Mome wa'amogtoba sae werero kekneba Pham Domba Me ponekori kologlamogha
6
Neneko uro yabioba,
kemelamnoag agha mome wa'amogtoba sae werero kekneba saekpare wamongne taneko agha Pham Domba Me ponekori samenagne nhon kologhaoa imno.
Kologhaoba ka'elamnoag agha lebe aroba tombare samen imnonge taneko nhondi yubu limang lilim saog lelamoba,
“Yae,”
aro yoplamonge ka'ebano.
2 Wene alamoba,
nari kemelamnoag agha pham kuda solomne nhon wamoa imno.
Pham kuda alibag pukamo nimi eneko yin saelbamoba,
nimi paliag tangtopne kwiria usoghag elektoba nimi nenekori usoghag kwiria elekiamonga imno.a
El palamonge neneko,
“Nimi mal talamnari,
nimi oro luknubahinun,”
aro wea piropne saog uro palamoa imno.
3 Neneko uro yabioba,
kemelamnoag agha sae werero kekneba phendepne neneko Pham Domba Me ponekori kologhaoba,
kemelamnoag agha lebe aroba samen imnonge phendepne nenekori yubu lelamori,
“Yae,”
alamoa ka'ebano.
4 “Yae,”
alamoba pham kuda yogne nen lambao.
Lamba yao pham kuda aneko eldi kon hongna uwong pham agha lambao.
Lamba yaoba,
pham kuda aneko alibag pukamo nimi enekoag mikipne tao.
Mikipne elag taongena,
“Nimiap-nimiap ma'ap tangto aingniro uropne neneko mog so'oag agha kom nembale andarina,
nimiap-nimiap loba nenel dalamukang,”
aro elag mikipne taoba yao.
Ane sembe nimi enekoag mal tarop karog nubunge elag taroba yao.
5 Nen kemelamnoba,
sae werero kekneba wilindipne neneko Pham Domba Me ponekori kologhaoa imno.
Kologhaoba ka'elamnoag agha lebe aroba samen imnonge wilindipne nenekori yubu lelamori,
“Yae,”
alamoba nari kemelamnoag agha pham kuda piri pham lag tao.
Lag taoba,
pham kuda aneko alibag pukamo nimi enekori saeag saelbamo ana kembi agha,
“Ikinaba undo wamla,”
aro el nenehiroba eldi saeag saelbamoba imno.
6 Nari yubu lilim nhon ka'ebanongena,
lebe aroba tombare samen imnonge taneko anabiag agha yubu lelamoa ka'ebano.
Yubu enekori pham kuda alibag pukamo nimiag ambarelamori,
“Kwaneng yo nubunge waelbanual.
Ae yo'obi ningki nhon awe tolamikne sembe kamna kapsiropne kwaneng roti sunuroba gandum walinge libatsiropne ot sae nhonog tobukang.
Gandum yogne kamna umag uropne ae yo'obi ningki nhon awe tolamikne sembe libatsiropne ot sae wilindi tomnep.
Aghana kamna alikinag taleagti,
kal zaitun wanaap,
anggur wanaap aweag pongoropne loba nembaheng kom,”
aro iriklamoa ka'ebano.
7 Wene seoba,
kemelamnoag agha sae werero kekneba tomne neneko Pham Domba Me ponekori kologhaoa imno.
Kologhaoba ka'elamnoag agha lebe aroba tomne nenekori yubu lelamori,
“Yae,”
alamoa ka'ebano.
8 “Yae,”
seoba kemelamnoag agha pham kuda nhon whingna naiktop phamdi whingag saog pham wamo.
Pham kuda anekoag pukamo nimi sina,
“Tepna” engerop.
El amik peram-peram nelebel alamongena,
nen nhon sina,
“Hades,”b
aro engeropne nelebel alamo.
Sindi saeag mikipne tao andarina,
nimi ni mog so'oag wamong nimi ma'abi agha palu tombare nembahin tanena,
nimi palu wilindi opsinep kom aghana,
nimi palu tomne ni ya'ag opsinep.
Sindi nimi mal talamna toman nimi maikno opsinep.
Kwaneng yo li toman nimi maikno opsinep.
Naikna toman nimi maikno opsinep.
Apna lebe aroba si yoabari nimi maikno opsinep.
9 Neneko uro yabioba,
kemelamnoag agha sae werero kekneba lamne neneko Pham Domba Me ponekori kologhaoa imno.
Kologhaoba kemelamnoag agha Allah sembe pimneba aukag tamnep hao sin umag aneko kemelamnoag agha Allah yubu salero ul pirop nimiri yame ipsino.
Nimi yame ipsinongena,
sindi Allah yubu salero sikne lag nenero lero ul palamekpa,
ora nimiri sin,
“Karong,”
aro ya'ag opsiekpa,
sin tebaek nimi yame wamonga ipsino.
10 Sindi yubu haum aro nubu uro lelamongdi,
“An sembenga orogne sikne wamlamdi,
nia mangkina saelbamsilam!
Nimi so'oag wamang nimiri nu eneng tiniro opsiekne sembe ik etpare wapmendi,
andi tam lelekto kemero karebatsimendi lumbahilulam?”
aro haum aro hailamong.
11 Sinag a'ero-a'ero ag wangaro siliro pelengenne solomne tatsiori sinag,
“Olog tektek papto wamlulom,”
aro ambatsio.
Tipto ambarelamsiori,
“A'unkabo nari arukna Yesusag wana paliro awe torop nimi mog so'oag kamag uro wamangne amik sum yog nimiri ya'ag opsukang.
Sin opsiik nimi tane na Allahri a'ilbahineri,
nari senenne sunsunum uro,
‘Ni abene,’
sembaneri lumbahinun,”
seoba ka'ebano.
12 Wene seoba,
kemelamnoag agha sae werero kekneba no'opne neneko Pham Domba Me ponekori kologhao.
Kologhaoag agha sa'uma nubunge uao.
Heng babe inibin taonge ag pham kambing piri hong wiropne saog uro piri taoba,
walna eneng saog tao.
13 Imberea babe lulupto mog so'oag timbaong nena,
khao nubunge ulamloba,
kal wana hulne tinilo saog uro imberea imag agha mog so'oag timbao.
14 Im kom tangom seonge kaluna nubunge wa'amoglo saog uro kom tangom seoba,
yim ni tanekoap,
mog so'o mag longo kanerop mog so'o ua uroba ni tanekoap nhonag merekel tal pio.
15 Unuaoba mog so'oag yubu sia lerop nimiap,
nimi nubunangap,
yin salerop nimi sikini yaboap,
saeagha tup nimiap,
nimi saelba uhirop nimiap,
yog nimi mo sektop nimiap,
nimi arukna urop nimiap ni tanekoag tilamsinoba,
kirik arame ina,
kirik selenga ina tognol dalamong.
16-17 Yim tanekoag babe,
kirik tanekoag babe yubu haum aro lelamongdi,
“Nunag tinil yahut!
Wene ikinne pairop sum eneko yal.
El nimi nubunge puka urobag pukamlangeap,
Pham Domba Meap abenekori oro wabahinepne neneko siriro la'anilamlaba,
nimi nhon babe sin whingag kasmi agha seknep kom ual.
Ane sembe,
nu ipsirikagti,
a'un yimap kirikap nu nikniro tognobahisom,”
aro wene alamongba ka'ebahino.