9
Allah arukna malaikat lamne ponekori eldi ma'i pho seoba,
kemelamnoag agha imberea nhon imag agha so'oag timbaonge imberea imno.a
Imagne nhondi ina kupto serekto uaneba nhon imberea anekori saeag taroba,
saelbamoba imno.
Eldi saeag wamongena,
selenga nimiri we sumbanep kom selenga ina kupnepne sembe eldi saeag nembaoba saelbamo.
2 Imberea anekori selenga nimiri we sumbanep kom selenga aneko kuboba,
aneko toman agha auk mhong imnonge,
hao sin nubungeag agha auk loloropba,
auk mhong inibin tu alamloa saog auk mhong walelamoa imno.
Mhong selenga anekoag agha walelamonge nenekori hengap imap inipto lililoboba imno.
3-5 Mhong aneko warelamo abeneko pere wheng mog so'oag kulukul alamongba ipsino.
Wheng tanekoag,
“Pongoroba babe,
kal babe,
meroba babe,
a'undi tero loba nembaheng kom,”
aro sinag irikahio.
Irikahioba wheng taneko mikip tahiongena,
whengdi nimi si sapsiikpa,
seklebaikne yamnenengdi ohiroba saog seklebaukang.
Wheng tanekoagna,
“A'undi ualulom,”
aro ambatsiongena,
“Allahringe kekneba haioghag kekneba pairop kom nimi agha sarekerepto opsululom,”
aro ambatsio.
“Opsululom,”
aro ambatsio aghana,
wheng tanekoag Allahri iriklamsiongena,
“Whengdi nimi olamsiikpa,
teban koma seklelamukang.
Seklelamikne neneko wal lambare undo uro yabilul aghana,
wheng tanekori nimi olamsiikne agha nimi tebaukang kom,”
sembaori iriklamsio.
6 Whengdi nimi olamsiik ko'o nonokoag,
nimiri senen nena,
“Wal lambare abenekoag nu olamsiangba,
wali tebanun,”
senelamukang.
Sindina,
“Nu wali tebaukap,”
senelamukang aghana,
sin sembe tepnange weag wamlul.
7 Wheng taneko kembi agha,
mal tarop pham kuda saog wamo.
Nimiri,
“Mal tabaukap,”
aro wea uro,
“Pham kuda alibag pukamneri,
nimi sarekerepto opsinun,”
aro pham kuda nong nenekoag seng enekatsilong.
Pham kuda nongag seng enekatsilong saog uro,
wheng taneko kembi agha undo saog wamo.
Whengdi usog alibagna,
leng-leng aroba emas agha sunuroba kwiria usoghag elektoba saogne wamo.
Sindi whingna,
nimi whing saog wamoba imno.
8 Sindi hongna,
kelabori hong waronne saog wamo.
Sindi sina,
lebe aroba singa si yonge saog wamoba imno.
9 Wheng tanekori saramag lelem top tangtop ana,
seng kat sirikne enekamlonga saog uro lelem top tangtop.
Wheng tanekori olngendi yubu lilim lerop ana,
pham kuda maiknori kereta kililamnaba,
mal tal piropba,
lilim leroba ane saog lilim lerop.
10 Sindi amuna yamnenengdi ohiroba saog uro ohirop.
Sindi amu eneko yag uropti wal lambare ane mikip uro nimi ohiropne agha nimi seklelamong.
11 Wheng taneko sikini yubu sia lenne nhon uropti,
eldi sinag yubu poa yingkina lerop.
Yubu sia lenne poa yingkihiropne nenekona,
selenga urobag saelba uhiropne nenekori sinag aruksirop.
Eldi si Ibrani yubuagna Abadon,
Yunani yubuagna Apolion.
Eldi si nene sembe,
“Loba nenehiropne,”
aro engerop.
12 Loba nenehiropne ponekori wheng arukahioba,
nimi opsio abeneko pere,
“Sekleroba selekne,”
aro engeropne uro yabioba imno.
Uro yabioba imno aghana,
sekleroba phendepne yanualba,
sekleroba wilindipne babe amik yalul.b
13 Neneko uro yabioba,
Allah arukna malaikat no'opne ponekori ma'i pho seo.
Pho seoba,
ka'elamnoag agha,
yubu lelamonge Allah sembe pairo auk mhong towalengero tamnebag agha ka'ebano.
Allah whingag anekoa emas agha sunuroba Allah sembe auk mhong towalengero tamnebag wamogpa,
ingkis tombare nenekoag pinu yagne tombare wamogne nenekoag agha,
yubu lelamonge ka'ebano.
14 Yubu enekori Allah arukna malaikat no'opne pho arop ma'i saelbamogne ponekoag yubu lelamori,
“Allah arukna malaikat tombare mag nubunge Efrat inaag sae haing kaupto wamangne abeneko sae lopsululam,”
alamoa ka'ebano.
15 Wene seoba,
Allah arukna malaikat taneko sae lop taong.
Allah arukna malaikat sae kauptoba agha sae lopsiongena,
Allahri samenag,
“Ot heng ko'o neneag,
sumene sum,
wal neneag,
hengkun eneag amik sae lopsineba,
nimi mog so'oag nimi maikno opsululom,”
aro tam karepto pibog.
Eldi samen karepto pibogne sunsunum uro Allahri poglamsiori,
“Nimi ni mog so'oag wamangne ma'abi agha palu wilindi nembahin tanena,
nimi palu phende opsiseng kom aghana,
nimi palu wilindipne ni ya'ag opsululom,”
aro pogto sae lopsio.
16-17 Sae lopsioba,
nari haing uamna kwelekamna senenag agha ipsinonge,
pham kudaap,
nimi pham kuda alibag pirop nimiap ipsino.
Pham kuda alibag poa pihirop nimi mal tarop nimi ililamsinoba,
sin nimi teng-tengne wamonga nimiri a'elbahinep kom aghana,
“Dua ratus juta nimi wamang,”
aro yubu lelamonga ka'ebano.
Pham kuda alibag puka urop nimi tanekona,
sindi saramag besi agha sunuroba seng enekamongne,
seng auk wana saogne seng uwongne ipsino.
Seng enekamongne neneko,
haluwil saogneap,
kamongkai pun saogneap seng enekamong.
Pham kuda tanekori usog ipsino ana,
si yoaba singari usog saog wamongba,
sindi sika'enag agha la'inilamo ana aukap,
mhongap,
auk song malinge ibaap la'inilamoba ipsino.
18 Pham kuda tanekori si ka'enag agha aukap,
mhongap,
ibaap la'inilamo andarina,
nimi maikno tebaong.
Nimi ni mog so'oag urop nimi ma'abi agha palu wilindi neneptan tanena,
nimi palu phende teban kom aghana,
aukap,
mhongap,
ibaapti nimi palu wilindipne ni ya'ag opsionga ipsino.
19 Nimi ya'ag opsiong nena,
pham kuda tanekori mikipne si ka'enag babe,
amuag babe wamo.
Sindi amuna,
paghae usog saog uropne pomaghag sip yag la'arop.
Amu tanekori nimi olamsiongba seklelamong.
20 Nimi ni ma'aro palu wilindi neneptan tanena,
pham kuda tanekori nimi palu wilindipne ni ya'ag opsiong aghana,
nimi palu phende tebaong kom.
Aghana sin tebaong kom nimi tanekori malia seneragto ulamongne lipsin koma wamongdi,
phia phalamongne lipsiong kom.
Sin kamag urop nimiri tipto phia phalamongdi,
nimiri saeri sunurop mema phalamong.
Mema sunuroba leng-leng aroba emasap,
perakap,
besi uwongne sunurobaap,
kirikap,
kalap agha mema pharoba sunulamongdi,
phia phalamong.
Nimiri mema sunuroba ni tanekori sa'a-sa'a imnep komdi,
ka'ebanep komdi,
yabinep kom aghana,
mema sunuroba nenekoag agha mog so'oag nimiri tipto phia phalamong.
21 Apna sindi sop-sop malia seneragto ulamongne taneko lipsin koma,
nen tipto nimi ya'ag olamsiongdi,
phia si lerop miliag agha lelamongdi ulamong.
Kelabo nengabo salik-malik uro walel dalamongdi,
haogha tolamsiong.
Nia malia seneragto ulamongne taneko lipsiong komdi,
Allahag saombaong kom.