Nimiri haioghag kekneba lag tangtop nimi teng-tengne Yohanesti ipsiogha
7
Neneko uro yabioba,
kemelamnoag agha Allah arukna imagnang malaikat tombare mog so'o ingkis sunuro sek-sek yabilamonga ipsino.
Sindi phoana mog so'o ingkis sunuro phoana yalamonge abeneko,
“Pho seleag,”
aro sale-sale yabiamong.
Andarina mog so'o mektopneag pho alamongeap,
mag laut longorop maghag sip pho alamongeap,
mog so'o kal ua urobag pho alamongeap taneko pho alamo kom.
2 Undo saelbamongpa,
kemelamnoag agha Allah arukna malaikat nenne heng walelingkirobag siba lag talamonga ipsino.
Allah arukna malaikat anekona,
Allah kamagne ponekori,
“Naringe,”
aro kekneba neneroba nhon malaikat anekori saeag pibogpa,
malaikat aneko yalamoa imno.
Allah arukna malaikat anekori Allah arukna malaikat tombare tanekoag yoplamsio.
Yoplamsio malaikat tanekona,
Allahri samenag,
“Sindi mog so'oap,
mag longorop maghap loba nembaukang,”
aro mikipne tatsio malaikat tombare tanekoag yubu mikip uro malaikat heng walelingkirobag siba yaonge anekori yoplamsio.
3 Allah arukna malaikat anekori sin yoplamsiori,
yubu lelamongena,
“Nuri anam Allahri awe torop nimi taneko wepto sindi haioghag,
‘Allahringe,’
aro kekneba pipsin komagna,
a'undi mog so'oap,
mag laut longorop maghap loba nembaheng kom,”
alamoa ka'ebano.
4 Nanag ambatneoba ka'ebanongena,
“Sin Allah elmabo teng-tengne (144.000) wamang nimi taneko haioghag kekneba pipsiap,”
alamo.
“Nuri sindi haioghag kekneba pipsiap nimina,
nimi sisa ubu paiamang nimi Israel sisa aobare wamang nimi taneko haioghag kekneba pipsiap,”
alamongba ka'ebano.
5 Sin Israel nimi sisa aobare ubu paiamangne sunuro nimi sisaag agha kekneba pipsiong nimina,
Yehuda nimi sisaag agha teng-tengne (12.000) pipsiong.
Ruben nimi sisaag agha pipsiong nimina teng-tengne (12.000) pipsiong.
Gad nimi sisaag agha teng-tengne (12.000) pipsiong.
6 Asyer nimi sisaag agha teng-tengne (12.000) pipsiong.
Naftali nimi sisaag agha teng-tengne (12.000) pipsiong.
Manasye nimi sisaag agha teng-tengne (12.000) pipsiong.
7 Simeon nimi sisaag agha teng-tengne (12.000) pipsiong.
Lewi nimi sisaag agha teng-tengne (12.000) pipsiong.
Isakhar nimi sisaag agha teng-tengne (12.000) pipsiong.
8 Zebulon nimi sisaag agha teng-tengne (12.000) pipsiong.
Yusup nimi sisaag agha teng-tengne (12.000) pipsiong.
Apna Benyamin nimi sisaag agha teng-tengne (12.000) pipsiong.
“Undo kekneba sinag pipsiap,”
aro wene alamonga ambatneong.
Saelba Uhiropne puka uroba whingag nimi teng-tengne ipsiogha
9 Neneko uro yabioba,
nen imnongena nimi maikno longoroba ipsino.
Sin nimi wamongba,
ipsinonge neneko nimi nhondi babe a'ilbahainep kom uro wamongba ipsino.
Sin nimi ubu paiamongba,
ipsino nimi taneko nimi sisa ni nimi anabiag agha,
yubu a'ero-a'ero lerop nimi ni anabiag agha,
mog so'o tala-tala urop nimi ni anabiag agha,
nimi winip tangto mo sektoba negara ni nimi agha,
ubu paiamongba ipsino.
Sin ubu paiamongba ipsino nimi taneko sindi ag siliro pelengka urop ag solom ag aghabog wangkamong.
Solom ag wangkamongdi,
tol ko sale-sale pina nimi nubunge saelba uhiropne puka urobag pukamonge ponekoap,
Pham Domba Meap abeneko whingag sekamongba ipsino.
10 Sin abeneko whingag sip sekamongdi,
yubu mikip uro haum alamongdi,
“Saelba Uhiropne purobag wamlange Nuni Allah poneko
el aghari nu mog so'oag nimi taulbahio.
Nu mog so'oag nimi taulba uhiropne Pham Domba Me poneko,”
alamongba ka'ebahino.
11 Allah arukna malaikat ni wamongne taneko sekongdi,
nimi nubunge saelba uhiropne puka urobaap,
nimi nubunang yubu epto wenehirop nangap,
lebe aroba kamag uropne tombare wamongne tanekoap kanero sekong.
Allah arukna malaikat wamongne taneko saelba uhiropne puka urobag pukamonge poneko saramag yingkina yabu sanukto haiog so'oag sip paiamongdi,
Allah omeklamong.
12 Sindi Allah omeklamongdi lelamong nena,
“Sikne agha Allah omekto lebang.
Nuni Allah paliag uropne lag nenero omeklamap.
El wana hektopne ponekori nunag ulamlange sembe nuri ya'ag uro kipto omeklamebe paghabog omeklamukap.
El mikip wamlari nia mangkina eldi saelbamla.
Nene sikne agha lelamap,”
aro wene alamong.
13 Wene alamongba,
nimi nubunang yubu epto wenehirop nimi tom tarabare taneko nhondi nanag hailamneori,
“Ag solom ag siliro pelengka urop ag wangkamang nimi tanena et nimi?
Asna tala nimi agha yaang?”
aro haibaneo.
14 Wene aro haibaneoba narina,
“Nai nana ekon.
Nai an agha el wamlam tiog,”
seno.
Wene senoba,
eldi lelamori,
“Nimi taneko seklena nubu uro seklelamong ko'oag agha sae kilip taong nimi.
Sindi ag wangaro siliplengka un ag a'elbaongdi,
Pham Domba Me enengag agha sin ag solomne wangarop nimi nenep taong.
15 Ane sembe sin Allahri nia mangkina saelba uhiropne puka uroba whingag ua ulamangdi,
sinag kweleknag Allah Eldamneri Mem Aeag Allah sembe awe toro omeklamang.
Awe toro omeklamangba,
el saelba uhiropne puka urobag pukamlange ponekori sin kaluro pelebahileri,
sinap nikag wamukang.
16 Sin nen kwaneng mag yo sembaukang kom.
Sin heng bobori babe,
auk bobori babe og seklebaukang kom.
17 ‘Nen seklebaukang kom,’
sen nena,
Pham Domba Me nimi nubunge saelba uhiropne puka uroba peramag wamlange ponekori sin yae paiamsilul.
Sin paiamsilul nena,
nimi walinge eldi pham domba o'ona senero yae paiamsiloa saog uro Pham Domba Me ponekori elenge nimi yae paiamsilul.
Eldi poa lepsileri,
mag lu walinge nimi kamag nenerop mag lu enekoag poa pihilul.
Poa pihileri,
sindi hail mag timbahionge ni aneko sembe Allah eldamneri sindi hail mag lupsileba,
nen seklebaukang kom,”
aro ambatneo.