Amik Uro Yabinepne Sembe
Yohanes Whingag
Lag Taogha
Yubu nene salerop nimi wana awi uro wamnepne sembe ambatsiogha
1
Allah yubu mome toro pairoba neneag wamlangena,
amik uro yabinepne liliag wamlange agha Yesus Kristus ponekori lag nembaonge agha mome toroba wamla.
Allahri Yesus ponekoag ambarelamori,
“Yesusti nen tipto Allah arukna urop nimiag wene men phea uro yabilulne sembe ambatsilul,”
aro ambaro.
Ambaroba Yesus Kristusti eldi arukna imagne malaikat poghoba,
Kristus arukna na si Yohanes wamnangeag yaori tamna,
“Undo-undo uro yabilul,”
aro na Yohanesag ambatneo.
2 Wene aro ambatneoba,
na Yohanesti haingdi nia ni imnonge nimi ni ambarelamsin nena,
Allahri yubu sembe babe,
Yesus Kristus ponekori yubu ambatneonge babe sikne lag nenero ambarelamsin.
3 Ni undo uro yabilulne sembe Allahri ambatneoba,
tipto ambarelamsinne nene ko'o olog we uro wamna komag agha uro yabilul.
Ane sembe nimi etneri nari mome toro ambarelamsinne nene kembaleri,
leple tanena,
wana awi uro wamlul.
Mome leple yubu nene ka'ebaik nimiri babe salero sunsunum uro ulamik tanena,
wana awi uro wamukang.
Yesusag wana paliro winip tangtop nimi as saekpare wamek nimi kipsiogha
4-5 Nangkabo,
Yesusag wana paliro winip tangtop nimi as saekpare Asia so'oag wamlom nimi kiplamsin.
Allah poneko el ya'ag uro wamlange,
wamogne,
wamlenge yalul.
“Elap,
Eldamne Yame neneap,
eldi weptopne Yesus Kristusapti a'unag wana yororo walia ulamsiikti,
a'un wana aingnibahukang,”
senelamnari a'un sembe molbarelamsin.
Allah ponekori nia mangkina saelbamsilne poneko el mikip sirikne pukaroba whingag aneko Eldamne Yame Walinge eneko yame saekpare ua ulamang.
Allahri weptopne Yesus Kristus poneko el mo samenagne nimi teptobag agha nen kamag taog.
Eldi haingdi iliropne sik uro sol wali uro tipto ambatsiropne wamla.
Elna yubu sia lerop nimi mog so'oag ubu paiamang nimi taneko saelba ulamsildi,
paliag sirikne wamla.
Yesus ponekori nu sembe ulamog nena,
nuri mali-malia ulamubungeri nu wana saog kauplamsiog aghana,
Yesusti nu sembe o'ona senelamogti,
nu sembe tebaogti,
eldi enengag agha nuri wana kaupna lobitsiog.
6 Yesusti nu lobitsiogti,
nu Saelba Uhiropne Allah yubu ka'ero sunsunum uro ulamap nimi nembahiogti,
memnang wamloa saog nimi nembahiog.
Undo nu wali nembahiog andarina,
Ili Allah omekto eldi awe torop nimi wamap.
Yesusti nu Ili Allah whingag wali nembahiog ane sembe,
el Kristus mikip sirikne ponekoag papna koma ya'ag uro omeklamukap.
Sikne agha lebap.
7 Tiwalengkahut!
Toa pololong aropne pere agha Yesus nen samoro kulukul yanual!
El kulukul yalea nimi ni haingdi ibukang.
Sin ibik nimi anabiag agha el Yesus alukto obek nimiri babe ibukang.
Nimi sisa ni mog so'oag wamang nimi agha niri el sembe ngolol alamukang.
Sikne agha lebap.
Undo uro yabilul.
8 Nu Saelba Uhiropne Allahri lelamlangena,
“Na tamag tomeagne wamna,”
alamla.a
El aghabog nia mangkina mikip uro Saelbamsilne poneko ya'ag uro wamlange,
wamogne,
wamlenge yalul.
Yohanesti haingdi ibogha
9 Na Yohanes a'unkae wamnange a'un seklelamlom saog uro nanag babe nika uro olamnel.
Nu Saelba Uhiropne Yesus ponekoag neleptop nimi seklenne seklelameberi,
wana khapto ulamukap.
Nanag babe ulamnelba,
wana khapto seklelamna.
Allah yubuap,
Yesusti sikne lag nenero ambarelamsiog yubuap nari ambarelamsisinge sembe nimiri karongdi,
na mag longo kanektobag nimi oroghag mog so'o Patmos ane na toro weag toboghaneekpa wamna.
10 Nu Saelba Ulamsilne poneko omekto winirop sum Allah Yame Walinge nanag taneori yepneoba,
ka'elamnoba yubu nubu uro na wailag siba nanag yubu lelamo.
Nanag yubu lelamonge yubu lilim neneko ma'i lom pho aroba trompet yubu lilim nubu uro lerop saog uro yubu lelamoa ka'ebano.b
11 Yubu lelamoa ka'ebanongena,
“Andi haingdi ililamlama ni momeag toro piplulam.
Mome toro pipmendi,
as soro kalurop as saekpare Yesusag wana paliro winil dalamang nimiag piplulam.
As saekpare tanekona,
Efesus,
Smirna,
Pergamus,
Tiatira,
Sardis,
Filadelfia apna Laodikia nimiag piplulam,”
aro wene alamo.
12 Wene alamoba,
“Etneri nanag yubu lelamla,”
aro tangabom agha wailag sip kembano.
Kemelamnoag agha auk pog tiniro iktoba yan saekpare leng-leng aroba emas agha sunuroba imno.
13 Auk pog tiniro iktoba yan taneko lulu phik agha kemelamnoag agha mog so'oag nimi tangtopne nhon saogne sekamoba imno.c
Eldi ag nongag enekamoba imnongena,
ag nongag agha yanag tau siliro pelengka uropne siliplengkamoa imno.
Saramag enekamoa imnongena,
leng-leng aroba emas agha noptop ag sunuroba saramag ek wa'aneropne wanwanoro enekamoba imno.
14 Eldi usog hongna solomne pham domba hong saog uro solom sirikne wamoa imno.
Eldi haing wanaag auk pog warea uropne saog wamoa imno.
15 Eldi yan imnongena,
kirik alneropba mheng-mhenga agha uwong iarop saog wamoa imno.
Eldi yubu ka'ebanongena,
mag mhun yangkalamnari,
nubu uro yubu lelamloa saog uro lelamoa ka'ebano.
16 Eldi sae sirik sip saelbamoa imnongena,
imberea saekpare saeag saelbamoa imno.
Eldi silomag lanalamoa imnongena,
karog yonge si tara-tara yo wamoa imno.
Eldi whing imnongena,
heng siro tingiropne saog uro tingkamoa imno.
17 Nari ililamnori,
na nimi teptop nimi saog uro el tamag u amupto malingkino.
Malingkino aghana,
eldi sae sirik sae nanag paia yubu lelamogti,
“An log sembaheng kom!
Nana nia mangkina wamna komag samenag wamsia,
amik babe komobanep komne wamne paghabog wamnunne wamna.
18 Na kamag wamnange poneko na wamna.
Na tebahi aghana,
na kamag tahiri,
ya'ag wamnange poneko wamne kekman wamnunne poneko wamna.
Nimi teptoba sembe babe,
teptop nimi ua urobagne sembe babe,
ina ane kupto serekto uaneba nari saeag wamla.
Ot nan agha nimi teptopne ua urobagd agha kamag nembahinep.
19 Ane sembe andi haingdi nia ni wene iplamneap,
wene uro yabilneap,
amik uro yabilulneap mome toro piplulam.
20 Nerane agha tognoropne imberea nari saeag wamlaba,
iplamne tanekoap,
emas agha sunuroba auk pog tiniro iktoba yan iplama tanekoap,
tibin nenero ambatnuaghen.
Imberea saekpare tanekona,
na Yesusag wana palirop nimi as saekpare tanekoag winil dalamang nimi sembe paia uro Allah yubu ambatsirop nimie saekpare wamangdi,
kekneba imberea saekpare nari saeag wamangne taneko iplam.
Emas agha sunuroba auk pog tiniro iktoba yan wamlaba,
saekpare iplamne tanekona,
as saekpare a'ero-a'ero na Yesusag wana palirop nimi winip tangto wamang nimi sembe,
kekneba auk pog tiniro iktoba yan saekpare iplamne taneko wamla,”
seo.