22
1-2 Allah arukna malaikat anekori,
“Mag kamag nenehirop mag yabiropne neneko kembalulam,”
aro ambatneo.
Nimiri teropba,
magti ya'ag kamag nenehirop mag whi uro yabirop mag anekona,
mag yame-yame upsererop mag agha imno.
Mag nimi ya'ag kamag nenehirop mag lu nenekona,
Allahap Pham Domba Meap abenekori nikag Saelba Uhiropne puka urobag agha lanalamlaba,
as aneko anabiag nimi yabirop ina nubunge nusam toman yabalamla.
Yabirop mag aneko abolag tara-tarana,
kal kamag nenehirop kal pongoroba imno.
Mag tara-tara pongorop kal tanekona,
wana mauroba hengkun nhonag agha li aobare mauropti,
wal nhonag agha li ik nhon-nhon maurop.
Kal anekori ma'aldi nimi mog so'o ni tala-tala urop nimi wali nenehirop.
3 As aneko lomag urop nena,
Allahri waro yo'oro kutkuruka nenenne nhon babe wamlul kom.
Allahap Pham Domba Meap abenekori nikag Saelba Uhiropne puka urobag as anekoag wamleba,
eldi arukna elmabo tanekori eldi awe toro omeklamukang.
4 Eldamne whing ililamikpa,
nimi tanekoag eldi si mome toro,
“Naringe” aro sindi haioghag paibatsilul.
5 Nu Saelba Uhiropne Allahri tibin wareamsilul ane sembe,
inibinne wamnep kom.
Eldamneri wareamsilul ane sembe nimiri,
“Whea tibin warenne wamso,”
sembanep komdi,
“Heng wamso,”
senenne babe wamnep kom.
Eldi mikip nena,
elmabori saeag pipleba,
yubu sia lerop nang saog uro saelbamsiik paghabog ya'ag saelbamsukang.
Yesus yanepne sembe pibogha
6 Allah arukna malaikat anekori nanag yubu lelamori,
“Yubu ka'ebalamne nene ot sikne agha wamla ane sembe,
sik uro yabilul sembanep.
Nia mangkina Saelba Uhiropne Allah ponekori samenag eldi Yameag agha Allah yubu silimu tiptop nangag ambarelamsiog saog uro,
wene babe eldi arukna malaikat a'unag pognel.
Eldi pognel nena,
‘Wene men phea uro yabilulne sembe ambatsilul,’
aro eldi arukna elmabo mog so'oag wamang nimiag na Allah arukna malaikat pognel,”
aro malaikat nenekori ambatneo.
7 Wene aro ambatneoba,
Yesusti lebogha nene ka'eamnoba,
“Ka'eamsut!
Ko'o we uro wamna komag na men phea yanun.
Nari yubu silimu tiptop yubu mome toro pairoba wa'amogtopne neneag wamlangena,
nimi etneri ka'ero saelbamleri,
sunsunum uro ul palamle tanena,
nimi eneko wana awi uro wamlul,”
seog.
8 Na Yohanesti ni ane aori ka'ebanori,
ni ane haingdi imno.
Nari ni ane ka'ebanori imnori,
nari Allah arukna malaikatti nanag ambatneonge neneko whingag nari yabu sanukto u amupto malingkina,
“El omekto kipnun,”
aro ulamno.
9 “Omekto kipnun,”
aro ulamno aghana,
eldi nanag lelamori,
“Undo unuaheng kom!
Ot Allah aghabog omeklamlulam!
Na babe an wamlamne saog uro Allah arukna wamnam.
Ankabo Allahri yubu silimu tiplamek nangap,
nimi ni mome neneag mome toro paliropne saelba nelepto ul pirop nimiap tanekori babe anap nanapti nika uro Allah sembe awe tolamap,”
seo.
10 Wene seori,
nen yubu lelamori,
“Ni amik uro yabinepne sembe iplamne nene ko'o we uro wamna komag agha uro yabilul.
Ane sembe,
amik uro yabinepne sembe mome toro palilamlamne nene wangaro tognoamseng kom.
11 ‘Sikne urop kom nimiri sik urop komne tipto ulamik,’
aro liloamsululom.
Allahri senenne seneragna koma malinge ulamik tanena,
liloamsimunba sindi malinge tipto ulamukang.
Aghana,
‘Wana porogne agha uanun,’
senerop nimiri tipto wana porogne agha ulamukang.
Nimi etneri,
‘Na Allah eldamneri weptop me wamna,’
senenne agha ul pirop nimiri nen tipto,
‘Allah eldamneri weptop me wamna,’
aro Allahri senenne sunsunum uro tipto ulamukang,”
aro wene seo.
12 Yesusti lebonge ka'eamnori,
tipto palilamna.
Yesusti ambarelamsio yubuna ane.
“Ka'eamsut!
Ko'o we uro wamna komag na men phea yanun.
Nimi ni sembe a'ero-a'ero tatsinepne nari saeag wamla.
‘Mog so'oag nimi niri ulamangne sunsunum uro a'ero-a'ero tatsinun,’
aro yanun.
13 ‘Nanagha tamag tomeagne wamna,’
alamna.a
Anena yum-yum samenag na mori nia mangkina alniro sumbahinge wamnari,
na mori nia mangkina komobitnepne wamna.
Nanagha nia mangkina wamna komag samen babe wamsiba,
nia mangkina kom talea babe,
ya'ag wamnun,”
seo.
14 Nimi etneri Yesusag sip taleri,
ag wangaro siliplengka urop ag a'alelamloa saog ulamle tanena,
nimi eneko wana awi uro wamlul.b
Nimi enekoag Yesusti ambarelamsileri,
“Nari as soro kalurop as anekoag nubu uro pa'arop ina siram toman agha wa'iapmundi,
nimiri kal wana teropba,
nimi ya'ag kamag nenehirop kal wana eneko telamlulom,”
aro sinag mikipne paliro ambatsilul.
15 Aghana as soro kalurop as paiag sipna,
mili lerop nimiap,
toptan koma salik-malik walep tangtop nimiap,
nimi ya'ag ohirop nimiap,
mema pharop nimiap,
sindam nimi wanaag orolenange yeng senenneag agha ora nimiag orolenange lero ul pirop nimiap,
as soro kalurop as walinge neneko paiag sip agha wamukang.
Sinna nimiri uaheng komne,
kamdi ua urop saog ulamang nimi ni as walinge eneko lomag wamnep komdi,
paiag sip agha wamukang.
16 Yesusti nen yubu lelamori,
“Na Yesusti Allah arukna malaikat a'unag pognangena,
‘Malaikat anekori nari yubu sikne lag nenero ambatsileri,
na Yesusag wana paliro winil dalamang nimi el nembahilul,’
aro malaikat aneko pogna.
Na Yesus,
Allahri samenag salag pibogne sunsunum uro Daudti nimi yana mangarobag agha mangaro yabihinge wamna.
Nanagha imberea heng walelingkirobag sip tibin sirik wareropne poneko na wamna,”
aro Yesusti wene seog.
17 Allah Yame Walinge nenekoap,
Pham Domba Meri kelabo toro anep kel enekoap abenekori lelamdang nena,
“Yae,”
aro yoplamsirang.
Nimi etneri ka'elamla tanena,
nimi enekori babe tipto nimi yoplamsileri,
“Yae,”
aro yoplamsilul.
Nimi etne mag yo wamleri,
kamag nenehirop mag neneko sembe,
“Mag tehene,”
sembale tanena,
nimi eneko yahori,
kamag nenehirop mag eneko sembe kamna tomna koma mo telamlul.
Yubu komoptopne pibogha
18 Na Yohanesti amik uro yabinepne sembe haingdi imnonge mome neneag sikne lag nenero mome toro palilamna.
Nimi etneri nari yubu ene ka'elamik tanena,
wenero ambarelamsin nena ane.
Nimi etneri amik uro yabinepne sembe mome toro paiamnange neneap ma'aro piple tanena,
mome neneag tibin nenero paiamnange sunsunum uro Allahri nimi nong opsinepne nimi enekoag pelengkalul.
19 Amik uro yabinepne sembe mome toro pimnange neneag agha nimi etneri ologha babe kom nembale tanena,
nimiri walia tomnepne sembe mome neneag tibin nenero paiamnange Allahri nimi enekoag walia tatnepne kom nembalul.
Mome neneag pimnangena,
Yesusti ambatsileri,
“As soro kalurop as nari,
‘O'omne,’
aro weptop as anekoag wa'iapmundi,
kal wanari nimi kamag nenehirop kal wana aneko telamlulom,”
aro ambatsilulne sembe mome toro pimna.
Aghana nimi etneri mome toro paiamnange neneag agha ologha babe kom nembale tanena,
nimi enekoag,
“Wa'imendi tululam,”
aro ambatnepne kom selul.
20 Yubu sikne ni ane lag nenero ambatnelne poneko eldamneri ambarelamsil nena,
“Sik uro lelamna.
Ko'o we uro wamna komag na men phea yanun,”
seo.
Sikne agha lelamla.
Nu Saelba Uhiropne Yesus,
an yalulam!
21 Nari a'un nhin sembe molbarelamsin nena,
“Yesus nu Saelba Uhiropne ponekori wana a'unag yorolamsileba,
walia ulamsilul,”
aro elag molbarelamsin.
Sikne agha lemna.
Abenda.