“As Yerusalem wendogne lag taoa imno,” seogha
21
Samen imnonge,
imap so'oap kom tangom seoba,
mag laut nubu uro longorop mag ka'eseptangom seo.
Ane sembe wene imnongena,
im wendogneap,
so'o wendogneap imno.
2 As soro kalurop as Allahri,
“O'omne,”
aro weptop as aneko imnongena,
as Yerusalem wendog as Allah imag ua urobag agha kulukul alamoa imno.
As soro kalurop as walinge nene imnongena,
kelabo agha,
“El tomnepne ponekoap haiptangka top tarukang,”
aro wali-walia towalengeropba,
holno arop saog wamo as soro kalurop as kulukul alamoa imno.
3 Undo unuamoba,
ka'elamnoag agha nimi nubunge saelba uhiropne puka urobag agha yubu nubu uro lelamoba ka'ebanongena,
“Wene Allahri ua urobag anekona nimiap nikag wamnebag wamla.
Sinna Allah elmabo wamikpa,
Allah sinap nikag wamleri,
Sikini Allahri sin pai uhiropne wamlul.
4 Eldi sindi engena ninge sembe
engelamikne eldi hail mag lupsilul.
Nimiap lebe arobaap tepna nen wamlul kom.
Wana ikin senenneap,
wana ngik-ngogha engenneap,
seklenne babe nen wamlul kom.
Nia mangkina samenag uro yabiropne
ya'ag orog tangto kom tal,”
alamoa ka'ebano.
5 Wene alamoba,
el nubunge nia mangkina saelba uhiropne puka urobag pukamonge ponekori yubu lelamori,
“Wene nia mangkina nari wendog nenelamna!”
aro wene seo.
Nanag babe tipto yubu lelamori,
“Ni yubu lelamnange tane sikne agha lelamna.
Sik uro yabilul sembanep ane sembe,
ni lelamnange nene mome toplulam,”
aro na ambatneo.
6 Wene seori yubu lelamori,
“Ni uro yabilulne sembe komopto ambatken.
‘Nanagha tamag tomeagne wamna,’
alamna.a
Anena yum-yum samenag na mori nia mangkina alniro sumbahinge wamnari,
na mori nia mangkina komobitnepne wamna.
Nimi etneri,
‘Mag yori mag tehene,’
senerop tanena,
na mori nimi eneko mag tebatsinun.
Mag tebatsinunne neneko,
kamag nenehirop mag lu la'inilamlange nenekoag agha kamna kapto koma mo tebatsinun.
7 Nimi etneri malinge luknuro khapto ulamikb tanena,
lemnange ni aneko wanaag agha elag tatneri,
na Ili Allah el paia uropne taneba,
el neneko na name talul.
8 Aghana ora nimi ik phendep sum tebaukang.
Sin log lelem aghabog senerop nimiap,
na Allahag sikne aro wana palirop kom nimiap,
malinge aghabog wanaag loloro seneragtop nimiap,
nimi ohirop nimiap,
toptan koma salik-malik walep tangtop nimiap,
mili lerop nimiap,
mema pharop nimiap,
nia ni orolena lerop nimiap,
sin taneko song mali auk singina iba ua urobag mag nubu uro longorop mag saog urop auk nubungeag tobogahinun.
Nenena ik phendep sum nimi tepnange tebaukang,”
aro wene alamoa ka'ebano.
9 Wene seoba ka'ebanoba,
Allah arukna malaikat nhon nanag yao.
Elna samenag Allah arukna malaikat saekpare tanekori kau saekpare lomag nimi nong opsineba saekpare komoptobagne taneko saelbamongne nhon nanag yao.c
Nanag yaori,
yubu lelamori,
“Nari an sembe Pham Domba Meri tomnep kel eneko whingag pabikeneba,
kembalulam aro yae,”
alamoa ka'ebano.
10 Wene alamoag agha Allah Yame Walinge nanag taneoba,
Allah arukna malaikat anekori na poa lemneori,
yim we sirikne nhonag poa yingkineo.
Eldi poa yingkineori,
“As Yerusalem Allahri,
‘O'omne,’
aro weptop as aneko tiplengkalulam,”
aro nanag ambatneo.
As Yerusalem Allah imag ua urobag agha kulukul alamoa imno.
11 Allah eldamne imang wareropne neneko as enekoag wamoba,
as nenekoag warerop nena,
kamna alikinag torop kirik sildi haing omom uropne saog uro ulamoa imno.
Kirik sildi haing omom uropne saog uro ulamoa imnonge nenena,
kirik uwongne wali sirikne mag whi urop mag saog uro ulamoa imno.
12 As eneko leka toro poa kanektobana,
alikin sirik wamori,
nubu wamoba,
ina siram aobare wamo.
Ina siram aobare wamonge pa'aropne tanekoag,
Allah arukna malaikat nhondi nhon,
nhondi nhon ina siram aobare taneko yae ubu paiamong.
Ina siram aobare tanekoag nhonag nhon,
nhonag nhon nimi sisa mome toro paiamong nena,
Israel elmabo nimi sisa sunuro aobare nang taneko si mome toroba imno.d
13 As mog so'o ingkis aneko sunuro ina siram wilindi-wilindi pa'arop.
As eneko leka toro poa kanektobana,
sae sirik sip ina siram wilindi pa'arop,
sae waneng sip ina siram wilindi pa'arop,
whingag sip ina siram wilindi pa'arop,
wailag sip ina siram wilindi pa'arop.
14 As soro kalurop as nene kirik leka tobekti sobaek nena,
yangan kirik aobareag agha sobaek.
Yangan kirik tanekoag mome torop nena,
Pham Domba Me ponekori nimi aobare wepto pogsiog nang tanekori si aobare mome tohirop.
15 Allah arukna malaikat nanap yubu lelamonge ponekori kame tunguna emas agha sunuroba saelbamo.
Kame tunguna saelbamonge nenena,
as anekoap,
ina siram pa'aroba tanekoap,
kirik leka tolingkiroba tanekoap sunuro porog o'onne tunguna emas agha sunuroba saelbamo.
16 As anekona ingkisna tombare urop.
Ingkis taneko sunuro tara-tara babe,
tai sip babe,
tau sip babe,
nikneag karep saelbom agha sobaek.
Ane sembe Allah arukna anekori eldi sunuro o'onne kame tunguna aneko agha sunuro porog o'obao.
Sunuro porog o'obao aneko we uro sobaek ana,
sunuro a'ilina saog tanena,
teng-tengne agha,
2.400 kilometer wamo.
Ingkis ni aneko 2.400 kilometerag sobaekti,
tai solingkiekne babe 2.400 kilometerag tai solingkiek.
17 Allah arukna malaikat anekori kirik leka waelbaekti,
pukama sobaekne sunuro porog o'obao ana,
yan ingiro a'ilina saog tanena teng phendeap epto aobareap (66 meter) pukama sobaek.
Allah arukna malaikat anekori sunuro porog o'obaongena,
nimiri sunuro porog o'oro soroba sunsunum uro porog o'obao.
18 As soro kalurop as nene kirik leka tobekti sopso waelbaek ana,
kirikna uwongap mirinap yogto-yogto paiarop kirik agha leka toro poa as kanektoba sobaek.
As soro kalurop as sobaek ana,
leng-leng aroba emas mori sobaek.
Emas neneap orabaap ma'aban koma urop emas wamoba,
kembiag agha whi urop mag agha alam-alam agha upsererop.
19 As soro kalurop as kanero leka yangan kirik tanekoag kamna alikinag torop kirik optenapto pibek.
Optenapto pibek nena,
leng-leng arop uwong-uwong urop kirikna yogto-yogto pibek.
Yangan kirik selek nena,
uwongap mirinap yogto-yogto urop kirik agha pibek.
Yangan kirik phendep nena,
haluwil saog kirik pibek.
Yangan kirik wilindip nena,
haluwil saogne ma'aro erenne ma'arop kirik pibek.
Yangan kirik tom nena,
eren saog urop kirik pibek.
20 Yangan kirik lam nena,
kirik uwongneap,
piringeap,
solomneap yogto-yogto urop kirik pibek.
Yangan kirik no'op nena,
pen ip lararopne saog kirik pibek.
Yangan kirik saek nena,
kamongkai saog kirik pibek.
Yangan kirik lin nena,
yungka saog kirik pibek.
Yangan kirik supnangena,
uwong sua ulne saog kirik pibek.
Yangan kirik sa'ongena,
erenne agha kiki agha leptop kirik pibek.
Yangan kirik ko'olom nena,
im piri saog pogna uwong yogto-yogtop kirik pibek.
Yangan kirik aongena,
pona kirik pibek.
21 Ina siram aobare taneko sik wana saogha nubunge kamna alikinag toropne sina mutiara aobarenge agha sopso yabiek.
Ina siram aobare taneko a'ero-a'ero sik wana saog uropne mutiara neneko nhonog agha a'ero-a'ero sopso yabiekti,
sik wana mutiara aobare agha sopso yabiek.
Ina siram wa'ina yandi pirop ina as soro kalurop as nubunge nenekoag tobek ana,
leng-leng aroba emas mo agha tobekti sobaek.
Emas neneap orabaap ma'aban koma urop emas wamoba,
haingdi kembiag agha whi urop mag agha alam-alam agha upsererop.
22 As anekoag nari kembanonge Allahri Mem Ae imno kom.
Allah nia mangkina mikip uro Saelba Ulamsilne ponekoap,
Pham Domba Me ponekoap sindam nang as anekoag wamdangdi,
Allahri Mem Ae sindam nang agha lunuro wamdang ane sembe,
mem ae imno kom.
23 As anekoag Allah eldamne imang warerobaap,
Pham Domba Meri tibin warerobaap sin abenekori as enekoag tibin nenehirop.
Ane sembe nimi nhondi babe,
“Heng tingiro warebahori,
wal tingiro warebaho,”
sembanep kom.
24 Nimi mog so'oag ni tala-tala urop nimi tibin ina aneko toman palamikpa,
mog so'oag nimi sembe yubu sia lerop nang sindi saeagha wali-waliaba tup nenep tangtoba poa as soro kalurop as anekoag poa wa'alamukang.
25 Allah eldamne imangap,
Pham Domba Meri tibin warerobaapti as anekoag warelamdikti,
as anekoag ae inipnange wamnep kom.
Inipnange wamnep kom ane sembe,
as anekoag leka kanero sorop ina siram nhon babe serekan koma,
ina sop-sop kuptoba wamle paghabog wamlul.
26 Mog so'oag ni tala-tala urop nimiri tup nenep tangtoba babe,
nimi nubunge kipto tatsiroba babe as anekoag poa wa'alamukang.
27 Allahri teba'en senenne nhon babe as soro kalurop as anekoag poa wa'inep kom.
Nimi etneri sik urop komneap,
Allahri karong senenneap ul pirop tanena,
nimi taneko as anekoag wa'inep kom.
Ot as anekoag wa'inep nimina,
Pham Domba Me ponekori sin sembe,
“Ya'ag kamag wamukang,”
aro nimi si mome toro pairop mome wa'amogtoba anekoag sindi si mome tobog taneogna,
undop nimi agha wa'inep.