Allah arukna malaikat nhondi mome toro pairoba ologne tarelaogha
10
Nari tiwalengelamnoag agha,
Allah arukna malaikat yogne mikipne imag agha kulukul alamoba tiwalengkano.
El kulukul alamonge nongag toa agha eneklamloa saog wamoba,
eldi usog alibag mano yame wiriktangtoba tiwalengkano.
Eldi whingna heng tingiropne saog wamoba,
eldi yanna aeoghag auk pog tag-tagha singilamloa saogne wamoba tiwalengkano.
2 Eldi saeagna,
mome toro pairopne wa'amogtoba ologne saelbamoba,
mome eneko eldi saeag sangaro wamoba imno.
Eldi sirik yanna mag laut longorop mag sin nubungeag ingkamori,
waneng yanna mog so'o mektopneag ingkamoba imno.
3 Undo sekamori,
eldi yubu haum aro lelamongena,
si yoaba singari kau arop saog uro nubu uro haum alamoba ka'ebano.
Allah arukna malaikat anekori yubu wene aro haum seo tanena,
limang lilim leroba ik saekpare samoro elag taltalang alamoa lilim ka'ebano.
4 Limang lilim leroba ik saekpare taltalang alamoba,
nari mome tomnun aro ulamnoag aghana,
nari imag agha yubu lelamonge ka'ebano.
Yubu lilim neneko ka'ebanongena,
“Limang saekpare tanekori yubu taltalagto alamangdi,
yubu lebangne tanekona mome toro pimna koma tognobalulam,”
alamoba ka'ebano.
5 Allah arukna malaikat yan tara mag laut longorop mag sin nubungeag ingkamori,
yan tara mog so'o mektopneag ingkamoba imno malaikat anekori,
eldi sae sirik sae imag sae towalengkamoba imno.
6 Undo sekamoba,
imno malaikat anekori yubu lelamogti,
Allah imap,
so'oap,
mag laut longorop maghap,
nia mangkina wamlangeap sumbahiogne poneko whingag agha salag lebo.
Allah ya'ag kamag uropne poneko whingag yubu mikip nenero salag lelamori,
“Yubu sikne agha lemnuan.
Nen ta'ap sen koma wene uro yabinep!
7 Samenag Allahri,
‘Uanun,’
senenne eldi arukna yubu silimu tiptop nangag ambatsiogpa,
tipto ambatsiek aghana,
tognoroba saog wamog.
Samenag Allahri tognoroba sinag ambatsiog aghana,
ko'o we uro wamna komag Allah arukna malaikat saekne nenekori mag ma'i pho alamleba,
Allahri tognoroba ambatsiogne sunsunum uro uro yabilul,”
aro salag lero pibo.
8 Imag agha yubu lelamoba,
ka'ebano yubu enekori nanag nen yubu lelamoba ka'ebano.
Eldi nanag lelamongena,
“Allah arukna malaikat yan tara mag longorop maghag ingkamlari,
yan tara mog so'o mektopneag ingkamlange poneko iplam.
Elag pimendi,
eldi saeag mome toropne wa'amogtoba sangaropne wamlange neneko tol pululam,”
alamoba ka'ebano.
9 Wene seoba pinori,
“Mome toro pairopne wa'amogtoba ologne aneko tatnululam,”
aro molbano.
Wene aro molbanoba,
Allah arukna malaikat anekori,
“Topmendi tululam.
Toro temenba,
andi mon lomagna og seklebalulam aghana,
andi pamagna pondog mag saog uro emem sekelul,”
seori ambatneo.
10 Wene seoba,
nari Allah arukna malaikatti saeag agha mome toroba ologne neneko tomnori teno.
Pamag telamnoagna,
pondog mag saog uro emem alamoba teno.
Aghana menaghanoag mon lomag og uaneo.
11 Tenoba eldi nanag ambarelamneori,
“Andi nen Allahri yubu silimu tipto ambatsinepneog wamla.
Nimi sisa a'ero-a'erop nimiap,
mog so'o tala-tala wamang nimiap,
yubu a'ero-a'erop yubu lerop nimiap,
yubu sia lerop nimi nubunangap Allahri,
‘Sinag uahinun,’
senenne andi yubu tipto ambatsinepneog wamla,”
aro arukaneoba ka'ebano.