As Babel loba taogha
18
Neneko uro yabioba,
nari kemelamnoag agha Allah arukna malaikat yogne imag agha kulukul alamoba imno.
Eldi saelba uhirop mikipne nubu wamoba,
elag imang wareroba wamonge nenekori mog so'o tibin warelobo.
2 Yubu nubunge agha lelamori,
“Wene loba tal!
As soro kalurop as Babel nubunge eneko tapto loba tal!
Wene as anekoag phia tognol tanag taori,
mema yongeri nimi nepsiropne ua urobag wamla.
As lomag tao wamnebagna,
ni winang nimiri winang sop tehirop kom winangap,
sembenga kalup tangtop saog winangap wamnebag agha tao.
3 As soro kalurop as Babel nimiri samen malia ulamong nena,
kelabori nimi sae kiliro mag yonge tebatsiro nenek nenelamsilori,
wana tohiro nengaboap salik-malik walep tangka malia ulamloa saog uro ulamongpa,
mog so'o tala-tala urop nimi Babel nimiag neleplamsiong.
Mog so'oag nimi sembe yubu sia lennangdi,
Imagne poneko wailag nembi agha
kelaboap salik-malik walep tangkamlonga saog uro as nubunge nenekoap ma'ap tangkamong.
Kamna kapto tol toro tongorop nang mog so'oag tala-tala wamong nang as enekoag pang-yang ulamongdi,
nimiri wanaag,
‘Nanag uro yaboho,’
senenne wali-waliaba along kamna kapto toro palamongdi,
tup talamong.
Salik-malik walep tangtop kel enekoag nelebom agha Imagne wailag nembaong ane sembe,
as soro kalurop as Babel nubunge eneko wene tapto loba tal!”
aro lelamoa ka'ebano.
4 Nen nari ka'elamnoag agha Imagneri yubu nhon lelamongena,
“Lambahut!
Nari mabo,
a'undi as soro kalurop as Babel tanekoa a'un lambalulom!
As aneko nimiri malia ulamangneag nelebahom tanena,
sinag nimi ohinne sekleroba tam timbanepne a'unag babe tahileagti,
a'un lambalulom.
5 Malia ulamangdi,
sembenga loloro palilamlange neneko ere-ere waelbaongdi,
imag tai yangkalamloa saogne as aneko nimiri malia ulamangne sembe Allah el wamla.
6 Babel enekori nimiag tarelamsiog saog uro elag lunuro tatlulom.
Eldi nimiag yonge ulamsiog nena,
eldi mag yonge tebatsiro nenek nenelamsiloa saog uro ulamogne nene sembe
a'undi lunulapmundi,
nen phelekto elag ma'aro yonge piplulom.
7 Kel enekori eldangkel wanaag paliag nenel dalamlari,
‘Yauog kel wamna komdi,
na yubu sia lerop kel nubunge wamna.
Ik nhon babe amang uro yaghe sembanun kom,’
alamla.
‘Bobonge agto yaboho,’
senenne agha tup nenel dalamog.
Ane sembe,
wene wali-walia maikno elag to'opto wamlange talup lambamundi,
seklenne agha to'opto lumbamun andarina,
wana ikin uro seklebalul.
Eldi wanaag,
‘Ik nhon babe amang uro yaghe sembanun kom,’
alamlange sembe,
8 ik nhon sum agha nimi ohinne elag omnep nena,
tepnange babe,
amang uro unne babe,
kwaneng yo seklenne babe
elag uro yabilul.
Nu Saelba Uhiropne Allah mikip sirik wamlari,
kel eneko sembe tam lelekto kemero karebalul.
Ane sembe ik nhon sum agha elna aukti tero kom talul,”
aro wene alamoa ka'ebano.
9 Wene aro ka'ebanongena,
as soro kalurop as Babel eneko aukti telamleri,
auk mhong kukto walelamleba,
mog so'oag nimi sembe yubu sia lerop nangdi ililamikti,
ngolol aro engelamukang.
Mog so'oag nimi sembe yubu sia lennangdi,
“Bobonge nanag wamlange agto yaboho,”
aro ulamongdi,
kelaboap salik-malik walep tangkamloa saog uro Imagne poneko wailag nembi agha as soro kalurop as nenekoap ma'ap tangkamong.
10 As Babel aneko auk telamleba,
seklelamukangne sembe yubu sia lerop nang,
“Nunag taleag,”
aro log lelem weag sekamikti,
tiboghamukang.
Sin weag sekamikti lelamikti,
“Yaghe,
seklelamang-e!
As soro kalurop as nubunge Babel eneko
as mikip sirikne wamo aghana,
ot heng ko'o nhonoghag agha
tam pelengeloglaba,
loba tal!”
alamukang.
11 Nimiri kamna kapto tol toro tongorop nimi mog so'oag tala-tala wamong nimi tanekori babe,
as nubunge neneko sembe amang pairo engelamukang nena,
“As aneko wamso tanena,
sikindinge taneko kamna kapto topsebe,”
senelamukang.
Aghana kom taleba,
sin nimi tanekori,
“Nimi nhondi babe nuri saeag payalamapne kamna kapto tol aukang kom,”
aro engelamukang.
12 As nubunge neneko anam aukti ten komag,
nimiri wana awi sirik uro kamna alikinag uro kapto tomnep nena,
leng-leng aroba emasap,
leng-leng aroba perakap,
kirik wana yame-yame upsererop kirik wana elektobaap,
wali sik wana saogne mutiaraap,
ag wet purum winne agha wirop ag walingeap,
wet purum yongonne agha wirop ag walingeap,
ag walinge uwong ag agha poptangtopneap,
kal ken-ken song wali saog kalap,
pham nubu sirik pham gadya sombola wenge agha sunurobaap,
kal kamna alikinag urop kal agha sunurobaap,
besi agha sunuroba uwongneap piringeap,
ae sorop kirik sildi yogto-yogto pairop kirikap,
13 kwaneng ma'al yona emem arobaap,
emem aroba kal konap,
song walia aukag tamnepneap,
nimi nongag likto song wali nenerobaap,
kal wea song walingeap,
haing anggur wana loltero terop maghap,
kal zaitun wana lolterop maghap,
kwaneng roti sunuroba leng-lenga walingeap,
kwaneng roti sunuroba gandum walingeap,
pham sapiap,
pham dombaap,
pham kudaap,
nimi alibag pukamnaba pham kudari kiliro pabihiropneap,
nimi babe arukna nembahinep nimi nong kamna kapto pabihirop nimiap,
anam as nubunge Babel eneko aukti ten komag,
pibom agha nimiri kamna kapto tol pinep.
14 Kamna kapto tol toro tongorop nimi tanekori as nubunge nenekoag ikinne timbalenge iogha lelamikti,
“Andi wanaag ‘Wali-walia topsene,’
senelamlamne neneko ni kom tal.
An tup tangka an holno seneba ni ka'eseptaoba,
nia taneko nen iplulam kom,”
alamukang.
15 As soro kalurop as neneko loba talamleba,
ogti lebareklamlenge sembe,
sin samenag as anekoag nimiag kamna kapto toroaekti,
tup taek nimi taneko weag agha tiboghaukang.
Tiboghaikti log lelem weag sekamikti,
amang pairo engelamukang.
16 Engelamikti yubu lelamikti,
“Yaghe,
seklelamang-e!
As soro kalurop as nubunge Babel eneko mane agha loba tal!
Elag kwiria elektoba enekamongena,
wet purum winne agha wirop agap,
uwong agap,
uwong ag agha poptangtop agap eneka urop.
Eldi sop-sop towalengep tangtobana,
leng-leng aroba emasap,
kamna alikinag agha sik wana saog uropne mutiaraap,
kirik wana yame-yame upsererop kirikap towalengep tangka urop.
17 Aghana heng ko'o nhonoghag agha elag tup ua ulamlange neneko orog tal,”
alamukang.
Mag alip toman piroba kabong nubunge alibag pirop nimi ni,
kabong o'orop nang sikini yaboap,
kabong lomag o'orop nangap,
“Mag laut longorop mag lomag uroba sembe ero toroaukap,”
aro kabongag nhon pirop nimiap,
sin niri weag agha sekamikti tiboghamukang.
18 Weag sekamikti tilamikpa,
as aneko auk telamleri,
mhong kuklamlea tiboghamukang.
Tiboghamikti yubu haum alamikti,
“As nubunge nhon as ane saog uro nubu uro soro kaulbaekne nhon urop kom,”
alamukang.
19 Unulamlea sembe sin engelamikti,
amang uropne agha usoghag hao lopto towalengel dalamikti,
yubu engenange agha nubu uro engelamukang.
Engelamikti,
“Yaghe,
seklelamang-e!
As soro kalurop as nubunge Babel eneko mane agha loba tal!
As aneag tup wamlangeri nu mag laut longorop mag alip toman piroba kabong ngai nimi tup nenelamsil!
Aghana heng ko'o nhonoghag agha nia ni wamlange loba tal,”
alamukang.
20 A'un imag ua urop nang,
as soro kalurop as neneko kom talne sembe yeng uro wamsut!
A'un Allah elmabo wepsirop nimiap,
a'un Yesusti wepto pogsirop nimiap,
a'un Allah yubu silimu tiptop nimiap awi senelamsut!
As neneko nimiri a'unag malia uhiropne sembe Allahri tam pelengero lumbahil!
21 Neneko uro yabioba,
imnori kemelamnoag agha Allah arukna malaikat mikipne nhondi kirik nubu sirikne saelbamori,
mag laut longorop mag nubungeag toboghaori,
yubu lelamori,
“Undo kirik nene mikip uro pelengero toboghan saog uro,
as Babel soro kalurop as nubunge neneko yo uro wa'epto toboghaleba,
nimi nhondi babe olog ibukang kom.
22 Pingpong yubu neneroba kecapi orop nimiri olamika lilim babe,
sepna septop nimiri seplamika babe,
ma'i agha lom nembongkia pho alamikpa yubu lelamlea babe,
ma'i trompet pho alamika babe an as Babel anekoag nimiri nen ka'ebaukang kom.
Sa'a-sa'a ni kop-kop tagto el wamnari,
sunuro sorop nimi babe as anekoag ibukang kom.
Kwaneng roti koloptop wana ururo yambanep kirikti yubu lelamlea babe as tanekoag ka'ebaukang kom.
23 As anekoag whea nhon babe nen warelamlul kom.
Anekoa nimiri kelabo tomnep sepna septo irit pholong alamika babe ka'ebaukang kom.
Samen as soro kalurop as Babel neneag agha
kamna kapto tol toro tongorop nimi tup nang nubu sirik nang nenep taong.
An Babel nimiri mili lero nimi mog so'oag nimi ulamsiloa saog ulamomba,
mog so'oag ni tala-tala wamong nimiri a'unag,
‘Nubunang,’
aro nelebahiongdi,
orolena sik senelamong,”