“Nuni Allah omeklamsut!” aro kiplameka
19
1-2 Neneko uro yabioba,
ka'elamnoag agha yubu lilim nimi maiknori haum alamloba,
yubu angkongkoa lelamlo saog uro imag agha yubu omekto lelamongdi,
“Nuni Allah omeklamsut!
Nimiri malia uropne sembe eldi sikne porogne agha
tam karepto pelengelamla.
Ane sembe lag phoro lelamapti,
Nuni Allah nimi taulba uhiropne wamlari,
el mikip wamlari,
nia mangkina saelbamla!
El paliag uropne kiplamap!
Salik-malik walep tangtop kel neneko sembe
Allahri tam karepto pelengkal.
Kel nenekori nengabo maikno kiliro
salik-malik walep tangkamloa saog ulamongeag agha
mog so'oag nimi maikno kiliro ulamsioba,
Allah wail ibarelamong.
Kel nenekori Allahri awe torop nimi maikno
eneng tiniro olamsioa sembe
Nuni Allahri eldi arukna usog lumbaldi,
tam ikinne kel nenekoag pelengkipla,”
alamong.
3 Wene alamongne neneko ka'ebanoba,
nen nimi maikno tanekori yubu lelamongdi,
“Nuni Allah omeklamsut!
Ina yabirop kel Babel neneko loba nembaoba,
auk mhong eneko kuklamle paghabog kuklamlul,”
aro Allah omeklamonga ka'ebano.
4 Wene alamongba ka'ebanoba,
saelba uhiropne puka urobag tibom agha,
nimi nubunang yubu epto wenehirop nang tom tarabare tanekori yabu sanukto u amupto pulingkiong.
Lebe aroba kamag uropne tombare Allah whingag ua uropne tanekori babe yabu sanukto u amupto pulingkina,
Allah omeklamong.a
Allah saelba uhiropne puka urobag pulamoba,
sindi Allah omeklamong yubuna,
“Sikne agha lebang.
Nuni Allah omeklamsut!”
aro omeklamonga ka'ebahino.
Pham Domba Meri elkel toropne sembe sani yoroba
5 Wene alamongba,
saelba uhiropne puka urobag tanekoag agha yubu lilim lelamoa ka'ebanongena,
“Allah elmabo a'un ni Allah arukna wamlomne,
a'undi wanaag agha Allah kiplamlomne,
nimi ni ologneap nubungeap a'undi Allah omeklamsut!”
aro yubu lilim lelamoa ka'ebano.
6 Wene aro yubu lilim neneko lelamoba,
nen ka'elamnoag agha yubu lilim lelamongena,
nimi maikno wamlori,
yubu lelamloba,
yubu angkongkoa lelamloa saog uro lelamongne ka'ebano.
Ka'ebanongena,
niksiag-niksiag agha limang talaglamnari,
mag mhun maiknoro yangkalamnari,
yubu lelamloa saog uro lelamoa ka'ebano.
Nari ka'elamnoba,
sindi yubu lelamong nena,
“Nia mangkina mikip uro Saelba Uhiropne Allah ponekori
wene salero yubu sia lelamla.
Ane sembe Nuni Allah omeklamsut!
7 Pham Domba Me ponekori,
‘Toroanun,’
senen kel eneko
weroba wamlaba,
sin top tanuarang.
Ane sembe nu awi uro wameberi,
Allah paliag uropne kipto sepna seplamukap.
8 Pham Domba Meri,
‘Toroanun,’
senen kel eneko sembe,
wangkanep ag wet purum winne agha
wetnerop ag walinge kororop ag sembenga orogne
kel enekoag taroba,
ag nene wangkamlari,
weroba wamla,”
aro lelamong.
Wene aro lelamonga ka'ebanori,
el tanonge,
“Ag wet purum winne agha wetnerop ag walinge,”
aro lelamongne kekneba sembe lebong.
“Wangkanep ag walinge wangkamla,”
seong aghana,
Allah eldamneri wepsirop mabori porog sirika ulamangne sembe lebong.
9 Allah arukna malaikat ponekori nanag yubu lelamori,
“Mome toplulamne ane.
‘Pham Domba Me ponekori kelabo tomnepne sembe sani yobaukang.
“Sani yolamangag yalulam,”
aro yobol ahile nimi taneko sin wana awi uro wali wamukang,’
aro mome toplulam,”
seo.
Wene seori,
nen ma'aro tipto yubu lebongena,
“Nene Allahri yubu sikne ambatken,”
aro ambatneo.
10 Wene seoba,
nari yabu sanukto u amupto malaikat yan tamag pulingkina,
“Kipnun,”
aro ulamno aghana,
eldi lelamori,
“Undo unuaheng kom!
Ot Allah aghabog omeklamlulam!
Na babe an wamlamne saog uro Allah arukna wamnam.
Ankabo Yesusti sikne lag nenero ambatsiog yubu saelba ul pirop nimiri babe anap nanapti nika uro Allah sembe awe tolamap,”
aro ambatneo.
Malaikat ponekori nanag undo ambatneongena,
tam nene sembe.
Yesusti yubu ambarelamsiogne nenena,
Allah Yame Walingeri Yesusti wanaag pibogne sunsunum uro sik uro ambatsiog.
Nimi etneri sik uro Allah Yame Walinge pere agha lerop tanena,
Yesusti yubu sunsunum uro Allah yubu silimu tipto ambatsirop.b
Pham kuda solomne alibag pukamonge poneko sembe ambatsiogha
11 Nari imag tiwalengelamnoag agha ina kuptoba nhon imag wamoba,
pham kuda solom pham nhon wamoa tiwalengkano.
Pham kuda alibag aneko pukamonge poneko si engerop nena,
“Sikne Sol Walinge,”
aro engerop.
Eldi tam karepnange babe,
mal talamnange babe,
sunsunum uro porogne agha ul pirop.
12 Eldi haingna,
auk pog saog uro warea urop.
Eldi usoghagna,
yubu sia leropne kwiria usoghag elel-molel aropne maikno eleka urop.
El nongag aneko mome top tangka urop aghana,
si mome top tangka urop si enekona,
nimi nenne ekon.
El agha mome top tangka urop si eneko eldamne agha el wamla.
13 Eldi ag wangaro pelengka urop ag anekona enengag phibi agha wangka urop.
Enengag phibi agha eneka uropne poneko el sina,
“Allah Yubu,”
aro engerop.c
14 Undo unuamoba ililamnoba,
el umag nimi maikno yin salerop nang kong-kongne pham kuda solomne alibag pukamongdi,
imag wamong.
Sin nongag wet purum winne agha wetnerop ag walinge,
kororop ag sembenga orogne enekamongdi,
elag neleplamong.
15 Eldi silomag agha lanalamoa imnongena,
nimi ohirop karog yo sirikne lambamonge imno.
Mog so'o tala-tala urop nimiri el aisa nenerop nang wamikne taneko eldi silomag agha karog lanaropne nenekori opsilul.d
Aisanang mog so'o tala-tala wamang nimi taneko oro luknubahileri,
eldi besi agha sunurop kame salero nimi kasmi agha saelbamsilul.e
Eldi aisanang luknubahilul nena,
nimiri anggur wana ingisapto lolterop mag lanalamloa saog uro,
Allah nia mangkina mikip uro saleropne ponekori wana yo sirik senenneag agha el,
“Allah Yubu,”
aro si engeropne ponekori el aisa nenerop nang ingisapnuahil.
16 Eldi wangaro pelengka urop agap,
eldi yan ilap abenekoag mome torop nena,
el si engeropne mome torop.
Eldi si mome torop nena undo.
“Yubu sia lerop nang sembe Yubu Sia Lenne paliagne.
Mog so'oag nimi saelba uhirop nang Saelba Uhiropne nubunge,”
aro mome torop.
17 Undo uro yabioba,
tiwalengelamnoag agha Allah arukna malaikat heng nusamag sekamoa tiwalengkano.
Sekamori winang im toman ni palamong winangag yubu mikip uro lelamori,
“Allahri sani nubunge weamlo saog uro weamlaba,
longoro telahut!
18 Yahutti nimi yubu sia lerop nangdi sopap,
yin salerop nang sikini yabori sopap,
palisong nimiri sopap,
pham kudari sopap,
pham kuda alibag puka urop nimiri sopap
a'un winang im toman yabalamlomneri tel alulom.
Nimi ni wamangne,
nimi arukna urop nimi babe,
mo sektop nimi babe,
nimi nubungeap,
ologneap
tebaiikpa,
sindi sop telahut!”
alamoba ka'ebano.
19 Wene seoba,
nari kemelamnoag agha lebe aroba yonge Allah san tiliptopne samenag imnonge nen sap imno.
Lebe aroba nenekoap,
nimi ni mog so'oag wamang nimi sembe yubu sia lerop nangap,
“Mal tabaukap,”
aro sindi yin salerop nang poloro wimbahiong.
Yin salerop nang wimbahiongdi,
“Imagne pham kuda solomne alibag puka uropne ponekoap,
ilipsabo yin salerop nangap luknubahukap,”
aro longolaong.
20 Longolaong aghana,
Allah san tiliptop lebe aroba nenekoap,
eldi yubu silimu tipto orolenange ambatsiropne nenekoap,
sin abeneko haing sae kaupto saelbahio.
Lebe arobari yubu silimu tipto orolenange ambatsiropne nenekona samenag,
“Mog so'oag nimi Allah san tiliptop lebe aroba nenekoag sip taukang,”
aro mema mikibari uanep kekneba ulamori,
mog so'oag nimi maikno haing kunulamsio.
Haing kunulamsio nimi tanekori,
“Allah san tiliptop lebe aroba nenekoringe taukap,”
aro kekneba sindam nimi nongag tobong.
Kekneba sindam nimi nongag tolamongdi,
lebe arobari yame sunumna sunuroba omeklamong.
Undo unulamong aghana,
Allah san tiliptop lebe aroba nenekoap,
eldi yubu silimu tipto orolenange ambatsiropne nenekoap,
sin haing sae kaupto saelbahiori,
auk nubungeag tobogahio.
Auk nubunge mag nubu uro longorop mag saog urop auk enekoag song mali auk singina iba ua urobag sin abeneko anam teban koma auk nubungeag tobogahio.
21 Auk nubungeag tobogahiori,
pham kuda solomne alibag puka uropne ponekori el silomag agha la'inirop karog saelbom agha Allah san tiliptop lebe aroba neleptop nimi ni ya'ag opsio.
Ya'ag opsioba,
ni winang im toman yabirop winang tanekori yingkina nimi teptoba taneko mon og uro telamonga imno.