Allahri yubu silimu tiptop nimi phende ipsiogha
11
“Ambarelamsululam,”
aro arukaneoba ka'ebanoba,
nanag tatneonge,
ae soropne porog o'obaneba kame nanag tatneo.
Tatneori nanag yubu lelamori,
“Sekmendi Allahri Mem Ae soroba nubunge sunul pululam.
Allahri Mem Ae anekoag Allah sembe pail pina aukag tarobag babe nubu uroba sunul pululam.
Sunul pimendi,
Allahri Mem Ae anekoag Allah omektop nimi wamangne babe a'ilbahilulam.
2 Ot andi Allahri Mem Ae sunulapmenneag agha,
Allahri Mem Ae aramag abolag sipna sunul peheng kom.
Allahri Mem Ae aramag abolag sip mog so'o tanekona,
sin nimi sisa Yahudi kom nimi Allah omektop kom nimi sembe wa'inebag liro pipsiog ane sembe,
mog so'o nene sunuro a'ilbaheng kom.
Sin nimi sisa Yahudi kom nimiri as aneko luknuro yingkina saelbamika,
hengkun wilindiap,
wal no'opbareap as soro kalurop as Allahri,
‘O'omne,’
aro weptop as aneko ingisaplamukang.
3 Allahri as soro kalurop as neneko ingisaplamukang aghana Allahrina,
‘Nari yubu tiptop nang phende abenekoag yubu tatsinenge hengkun wilindi nen ma'aro wal no'opbare yubu sikne agha lag nenero ambarelamsurukang.
Nari yubu silimu tipto ambarelamsirik nang abenekori sindi wana ikin uro senenne agha ag malinge wangkarikti,
nari yubu silimu tipto ambarelamsurukang,’
seo,”
aro ambatneo.
4 Sin Allahri yubu silimu tipto ambatsirop nang phende abenekona,
kal zaitun wana maurop kal yo'o phende abeneko wamdang.
Sin phende abenekona,
Allah imap so'oap saelba uhiropne whingag auk pog tiniro iktoba yan sektopne abeneko wamdang.a
5 Nimi etneri,
“Sin abeneko opsukap,”
aro ulamsiik tanena,
Allahri karepto pibog nena,
“Sin abenekori pamag agha auk lanalamleri,
sin aisa nenep tangtop nimi taneko opsilul,”
aro karebaog.
Ane sembe sik undo uro yabilul.
Nimiri,
“Sin abeneko opsukap,”
aro ulamsiik tanena,
sin abenekori pamag agha auk lanaropne ulamdikpa,
nimi taneko aukti tehilul.
6 Allah yubu tipto ambarelamsirik ko'o enekoag Allahri sinag mikipne pipsio andarina,
mag imag agha kulukul anepne sindi yubu leptikneag agha kom taleba,
mag timbalul kom.
Allahri mikipne sin phende nangag pipsionge neneag agha,
mag luap mag longorop maghap ni wamlange sin abenekori,
“Eneng talul,”
aro nembanep.
Allahri mikipne sinag wamla andarina,
sindi wanaag seneragna sunsunum uro,
“Undo-undo ulamnemeba,
mog so'oag loba nenehiroba nhon sao,
nhon sao uro yabilul,”
senenne sunsunum uro sik talul.
7 Sin abenekori Allahri yubu sikne lag nenero ambatsiroba komopto ambatsirikpa,
lebe aroba selenga anekoag agha yalenge nenekori sinap mal talamukang.
Mal talamukang aghana,
lebe aroba yonge nenekori sin abeneko oro luknubahileri,
ya'ag olopsilul.
8 As soro kalurop as nubunge wamdikag anekona,
samenag sikin Saelba Uhiropne poneko babe nimiri el kalag sipto obekpa,
amik babe lebe aroba nenekori sin abeneko luknuro opsileba,
as anekoag inaag tebarika maloamtukang.
As soro kalurop as nene likiptop yubuag nimiri engerop nena,
Sodomap,
Mesirap,
aro engerop.
9-10 Sin tebarika nong teptoba abeneko as soro kalurop as nubunge tanekoag ik wilindiap,
pogtop sumap ina pirobag agha mo teploamtukang.
Allahri yubu silimu tiplamdik nimi abeneko anam teban koma,
sin abenekori ulamdikneag agha,
mog so'oag urop nimi maiknoro seklelamukang.
Ane sembe sin aisa nenep tangtop nimi mog so'oag wamik nimi tanekori,
“Sin abeneko tebarangne wali,”
aro wana awi uahileba,
sani yoro wana wali nenel tana amoptangto tarel dalamukang.
Nimi sisa ni nimi anabiag agha,
yubu a'ero-a'ero lerop nimi ni anabiag agha,
mog so'o tala-tala urop nimi ni anabiag agha,
nimi winip tangto mo sektoba negara ni nimi agha,
sindi nong teptoba abeneko kemehiro wana awi wamukang.
Sin nong teptoba abeneko kemelamsiikti,
“Nong teptoba abeneko so'oag sikil ahiseng kom,”
aro iriklamsiikpa,
nong teptoba abeneko inaag agha wamtukang.
11 Ik wilindiap,
pogtop sum enekoap teptoba abeneko inaag mo wamdik aghana,
amik uro yabilulne sembe imnonge ane.
Allahri eldi yubu silimu tiptop nang abenekoag hain epna pho aro tobongkipsioba,
kamag tarong.
Allahri sin abeneko kamag nembahioba,
sin sektongpa,
sin ipsiong nimi taneko log maikno uahio.
12 Allah yubu silimu tiptop nang phende abeneko sektongpa,
yubu nubu uro imag agha sin yoplamsioa ka'ebarongne,
“Ane walel arurom!”
alamoa ka'ebarong.
Sin aisa nenehirop nimi whingag agha sin abeneko imag walelamdongpa,
toari niknibahio.
13 Walelamdong abeneko sa'uma nubunge ulamori,
ae soroba as enekoag wamonga maiknoro loba tao.
Ni ae soroba as enekoag wamongne ma'abi agha pogto sa'obare neneptan tanena,
ae pogtopne supnabare kwerek tao kom aghana,
ae pogtopne sa'onge kwerek tao.
Sa'uma nubunge ulamo abeneko pere nimi teng-tengne (7.000) nimi sa'uma anekori ya'ag opsio.
Undo opsioba,
nimi nenne kamag wamong aghana,
Allah imagne sembe sin log lelem,
“An mikipne wamlam,”
aro Allah paliag uropne lag nenero kiplamonga ka'ebanori imno.
14 Nimi sekleroba phendepne neneko uro yabioba imno.
Aghana kembalulom!
Nimi sekleroba ik wilindipne uro yabinual.
Ma'i trompet saekneag Allah arukna malaikatti pho aro yubu lebogha
15 Nari kemelamnoag agha,
Allah arukna malaikat saekne nenekori eldi ma'i pho alamo.
Pho alamoba,
ka'elamongpa imag agha yubu nubu uro lelamongdi,
“Wene mog so'oag nimi ni sembe yubu sia lenne nhonogne,
ot nu Saelba Uhiropne ponekori yubu sia lelamla.
Mikipne nene eldi saeag wamlaba,
eldamneri wepto poghogne Kristus ponekoag ni saeag nembaog.
Kristus poneko saeag pibogpa,
yubu sia lero ya'ag uro saelbamsile paghabog wamlul,”
aro haum aro lelamong.
16 Wene alamongba,
yubu epto wenehirop nang tom tarabare nang Allah whingag pukamong nang taneko sikin nubunang puka urobag agha kulukul aongdi,
yabu sanukto u amupto malingkina Allah omeklamong.
17 Allah whingag u amupto malingkina omeklamongdi,
“Nuni Allah nia mangkina mikip uro Saelba Uhiropne wamlamne,
yum-yum samenag babe Saelba Uhiropne wamlum.
Wene andi mikip phelektopneag agha
alniro ya'ag uro yubu sia lelamlamdi saelbamsilam.
Ane sembe,
‘Nuni wali saelbamsilam,’
aro kiplangkeap.
18 Sin tala-tala mog so'oag urop nimiri wana yo senenne agha yanghang alamsiong,
aghana wene andi sin sembe wana yo senero opsinep.
Wenena,
nimi ni teptop nimiri samenag ulamekne sembe andi tam porog uro kareptop sum eneko wene wamla.
Wenena,
andi arukna andi yubu silimu tiptop nimi tanekoap,
andi weptop mabori an omekto kiplangkeang nimi tanekoap,
ologne nubunge wene andi kamna tatsululam.
Aghana,
mog so'oagne loba nenehirop nimi sembe wene loba nembahilulam,”
aro Allahag omekto yubu lelamong.
19 Undo uro yabioba,
Allahri Mem Ae imag wamlange ina siram kuptao.
Kuptaoba ae lomag imnonge,
Allahap yubu nikne lebek yubu Allahri kirik alibag mome toro pibog kirik pimnep ae kal agha soroba neneko keknep wamoa imno.
Keknep wamoba,
lepna tingom-tingom alamoba,
limang yubu lilim mu aro talaglamoba,
sa'uma ulamoba,
kirik wana saog luli wana imag agha kuluklamonge nubunge telamoba imno.