Pham Domba Me ponekori mome toro pairoba wa'amogtopne tobogha
5
Neneko uro yabioba,
kemelamnoag agha mome toro pairoba wa'amogtopne nhon nimi nubunge saelba uhiropne puka urobag pukamonge ponekori sae sirik saeag saelbamoa imno.
Saelbamo mome toroba tara-tara ni to'opto mome toro pairop wamoba imno.
Mome toro pairoba anekoag kekneba sae werero pairoba saekpareri mome serektopne wamoa imno.
2 Sae werero pairopne saekpare wamoba,
kemelamnoag agha Allah arukna imagne malaikat mikipne nhondi yubu nubu uro lelamogti,
“Nimi etne sunsunum wamlari,
sae werero kekneba pairopne tane kologhaleri,
mome toro pairopne wa'amogtoba ane sangkanep?”
aro ambarelamsioa imno.
3 Aghana imag agha babe,
so'oag agha babe,
so'o mombolag agha babe nimi nhondi babe sang-sanga mome toro pairopne wa'amogtoba nene sangaro lomag kembanep kom.
4 Mome toro pairopne wa'amogtoba sangaro lomag mome toro pairopne kembanep nimi sunsunum urop nimi nhon babe irop komdi,
na wana ngik-ngogha engkano.
5 Engkanoba nimi nubunang yubu epto wenehirop nang taneko nhondi nanag yubu lelamori,
“An engkaheng kom!
El Yehuda sisa agha,
‘Si yoaba singa,’
aro engeropne kembae!
Elna Daudti nimi yana mangarobag agha mangaro yabiogne nubunge wamlari,
ni aisanang luknubahiog.
Eldi sae werero kekneba saekpare wamangne taneko kologhanepti,
mome toro pairoba wamlange nene kembanep,”
aro ambatneo.
6 Wene seoba,
kemelamnoag agha Pham Domba Me nhon nimi nubunge saelba uhiropne puka uroba aneko peramag sekamo.
Sekamoba sin lebe aroba kamag uropne tombare tanekoap,
nimi nubunang yubu epto wenehirop nang tanekoapti longo el kanero wamong.
Pham Domba Me aneko kembanoagna,
samenag oro kaleropne saog wamoa imno.
Pinu saekpare wamoba,
haing wana saekpare wamo.
Pinu saekpareap,
haing wana saekpareap tanekona,
Allah Yame saekpare mog so'o sirikag-sirikag pogsinepne pongoro yabiamo.
7 Unuamoba Pham Domba Me aneko yaoba,
nimi nubunge saelba uhiropne puka urobag pukamonge ponekori mome toro pairoba wa'amogtoba wamonge neneko sae sirik siba taroba saelbao.
8 Mome toro wa'amogtoba aneko Pham Domba Me ponekori sae saelbamoba,
lebe aroba tombare wamongne tanekoap,
nubu nimi yubu epto wenehirop nimi tom tarabare wamongne tanekoap,
Pham Domba Me whingag,
“Kibukap,”
aro u amupto so'oag mal piong.
Sindi a'ero-a'ero nhon-nhon sale-sale yabiamong ana pingpong ana yubu lilim neneropne,
apna leng-leng aroba emas agha kau soropneap saelbamong.
Sindi a'ero-a'ero kau saelbamongne taneko lomag song walia liro aukag taroba saelbamong.
Song walia kau lomag saelbamongne tanekona,
Allah eldamneri weptop kelmabo meri Allahag molona moloropne kau lomag to'opto wamlaba saelbamong.
9 Molona moloropne kau lomag salelamongdi,
sindi sepna wendogne agha nhon si sipto seplamong.
Seplamong nena,
“Nimiri an opkeekpa,
andi eneng lanaro tebalumne toman
nimi sisa ni nimi anabiag agha,
yubu a'ero-a'ero lerop nimi ni anabiag agha,
mog so'o tala-tala urop nimi ni anabiag agha,
nimi winip tangto mo sektoba negara ni nimi agha,
sin sembe,
‘Allahringe taukang,’
aro kamna top talum.
Ane sembe,
ot an aghabog sunsunum uropne wamlam andarina,
mome toro pairoba wa'amogtopne aneko tobia
mome wa'amogtoba sae werero kekneba taneko kologna kologhanep.
10 Andi sin mog so'o tala-tala urop nimi agha topsilumdi,
nu Saelba Uhiropne Allah yubu ka'ero sunsunum uro urop nimi nembamsilum.
Sin nimi taneko memnang Allah sembe palirop nangdi awe tolamlonga saog nimi nembahilum.
Amik sum sindi babe yubu sia lero mog so'oag uropne saelbamsukang,”
aro seplamong.
11 Neneko uro yabioba,
nen ka'ebanongena,
Allah arukna imagnang malaikatti teng-tenga maiknori yubu lelamonga ka'ebahino.
Sin warekto sekong nena,
nimi nubunge saelba uhiropne puka urobaap,
lebe aroba tombare tanekoap,
nimi nubunang yubu epto wenehirop nang tom tarabare tanekoap nusamag nembahiongdi,
sin malaikat teng-tenga taneko warekto sekong.
12 Sin warekto seklamongdi,
omektop sepna yubu nubu uro seplamong nena,
“Pham Domba Me oro kaleropne poneko el agha sunsunum uropne wamla!
Nia mangkina eldi saeag tanepba,
tup taneba ni saelbamle!
El agha wana hektopne,
mikip sirikne wamla!
Eldi unulamlange sembe el agha kiplameberi,
paliag nenelameberi omeklamukap,”
aro seplamong.
13 Wene alamongba,
nari ka'ebanongena,
ni lebe aroba imag,
so'oag,
mog so'o mombolag,
mag nubu uro longorop maghag wamongne,
nia mangkina sumbahiogne taneko niri seplamong.
Seplamong nena,
“El nimi nubunge saelba uhiropne puka urobag pukamlangeap,
Pham Domba Me ponekoap sin phende agha mikip sirikti,
nia mangkina saelbamdang.
Papna koma omeklamsiberi,
ya'ag uro paliag nenero kiplamsibe paghabog kiplamsukap,”
aro sepna seplamong.
14 Sindi wene aro seplamongne sembe lebe aroba tombare tanekori samoro,
“Sikne agha lelamlom,”
aro wene seongba,
nimi nubunang yubu epto wenehirop nang tanekori u amupto so'oag malingkina kiplamong.