Allahri nimi waro opsineba saekpare taneko mog so'oag ikil pieka
16
Nari ka'elamnoag agha,
yubu nubu uro Allahri Mem Ae lomag agha Allah arukna malaikat saekpare tanekoag yubu lelamori,
“Pimundi Allahri nimi waro loba nembahineba anggur wana lolterop mag saog uropne kau saekpareag liroba wamlange taneko,
mog so'oag ikil pululom,”
alamoa ka'ebano.
2 Allah arukna malaikat selekne poneko piori,
Allahri nimi mog so'oag waro loba nembahineba kau lomag liro pairopne neneko mog so'oag ikil pio.
Ikil pioba,
sin Allah san tiliptop lebe aroba neneko yame sunumna omektop nimi tanekoag sorog maulamsio.
Lebe aroba kekneba aneko sindam nimi kon nongag torop nimi tanekoag sorog nubunge og seklenne maubu yabihio.
3 Neneko uro yabioba,
Allah arukna malaikat phendepne ponekori kau lomag liro pairopne neneko mag laut nubu uro longorop maghag ikil pio.
Longorop maghag ikil pioba,
mag longorop mag aneko nimi teptop nimi eneng saog taori,
lebe aroba mag lomag uropne ni tepto yambaong.
4 Neneko uro yabioba,
Allah arukna malaikat wilindipne nenekori kau lomag liro pairopne neneko mag yabirop maghag,
mag luag ikil pioba,
mag ni aneko eneng aghabog tao.
5-6 Unuaoba ka'elamnoag agha,
Allah arukna malaikat mag sembe yae uro wamo malaikat anekori yubu lelamori,
“Tam malinge nene uro yabalamlange sembe
andi tam karepto pelengelamlamne porogne agha karepto pelengelamlam.
Sin mog so'oag yo nimiri Allah eldamneri wepsirop mabo eneng pelengelamsiangdi,
Allah yubu silimu tiptop nimi eneng babe pelengelamsiangne sembe,
eneng pelengelamsiangne sunsunum uro
andi wene eneng nene sin mo'olamsilam.
Yo,
an mo sembenga orogne wamlamne samenag babe wamluma wene babe wamlam.
Sunsunum uropne porog uro pelengelamsilam,”
aro wene alamoa ka'ebano.
7 Wene seoba,
nari ka'elamnoag agha Allah sembe auk mhong towalengero tamnebag aneko yubu lelamori,
“Sikne agha lepla.
Nuni Allah nia mangkina mikip uro Saelba Ulamsilamne,
sindi malia uropne sembe andi sikne porogne agha tam karepto pelengelamlam,”
alamoa ka'ebano.
8 Neneko uro yabioba,
Allah arukna malaikat tomne ponekori,
“Nimi heng bobo seklebaukang,”
aro kau lomag liro pairopne neneko heng anekoag ikoba,
heng anekori nimi aukti telamsiloa saog uro telamsio.
9 Heng bobo mikipne anekori aukti telamsiloa saog uro telamsioba,
mog so'oag nimiri Allah sembe san tiliplamong.
Allah ponekona el arukna imagnang malaikat tanekoag,
“Nimi opsineba nene sinag pelengel pihi,”
aro ambarelamsioba,
mog so'oag nimiri el Imagne si san tilipto lelamong.
Seklelamongdi,
“El neneko paliag nenero kiplamukap kom,”
aro san tiliplamongdi,
sindi malia seneragto ulamongne limna koma tipto malia ulamong.
10 Undo unuaoba,
Allah arukna malaikat lamne ponekori kau lomag liro pairopne neneko lebe aroba yongeri mog so'o saelba uhinne puka urobag aneko iko.
Allah san tiliptop lebe aroba nenekori mog so'o saelba uhinne puka urobag aneko ikoba,
lebe arobari mog so'o saelba uhiro ua urobag aneko inibin sogmondo seo.
Inibin seoba,
sin og seklenne agha mog so'oag nimiri silimu si sabal dalamong.
11 Sinag sorog maulamsioba,
og lelem seklelamong aghana,
sindi malia seneragto ulamongne limna koma Allah Imagne poneko sembe,
“Seklenne nene elba,
nunag pipsio,”
aro san tilipto warop yubu lelamong.
12 Neneko uro yabioba,
Allah arukna malaikat no'opne ponekori kau lomag liro pairopne neneko nubu mag Efrat yabirop inaag ikoba,
mag Efrat lo'oe tao.
Lo'oe tao andarina,
yubu sia lerop nang heng walelingkirobag siba mag Efrat ina lo'oe taonge aneko kaubom agha,
“Mal tabukap,”
aro yingkinepne sembe lo'oe nembao.
13 Neneko uro yabioba,
kemelamnoag agha phia yonge wilindi sinna ya'i saog wamonga ipsino.
Sin ya'i saog uropne lanap tangka yalamongba ipsinongena,
paghae sel-sel nubunge neneko pamag agha,
lebe aroba yonge mag longorop mag agha lanaropne neneko pamag agha,
apna lebe arobari yubu silimu tipto orolena ambatsiropne pamag agha lanap tangka lanalamonga ipsino.
14 Sin phia yonge tanekori ulamongne nimiri kembi agha,
“Yaghe mema mikibari uanepne ulamang,”
senenne kekneba ulamong.
Sin phia yonge wilindi tanekona,
mog so'o tala-tala pina,
yubu sia lerop nang tala-tala urop nubunang poloro wimbi agha,
“Amik sum Allahap mal tabukap,”
aro winil palamsiong.
Sindi Allah nia mangkina mikip uro saleropne ponekoap mal nubunge tarop sum nubu sum eneko sembe wero ul palamsiong.
15-16 Phia yonge tanekori yubu sia lerop nang,
“Mal tabukap,”
aro poloro winihirobag anekona,
Ibrani yubuag Harmagedona arobag poloro wimbahionga ipsino.
Imagne Ponekori lelamlari,
“Ka'eamlulom!
Na yanun nena,
a'undi ekon urop sum yanun.
Haogha torop nimiri ambatsin koma yingkina tohirop saog uro,
na babe a'undi ekon urop sum yanun!
Nimi yae up tangka seneraglamleri,
‘Nari nongag enekanepne orogti,
kabeog wamnenge kembaneikpa,
ali sembaneag,’
aro nongag enektop ag wero
elem uro wangaro anebag piple tanena,
wana yeng uro wamlul,”
alamla.
17 Poloro winilamonga ipsinori,
kemelamnoag agha Allah arukna malaikat saekne imag wamonge nenekori kau lomag liro pairopne neneko imag yam-yamoro iko.
Ikoba Allahri Mem Ae lomag anekoag nia mangkina saelba uhiropne puka urobag agha yubu nubu uro lelamori,
“Wene loba nenehiroba komoptopne ikitla,”
seoba ka'ebano.
18 Wene seoba,
lepna tingom-tingom alamoba,
limang yubu lilim mu aro talaglamoba,
sa'uma nubunge lologlamo.
Samenag nimi sumbahiog sumag agha sa'uma ik nhon babe mog so'o lologna lologhaog komne ot sumene agha nubu sirikne uao.
19 As nubu uro soro kalurop as Babel eneko pogto wilindi nenep taoba,
mog so'o tala-tala urop nimiri soro kalurop as loba tahio.
Undo uro yabiongena,
as soro kalurop as Babel nimiri samenag malia ulamekti,
ulamongne sembe Allahri ekon tahio komdi,
lunuro opsio.
“Lunuro opsinun,”
aro seneraghori,
as soro kalurop as nubunge Babel nimi taneko sembe Allahri nimi waro loba nembahinepne kau lomag liroba sinag pelengero ikitsio.
20 Mag longo kanektop mog so'o ni magti niknibahioba,
orog taoba,
yim babe ni kom tao.
21 Luli wana imag agha kirik saogne telamori,
nimi so'oag nimi olamsio.
Luli wana imag agha telamonge neneko luli wana nubu sirikne ikin sirik uropne telamsio.
Luli wana nhon-nhon ikinna,
50 kilogram saog urop luli wana imag agha mag saog uro telamori,
nimi olamsio.
Luli wanari nimi olamsionge nene sembe mog so'oag nimi maikno sirik seklelamongdi,
Allah Imagne poneko sembe san tiliplamonga ka'ebahinori imno.