Lag Taogha 2

Efesus nimi sembe yubu pibogha

Yesusti nanag ambarelamneori, “Nari ambarelangkenne tane na Yesusag wana palirop nimi as Efesus winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, na imberea saekpare sae sirik saeag saelbamnange ponekori yubu lelamna. Na emas agha sunuroba auk pog tiniro iktoba yan saekpare nusam toman yabalamnari, yae wamnange ponekori lelamna. 2 Nari a'undi walia ulamlomne sembe el wamsin. A'un seklelamlomne sembe seneragna koma a'undi wana khapna agha whin seklero awe tolamlom. A'undi senelamlomdi, “Sin wana yoaba urop nimi nunap sae tiptangto wamnep kom,” senelamlomne sembe na el wamna. Sin wana yoaba urop nimiri, “Nu Yesusti wepto pogsirop nimi,” al dalamang aghana, sik urop komne agha undo lelamang. A'undi sindi orolena lelamangne sembe mibamsilomdi, sindi yubu “Sikne kom,” aro el uro wamlom. 3 A'un seklelamlom aghana, wana khapna agha na Yesus sembe walia ulamlomdi, na Yesus, “Si nubu talul,” aro solban sen koma sop-sop walia ulamlom.

4 A'undi na sembe walia unulamlom aghana, nari a'un sembe, “Sindi unuaheng kom,” senelamsin nena ane. A'undi samenag na sembe alniro o'ona senelamnelumdi, ulamlum saog uro wene babe wanaag agha ulamlom kom. 5 Ane sembe samen wanaag agha ulamomne neneko libomdi, lomag eba timbaloa saog uro uaomne nene sembe el uro wamlulom. A'undi wanaag agha ulamlom komne nene wailag nembamundi, samenag ulamom saog uro wanaag agha ulamlulom. Wanaag agha unulapmun kom pagha tanena, na a'unag yaneri, auk pog tiniro iktoba yan aneko merobag anekoa wenelanun.

6 Undo lemna aghana, walinge nhon a'unag wamla. Walinge a'unag wamlangena, Nikolaus ponekoag neleptop nangdi ulamangne sembe nari babe karong sembamsin saog uro, a'undi babe karong sembamlom.

7 Allah Yame Walingeri Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom. Nimi etneri malinge luknuro khapto ulamik nimi sembe, Allahri wali uro wamnebag sumbaog so'o nenekoag nimi neneko nandamneri enero payanun. Nimi eneko sembe, “Kal wana ya'ag kamag nenehirop kal wana nene telamlulam,” aro ambatnun,’ aro mome toro piplulam,” seo.

Yesusti undo ambatneoba, nari a'un Efesus nimi sembe mome toro pimna.

Smirna nimi sembe yubu pibogha

8 Nen tipto ambarelamneori, “Nari ambarelangkenne tane na Yesusag wana palirop nimi as Smirna winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, el nia mangkina wamna komag samenag wamogne, amik babe komobanep komne wamle paghabog wamlulne, el tebaogti, kamag taogne ponekori yubu wamla. 9 Nari a'un seklelamlomdi, kwema uro wamlomne sembe nari a'un sembe el wamsin. Nimiri, “Nu Yahudi nimi wamap,” al dalamang nimiri sik kom yubu minilamangdi, a'un san tiliplamsiang. “Nu Yahudi nimi wamap,” al dalamang aghana, sindi wanaag Yahudi nimi wamang kom. Sinna phia sikini nubunge neleptop nimi winip tangtoba wamang. A'unna kwema uro seklelamlom aghana, a'un tup nenep taneba maikno a'undi wanaag wamla. 10 Ko'o we uro wamna komag a'un seklenne nen lag talul aghana, seklebalulomne sembe log sembaheng kom. “A'un el uro wamlulom,” senelamnari ambarelamsin nena, phia sikini nubunge nenekori nimi mikip nembahileba, nimi tanekori a'un wamlom nimi etpare sae kiliro, “Mipsinun,” aro sae kaupto kop aeag tobongkipsukang. Tobongkipsiikpa ik sa'obare a'un, “Seklebaik,” aro ulamsiikpa wamlulom. Ane sembe na Yesusti a'unag ambarelamsin nena, a'undi nanag wana palilapmuna kekman tebamun tanena, nari a'un kamna tatsinun. Tatsinun nena, a'undi malinge luknubamunne sembe nari kwiria a'undi usoghag elektoba elekahineri, a'un ya'ag kamag uro wamlulom.

11 Allah Yame Walingeri Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom. Nimi etneri malinge luknuro khapto ulamle tanena, el nimi nong tebalea babe, Allahri nimi ni tam lelekto kemero kareptop sum eneko nimi ane omna koma ik phendep sum tebalul kom. Ya'ag kamag wamlul,’ aro mome toro piplulam,” seo.

Yesusti undo ambatneoba, nari a'un Smirna nimi sembe mome toro pimna.

Pergamus nimi sembe yubu pibogha

12 Nen tipto ambarelamneori, “Nari ambarelangkenne tane na Yesusag wana palirop nimi as Pergamus winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, karog yonge si tara-tara yo urop karog saelbamnange ponekori yubu wamla. 13 Nari a'undi as sembe el wamsin. A'un wamlomag aneko phia sikini nubungeri nimi maikno mikip uro saelbamsildi, el puka urobag wamloa saog wamlom. A'unkae Antipas ponekori na Yesus sembe nimiag sol wali uro sikne lag nenero ambatsiogpa, yubu neneko sembe a'un as Pergamus wamlom as anekoag yo urop nimiri Antipas ya'ag obek. El obek aghana, sum eneko babe a'undi, “Nu opsiikag,” semban koma nari siag kekhaekto wamlomne limneom komdi, phia sikini nubunge ua urobag aneko papna koma nanag wana paliro seneraglamnelom.

14 A'undi nanag wali seneraglamnelom aghana, nari a'undi ulamlomne sembe karong sembamsin nena, Bileamdi samenag yubu ambarogne Israel nimiri ka'elamek saog uro a'un anabiag nimi nhon-nhon pogto orolenange ka'elamlomdi ulamlom. Unulamlomne nene sembe karong sembamsin. Bileamdi samenag Balak poneag ambarelamogti, “Andi Israel nimi wana kiliro malingeag nembahilulam,” aro ambarog. Ambarogpa Bileamdi yubu sunsunum uro Balakti ulamog andarina, Israel nimiri Allahri iriksirop yubu ingisaplamekti, nengabo kelabo salik-malik uro walel dalamekti, mema pharoba sembe pairop kwaneng babe toro telamek. 15 Bileamdi samenag yubu ambarogne ka'elamekti, nelepto ulamek saog uro, yubu ambatsiropne Nikolaus ponekori orolena yubu ambarelamsil. Orolena yubu ambarelamsilba, a'un anabiag wamlom nimiri eldi yubu salero nelepto ulamlom. A'undi eldi yubu nelepto ulamlomne nene mali. 16 Ane sembe malia seneragto ulamlomne neneko lipsimundi, walinge seneragto ulamlulom. Kom pagha tanena, a'un anabiag agha orolena salero nelepto ulamang nimi sembe, “Na aisa nenelamneang,” aro na men phea yingkina karog naringe silomag kilbi agha nari, “Sinap mal tabukap,” aro ulamnun.

17 Allah Yame Walingeri na Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom. Nimi etneri malinge luknuro khapto ulamle tanena, kwaneng roti Allahri sae agha tatsiropne, manna si engerop kwaneng roti tognoropne nene agha tatnun. Apna nimi eneko sembe kirik solomne walinge elag tatnun. Kirik solomne nene alibag nena, nimi neneko sembe si wendogne engero mome toro pimneba, si wendogne nene sembe ot nimi neneko agha el tanep,’ aro mome toro piplulam,” seo.

Yesusti undo ambatneoba, nari a'un Pergamus nimi sembe mome toro pimna.

Tiatira nimi sembe yubu pibogha

18 Nen tipto ambarelamneori, “Nari ambarelangkenne tane na Yesusag wana palirop nimi as Tiatira winil dalamang nimi sembe paia uro yubu ambatsiropne ponekoag mome toro piplulam. Piplulam nena,

‘Yubu enena, Allah Elme eldi haing wana auk pog warea urop saogne wamlaba, eldi yanna kirik alneropba mheng-mhenga agha uwong iarop saog wamlange ponekori yubu wamla. Eldi yubu a'un Tiatira nimi sembe ambatsilulne ane. 19 Nari a'undi nia ulamlomne sembe el wamsin. A'un mamun o'ona senel dalamlomdi, nanag sikne aro wana palilamlom. A'undi awe wali uro tolamlomdi, wana khapto ulamlomne ni aneko nari a'un el wamsin. Nari wene a'un sembe el wamsin nena, samenag awe wenne olog hae saog uro welamlum aghana, wene maiknoro welamlomne sembe el wamsin. 20 Unulamlom aghana, nari a'un sembe karong sembamsin nena ane. Kel nhon Izebel kel enekori, “Na Allahri silimu tiptop kel wamna,” al dalamla kel enekoag a'undi wana tarelamlom. Eldi orolenange agha yubu amoro ambarelamsiori, nimi maikno wana tolamsio. Wana tolamsio andarina, nari arukna awe torop nimiri eldi yubu nelepto ina selepne toman palamang. Ina selepne toman palamangdi, Allahri iriksirop yubu phiro nengabo kelabo salik-malik uro walel dalamangdi, mema pharoba sembe pairop kwaneng babe toro telamang. 21 Eldi malia undo ulamla aghana, nari el sembe wana pailingkina, “Mali-malia seneragto ulamlange lipleri, nanag samoro yalul to, kom to,” aro ko'o tatno. Ko'o tatno aghana, mali-malia neneko lia yan koma nengaboap walel tananne agha tipto ulamla.

22 El uro wamlulom. Eldi ulamlange sembe nari ae usa mamnebag el mambitneba, ae koloag nong og seklebalul. Sin Allah wail ibare agha elap walel dalamang nimi tanekori babe elag nelepto seneragto ulamangne libik kom tanena, elap nhon seklena nubunge seklebaukang. 23 Elmabo elag neleplamang nimi babe opsine andarina, na Yesusag wana paliro winil dalamang nimi ni el taukang. Na sembe el taukang nena, “Ot eldi agha nimiri seneragha uropneap, nimi wanaag seneragha ulamangneap el wamsildi, nimiri uroba kembaleri, ‘Malinge to, walinge to,’ aro tam karebaleri, lunuro pipsilul,” aro el taukang. 24 Aghana a'un nenne as Tiatira wamlomne, sindi malinge ulamangne saog uro ulamlom kom. El Izebel kel enekori, “Mili tognoroba walinge ambarelamsin,” alamlaba phia sikini nubungeri ambatsirop yubu eneko a'undi salero neleplamlom kom. Ane sembe, nari lelamnangena, “Nari a'unag yubu ikinne nen ma'aro, ‘Ulamlulom,’ senun kom,” aro ambatsin. 25 Aghana a'undi wene saelbamlomne neneko sae limna koma saelbamlulom paghabog na amik yanun.

26-27 Nimi etneri malinge luknubaleri, nari awe komopto tolamlul tanena, na Naniri mikipne na tatneogne saog uro, nari babe nimi enekoag mikipne neneko tatnun. Nari mikipne saelbamnange sinag tatsineba, malinge luknuro khapto ulamik nimi tanekori mog so'o tala-tala wamang nimi sembe yubu sia lero saelbamsukang. Tam nene sembe samenag nimiri mome toro pibog nena,

“Eldi mog so'oag nimi saelbamsilul nena, besiag agha sunurop kame saelbaleri, kasmi agha mog so'oag nimi saelbamsilul.

Eldi yubu ka'erop kom nimi sembe so'o katneag agha sunurop mag ma'i solapto urubanep saog uro luknubahilul,”

aro mome toro pibog.

28 Sin malinge luknuro khapto ulamik nimi tanekoag kekneba nhon imberea heng walelingkirobagne nari tatsinun. 29 Allah Yame Walingeri Yesusag wana paliro winil dalamang nimiag leplange nenena, aori ka'ebalomne nimi niri seneragto saelbamlulom,’ aro mome toro piplulam,” seo.

Yesusti undo ambatneoba, nari a'un Tiatira nimi sembe mome toro pimna.