Lebe aroba yonge mag laut longorop maghag agha lag taogha
13
Paghae sel-sel aneko mag laut longoropne abolag sekamoa kemelamnoag agha,
lebe aroba yogne eldi pinu yagne sa'obare wamoba,
eldi usog saekpare wamonge mag laut longorop mag lomag agha lanalamoba imno.
Eldi pinu yagne sa'obare tanekoagna,
yubu sia lerop nang kwiria usoghag elektoba saogne sa'obare,
pinu nhonag nhon,
nhonag nhon elek-elek yabiamo.
Eldi usog saekpare tanekoagna,
si engeroba Allah san tiliptop si engeropne eldi usog saekpare ni tanekoag mome toro paliroba imno.
2 Nari lebe aroba imnoa anekona,
si yoaba tutul wamloa saogne imno.
Eldi yanna,
pai kam beruang nubu kam agha norop kamdi yan saog wamoa imno.
Eldi uram imno ana,
si yoaba singa mikipne si ka'en saog wamoa imno.
Elag mikipne taongena,
paghae sel-sel anekori el saeag mikipne wamonge lebe aroba nenekoag piboba,
paghae sel-sel sae taloa saog el yubu sia leropne mikipne tao.
Yubu sia lero wamoba,
paghae sel-sel aneko eldamneri ni mog so'o saelba uhiro yubu sia lelamloa saog,
lebe aroba nenekori saelbamsio.
3 Lebe aroba el usog saekpare wamonge taneko agha usog nhonag imnongena,
usog neneko nimiri oboba,
ya'ag tebanep aghana,
meneng aneko kut tangkamoa,
wali taloa saog meneng el usog nhonag imno.
Meneng wamonge wali taoba,
mog so'oag nimi ni wamloa tanekori lo'om seongdi,
lebe aroba nenekoag neleplamong.
4 Paghae sel-sel anekori eldi saelba unne mikipne lebe aroba anekoag taroa sembe,
mog so'oag nimiri paghae sel-sel aneko omekto phalamonga imno.
Sindi omekto phalamongdi yubu lelamong nena,
“Lebe aroba nene wamla saog nena,
nhon wamla kom!
Elag babe tanna mal taro luknubanep kom,”
aro wene alamonga ipsino.
5 Lebe aroba aneko yubu lemnep taori,
eldamne sembe maiptangtop yubu lelamori,
Allah san tiliplamo.
Lebe aroba anekoag mikipne tao andarina,
hengkun wilindiap wal no'opbareap lebe aroba anekori mog so'o saelbamsio.
6 Lebe aroba aneko yubu lemnep taori alnibaori,
Allah eldamneap,
el si engerobaap san tilipna imbao.
Allah imag ua urobag babe,
elap nhon imag ua ulamangne babe san tiliplamsio.
7 Mikipne lebe aroba nenekoag taori,
Allah eldamneri weptop mabo sembe,
“Wea naglamsineri,
oro luknulamsunun,”
aro ulamori,
Allah elmabo luknulamsio.
Luknulamsiori mikipne el saeag wamongena,
nimi sisa ni nimiap,
yubu a'ero-a'ero lerop nimiap,
mog so'o tala-tala urop nimiap,
nimi winip tangto mo sektoba negara ni nimiap sembe yubu sia lelamori saelbamsio.
8 Lebe aroba anekoag nimi ni mog so'oag urop nimiri omekto phalamukang.
Sindi elag phalamik nimi ni tanekona,
Imagne ponekori sin sembe,
“Ya'ag kamag wamukang,”
aro nimi si topsin kom ane sembe,
sindi lebe aroba nenekoag omekto phalamukang.
Imagneri nimi kamag wamnep nimi sembe,
“Ya'ag kamag wamukang,”
aro nimi si toro mome nhonag mome toro pipsiog.
Kamag wamnep nimi si tohirop mome nenekona,
imap so'oap sumbaog sumag agha,
Imagneri karepto pibogti,
“Amik Pham Domba Me poneko nimiri obikpa,
nimiri malia ulamangne sembe tebalul.
Tebalul aghana,
nimi aneap,
nimi aneapti,
amik Pham Domba Me ponekoag wana palilamikti,
ya'ag kamag wamukang,”
aro el wamog.
El wamogti,
karepto pibogpa,
nimi taneko si mome Pham Domba Meringe nenekoag mome top taog.
Ane sembe,
sindi lebe aroba yonge nenekoag phalamukang kom.
9 Aori ka'ebalomne nimi niri seneragto saelbamlulom.
10 Allahri,
“Nimi nene nimiri sae kaupto pabukang,”
aro karepto pipso tanena,
nimi eneko sae kaupto pabukang.
“Nimi nene mal tarop karog agha nimiri ya'ag obukang,”
aro karepto pipso tanena,
nimi eneko mal tarop karog agha tebalul.
Ane sembe,
a'un Allah eldamneri wepsirop mabo seklenne wamleba,
elag sikne aro wana paliro seklena babe seklelapmundi,
wana khapto wamlulom.
Lebe aroba so'oag agha la'iniroba lag taogha
11 Nari kemelamnoag lebe aroba yogne mog so'o lomag agha la'inilamoa imno.
Eldi pinu yagne phende wamo ana pham domba pinu saog wamoa imno aghana,
eldi yubuna paghae sel-seldi yubu saog lelamoa ka'ebano.
12 Lebe aroba samen mag longorop maghag agha lanaropne nenekori el mikipne neneko lebe aroba amik so'oag agha lanaropne nenekoag piboba,
mikipne neneag agha yubu tipto ambarelamsiori,
“Lebe aroba samne si nubu talul,”
aro amikne nenekori yepto ulamo.
Lebe aroba samne nenekona,
samenag nimiri oboba,
tebanep aghana,
wali taonge lebe aroba wamo.
Lebe aroba samne neneko amikne nenekori yepto ulamo.
Lebe aroba amikne nenekori,
“Nimi ni mog so'oag wamang nimiri el omeklamukang,”
aro mikip uro aruklamsiori,
lebe aroba samen maghag agha lanaropne yepto ulamo.
13 Lebe aroba amik so'oag agha lanaropne nenekori ulamonge,
“Yaghe,
mane agha ulamla,”
senenne kekneba nubunge maikno ulamo.
Nimi ni whingag agha ulamongena,
imag agha auk mog so'oag pelengel alamonge babe ulamo.
14 Lebe aroba samen maghag agha lanaropne nenekori lebe aroba amikne nenekoag mikipne piboba,
“Lebe aroba samne si nubu talul,”
aro lebe aroba amikne nenekori,
“Yaghe,
mane agha ulamla,”
senenne kekneba ulamo.
Ane sembe,
lebe aroba amikneri kekneba ulamonge neneag agha mog so'oag nimiri orolenange sik senelamong.
Lebe aroba amikne nenekori mog so'oag nimi aruklamsiori,
“El samenag nimiri mal tarop karogti oboba,
tebanep aghana,
wali taonge neneko sembe,
‘Kibukap,’
aro el yame sunumna sunuro sekitlulom,”
aro arukahio.
15 Aruklamsioba sunulamongba,
lebe aroba amik so'oag agha lanaropne nenekoag mikipne tao andarina,
eldi lebe aroba samne yame sunumna sumbaongne nenekoag hain epna tarelamoba,
lebe alamori,
yubu lelamo.
Yubu lelamoba,
nimi etneri yame sunumna nenekoag pharo omeklamsiong kom tanena,
yame sunumna nenekori yubu leropne sunsunum uro nimi eneko ya'ag olamsiong.
16 Nimi ni nubungeap,
ologneap,
tup nimiap,
saeagha orog nimiap,
nimi arukna urop nimiap,
mo sektop nimiap,
“Yeng to,
karong to,”
senen nimi niag,
lebe aroba amik so'oag agha lanaropne nenekori aruklamsiori,
“A'undi sirik saeag to,
haioghag to kekneba nhon pipsiikpa wamlul,”
aro arukahio.
17 Kekneba saeag to,
haioghag to,
palilamsiongne anena,
nimi nhondi nongag lebe aroba si engeroba mome torop kekneba palilamsiongba,
nimi nenne nongag lebe aroba si lunuro a'ilina mome torop kekneba palilamsiong.
Nimi etne el nongag kekneba nene orog pagha tanena,
nimi enekori,
“Kamna kapto tomnun,”
sembanep aghana,
kamna kapto tomnep kom.
Apna nimi enekori,
“Pimneba ora nimiri kamna kapto tobukang,”
sembanep aghana,
eldi nongag kekneba nene orog pagha tanena,
eldi saeagha babe ora nimiri kamna kapto tomnep kom.
18 Wana hekahinep yubu ane ambatnuahinne ka'ebamundi seneragsut!
Lebe aroba si engeroba lumbanep a'ilina nenena nimiri a'iliroba wamla.
Ane sembe,
nimi etneri el wali uro seneragnep tanena,
lebe aroba si engeroba lunuro a'ilina nenena seneraglamleri,
el tanep.
Lebe aroba si engeroba lumbanep a'ilina anekona,
teng tom tarabare eptopne sa'o tarabare (666) wamla.