Mome wa'amogtoba sae werero kekneba saekne kologlamogha
8
Pham Domba Me ponekori mome wa'amogtoba sae werero kekneba saekne neneko kologhaoba,
imag taneko yubu lilim nhon orog wamoba,
heng ko'o olog pio.
2 Heng ko'o olog pioba,
nari kemelamsinoag agha Allah arukna imagnang malaikat saekpare taneko Allah whingag sop-sop sekamong malaikat ipsinoba,
ma'i pho aroba trompet saekpare Allah arukna imagnang malaikat saekpare tanekoag tarel ahio.
3 Tarel ahioba,
Allah arukna imagne malaikat nenne lag tao.
Eldi saeag emas agha kau sunuroba Allah sembe mhong song walinge taroba kau payaori,
Allahag mhong towalengero tarobag aneko sekamo.
Eldi saeag payaongena,
Allah sembe mhong song walinge tamneba maiknoap,
Allah Eldamneri weptop mabo niri Allahag molona molorobaap eldi saeag taoba,
“Allah sembe pimnun,”
aro kau lomag payao.
Nimi nubunge saelba uhiropne puroba whingag sip payaori,
Allah sembe auk mhong towalengero tamnebag aneko pailao.
Mhong towalengero tarobag aneko babe emas agha sunuroba wamog.
4 Allah Eldamneri weptop mabo niri Allahag molona moloropne ni anekoap,
Allah sembe mhong song walia taroba anekoap Allah arukna malaikat saeag payaoba,
mhongap molona moloropneap Allah whingag walelamo.
5 Walelamoba Allah arukna imagne malaikat anekori Allah sembe mhong song walia taroba kau aneko tobori,
Allah sembe pail pirobag agha auk wana tobori,
taroba kau lomag aneko tolongkia mog so'oag pelengelobo.
Mog so'oag pelengelobo abeneko pere limang yubu lilim mu aro talaglamoba,
lepna tingom-tingom alamoba,
sa'uma mog so'o lologlamo.
Ma'i pho aroba trompet yubu lilim lelameka
6 Neneko unuaoba,
Allah arukna malaikat saekpare tanekori ma'i pho aroba trompet saelbamongne taneko,
“Pho sukap,”
aro ulamong.
7 Allah arukna malaikat selekne nenekori ma'i pho seoba,
luli wana imag agha kulukulan aloghoba,
auk poghap enengap ma'aro mikip uro mog so'oag kulukulan alogho.
Kulukulan aloghoba,
mog so'o ni wamlange agha so'o pogtoba wilindi neneptan tanena,
pogtopne phende mali tao kom aghana,
pogtopne wilindipne aukti tero kom tao.
Mog so'o pogtopne wilindipne kom taongena,
ni kal pongoropne mog so'oag wamonge babe,
pongoroba erenne ni wamonge babe ma'abi agha pogto wilindi neneptan tanena,
pogtopne phende mali tao kom aghana,
pogtopne wilindipne aukti tero kom tao.
8-9 Allah arukna malaikat selekne nenekori pho seonge unuaoba,
phendepne nenekori ma'i pho alamoba,
nubua auk telamloa saogha,
kemenagna yim nubunge auk telamloa saogha mag laut nubu uro longorop maghag tobogto pelengeloboa imno.
Tobogto pelengeloboba,
ni mag laut nubu uro longorop mag aneko pogto wilindi neneptan tanena,
pogtopne phende mali tao kom aghana,
wilindipne nenekoag mag laut longorop maghag lebe aroba ni wamloa abeneko agha ni teplobongpa,
mag eneng aghabog to'op tao.
Nimiri mag alip toman pabirop kabong nubunge ni wamangne taneko babe ma'abi agha pogto wilindi neneptan tanena,
pogtopne phende mali tao kom aghana,
wilindipne ni kom tao.
10-11 Allah arukna malaikat phendepne ponekori pho seonge unuaoba,
wilindipne ponekori ma'i pho alamongena,
imberea nubunge si,
“Imberea Sekne,”
aro engeropne auk pog tag-tag alamongena,
whea saog uro auk pog tag-tag alamonge imag agha tinilamo.
Imberea mog so'oag tinilamonge nenekori mag yabirop maghap,
mag lu wamlange tanekoap niknil ingkio.
Mag niknil ingkio ana,
ni mag yabirop maghap,
ni mag lu wamlange tanekoap ma'abi agha pogto wilindi neneptan tanena,
pogtopne phende mali tao kom aghana,
wilindipne nenekoag niknil ingkio.
Niknil ingkioba mag yabirop maghap,
mag lu tanekoap sek mag aghabog tao ane sembe,
nimi sek mag eneko teong nimi agha nimi maikno teplobong.
12 Allah arukna malaikat wilindipneri ma'i pho seonge unuaoba,
tomne ponekori ma'i pho seongena,
hengap,
walap,
imbereaap pogtoba lulubaloa saog uaoba,
tibin warea unne pogtoba orog tao.
Heng yo'obi sop-sop heng warelamla ko'o nene agha pogto wilindi neneptan tanena,
heng ko'o pogtopne phende warelamo aghana,
heng ko'o wilindipne warelamo kom.
Inipnag tibin warea uropne nene agha babe pogto wilindi neneptan tanena,
pogtopne phende warelamo aghana,
pogtopne wilindipne inibin aghabog tao.
13 Allah arukna malaikat saekpare tane agha,
tombareri ma'i pho seongne unuaoba,
nari kembanoba,
winang abeao alikin toman palamoa imno.
Im toman palamo abeneko pere yubu nubu uro lelamonge ka'ebanongena,
“Sekleroba!
Sekleroba!
Sekleroba!
Allah arukna malaikat wilindi tanekori ma'i pho alamik tanena,
nimi ni mog so'oag wamangne sik uro seklebaukang,”
aba palamoa ka'ebano.