Phia sikini nubunge neneko hengkun taibuka taubuka teng-tengne (1.000) haing kaupto uaneba
20
Neneko uro yabioba,
kemelamnoag agha Allah arukna malaikat nhon imag agha kulukul alamoa imno.
Eldi saeag saelbamoa imno ana,
selenga nimiri we sumbanep kom selenga ina siram kupto serekto uaneba nhonap,
nimi kaupsin haing nubu sirikneap saelbamoa imno.
2-3 Ina serekna anekoap,
nimi kaupsin haing anekoap saelbamori,
paghae sel-sel yum-yum samenag wamog paghae eneko salelamoa imno.
Paghae nenekona,
phia yonge sikini nubunge si Satanas neneko Allah arukna malaikat ponekori haing sae kauplamori,
phia ua urobag selenga lomag pelengero toboghao.
Pelengero toboghaori,
selenga ina siram aneko mikip uro serekaori,
kwerekanep kom haing kaubi agha kekneba ina siram tiptobag pibo.
Andarina hengkun taibuka taubuka teng-tengne (1.000) aneko anam pin komag,
paghae sel-sel Satanas nenekori mog so'oag as tala-tala urop nimi haing kunuro orolena ambatsilul kom.
Ot hengkun taibuka taubuka teng-tengne (1.000) aneko uro yabile taneogna,
Allahri,
“Paghae sel-sel Satanas neneko sae lopsut,”
selul.
4 Neneko uro yabioba,
kemelamnoag agha nimi nubunang saelba uhirop nang puka uroba ipsino.
Sin saelba uhirop nang puka urobag pukamong nimi tanekori samenag Allah san tiliptop lebe aroba neneko omeklamong komdi,
lebe arobari kekneba neneko sikin haioghag babe,
saeag babe tobong kom.
Sin saelba uhirop nang puka urobag pukamong nimi tanekori samenag Allahri yubuap,
Yesusti sikne lag nenero ambatsiog yubuap salero ul piropne sembe yo nimiri sin usog ngangag agha karepto opsiong.
Sin opsiong aghana,
wene kamag taongdi,
sin kamag tangka sindi yame taneko saelba uhirop nang puka urobag pukamongba,
Allahri sindi saeag mikipne pipsio.
Mikipne pipsioba,
Allahri wepto poghogne Yesus Kristusap nhon wamikti,
hengkun taibuka taubuka teng-tengne (1.000) aneko uro yabalamle abeneko pere,
Kristusap nikag tam lelekto kemero kareplamikti saelbamsukang.
5 Nene agha sin samenag ik selek sum nimi teptop nimi kamag nenehiropne imno.
Amik ik phendep sum babe,
nimi teptopne orange kamag taukang aghana,
hengkun taibuka taubuka teng-tengne (1.000) aneko uro yabile taneogna,
nimi teptopne orange kamag taukang.
6 Sin samenag ik selek sum kamag nembahio nimi tane,
sin wana yeng uro wamukang.
Sin agha Allah eldamneri o'om nimi taong.
Samenag nimi nong tebanep aghana,
ik selek sum eneko sin kamag nembahile tanena,
Allahri tam ikinne pelengerop sum eneko ik phendep sum tebaukang kom.
Sinna ik phendep sum teban koma,
memnang wamloa saog wamikti,
Allahap eldi weptopne Kristusap sembe wali-walia paliro yepsirop nimi taukang.
Wali-walia paliro yepsirop nimi taikpa,
hengkun taibuka taubuka teng-tengne (1.000) aneko uro yabalamle abeneko pere,
Allahri weptopne Kristusap ma'ap tangka sindi elap nhon yubu sia lero mog so'o saelbamsukang.
Phia sikini nubunge Satanas nenekoag tam pelengero omneba
7 Hengkun taibuka taubuka teng-tengne (1.000) aneko kom taleba,
phia sikini nubunge Satanas neneko haing sae kaupto palirobag anekoa sae lopto pilul.
8 Sae lopleba,
mog so'o ingkisag ni tala-tala urop nimi wamikag pileri,
“Nanag sip taukang,”
aro orolenange lelamlul.
Phia sikini nubunge nenekori sin mal tabanepne sembe poloro wimbahilul nimi taneko sembe,
likiptop yubuag agha,
“Gogap Magogap,”
aro si engero pirop nimi along poloro wimbahilul.
Sin teng-tengne kirik a'angkea mag nubu uro longorop mag abolag uropne saog uro wimbahilul.
9 Nari imnongena,
poloro wimbahioba,
sin as mog so'o nimi tala-tala urobag wa'al pionga,
Allahri o'ona sembamsil as taneko piongdi,
kanero weamsiong.
Kanero weamsiongba,
Allahri wepsirop nimi ua urop as anekoag,
sin kanero weamsiong nimiri,
“Opsukap,”
aro weamsiong.
Aghana auk imag agha kulukul aori,
sin kom nembahio.
10 Kom nembahiori,
Allahri el phia sikini nubunge neneko,
nimi haing kunuhirop phia neneko salero,
song mali auk singina iba ua urobag auk nubunge mag longorop saog urop aukag toboghao.
Auk nubunge anekoag Allah san tiliptop lebe arobaap,
eldi yubu silimu tipto orolenange ambatsiropne nenekoap samenag tobogahio.
Sin anekoag iniplamlea kweleklamlea seklelamik paghabog sop-sop ya'ag aneko wamukang.
Teptop nimi sembe tam karebom agha sinag pelengkahineba
11 Neneko uro yabioba,
kemelamnoag agha nimi nubunge saelba uhiropne puka urobag solomne nubu sirikne imno.
Puka urobag solomne neneko alibag el pukamoa imnoba,
imap so'oap el whingag anekoa kom tangom seoba,
olog ilenne olog imno kom.
12-13 Imap so'oap imno komdi,
kemelamsinoag agha,
nimi teptop nimi ologne nubunge kamag taonga nimi nubunge saelba uhiropne puka urobag whingag aneko sekamong.
Mag laut nubu uro longorop mag anekori nimi teptop nimi lomag wamongne tam lelekto kareptopne ponekoag tarel ahiloa saog pabahio.
Tepna nenekoap,
Hadesa nenekoap sin abenekori nimi teptoba salelamsiang nimi tam lelekto kareptopne ponekoag tarel pihirong.
Maghap,
Tepnaap,
Hadesap nimi tarel pihiongba sekamongba,
mome toro pairoba wa'amogto pairop mome etpare taneko sangaro wamongba imno.
Mome toro pairoba sangaro wamongba,
nimi teptop nimi taneko sindi samenag ulamekne ni mome ni neneag top tangtoba wamo.
Mome top tangtoba anekoag kembiag agha tam lelekto kemeropne ponekori sindam nimiri uroba sunsunum uro tam palilamo.
Mome toro pairopne wa'amogtoba nenne babe sangap taonge wamongena,
nimi ya'ag uro kamag wamnep nimi si mome toroba imno.
14-15 Nimi ya'ag uro kamag wamnep nimi si mome toro pairoba anekoag,
eldi si orog pagha tanena auk nubunge mag longorop saog urop auk anekoag toro tobogahio.b
Nimi teptopne saelba uhirop nang si Tepnaap,
Hadesap aro engeropne abeneko auk anekoag toro toboglamsio.
Auk nubunge mag nubu uro longorop mag saog urop auk anekona,
ik phendep sum tepnange aro engerop.