Kelabo nhonap, lebe aroba nhonap ipsiogha
17
Neneko unuaoba,
sin Allah arukna malaikat saekpare tanekori kau saekpare saelbamong nang nhon nanag yaori,
yubu lelamori,
“Yae,
nari anag lag nembatkeneba iplulam nena,
ina yabirop kel si nubu kel enekoag Allahri amik tam pelengero omnepne sembe lag nembatkenun.
Ina yabirop kel eneko sembe likipto lelamnangena,
as nubu uro soro kalurop as mag maikno libunag uropne sembe lelamna.
2 Nengabori salik-malik walep tangtop kel saelbom agha maptangka malia ulamloa saog uro,
mog so'oag yubu sia lerop nang ubu paiamang nang tanekori Allah wailag nembi agha as nenekoag piongdi,
malia ulamong.
Kelabori mag yonge tebatsiro nenek nenelamsilori,
wana tohiro nengaboap salik-malik walep tangka malia ulamloa saog uro as soro kalurop as Babel nimiri undo unulamong.
As Babel nimi tanekori as tala-tala urop nimi wana tohiro loba nenelamsiongba,
Allah wailag nembaongne sembe Babel nimi opsilul,”
aro ambatneo.
3 Wene aro ambatneoba,
Allah Yame Walinge nanag taneoba,
Allah arukna malaikat anekori na poa lemneori,
pai aldesag poa pineo.
Aneko poa pineoba,
kemelamnoag agha kelabo nhon lebe aroba alibag pukamoa aneko,
lebe arobari nongna uwong wamoba imno.
Lebe arobari nongag kembano ana,
mome aghabog mome toropti,
Allah si san tiliptop yubu momeag mome toroba lebe aroba anekori nongag to'opto wamoba kembano.
Lebe aroba aneko eldi usog kembano ana usog saekpare wamoba,
eldi pinu yagne sa'obare wamoa imno.
4 Kel enekori enekamo agna,
uwong agap,
uwong ag agha poptangtop agap agha enekamo.
Apna kamna alikinag uro toroba yogne-yogne wangkamongena,
leng-leng aroba emasap,
sik wana saog uroba mutiaraap,
kirik wana yame-yame upsererop saogneapti elek-palag aroba wangkamo.
Eldi saeag saelbamo ana,
mag ma'i leng-leng aroba emas agha sunurop mag ma'i saelbamo.
Mag ma'i saelbamonge lomag liroba anekona,
popmagha sirik uropneap,
sembenga kaluro pibongeap to'opto wamo.
Anena kel enekori nengaboap salik-malik walep tangtoba ma'i lomag ikto liploa saogne wamoba imno.
5 Eldi haioghag mome toroba kembanongena,
el si engeropne lomag tognorop yubu wamlange mome toro pairoba eldi haioghag kembano.
El si engeropne tognorop yubu mome toropne nenekona,
“Babel Nubunge
Nengaboap Salik-Malik Walep Tangtop Kelabo Sikinin
Popmagha Urop Sembenga Mog So'oag Uropne Mangkahirop Kelabo,”
aro mome toroba kembano.
6 Nari kel enekoag kembanongena,
eldi mag yonge tero nenek salerop nimi saog wamori,
ulamoa imno.
El nenek salerop nimi saog nenerop mag yonge nenena,
Allah eldamneri wepsirop mabo Yesus yubu sikne lag nenero ambatsirop nimi taneko kel enekori opsiori,
nimi eneng lambom agha mag yonge telamloba,
nenek saelbamlo saog ulamoa kembano.
Kel eneri undo ulamonge nene kembanori,
nari el sembe ngalagto lo'om paibom senori,
“Yaghe” sembano.
7 Wene sembanori kembanoba,
Allah arukna malaikat anekori nanag yubu lelamori,
“Sa'a sembe kel eneag kembi agha lo'om aro,
‘Yaghe,’
senelamlam?
Kel eneko sembe tognoroba wamlange nene sembe tibin nenero ambatkenun.
Apna kel eneko lebe aroba alibag pukamlange taneko,
lebe aroba nenekoap,
lebe aroba usog saekpare wamlangeap,
el pinu yagne sa'obare wamlangeap sembe tognoropne neneko nari ambatkenun.
8 Lebe aroba ane samenag wamog aghana,
wene an Yohanes wamlam ko'oag wamla kom.
Wene wamla kom aghana,
el selenga nimiri we sumbanep kom selengaag agha lamba lepleri yaleri,
amik loba nenep tanebag pilul.
Nimi mog so'oag wamik nimiri lebe aroba neneko ibikti,
el sembe ngalaglamikti,
‘Yaghe,
samenag wamogti,
kom tao aghana,
nen yal,’
aro lo'om sukang.
Lo'om sukang aghana,
imap so'oap sumbaog sumag agha Imagneri,
‘Ya'ag kamag wamukang,’
aro wepsirop nimi si tohirop mome toro pibog.
Nimi si mome toro pibog mome neneag sindi nimi si mome tohirop kom nimi aghari lebe aroba neneko ibikti,
lo'om sukang.
9 Wana hekahinep yubu ane ambatnuahinne ka'ebamundi seneragsut!
Usog saekpare wamlange nenena,
yim kongten saekpare wamlaba,
kongten taneko alibag kelabo eneko puk-puk yabiamla.
Usog saekpare wamlange nene babe,
nimi yubu sia lerop nimi saekpare saelba uhirop nang wamang.
10 Sin saekpare taneko agha,
lambare timbaongpa,
nhonna anam sekamlari,
yubu lelamla.
Nen nhon anam yingkiamla kom.
El anam yingkiamla komne neneko el yaleba,
Allahri karepto pibogne sunsunum uro sekamlul aghana,
ko'o we uro yubu sia lero sekamlul kom.
11 Lebe aroba uwongne el nongag Allah san tiliptop yubu mome top tangtop lebe aroba neneko,
el samenag wamog aghana,
wene wamla kom.
El nenekona,
yubu sia leropne linne wamlul.
El babe sin yubu sia lerop nang saekpare taneko agha lag talul aghana,
loba nenep tanebag pilul.
12 Pinu sa'obare wamlaba,
iplamne nenekona yubu sia lerop nang anam sekamnari yubu sia leamna kom nang.
Aghana sinag mikipne neneko tatsile tanena,
lebe aroba anekoap sin nhon heng ko'o nhon saelba uhiro yubu lelamukang.
13 Sin yubu sia lerop nang sa'obare tanekona,
sindi wanaag,
‘Uaukap,’
aro ulamik nena,
ot ina nhonog.
Anena sindinge mikipneap,
sindam nang imangapti saelba uanepne neneko nhin lebe aroba aneko,
‘Nubu talul,’
aro el saeag nembaukang.
14 Sindi wero Pham Domba Me ponekoap,
‘Mal tabukap,’
aro ulamukang.
Aghana Pham Domba Me ponekona,
mog so'oag nimi saelba uhirop nang Saelba Uhiropne nubunge wamla.
El ponekona,
yubu sia lerop nang sembe Yubu Sia Lenne paliagne wamla.
Ane sembe,
sindi elap,
‘Mal tabukap,’
aro ulamukang aghana,
sin oro luknubahilul.
Pham Domba Me ponekori oro luknubahile sum eneko,
eldi wepto yopsirop nimi elag sikne aro wana paliro nelepto ul pirop nimi taneko elap nikag wamukang,”
aro ambatneo.
15 Allah arukna malaikat anekori nen babe ambarelamneori,
“Mag andi iplamne nenena,
nengaboap salik-malik walep tangtop kel eneko puka urobag iplam sunumnana ane.
Mag iplam nena,
nimi mog so'o tala-tala wamang nimiap,
nimi maiknoro longorop nimiap,
nimi winip tangto mo sektoba negara a'ero-a'ero urop nimiap,
yubu a'ero-a'ero taneko yubu lero urop nimiap,
sin alibag puka ulamoba iplam.
16 Lebe aroba anekoap,
el pinu yagne yubu sia lerop nang sembe likipto sunurop pinu yagne sa'obare tanekoap iplamne nenekona,
salik-malik walep tangtop kel eneko sembe sin nimi tanekori karong sembaikti,
haing sek uro kembaukang.
Sindi sa'a-sa'a kel enekori saeag wamlea taneko pelepto tobikti,
kel eneko kabeog nenero ali nembaukang.
Sindi eldi nong sop aneko aukag taro telamukang.
17 Allahri,
‘Nari seneropne agha ulamukang,’
aro sindi wanaag el nembahio.
Allahri seneraglamogti,
‘Yubu sia lerop nang sa'obare tanekori saekag lelamikti,
sindi yubu sia lenne mikiba neneko lebe aroba saeag nembaikpa,
sesog saelbamsilul,’
sembaog.
Allahri wene sembaogpa ulamikpa,
lebe aroba yonge anekori saelba ulamlea kekman Allahri samenag salag lero pibogne neneko uro yabilul.
18 Kelabo andi iplam kel enekona,
as soro kalurop as nubunge wamlari,
mog so'oag nimi sembe yubu sia lerop nang saelba uhirop kel wamlaba iplam,”
aro Allah arukna malaikat anekori lelamoa ka'ebano.