Pham Domba Meap, Allah elmabo teng-tengne tanekoap sembe lebogha
14
Nimiri undo lebe arobari kekneba nongag palilamsionga ipsinori,
nari kemelamnoag agha Pham Domba Me aneko lag nenep tangka lebori,
Sion mainag sekamoa imno.
Elap nhon sekamong nimi ipsinongena,
sindi haioghag mome el Pham Domba Meri siap,
Iliri siap haioghag mome top tangtop nimi teng-tengne (144.000) sekamonga ipsino.
2 Undo sekamongba,
ka'elamnoag agha imag agha lilim lelamonge ka'ebanonge mag mhun nubungeri pelengelamloba,
lilim leroba ane saog uro limangdi taltalagto lilim leroba ane saog uro lelamoa ka'ebano.
Lilim lelamoa ka'ebanonge nenekona,
pingpong yubu nenerobari lilim lelamoa ka'ebano.
3 Nia mangkina Saelba Uhiropne puka uroba whingag aneko,
lebe aroba kamag uropne tombarea wamonga whingag aneko,
nubunang yubu epto wenehirop nangb whingag anekoa,
nimi teng-tengne (144.000) tanekori sepna wendogne seplamong.
Sindi sepna seplamong sepna anena nimi nhondi babe,
“Sepna si undo lel palamang,”
aro tibin nembanep komdi,
ora nimiri nelepto sepnep kom.
Sinba Allahri mog so'oag nimi agha taluro pipsiog nimi teng-tengne taneri agha el wamongdi sepnep.
4 Sin nimi tanekona,
kelaboag babe salehirop komdina,
sin nongagna,
“Nuni Allah whingag wali wamukap,”
aro mali nenehiroba paip tangtop kom.c
Sin undo uroptina,
Pham Domba Me aneko tala palamnaag babe sin nelepto pirop.
Nimi mog so'oag nimi ni anabiag agha sindi malia ulamangne sembe Allahri tam kom nenero kamna tobogti,
taluro pipsiog.
Eldi sin taulbahiogne neneag agha,
sin Allahap Pham Domba Me ponekoap sembe paip tangtop nimi o'omne wamong.
5 Sindi pamag orolenange lenne babe orog.
Undo wamong ane sembe,
nimi nhondi sinag malinge aro tam pimnep kom.
Allah arukna malaikat wilindi sembe lebogha
6 Nimi taneko ipsinori,
nari Allah arukna malaikat nhon imnongena,
im toman winang pirop saog uro palamoa imno.
Allah arukna malaikat anekori yubu poa palamongena,
Allah yubu walinge ya'ag uropne neneko,
“Nimi mog so'oag urop nimiag ambatsinun,”
aro pabalamo.
“Ambatsinun,”
aro palamongena,
nimi winip tangto mo sektoba negara nhin nimiap,
nimi sisa nhin nimiap,
yubu a'ero-a'ero lerop nimiap,
mog so'o tala-tala urop nimiap,
“Sin nimi niag yubu walinge ambatsinun,”
aro palamo.
7 Allah arukna malaikat anekori yubu nubu uro lelamori,
“Allahag log uro wamlulom.
El nubunge wamlange sembe paliag nenero kiplamlulom!
Mog so'oag nimiri sa'a-sa'a uropne sembe wene Allahri tam karepto pimnual.
El imap so'oap sumbaogti,
mag nubu uro longorop mag sumbaogti,
mag lu ni wamlange sumbaogne poneko yabu sanukto pulingkina u amupto omeklamlulom!”
aro wene alamo.
8 Allah arukna malaikat samenne neneko wamoag phendepne amik yaori,
yubu lelamori,
“Wene loba tal!
As soro kalurop as Babel nubunge eneko tapto loba tal!
As Babel nimiri samenag malia ulamong nena,
nengaboap salik-malik walep tangtop kelabori nimi sae kiliro mag yonge tebatsiro nenek nenelamsilori,
wana tohiro nengaboap walep tangka
malia ulamloa saog uro ulamong.
As Babel nimi tanekori mog so'o tala-tala urop nimi wana tohiro
loba nenelamsiongba,
Allah wailag nembaong.
Aghana wene as Babel neneko loba tal!”
aro wene alamo.
9 Allah arukna malaikat phende abeneko wamdongag,
wilindipne neneko yaori,
yubu nubu uro lebog.
Yubu lelamori,
“Nimi etneri lebe aroba anekoap,
el lebe aroba maghag agha lanaropne yame sunumna nimi saeri sunuroba anekoap omekto yabu sanukto kiplamleri,
lebe aroba anekoringe kekneba eldi haioghag to,
eldi saeag to,
toamle tanena,
10 Allahri yo senenne nimi enekori eldamneag apto paip tangkamlul.
Allahri undop nimi waro opsinepne nenekona,
nimiri anggur mag yo orangeap ma'aban komne mag ma'i lomag ikto piploa saog uro,
lebe aroba neleptop nimi sembe Allahri sinag yo aghabog ikto pelengkahileri opsilul.
Nimi eneko seklenne seklebalul nena,
Allah arukna malaikat sol walinge whingag babe,
Pham Domba Me whingag babe,
aukag tapto song mali auk singina iba ua urobag agha seklena seklebalul.
11 Auk mhong nimi taneko seklenne seklebaukangne mhong kukto ya'ag uro walelamle paghabog wamlul.
Sindi lebe arobaap,
el yame sunumna saeri sunurobaap omekto yabu sanukto kiplamikti,
lebe aroba anekori kekneba nongag tobik tanena,
sin seklebaukang nena,
inipna kwelekna seklena seklelamik paghabog seklelamukang,”
aro wene alamoa ka'ebano.
12 Ane sembe,
Allah eldamneri wepsirop mabo wamapne eldi aruksirop yubu kasmi agha salero ul palamukap.
Seklenne wamleba,
Yesusag sikne aro wana paliro seklena babe seklelapmundi,
wana khapto wamlulom.
13 Undo uro yabioba,
nen ka'elamnoba,
yubu imag agha lelamori,
“Yubu nene mome tobe.
Wene agha nimi etne nu Saelba Uhiropne ponekoap ma'ap tangtop nimi agha tebaik tanena,
sin wana yeng uro wamukang,”
seo.
Wene seoba,
Allah Yame Walingeri samoro lelamori,
“Otsik lepla.
Tebaikpa sin Saelba Uhiropne poneko sembe samenag kilim weanga awe tolamangne sinap nhon Imagne whingag lag talul.
Ane sembe,
tebaik sum eneko sindi awe tolamangne libikti,
tektek papto wali wamukang,”
aro yubu lelamoa ka'ebano.
“Imagneri karog saekom-saekoma karepto pololamoa imno,” aro ambatsiogha
14 Undo uro yabioba,
kemelamnoag agha toa solomne lag tao.
Toa solomne alibag aneko imag uropne mog so'oag nimi taogne saogha nhon pukamo.
Eldi usoghag aneko paliag tangtop nimiri kwiria usoghag elektoba leng-leng aroba emas agha sunuropne elekamo.
Eldi saeag saelbamo ana,
karog si yonge kwanektopne agha kwaneng roti yo'o karepto yongorop karog agha saeag saelbamoba imno.
15 Imnori kemelamnoag agha,
Allah arukna malaikat nhon Allahri Mem Aeag agha lanap tangka yabal togho.
Lanap tangom agha lebori yubu nubu uro el toa alibag pukamonge enekoag,
“Wene wana whi talba,
yongorop li saog wamla ane sembe,
karog saelbom agha saekom-saekoma kareplamlonga saog uro sae nginikom agha mog so'oag nimi wimbahilulam,”
alamoa ka'ebano.
16 Wene seoba,
el toa alibag pukamonge ponekori karog tobom agha saekom-saekoma,
mog so'oag karepto pololamoa imno.
17 Nari nen kemelamnoag agha Allah arukna malaikat nenne Allahri Mem Aeag imag agha lanalamoa imno.
Eldi babe yongoro tongorop karog yonge nhon saelbamoa imno.
18 Nen kemelamnoag agha Allah arukna malaikat nenne Allah sembe aukag tamnep hao sinag agha auk saelba urop malaikat aneko yao.
Yaori karog yonge saelbamo malaikat anekoag yubu nubu uro lelamori,
“Mog so'oag haing anggur wana whi tal ane sembe,
karog yonge saelbamlama ane agha mog so'oag haing anggur wana whinge tagnepne karog agha karebel pululam,”
alamoa ka'ebano.
19 Wene seoba,
Allah arukna malaikat anekori karog tobom agha saekom-saekoma,
haing anggur wana mauamonge koag agha karepto poloro tobori,
anggur wana loltero pelengenag lang-lang aro tol toglamo.
Anggur wana loltero pelengenag anekona,
nimiri anggur wana yan ingisaplamlongdi,
mag loltero ikto tobongkiplonga saog uro,
Allahri nimi yonge waro yan ingisapsileba,
eneng lanaro tebaukang.
20 Anggur wana lolterobag anekona,
as soro kalurop asag lolteban koma paiag sip agha yan ingisapto loltel pirop.
Anggur wana lolterop mag loltelamoba,
la'inilamo ana nimi eneng agha mag yabirop mag saog uro la'inilamoa palamo.
Nimi eneng la'iniro yabirop mag saog uro yabalamonge imno ana,
nimi purukanep tanena,
sa'oag waelbanep.
Nimi eneng mag saog uro palamo ana 300 kilometer palamoa imno.