindip wal Maret anabi, tom wal April anabiag uro yabalamla. Kwaneng roti walerop komne telamek ko'o alnirop sum, “Pham domba me oro yobaukap,” aro ulamek sum Paskah sum alamek. El nenerop yubu Paskah sembe pibapne babe kembanep.
Mahkamah Agama - Yahudi nimi sembe nubunang winip tangtoba wamek. Sin memnang Allah sembe palirop nang sikini yaboap, Musari yubu amohirop nangap, Yahudi nimi sembe wenehirop nangap winil dalamekti, Yahudi nimi sembe tam kareplamek.
malaikat - Allahri nia mangkina sunulamsiogti, imagnang malaikat babe, “Nari senenne sunsunum uro ul palamukang,” aro sumbahiogpa, eldi arukna wamang. Yahudi nimiri samenag seneraglamek nena, “Allahri el arukna imagnang malaikat, ‘Mog so'oag nimi ni nhondi nhon, nhondi nhon paiamsululom,’ aro pogsiog,” aro seneraglamek (Matius 18:10). Allah arukna imagnang malaikat taneko mog so'oag nimi nong saog wamang kom aghana, ik nhon-nhon mog so'oag nimi nong saog nenep tangto lag tanep (Sumbaogha 19:1-22; Ibrani 1:4; 13:2). Yahudi nimi nhon-nhondi seneraglamekti, “Allah arukna malaikat nhon eldi nimi paia urop nimiap whing nhonog saog lag tanep,” senelamek (Pogsiog Nang 12:15).
memnang Allah sembe palirop nang - Memnang Allah sembe palirop nang Allah Eldamne Mem Ae nubungeag awe tolamekti, Allahap nimiap anabiag urop nang wamek. Nimiri, “Allah omekto tarel pinun,” aro ulamekti, wali-waliaba memnang saeag nenero tarel palamsiek. Tarelamsiekpa memnang Allah sembe palirop nangdi wali-waliaba Allah sembe aukag talamek. Yahudi nimiri pham domba, pham sapi, pham kambing, mem winang tarel palamsiekpa, memnang Allah sembe palirop nangdi oro aukag talamek. Yahudi nimiri tena babe tarel palamsiekpa, Allah sembe aukag talamek.
Memnang Allah sembe palirop nang tanekori awe yogne babe salelamek nena, Allah yubu ambarelamsiekti, molona babe nimi sembe Allahag molbarelamsiek. Memnang Allah sembe palirop nang sikini nubunge nhon wamogpa, memnang Allah sembe palirop nang sikini yabo babe wamekpa, memnang Allah sembe palirop nang umagnang babe wamek.
Mesias - Yesus anam yan komag Allahri samenag Yahudi nimiag, “Mog so'oag nimiri mali-malia uropne sembe, ‘Opsineag,’ aro na Allahri nimi nhon pogneba, el ponekori mog so'oag nimi taulbahileri saelbamsilul,” aro salag lebogne Yesus amik yalulne sembe salag pibog (Sumbaogha 49:10; Bilangan - A'iliroba 24:17-19; Sepna 2:7-9; Yesaya 42:1-4; 53:1-12). Allahri, “Pognun,” aro lebogpa, nimi ene yanepne sembe Yahudi yubuag, “Mesias,” aro engero yabiog aghana, Yunani yubuag Kristus aro engero yabiog (Yohanes 1:41).
mikibari uanepne - Mog so'oag nimiri uanep komne wamla aghana, nimi nhondi kekneba uan tanena, ora nimiri, “Memne mikibari el pere agha ual,” sembanep. Allahri mikibari nimi pere agha ual tanena, “Nimi enekori ambatsirop yubu neneko nimiri sik sembaukang,” aro uanep (Ibrani 2:3-4). Aghana phia yongeri mikibari nimi pere agha ual tanena, “Orolenange sik sembaukang,” aro uanep (Matius 24:24; Markus 13:22; 2 Korintus 11:14; Lag Taogha 13:14). Ane sembe Yohanes ponekori wenero ambarelamsiogti, “Mog so'o eneag nimi maiknori orolena yubu ambatto tongolamsiangdi, ‘Allah Yameri ambatneoba yubu silimu tipto ambarelamsin,’ aro orolenange ambarelamsiang aghana, mipna koma ni sik sembaheng kom. Yubu ka'elapmundi, ‘Yubu ene Allah Yameri ambarelamsil yubu lelamla to, phia yongeri ambatsirop yubu lelamla to,’ aro seneragto miplamlulom,” aro mome toro pibog (1 Yohanes 4:1).
Musa - Musa pone Israel nimi sembe nimi nubu sirikne wamog (Pogsiog Nang 7:20-41). El Israel nimiri likto piropne nhon Mesir so'oag mangap taog. El anam mangap tan komag Mesir nimi sembe yubu sia leropne Firaundi, “Israel nimi maikno taikagti, sikindi mabo mangap taikpa, yabirop Mag Nil maghag tobogsiro opsululom,” aro arukahiog. Wene aro arukahiog aghana, Musa mangap taogpa, ili ilinapti wal wilindi mo'obarekpa, Musa eldo'el kel enekori me aneko kau lomag tobongkibogti, Mag Nil abolag pibogti, el sembe tiro yae ulamog. Yae ulamogpa, Firaun elmangkeldi olog me eneko ibogti, yareag senenneag agha tobogti, “Nari me talul,” aro mo'obaogpa, nubu taog (Keluaran - Lambaeka 2:1-10). Nubu taogpa, Allahri el arukna imagne malaikat nhon poghogpa, kal werengkel alog saog kal nhonag auk pog tag-tag alamogne toman agha Musa ponekoag, “Nari nimi Israel nimi taneko saelbamsimendi, haing sae lopto taulbahilulam,” aro yobog (Keluaran 3:1-20; Pogsiog Nang 7:30-35). Allahri yeplamsiogpa, Musari Mesir mog so'oag agha Israel nimi ni poa lambahiog (Keluaran - Lambaeka 12:50-51; Pogsiog Nang 7:36).
Mesir so'oag agha poa lambahiogpa, pai aldesag wamek. Musa Sinai Yimag waelbaogpa, Allahri elag aruksirop yubu ambarogpa, Musari Israel nimiag tipto ambatsiog (Keluaran - Lambaeka 20:18-21; Pogsiog Nang 7:38).
Musari yubu amohirop nang - Allahri samenag Israel nimiag, “Yubu nikne lebukap,” seogti eldi aruksirop yubu Musa pere agha sinag ambatsiog. Amik sum Musari yubu amohirop nang tanekori yubu eneko yubu kiki telekto el talamekti, Israel nimiag amoro ambarelamsiek.
Musari samenag mome toro pibogne sembe babe, amik nimiri, “Undo-undo ulamlulom,” arop yubu babe, Musa yubu amohirop nang el uro wamek. El uro wamek ane sembe, Allah yubu lero winil dalamek aeag Allahri aruksirop yubu neneap, amik nimiri, “Undo-undo ulamlulom,” arop yubuap ambarelamsiek.
Samenag Musari yubu amohirop nangdi, “Allahri mog so'oag nimi taulbahileri, saelbamsilulne nhon poglul,” aro el uro wamek (Ulangan - Sariktoba 18:15). El uro wamnep aghana, sin nimi taneko maiknori Yesus sembe, “Allah Elme,” aro sik senelamek komdi, wa'epto ebek (Matius 16:21; 20:18; 27:41-43).
Paskah - Sin Yahudi nimi Mesir so'oag wamekpa, Mesir nimiri sin arikal aro aruklamsiekpa, seklero wamek. Allahri amik sum, “Israel nimi sae lopsululom,” aro Mesir nimiri mabo yandonge olamsiogti, Israel nimi taluro Mesir so'oag agha elem uro poa lambahiog. Lambaek sumag agha Israel nimiri Allah omekto, “Nu sae lopna agha taulbahiog,” aro awi uro seneragto ulamekti, wene babe pham domba oro telamang sum eneko sembe, “Paskah sum,” aro si engero yabalamla (Lambaeka - Keluaran 12:1-39).
Elem uro poa lambahiog aghana, anamag Israel nimiri ul palamek nena, kwaneng roti sunulamekpa, roti olog wamnepne nubu taleba, aukag talamekti telamek. Ot Allahri elem uro poa lambahiog ane sembe, kwaneng roti sunulamekne anam waelban koma aukag tabekti, Mesir so'oag agha lambaek. “Taulbahiog,” aro seneragtop sum Paskah sumag agha alnibaekti, Israel nimiri, “Nu elem uro Mesir so'oag agha poa lambahiog,” aro ik saekpare sani yoro telamek aghana, Allahri Israel nimi arukahiog yubu sunsunum uro kwaneng roti waleropne telamek kom. Allahri sinag arukahiog yubuna, Paskah sum peram talamogpa, Yahudi nimiri anam pham domba omna komag, “Roti waelbalul,” aro yamoroba samenne sindi ae lomag wamnepne, “Toro la'inilamlulom,” aro arukahiog. Aruklamsiogti, “Ik saekpare sop-sop ae lomag po'oro, ‘Roti waelbalul,’ aro yamoroba ni toro la'inilapmundi, saek sum eneko pham domba oro telamlulom,” aro arukahiog. Hengkun tai puka tau puka ulamogha abeneko, Paskah sum peram talamogpa, ik saekpare sop-sop ae lomag po'oro, rotiag yamoroba ni toro la'inilamek. Paskah sum talamogpa, “Allahri nu opsin koma Mesir so'oag agha taulbahiog,” aro pham domba oro telamek. El nenerop yubu kwaneng roti walerop komne telamek ko'o sembe pibapne babe kembanep.
Korintus nimiag Paulusti mome toro palilamogti, “Kristus poneko nu sembe tebaog nena, Yahudi nimiri senelamekti, ‘Allahri nu opsin koma taulbahiog,’ aro Paskah sum pham domba oro telamek saog uro Kristus poneko nu sembe pham domba saog uro tebaog,” aro mome toro pibog (1 Korintus 5:7). Wene nu Kristusag wana palirop nimi sembe, “Paskah,” aro yubu lelamap nena, “Allahri nu opsin koma talulamsil,” aro Kristus tebaogti, kamag taogne sembe seneraglamap.
Pentakosta - Yunani yubuag, “Pentakosta,” neneko a'iliroba, “Teng nhon eptopne lam tarabare,” aro lerop. Yahudi nimiri nubu sum Paskah sum eneko tangtopba, inipna teng nhon eptopne lam tarabare sum eneko si Pentakosta sum engerop. Pentakosta sum si nhon Minggu A'ilina sani yoro tero urop sum (Imamat - Memnang 23:15-21; Ulangan - Sariktoba 16:1-10). Pentakosta sum enekona, “Roti wana mauroba yo'o karepto palilamap,” aro sani yolamek. Yesusag sikne aro wana palirop nimi sembe Pentakosta sum eneko Allah Eldamne Yame Walinge kulukul aogha sembe seneraglamapti, nubu sum nenelamap (Pogsiog Nang 2:1-4).
phia yonge - Phia mog so'oag wamang nena, samenag Allahri, “Nari arukna taukang,” aro sumbahiog. Wali sumbahiog aghana, Allahri iriktop yubu sindi phiro ulamekti, Allah yubu ingisaplobekneag agha Allah aisa nembaek (Yudas 6). Allah aisa nembaek ane sembe, Allah ua urobag agha pelengkahiog (2 Petrus 2:4; Lag Taogha 12:7-9). Pelengkahiogpa sindi mog so'oag nimi sembe, “Allah yameap seneragnaap sunsunum uro sumbahiog,” aro karongdi, nimi neplamsiang. Phia sikini nubunge si Satanas aro engero yabirop (Lag Taogha 12:9-17). Amik sum sarangtop kom aukag toboglopsilul (Matius 25:41; Lag Taogha 20:7-10).
Pilatus - Nimi nubunge Pilatus poneko Yahudi nimi kom (Yohanes 18:35). Samenag Roma nimiri mog so'o Yudea wamek nimi luknubahiekti saelbamsiek. Roma nimi sembe yubu sia leropne nubunge Kaisar ponekori Pilatus Romange ponekoag, “Mog so'o Yudea saelbamlulam,” aro poghogpa, Yahudi nimi saelbamsiog (Matius 27:2; Lukas 3:1; Yohanes 19:7-16). Ane sembe Yahudi nimi sembe nubunangdi, “Yesus obukap,” aro ulamek nimi tanekori Yesus salero Pilatus whingag pabiek (Matius 27:1-2; Markus 15:1; Lukas 23:1-2; Yohanes 18:28-32).
Roma nimi - Yesus mog so'oag wamoghag Roma nimi taneko Yahudi nimiri mog so'oag wamek aghana, samenag agha mog so'o ngai nimi wamek kom. Yahudi nimi wamek mog so'o eneko Roma nimiri samenag ngai wamek nimi luknubahiekti, saelba ulamsiek. Roma nimiri saelbamsiek li enekoag, Roma nimiri peramag mog so'o ni saelbamsiek. Weag mog so'o nhon Roma nimiri saelbamsiek kom tanena, Yunani yubu lerop nimi mog so'o ane sembe ekon.
Roma nimi sikini nubunge Kaisar poneko as nubunge Roma weag wamog. Wamogti tala-tala wamek nimi mog so'o maikno saelbamogpa, mog so'o wamek nimi taneko eldi yubu ka'elamekpa, Yahudi nimi babe el umag wamek. Tam nene sembe Yahudi nimi karong senelamekti, “Mo seksebeba, nimi nubunge nuringe mo wamsori, nu Yahudi nimi saelbamsiso,” senelamek. Sin Yahudi nimiri, “Nu saelbamsiso,” senelamekne poneko sin Yahudi nimiri yubuag Mesias aropne, Yunani yubuag Kristus aropne poneko sembe nang-nangaro wamek. Undo senelamek aghana, Roma nimi sikini nubunge Kaisar ponekori, “Israel nimiri nari yubu ingisaplobikagti, yae wamlulom,” aro yin salerop nang maikno Yahudi nimi wamek mog so'oag pogto sekitsiog.
Yesus mangap taog sum eneko Yahudi nimiri Mesias ponekori ulamnepne sembe seneraglamekti, “Roma nimi yag lambahileri, el agha nuri nimi nubunge wamlul,” senelamek. Ane sembe Yesus pham keledai me alibag pulingkina as Yerusalem wa'iogpa, Yahudi nimi maiknori, “Wene el nuri nimi nubunge taleri, Roma nimi yag lambahilul,” senelamek (Matius 21:1-9; Markus 11:1-11; Lukas 19:28-38; Yohanes 12:12-15). Undo senelamek aghana, Yesusti, “Roma nimi yag lambahineba, Yahudi nimi mo sekukang,” aro Yesus samenag mog so'oag yaog kom (Yohanes 6:14-15; Pogsiog Nang 1:6-7).
“Roma nimi,” aropne as Roma nimi wamek nimi sembe mo kom. Paulusti, “Romange wamna,” seogne mog so'o sembe lebog kom. Ina phende toman agha, “Romange wamna,” aro lemnep nena, kamna tatsiropne agha babe, Romangeri likto pirop nimi mangap tangtopne agha babe nimi nhon “Romange” tanep (Pogsiog Nang 22:25-28). Roma nimi pelebahinepne yubu sia lero pibek. Nimi etneri tam wali kemero kareban koma Roma nimi nhon salik-malik uro obik tanena, Roma nimi saelba uhirop nimi nubunangdi obik nimi tanekoag tam ikinne pimnep (Pogsiog Nang 16:37-39; 22:29).
Roma nimi sembe kamna poloro torop nimi - Roma nimi sembe kamna poloro torop nimi tanekona, saelba uhirop nangdi yubu eptop nang wamek. Kamna poloro torop nangdi sin mog so'o aneko wamek nimiag, “Kamna tolamlomne agha saelba uhirop nang sembe pogto nanag palilamlulom,” aro aruklamsiek. Aruklamsiekpa payalamekpa, kamna kaptoba aneko sikini yabo saeag tipto tarelamsiek. Mog so'o aneko wamek nimiri sunsunum uro kamna payingkina tatsiek kom tanena, yin salerop nangdi nimi taneko salero haing sae kaupto kop aeag tobongkipsinep. Yubu walinge Yesus sembe mome toro pibogne Matius, si nhon Lewi poneko Roma nimi sembe kamna poloro toropne wamog (Matius 9:9-13; Markus 2:13-17; Lukas 5:27-32).
Sabat sum - Allahri samenag nia mangkina sunulamsiogti, ik no'opbare sumbahiogpa, ik saek sum tektek pabog. Tektek pabogti, “Ik saek sum eneko wali sirik sum nemban,” aro mo wepto pibog (Sumbaogha 2:3). Amik sum Israel nimi pai aldesag wamekpa, Allahri Musa pere agha aruklamsiogti, “Ik no'opbare agha awe tolamlulom aghana, saek sum eneko nari weptop sum Sabat sum wamlaba, a'undi awe tomna koma tektek papto wamlulom,” aro arukahiog (Keluaran - Lambaeka 16:23-30; 20:8-11). Israel nimiri seneraglamek nena, “Inipna samenag wamogpa, tibin amikag warebaog ane sembe, ik nhon sum heng purukanebag alnibanep,” seneraglamekti ae ik a'ililamek (Sumbaogha 1:5). Nuri lam sum alamapne, Jumat sum neneko heng purukanebag Sabat sum eneko alniro yabalamogpa, awe tomna koma tektek papto wamek. Tektek papto wamekpa, Sabtu sum heng purukanebag Sabat sum awe tomna koma tektek papto ulameka komobanep.
Saduki nimi - Saduki nang tanena nimi sisa kom. Sindi seneragna nhon salero ul pirop nimi kong nhon wamek. Sin Yahudi nimi sembe nubunang wamek aghana, Saduki nimiri seneraglamek nena, “Nimi teptopne yame orogti, nimi teptopne kamag tanep kom. Allah arukna imagnang malaikat babe orog,” aro seneragtop nimi wamek (Matius 22:23; Markus 12:18; Lukas 20:27; Pogsiog Nang 4:1-2; 23:6-8). Memnang Allah sembe palirop nang maikno Saduki nimi wamek (Pogsiog Nang 5:17).
Saelba Uhiropne - Nimi nubunge sembe lerop. Aweap, aeap, mog so'oap, phamap ngainge wamla tanena, nimi eneko sembe, “Saelba uropne,” senep. Allahri Yesus pere agha imap so'oap sumbaog ane sembe, sin phende imap so'oap ngainge wamdang (Kolose 1:15-20). Ane sembe, Yesusap Allahap abeneko sembe, “Nu Saelba Uhiropne,” aropne babe, “Imap so'oap Saelba Uropne,” aro lemnepne babe, “Nia mangkina Saelba Uhiropne,” aro lemnepne babe sunsunum wamla (Pogsiog Nang 10:36).
Salomo - Daud elme Salomo poneko Israel nimi sembe yubu sia lenne wana hektopne tupne nubu sirikne wamog (1 Raja - Yubu Sia Lennang 3:5-14; Matius 6:29; 12:42). Allahri Mem Ae anam wamna komag, Israel nimiri saeagha memnangdi Allahri mem ae kalun aeag Allah sembe palilamek. Salomo ili Daud ponekori Allahag mololamogti, “Ae nhon Yakub paia uropne Allah ua unag nhon an sembe sobanun,” aro molbaog (2 Samuel 7:1-2). Molbaog aghana Allahrina, “Anme Salomori nari ae sobalul,” seog (1 Raja - Yubu Sia Lennang 6:1-38; Pogsiog Nang 7:46-47). Wene seogpa, Salomo ponekori Allahri Mem Ae walinge nubu sirikne sobaog (2 Tawarikh - Ukuma 3:1--5:14).
Samaria nimi - Mog so'o nhon si Samaria wamog (1 Raja – Yubu Sia Lennang 16:24). Samenag Israel nimi sisa aobare nimi taneko yubu sia lenne nhonog umag wamek. Nhonog uro wamek aghana, Allah wail ibongkia laploamekne sembe amik sum pogtangto a'ep taek. Nimi sisa aobare nimi taneko a'eptangto wamek nena, nimi sisa phende Yehuda nimi sembe yubu sia lenne umag wamekpa, nimi sisa sa'obare Israel nimi sembe yubu sia lenne umag wamek (1 Raja - Yubu Sia Lennang 11:26--12:24). A'eptangto wamekpa, amik sum yog nimiri Israel nimi sisa sa'obare taneko luknuro weag mog so'oag pabahiek. Sin Israel nimi sisa pogto pabahiek komba, Israel mog so'oag wamek aghana, Israel sisa kom nimiap nengabo kelabo tol dalamekti, Samaria mog so'oag ua ulamek. Mog so'o Samaria nimina, Israel sisa nimiap, Israel sisa kom nimiap tol dalamek nimiri likto pirop nimi tanekori Musari samenag mome toro pibog yubu pogto salelamek aghana, “Allah omeklamukap,” aro yubu yogneap ma'aro salelamek (2 Raja - Yubu Sia Lennang 17:24-41). Undo wamekpa, Yesus mangap taogti, mog so'oag wamog ko'oag Yahudi nimiap, Samaria nimiap sin mamun wana yo uro karong senel dalamek (Lukas 9:52-54). Yahudi nimi maiknori, “Kwaneng mag teroba Samaria nimiringe nari pamag pimnun kom,” alamek. Kwaneng yangaro pairoba babe, mag ma'i babe, Samaria nimiri kwaneng mag pairoba abenekoag agha samenag terop tanena, Yahudi nimi maiknori, “Nari tenep kwanengap maghap sikindingeag pimnep kom,” senelamek (Yohanes 4:9). Aghana Yesusti Samaria nimi loba sembahin koma, nimiri wanaag senenne paliag nenero Samaria nimi sembe wali aro lebog (Lukas 10:33-37).
Satanas - Ibrani yubuag, “Satanas,” aropne Ibrani yubuag, “Aisa nenep tangtopne,” aro lebekne neneko phia sikini nubunge sembe si engero yabiogpa, Yunani yubuag babe yubu lilim nikne neneko phia sikini nubunge sembe lebek. Phia maikno mog so'oag wamang aghana, sikini nubunge ot nhonog, Satanas si nhon Iblis wamla (Lag Taogha 12:7-9). Yesusti phia sikini nubunge neneko sembe yubu lelamogti, “El neneko samenag agha nimi ya'ag ohiropne wamog. Eldamne wanaag sikne orog ane sembe, sikne anekoag sekil pinep kom. Eldamne orolena leropne agha wamla ane sembe, el nenekori orolena lerop tanena, eldamneri yubu agha lelamla,” seog (Yohanes 8:44). Phia mog so'oag wamangne Allah ua urobag agha pelengkahiogpa, sindi mog so'oag nimi sembe, “Allah yameap seneragnaap sunsunum uro sumbahiog,” aro karongdi, nimi neplamsiang (Yudas 6). Nimi neplamsiangdi, mikip wamang aghana, Yesus Kristusti mikiba sunsunum uro kom (Markus 1:27). Amik Yesus nen samoro yale sum eneko phia yonge nenekoap elag sip tangtop phia tanekoap ni luknuro opsilul (Lag Taogha 20:7-10)
sembenga kaolbanne - Yahudi nimiri, “Allah whingag sembenga pabibeag,” aro maiknoa maghag a'elelamek. Sindam nimi babe maghag a'alel dalamekti, kwaneng paia ingina babe, mag lina babe maghag a'elelamek. Sa'a-sa'a, “Allah whingag talul,” senelameka babe sindina, “Allahri loba sembaleag aro ni sembenga kaolbanepne kom talul,” senelamekti maghag a'elelamek (Markus 7:3-4).
Allahri Mem Ae lomag yingkina nhon pimnep tanena, “Pham oropne toman wa'alamekne nene sembe, pham kambing oroba enengap, pham sapi yemne oroba enengap, pham sapi sarenne aukag taropne haoap nimiag yamoropne toman agha sin sembenga kaolbahiog nimi nong malinge lupto a'elbahiloa saog uro Allah whingag tanep nimi nenelamsiek” (Ibrani 9:13).
Stoari seneragtopne - Yunani nimi Stoari seneragtopne saelbamek nimiri seneraglamek nena, “Wali uro tam lelekto kemero seneraglameberi, nimiri wali uro ul palamukapne sembe el taukap. Nimiri mema phalamapne maikno wamang aghana, nu mog so'oag nimiri nundam nimi agha seneraghal dalamukapti, nuri saelba uhirop nimiri, ‘Ulamlulom,’ seikne aghabog ulamukap,” aro seneraglamek (Pogsiog Nang 17:18).
wenehirop nang - Indonesia yubuag, “Penatua,” alamang aghana, samenag Allah yubu mome tolamek nimiri Yunani yubuag agha yubu kiki ane mome tolamekti, seneragna phende wamla. Seneragna nhon, “Nong nimi,” aro lelamek. Seneragna nhon, “Nimi wenehiropne,” aro lelamek. Allah elmabo wenero paiamsinep nimi salik-malik urop nimi wamnep kom (Titus 1:6-9).
Yahudi nimi - Abraham elme Ishak mangkaogpa, Ishak elme Yakub mangkaogpa, amik sum Yakub sembe Allahri elag si nhon Israel engero pibog. Ane sembe, Abraham Ibraninge ponekori mangarobari mangkahiek nimi taneko Ibrani nimi wamek. Abraham ilisag Yakub, si nhon Israel ponekori likto pirop nimi sembe Israel nimi alamsiek. Israel elmabo aobare wamek nimina, ot Yehuda nimi sisa agha Yahudi nimi tapto wamekpa, elkabo ko'olombare nang sembe nimi sisa sunsunum uro samenag agha, “Yahudi nimi,” alamsiek kom. Aghana Allah poneko Israel nimi paia uhiropne wamogpa, Yahudi nimiri el omeklamek saog uro Israel nimiri babe Allah omektop nimi sembe amik sum Yahudi nimi alamsiek (Lukas 1:68; Roma 2:28-29).
Yahudi nimiri Allah yubu lero winirop ae - Yahudi nimiri as tala-tala wamekag nimi poloro winip tangto Allah yubu lerop ae nhon-nhon solamek. Yahudi nimi senelamek nena, “Yahudi nang sa'obare nik asag wamnep tanena, Allah yubu lero winirop ae sobanep. Aghana nengabo sa'obare wamnep kom tanena, Allah yubu lero winirop ae sobaukap kom,” senelamekne sunsunum uro ul palamek.
Yahudi nimiri Allah yubu lerop sum Sabat sum talamogpa, Yahudi nimiri Allah yubu lero winirop aeag wa'alamekti, Allah yubu ambarelamsieka ka'elamek. Ora sum babe sindi mabo Allah yubu lero winirop aeag wa'alamekti, mome kemeropne babe, mome toro pimnepne babe sembe el talamek. Allah Yubu babe usoghag tobongkia wanaag agha el uro lelamek. Yesusti babe Allah yubu lero winirop aeag wa'ina Allah yubu ambarelamsiog.
As nhonag Yahudi nengabo maikno koma Yahudi nimiri Allah yubu lero winirop ae orog tanena, Yahudi nimi wamekne tanekori mag abolag winil dalamekti, “Allah whingag sembenga pabibeag,” aro sindi yan sae a'alel dalamekti, Allahag moloro omeklamek (Pogsiog Nang 16:13).
Yesusti wepto pogsiog nang - Nimi aobare Yesusti wepto yopsiog nimina, “Sin nanap nhon wameberi, Allah yubu ambarel palamsiberi, phia nimi kulomag wamikne yag lanalamsukang,” aro wepto pogsiog. Yesusti samenag wepto pogsiog nimina, Simon Petrusap, Zebedeus elme Yakobusap, Yakobus ilipsae Yohanesap, Andreasap, Filipusap, Bartolomeusap, Matiusap, Tomasap, Alfeus elme Yakobusap, Tadeusap, Simon mo sekukap aro yin saleropne, apna Yudas Iskariotne (Matius 10:1-3; Markus 3:14-19). Nimi aobare wamek aghana, Yudas Iskariotne Yesus pan khebaogne eldamne optaogpa, el lunumna Matias aonge taog (Pogsiog Nang 1:15-26).
Sin aobare nang taneko Yesus ilipsabo taptopne kom aghana, Yesusti wepto pogsiog nang alamap. Yesus ilipsabo taptopne babe, ilipsa'elabo taptopne babe wamek (Markus 6:1-3). Yesus ilipsabo taptopne sina Yakobus, Yoses, Yudas, Simon wamek aghana, Yesus anam teban komag wamek nena, sindi Yesusti yubu ka'ero neleplamek kom (Markus 3:20-21; Yohanes 7:2-5). Ane sembe aobare nang sembe palilamapne, “Yesus ilipsabo,” alamap kom. Yesus ilipsabo a'ero, Yesusti yubu ka'ero neleptop nimi a'ero, Yesusti wepto pogsiog nang babe a'ero wamla.
Yesus anam teban komag eldi wepto pogsiog nang aobare nang wamek aghana, ik nhon sum Yesusti teng phendeap epto sa'o tarabare nang babe wepto, “Nimi naiktopne wali nenelamsimundi, yubu ambarelamsimundi, ‘Allahri mog so'oag nimi saelbamsilula a'unag peram tal,’ aro ambarelamsululom,” aro pogsiog (Lukas 10:1-24). Yesus kalag tebaogti, kamag taogpa, amik sum Paulus, si nhon Saulus poneko babe Yesusti wepto poghogne taog (Pogsiog Nang 9:15-16; 1 Korintus 15:8-11).
yubu ka'ero neleptopne - Yubu tam ane Yunani yubuag wamlange, “El tahane,” aro urop nimi sembe mome toro palilamek. Amohirop nimi maikno wamekti, yubu ambarelamsiekpa, yog nimiri sindi yubu ka'ero neleplamek. Yohanes maghag pelengehiropne ponekori yubu ka'ero neleptop nimi babe wamek (Matius 9:14; 14:12). Yesusti yubu ambatto poa tongolamsiogpa, nimi maikno sirik elag neleplamekti, yubu ka'elamek. Yesusti wepto pogsiog nang aobare wamek aghana, eldi yubu ka'ero neleptop nimi maikno wamek. Ot nimi maiknori elag neleplamek nena, “Yesusti yaghe senenne kekneba ualulne ipsebe,” aro elag neleplamekti, eldi ambatsiog yubu ka'elolamek. Nimi maiknori Yesusti yubu ka'elolamek aghana, sin Yesusti yubu ka'ebi agha wali uro seneragto sunsunum uro ul pirop nimina, Yesusti yubu ka'ero neleptop nimi taptopne wamang (Matius 28:19-20; Lukas 14:25-27; Yohanes 6:60-68; 8:31).
yubu so'opto salag paliropne - Yahudi nimiap, yog nimiapti lero ulamek nena, “Salag palilamna yubu ene mikip nembaneba, nimiri sik sembanukang,” aro mema nhonag to, memne nhonag to nimiri yubu so'opto salag paliro lelamek. Sindi mema nhonag yubu so'opto salag palilamekti, “Orolenange lelamna tanena, memneri omnelul,” aro salag yubu mikip nenero lelamek (Ibrani 6:16).
Nimiri orolenange lemnep ane sembe nimiri, “Salag paliropne mikip nembanun,” aro lerop tanena, mikip phelektopne nhonag nimiri yubu so'opto, “Orolenange sembe omnelul,” aro salag yubu mikip nenero lemnep. Aghana Allah eldamne mikip phelektopne wamlari, orolenange lemnep komne wamla ane sembe, orangeag yubu so'opto, “Orolenange sembe omnelul,” aro lemnep kom. Ane sembe eldamne si walingeag salag yubu mikip nenero palilamogti, eldi salag pibog yubu angkanep komne wamla (Ibrani 6:13-18).
Aghana nu mog so'oag nimi wene wamapne sembe Yesusti ambarelamsiogti, “Nhonag babe yubu so'opto salag pipseng kom... Ot a'undi wanaag, ‘Yo sik,’ senelapmun nena, ‘Yo sik,’ sululom. A'undi wanaag, ‘Kom,’ senelapmun nena, ‘Kom,’ sululom. Nimiri nen phelekto lerop tanena, malingeag agha lelamla,” aro ambatsiog. (Matius 5:34-37; Yakobus 5:12).