Paghae sel-seldi, “Kelabo anekori me toro tenun,” aro ulamogha
12
Tiwalengelamnoag agha imag lag taongena,
amik uro yabinepne sembe kekneba,
“Yaghe,
mane agha uro yabil,”
senen kekneba nhon lag tao.
Kelabo nhondi el nongag enekamongena,
heng agha nongag wangkamori,
wal alibag sekamo.
Eldi usoghag wamongena,
paliag tangtop nimiri kwiria usoghag elektoba saogne,
imberea aobare agha sunurop kwiria usoghag elekamo.
2 Kel eneko memon wamoba,
me mangaro anep peramdi,
memon telamonge og lelem ngolol alamo.
3 Ngolol alamoba,
imag kembi agha nimiri,
“Huro yabilul,”
senenne kekneba nhon lag tao.
Imag lag taongena,
paghae sel-sel nubu sirikne,
eldi konna uwong wamoba,
eldi usogna saekpare wamoba,
eldi pinu yag nena sa'obare wamo.
Eldi usog saekpare tanekoagna,
yubu sia lerop nang kwiria usoghag elektoba saogne saekpare,
usog nhonag nhon,
nhonag nhon elek-elek yabiamo.
4 Eldi amu eneko kepsengelamo ana,
ni imberea imag wamonge palu wilindi nenep tangkamong aghana,
palu phende imag ya'ag wamongba,
palu wilindipne lulubom agha paghae sel-sel nenekori wenero mog so'oag pelengelamsio.
Paghae sel-sel eneko kelabo me maghan telamo kel eneko whingag sekel pina,
“Me mangal tole abeneko,
me aneko toro tenun,”
aro ulamo.
5 Kel enekori me nengabo me mangaro ao me enekori nimi sisa ni tala-tala mog so'oag wamang nimi sembe yubu sia lero saelbamsilul.
Nimi nubungeri salerop kame tunguna mikipne,
besi agha sunurop kame tunguna saelbom agha nimi saelbamsilul.
Ane sembe me aneko kel eneko saeag agha Allahri pelepto kiliro tobori,
Allahri mog so'oag saelba uhiro puka urobag aneko poa pio.
6 Unuaoba kel eneko merea lebori,
pai aldesag pioag aneko Allahri el sembe weroba wamoag pio.
Pioag aneko el yae paiamlul nena,
hengkun wilindiap wal no'opbareap ane yae paiamlul.
7 Kel eneko pai aldesag pio ana,
anam pin komag,
imag mal taoba,
imagnangdi mal talamang.
Allah arukna malaikat sikindo Mikhaelap,
Allah arukna malaikat Mikhael umag wamong nangap sindi,
“Paghae sel-sel aneko luknubaukap,”
aro mal talamong.
Paghae sel-sel anekoap,
imagnang malaikat elag sip tangtop nang tanekoapti,
“Mikhael ilipsaboap luknubahukap,”
aro mal talamong.
8 Mal talamong aghana,
Mikhaelap ilipsabo Allah arukna malaikat walinge tanekoapti paghae sel-sel aneko ilipsaboap oro luknubahiong.
Oro luknubahiongdi,
paghae sel-sel anekoap,
ilipsabo tanekoap imag agha oro yagsiong.
9 Paghae sel-sel nubu paghae eneko oro tobogto yag lambahiong.
Paghae sel-sel nenekona,
yum-yum samenag wamog paghae,
eldi nimi ni mog so'oag nimi haing kunuhiro,
“Orolena sik sembaukang,”
aro ulamsiogti,
ulamsilne wamla.
El phia yonge sikini nubunge si Satanas engeropne wamla.
Elap,
imagnang malaikat elag sip tangtop nangap oro luknubahiongdi,
imag agha mog so'oag tobogto pelengel ahiong.
10 Neneko uro yabioba,
ka'elamnoag agha yubu nubu uro imag agha lelamonge ka'ebano.
Ka'elamnoba,
“Phia sikini nenekori nungkabo Yesusag wana palirop nimi sembe,
‘Malia ulamang,’
aro Nuni Allah whingag sop-sop sinag kweleknag san tiliptop yubu loloro teba'en nenelamsio.
Aghana,
wenena Allahri phia sikini neneko tobogto pelengkao.
Ane sembe,
wene ko'o eneogna Allahri elmabo taluro pipsinep ko'o wamla!
Wenena,
Allahri el mikipneag agha nia mangkina Saelba Ulamsilne lag tal.
Eldi wepto poghogne Kristus ponekori saeag mikipne pibogpa,
wene lag tal.
11 Nuni Allahri Pham Domba Me el saeag mikiba pibogne obekpa,
eneng lanaro tebaog.
Tebaog aghana,
eldi eneng lambaogne nenekoag agha
nungkabo Yesusag wana palirop nimi tanekori phia sikini neneko luknubaong.
Nungkabo tanekori yubu sikne lag nenero lag phoro ambatsiropneag agha
san tilipto leropne phia sikini neneko oro luknubaong.
Sindam nimi sembe,
‘Na o'omne,’
seneptan koma,
‘Omneika babe wana khapto wamnun,’
aro ulamong.
12 Ane sembe,
a'un nhin Allah imag ua urobag wamlomne,
wana yeng uro wamlulom.
Aghana phia sikini aneko mog so'oag kulukul aori,
eldamne sembe el wamlangena,
ko'o weag uro wamnep komdi,
eldi wanaag yo nubunge wamla.
Ane sembe,
a'un mog so'oag ua uropneap,
mag laut longorop mag nubunge ua uropneap,
eldi wana yo senenneag agha a'un maiknoro seklebalulom,”
alamoa ka'ebano.
13 Paghae sel-sel anekori,
“Na mog so'oag pelengel aneong,”
aro el taori,
kel nengabo me mangkao kel eneko,
“Omnun,”
aro sarekereplamo.
14 Aghana kel enekoag nubu winang abeao ol phende elag tarongba,
kel eneko Allahri el mo'obanep wea urobag,
“Pai aldesag sip walero pilul,”
aro ol elag tarong.
Ol phende elag tarongba,
Allahri el mo'obanebag pioba,
paghae sel-sel anekori kel eneko omnep koma urobag hengkun wilindiap wal no'opbareap wamo.
15 Undo wamoba,
paghae sel-sel anekori,
“Kel eneko magti niknibaleba tebalul,”
aro mag nubu uro yabirop mag momagto pho aro kel enekoag sip ebo.
16 Kel enekoag sip ebo aghana,
mog so'o si a'aro lelamlo saog ulamori,
paghae sel-sel nenekori mag momagto pho aro ebonge neneko mog so'o selengaag timbao.
Ane sembe mog so'o anekori kel eneko yebongeag agha magti obo kom.
17 Ane sembe paghae sel-sel anekori kel enekoag yo sembao.
Yo sembaori,
pina lebori,
“Kel enekori nimi sisa urop nimiap mal tabukap,”
aro ol pihio.
Kel enekori nimi sisa wamang nimina,
Allahri aruksirop yubuag nelepto ul pirop nimi,
Yesusti sikne lag nenero ambatsiog yubu saelba ul pirop nimi wamang.
Sin nimi taneko paghae sel-sel nenekori,
“Opsinun,”
aro ol pihio.
18 Ol pihiori,
paghae sel-sel aneko mag laut longorop mag abolag sekamo.