Lag Taogha 3

Sardis nimi sembe yubu pibogha

Nen tipto ambarelamneori, “Nari ambarelangkenne tane na Yesusag wana palirop nimi as Sardis winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, el imberea saekpareap, Allah whingag Yame saekpare ua ulamangneap saelba uhiropne ponekori yubu wamla. Nari sa'a-sa'a a'undi ulamlomne sembe el wamsin. A'undi ulamlomne sembe nimiri a'un si lero seneraglamang nena, “Kamag wamang,” alamsiang aghana, a'unna kulomag nimi teptop nimi saog uro wamlom. 2-3 A'un teptop nimi haing kwelekahut! Puksut! A'undi ul palamlomne ipsindi, nari seneraglamnange ka'ebahut. A'undi ulamlomne sembe Nani Allahri, “Nari awe wali uro komopto tobang kom,” senelamsil. Ane sembe, a'undi salero ul palamlomne neneko tebaloa saog wamla aghana, wana khapto ul palamlulom. Allahri a'un sembe “Nari awe wali uro komopto tobang kom,” senelamsil ane sembe, samenag a'un ambatsiekpa, ka'ebalumne neneko seneraghal pululom. Ambatsiekpa ka'ebalumne neneko mikip uro saelba ulapmundi, a'undi malinge seneragto ulamlomne lipsululom. A'un agha haing kwelekamundi, pukmun kom tanena, nanagha haogha nimi yaloa saog uro a'unag yanun. Yanunne neneko a'undi, “El etsum yalul,” anne a'un ekonag agha na yanun.

4 Aghana a'un Sardis wamlom nimi nhon-nhondi malinge wa'epto naghi agha walinge aghabog ulamlom nimi si el wamna. Unulamlom nimi tanekona, “Ag wanganne sembenga kaulbaneleag,” aro nimiri wali uro yae wamloa saog uro yae ul dalamlom nimiag yanun. Yaneri a'un sembe, “Nanap sae tiptangto wamukapne sunsunum,” sembahinun. “Sunsunum urop nimi,” sembahine nimi tanekona, ag wanganne kororopne enekamikpa, nanap nhon yabalamukap. 5 Sikin ag wanganne kororopne enekamikne saog uro, nimi etneri malinge luknuro khapto ulamik tanena, nimi eneko sembe ag solomne agha wangkitsinun. Wangkitsineri nari nimi si toro nimi ya'ag uro kamag wamnep nimi sembe mome toro wa'amogto pairoba nenekoag sindi si babe wamlul. Sindi si wamleba, mome toro pairoba wamlange nenekoag agha lupsinun kom. Nari Nani Allahap, eldi arukna imagnang malaikat wamangneap, sindi whingag agha nari lemnun nena, “Sin nari nimi wamang,” senun. 6 Allah Yame Walingeri Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom,’ aro mome toro piplulam,” seo.

Yesusti undo ambatneoba, nari a'un Sardis nimi sembe mome toro pimna.

Filadelfia nimi sembe yubu pibogha

7 Nen tipto ambarelamneori, “Nari ambarelangkenne tane na Yesusag wana palirop nimi as Filadelfia winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, na sembenga orogne ponekori yubu wamla. Na sik uropne poneko wamna. Samenag Israel nimi sembe yubu sia leropne Daud ponekori mikipne saelbamogti, mikipne neneko ina kupto serekto uaneba saog wamog. Wenena na sembenga orogne ponekori ina kupto serektoba mikipne saelbamnari lelamna. Nari ina kuplamna tanena, nimi nhondi babe serekanep kom. Nari ina sereklamna tanena, nimi nhondi babe pa'abanep komne wamla. 8 A'undi ulamlomne sembe na el uro wamna. A'un mikip kom wamlom aghana, nari lelamna yubuag neleplamnelomdi, nari siag kekhaekto wamlomne limnen koma wamlom. Ane sembe el wamlulom. A'un sembe nari ina nhon kubatsinonge neneko a'un whingag wamlaba, nimi nhondi babe serekanep kom. 9 Nari ina kupnonge nene sembe el uro wamlulom. Yahudi nimiri Allah yubu lero winip tangtop aeag longorop nimi tanekori sindam nimi sembe, “Nu Yahudi nimi wamap,” al dalamang. “Nu Yahudi nimi,” al dalamang aghana, sindi wanaag Yahudi nimi wamang kom. Ot orolenange agha lelamangdi, phia sikini nubungeri yubuag nelepto ul palamang. Wene alamang nimi tanekoag nari sinag uahineba, a'un tamag kipto yingkukang. A'un tamag kipto yingkina yabu sanukto so'oag u amupto malingkiikti, “Imagne ponekori a'un o'ona sembamsil,” aro lag phoro ambatsukang. 10 A'undi nari lelamna yubuag seneraglamlomdi, eraruk wamlomneag agha a'undi wana khapna agha sol wali, wali uro sunsunum uro ul palamlom. Amik sum mog so'o tala-tala wamang nimiag eraruk uro unne kwelekto yabile andarina, sin mipsilul. Aghana a'undi nanag seneraglamnelomdi, ulamlomne sembe mog so'o niag eraruk uro unne kwelekto yabile sum eneko nari a'un pelepto yepsinun. 11 Ko'o we uro wamna komag na men phea yanun ane sembe, a'undi salero ul palamlomne neneko sae lipmunagti, wali uro yae up tangkamlulom. Wali uro khapto wapmun andarina, a'undi malinge luknubamunne sembe kwiria a'undi usoghag elektoba elekahinun. Aghana khapto wamna koma a'undi na sae linumun tanena, kwiria usoghag elektoba tatsinepne neneko a'unag talul kom. 12 Nimi etneri malinge luknuro khapto ulamle tanena, Nani Allahri Mem Ae nenekoag nimi neneko aeog iktop kal nubunge saog nembanun. Unuaneri el aneko ya'ag sop-sop unag nembaneba, Allah ua urobag eldi Mem Aeag agha nen lambalul kom. Nani Allah siap, naringe si wendogneap nimi enekoag mome toro pimnun. Nani Allahri imag agha as soro kalurop as Yerusalem wendogne mog so'oag pelengkaleba, kulukul alul. Imag agha pelengerop as si wendogne babe nimi enekoag mome toro pimnun. 13 Allah Yame Walingeri Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom,’ aro mome toro piplulam,” seo.

Yesusti undo ambatneoba, nari a'un Filadelfia nimi sembe mome toro pimna.

Laodikia nimi sembe yubu pibogha

14 Nen tipto ambarelamneori, “Nari ambarelangkenne tane na Yesusag wana palirop nimi as Laodikia winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, Allahri samenag nia mangkina sumbaogti, Elmeri saeag pibogpa, nia mangkina saelbamsilne ponekori yubu wamla. Nia mangkina sumbaogne saelba uhiropne ponekori Allah yubu sol wali uro sikne lag nenero ambarelamsildi, ot sikne agha lero ulamla. El sikne agha lero uropne ponekori yubu lelamlange neneko ane. 15 Na a'undi ulamlomne sembe el wamna. A'undi na sembe ulamlomne nenena, “Allah yeng nembanun,” aro wanaag agha ulamlom kom aghana, “Karong,” aro babe na liamnelom kom. Nari a'un sembe senelamsin nena, “Sindi na sembe wana yengag agha sol wali uro tolamik ane wali. Sindi na sembe karong sembahenga babe hae limnukang,” senelamna. 16 Ot a'undi ulamlom nena, wana yengag agha babe, wana karongag agha babe ulamlom kom. A'undi wana yeng anabi karong anabiag ulamlom ane sembe, tungna saog uro nari pamag agha tukom agha la'ambitsinun. 17 A'undi lelamlomdi, “Nuna sa'a-sa'a kwema kom. Nunag sa'a-sa'a wamlaba, nu tup nimi wamap,” alamlom. Aghana a'unna wanaag wamlomne yareagti, wanaag orogti seklelamlonga saog wamlomba, nari a'un kembi agha, “Sin saeagha orogti, nongag eneka uropne wamna koma haing uro wamloa saog nimi wamang,” senelamsin. 18 Ane sembe nari yubu wenero ambarelamsin nena, leng-leng aroba kamna paliag uro toroba emas nanag agha kamna kapto toplulom. Nanag agha topmun taneogna, a'un tup talulom. Nanag agha babe ag solomne a'un wangaltonne kamna kapto topmun andarina, a'un kabeog wamlomne, “Lag taleag,” aro enektangkapmundi, ali sembalulom kom. Apna a'undi haingag naikna ulamsilba, haing toa saogne lililamsilne a'undi haingag pelaghal tananba, wali nenerop likna nan agha kamna kapto topmun taneogna, sik uro haingdi ililamlulom. 19 Nari nimi o'ona sembamsin nimiag nari yubuag agha el nenero wenelamsindi, “Nari yubu ka'ebaleba, wali wamlul,” alamna. Ane sembe a'un wana yengag agha nari wenerop yubu sunsunum uro ulapmundi, a'undi malinge seneragto ulamlomne lipsululom. 20 Ka'eamnululom! Na wene ina siramag sekamnari, ina kaungulamna. Nimi etneri na yubu ka'ebaneleri, ina kupnele tanena, na wa'ineri, nimi enekoap kwaneng nhon tenemeri, el babe nanap kwaneng nhon tununam.

21 Nimi etneri malinge luknuro khapto ulamle tanena, nimi eneko sembe, “Nanap nhon pukamnunam,” senun. Nari babe samenag malinge luknubahiri, na Naniap saelba uhiropne paliag puknebag nhon pukamna saog uro, nimi etne babe malinge luknubale nimi eneko, “Nari saelba uhiro puknebag nhon pukamnunam,” aro elag ambatnun. 22 Allah Yame Walingeri Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom,’ aro mome toro piplulam,” seo.

Yesusti undo ambatneoba, nari a'un Laodikia nimi sembe mome toro pimna.