Allah arukna malaikat saekpareri nimi opsineba saekpare salelameka
15
Nari imag tiwalengelamnori,
imnonge kekneba,
“Yaghe,”
senenne nimiri babe ngalagtopne imag tiwalengkano.
Allah arukna malaikat saekpareri nimi loba nembahineba saekpare komoptopne sale-sale yabiamongba ipsino.
Nimi loba nembahineba saekpare taneri nimi loba nembahile taneogna,
“Wene komopto uro yabil,”
aro Allahri nimi waro ohinne sae topleri komobitlul.
2 Neneko uro yabioba,
kemelamnoag agha mag longorop mag sin whiri yame-yame uropba,
auk poghap ma'aro longoroba imno.
Mag abolag aneko nimi sekamong nimi tanekona,
lebe aroba yonge nenekoag pharop koma khaptop nimi sekamong.
Sin samenag mog so'oag wamonga,
lebe aroba yonge neneko si lunuro a'ilinne kekneba sin nongag torop kom.
Sin nongag torop koma el yame sunumna babe kiptop komdi,
khapto wamongne pere agha lebe aroba yonge neneko luknubaongdi,
wene imag mag longorop mag neneko abolag sekamonga imno.
Sindi saeag saelbamong nena,
pingpong yubu lilim neneroba kecapi Allahri tatsiogpa,
salelamonga imno.
3 Sindi sepna seplamongne,
Allah arukna Musa ponekori sepna babe,
Pham Domba Meri sepna babe sepna seplamong.
Sepna seplamongne lilimna ane,
“Nuni Allah nia mangkina mikip uro Saelba Ulamsilamne,
andi ulamlamne sembe nimiri,
‘Yaghe,’
senenne agha ngalagtopne ulamlam.
Anna nimi sisa mog so'o tala-tala urop nimi sembe Yubu Sia Lenne wamlam.
Sik uropne aghabog ulamlamdi,
porog uro ul palamlam.
4 An mo sembenga orogne wamlamba,
an saog uropne orog wamla.
Nu Saelba Uhiropne wamlamne,
nimi niri an log uro kiplangkukang.
An si kiptop kom nimi nhon babe wamnep kom.
Andi porog sirikne ulamlamne ni lag tal ane sembe,
mog so'o tala-tala urop nimi ni an whingag u amupto pulingkina an omeklangkukang,”
aro sepna seplamong.
5 Neneko uro yabioba,
imag tiwalengelamnoag agha Allahri Mem Ae Allahri nimiag salag paip tangtop yubu paia urop kalun ae aneko ina kuptop wamoba,
Allah omektobag mem urobag imno.
6 Wamoba kemelamnoag agha Allah arukna malaikat saekpare tanekona,
nimi loba nembahineba saekpare saelbanep malaikat taneko Allahri Mem Ae lomag taoa lanalamonga ipsino.
Sindi ag enekamong nena,
ag wet purum winne agha wetnerop ag sembenga orog ag,
haing omom urop ag agha enekamongba ipsino.
Sindi saramag enekamong ana,
leng-leng aroba emas agha sunuroba saramag ek wa'aneropne wanwanoro enekamongba ipsino.
7 Allah arukna malaikat saekpare taneko Allahri Mem Aeag agha lambaongba,
lebe aroba kamag uropne tombare Allah whingag omekto wamongne nhondi Allah arukna malaikat saekpare tanekoag tarel pihio.
Tarel pihiongena,
kau leng-leng aroba emas agha sunurop kau saekpare tarel pihio.
Kau lomag taneko Allah ya'ag kamag wamlange ponekori mog so'oag nimi waro nimi loba nenero opsineba to'opto wamoba,
tatsioba imno.
8 Tarelamsioba kemelamnoag agha,
Allahri Mem Ae anekoag Allahringe imang wareropneap,
eldi mikipneap abenekoag agha auk tobongkiploba,
mhong polesog seloa saog ulamoba imno.
Nimi loba nembahineba Allah arukna malaikat tanekori payaongne taneko anam komopto uro yabin komagna,
nimi nhon babe Allahri Mem Ae anekoag wa'inep kom.