Nia Mangkina Saelba Uropne poneko imag puka uroba ibogha
4
Neneko uro yabioba,
nari kemelamnoag agha ina siram nhon imag kubamoba imno.
Kubamoba kemelamnoag agha yubu nhon,
samenag babe nanag yubu leboba,
ka'ebano yubu eneko,
ma'i trompet pho aroba lilim nubu uro lerop saog urop yubu lilim nenekoag agha nanag lelamoba ka'ebano.
Yubu lilim enekori nanag yubu lelamori,
“Ane walelae.
Amik sik uro yabilulne nari anag lag nembatkeneba iplulam,”
alamoa ka'ebano.
2 Wene alamo abeneko pere Allah Yame Walinge nanag taneoba,
kemelamnoag agha nimi nubunge saelba uhiropne puka urobag aneko el pukamonge poneko imno.
3 Pukamonge poneko imnongena,
imang wareroba eren saogneap uwong saogneap imang warelamoba,
el pukamoag aneko mano yame eren saogne agha warekloamoa imno.
4 Nimi nubunge saelba uhiropne puka urobag kanero warekloamo anekoag nen nimi nubunang yubu epto wenehirop nang puka urobag tom tarabare wamoa imno.
Sin nimi saelba uhiro wenehirop nimi tom tarabare taneko kemelamsinoba,
ag solom ag wangarop nimi sindi usoghag kwiria towalengkamongpa ipsino.
Sindi usoghag kwiria towalengkamong nena,
leng-leng aroba emas agha sunurop kwiria usoghag elekamongdi,
pukamonga ipsino.
5 Nimi nubunge puka urobag nusamagne enekoag agha lepna tingom-tingom alamoba,
limang yubu lilim mu aro talaglamo.
Limang talaglamoba,
nimi nubunge puka urobag aneko whingag whea saekpare tiniro meroba wamoba imno.
Whea saekpare tiniro meroba imnonge nenekona,
Allah Yame saekpare wamlange sembe imno.
6 Nimi nubunge saelba uhiropne puka urobag aneko whingag sip nen wamoba imnongena,
mag longorop mag sin aneko whiri yame-yame uropba,
sa'a-sa'a babe imnep wamoa imno.
Nimi nubunge saelba uhiropne puka uroba anekoag ingkis sunuro wamongena,
lebe aroba kamag uropne tombare wamongne taneko,
whingag sip babe,
wailag sip babe haing wana aghabog to'opto wamoa imno.
7 Lebe aroba selekne nenekona,
si yoaba singa saog wamoba imno.
Lebe aroba phendepne nenekona,
eldi usog pham sapi yem pham saog wamoa imno.
Lebe aroba wilindipne nenekona,
nimi whing saog wamoa imno.
Lebe aroba tomne nenekona,
eldi usog winang abeao winang im toman palamloa saog wamoa imno.
8 Lebe aroba tombare tanekoag a'ero-a'ero ubu paiamsioa ipsinonge,
ol no'opbare ubu paiamsio.
Tara-tara sip babe haing wana maikno to'opto ubu paiamsioa ipsino.
Lebe aroba tanekori ae inipnag babe,
ae yo'obi babe olog ta'ap sen koma sepna aghabog saelba ulamong.
Seplamong nena,
“Sembenga orogne,
sembenga orogne,
nu Saelbamsilne sembenga orogne.
Allah nia mangkina mikip uro Saelba Ulamsilne poneko wamlange,
wamogne,
wamlenge yalul,”
aro omektop sepna seplamongba ka'ebano.
9 El ya'ag kamag uropne,
el saelba uhiropne puka urobag pukamlange poneko sembena,
lebe aroba tombare tanekori omektop sepna seplamongdi,
“Andi walia nunag tarelamsilamdi,
ulamsilamne sembe kibiang an sembe towalengelangkeap,”
aro omeklamong.
Lebe aroba tombare tanekori el sembe omeklamong abeneko
10 nimi nubunang yubu epto wenehirop nang tom tarabare tanekori u amupto so'oag malingkina kiplamong.
Sin nimi tom tarabare nangdi so'oag malingkina kiplamongdi,
nimi nubunge saelba uhiropne puka urobag pukamonge ya'ag kamag uropne poneko whingag yingkina yabu sanukto so'oag malingkina kipto omeklamong.
Omeklamongdi kwiria sindi usoghag elektoba elekamongne kopto el saelba uhiropne puka urobag pukamonge poneko tamag pelengero palilamong.
El tamag kwiria elektoba palilamongdi,
yubu lelamongdi,
11 “Nuba Nuni nu Saelba Ulamsilamne Nuni Allah!
Andi agha nia mangkina sumbalumne neneko andi seneropne agha nia mangkina sunuro yabiogpa,
wene babe kamag wamla.
Ane sembe nimiri babe an aghabog kibiang towalengero an omeklangkukap.
Omeklangkeap nena,
an mo mikipne sunsunum uropne wamlamne aghabog omeklangkukap,”
aro omeklamong.