10
Amoonii ñɩma ɖʋʋ Daaviidi tʋmlaɖaa fɛyɛ yɔ
( Ɩcɔnɩ Awiya tɔm cɔlɩɩ 19.1-5)
1 Se, pʋkɔm pɩla alɩwaatʋ cabɩ lɛ, Amoonii ñɩma wiyaʋ, sɩ nɛ ɛ-pɩyalʋ Hanuuni lɛɣzɩ e-lone taa. 2 Se, Daaviidi ɖʋ ɛ-taa se, ɛnʋ lakɩ Nahaasɩ pɩyalʋ Hanuuni ɖeu ɛzɩ ɛ́lɛ caa kalabʋ ɛnʋ yɔ. Pʋ-yɔɔ etiyi ɛ-tʋmlaɖaa nabɛyɛ ɛ́lɛ caa sɩm alɩwaatʋ taa se pɛsɛɛ-ɩ leɣa. Daaviidi tʋmlaɖaa mba, pɔkɔm patalɩ Amoonii ñɩma ɛjaɖɛ taa lɛ, 3 Amooniiñɩma awiya pɔzɩ pa-ñʋʋdʋ Hanuuni se ɛmaɣzɩɣ se, toovenim lɛ, ɛ-caa hɩɖɛ ɖʋʋ yɔɔ ɖeke Daaviidi tiyi ɛ-tʋmlaɖaa se powolo pɛsɛɛ-ɩ leɣa naa we? Potowolo se pefeŋ ḿba tɛtʋ taa nɛ pana nɛ pʋwayɩ lɛ, paawolo pɛlɛɣ-tʋ yaa we? 4 Peeye Hanuuni yeba nɛ pakpa Daaviidi tʋmlaɖaa ḿba nɛ pahʋ pa-tandɩŋ hɔɔlɩŋ hɔɔlɩŋ nɛ pɛsɛtɩ po-tokonaa nɛ pɩsɩnɩ pɔ-tɔbɩŋ nɛ peyebi-wɛ nɛ pɛɖɛɛ. 5 Pɩlabɩ ḿbʋ lɛ, Daaviidi nɩɩ. Peeye etiyi ɛyaa nabɛyɛ se pakʋyɩ nɛ pakatɩ ɛ-tʋmlaɖaa ḿba, mbʋ pʋyɔɔyɔ, fɛyɛ kʋʋ-wɛ yɔ. Wiyaʋ heyaa se peheyi-wɛ se pacaɣ Yeriikoo tɛtʋ taa nɛ pa-tandɩŋ ñɔ lɛ pɩha-wɛ nʋmɔʋ nɛ papɩsɩ ɛ-cɔlɔ.
Daaviidi kʋyʋʋ Amoonii ñɩma nɛ Siirii ñɩma pɔ-yɔɔ yɔ.
(Ɩcɔnɩ Awiya tɔm cɔlɩɩ 19.6-19)
6 Se, Pɩlabɩ ḿbʋ lɛ, Amoonii ñɩma na se palɩ Daaviidi sɔŋ. Peeye powoba paya Siirii ñɩma mba pɛwɛ Beyitirehoovi nɛ Covaa pɛ-tɛtʋ taa yɔ, pɔ-sɔɔjanaa kutokiŋ nɩɩlɛ (20.000) 7 Daaviidi tɩnɩ ḿbʋ lɛ, ɛkʋsɩ sɔɔjanna ñʋʋdʋ Yowaabɩ nɛ sɔdɩŋ tɩnɛ se powolo nɛ pakʋyɩ pɔ-yɔɔ. 8 Peeye Amoonii ñɩma wobi pɛ-tɛtʋ sɔsɔtʋ nɔnɔɔ taa nɛ pɔñɔɔzɩ pa-tɩ nɛ paɖaŋ se pa nɛ wɛ poyoo. Cova nɛ Beyitirehoovi pɛ-tɛtʋ taa Siirii hɔɔlʋʋ taa ñɩma nɛ Toovi nɛ Maakaa pa-ñɩndʋ taa ñɩma paba ñowolo pekpeɣli ɖama tɛyɛ yɔɔ. 9 Se, Yowaabɩ nawa se pʋwɛɛ se ɛ nɛ ɛ-sɔɔjanaa ɛkʋyɩ pɔ-yɔɔ nɛ hɔɔlɩŋ naalɛ taa, wayɩ nɛ ɛsɩndaa ɖɩnɛɛ ɛlɩzɩ Izirɛɛlɩ sɔɔjanaa taa sɔdɩŋ nɛ ɛpɩlɩ-wɛ Siirii ñɩma ɛsɩndaa. 10 Piyele ɛsɩɩ e-neu Aviisayɩ sɔɔjanaa mba pɩkazaa yɔ pɔ-nɔɔ yɔɔ nɛ ɛpɩlɩ-ɩ Amoonii ñɩma ɛsɩndaa. 11 Eheyi ɛ́lɛ se, ye Siirii ñɩma yuŋ ewiziɣ-wɛ lɛ, ewolo ɛsɩnɩ-wɛ. Se, ye Amoonii ñɩma ñɩŋ ewiziɣni ɛ́lɛ lɛ, pʋbʋ, ɛnʋ ñowokina nɛ ɛsɩnɩ-ɩ. 12 Eheyi-i ɖɔɖɔ se ɛwɛɛ abalɩtʋ! Se poyoni abalɩtʋ pa-samaɣ nɛ pɛ-Ɛsɔ tɛtʋ pɔ-yɔɔ. Se, Kɩpaɣlʋ ɛla ɛzɩ pɩkɛdɩnaʋ-ɩ yɔ. 13 Se, Yowaabɩ nɛ ɛ-sɔɔjanaa powokaɣ se pakʋyɩ Siirii ñɩma yɔɔ lɛ, paba ñese. 14 Amoonii ñɩma kɔm pana Siirii ñɩma seɣ ḿbʋ lɛ, pa-maɣmaɣ pese Aviisayɩ esɩndaa nɛ powolo pasʋʋ pɛ-tɛtʋ taa. Peeye Yowaabɩ yebi Amoonii ñɩma yɔɔ kʋyʋʋ nɛ ëpɩsɩ Yeruusalɛm. 15 Se, Siirii ñɩma ñanawa se Izirɛɛlɩ ñɩma wabɩ-wɛ lɛ, pekpeɣli pɔ-sɔɔjanaa tɩnɛ. 16 Se Hadaadɛzɛɛrɩ tiyi nabɛyɛ se powolo pekpeɣli Siirii ñɩma mba pɛwɛ Efiraatɩ pɔɔ wayɩ yɔ. Pekpeɣla-wɛ nɛ, pɔkɔɔ patala Helam tɛtʋ taa. Sovaakɩ kɛɖɛnɩ-wɛ nɔɔ, ɛnʋʋ lɛ Hadaadɛzɛɛrɩ sɔɔjanaa ñʋʋdʋ. 17 Se, pɩlabɩ ḿbʋ lɛ, Daaviidi nɩɩ, nɛ ɛ́lɛ kpeɣli Izirɛɛlɩ sɔɔjanaa tɩnɛ nɛ pɛtɛsɩ Yɔɔrɩdaŋ pɔɔ nɛ powolo Helam tɛtʋ taa. Siirii ñɩma ñapɩlɩ ɖama Daaviidi ɛsɩndaa nɛ pakʋyɩ ɛ-yɔɔ. 18 Ɛlɛ, Izirɛɛlɩ ñɩma ɖɔɔnɩ-wɛ nɛ pese. Se, Daaviidi nɛ ɛ-sɔɔjanaa pakʋ kpaŋnaŋ weyi ɛhɔŋ lɔɔɖa yɔ́ɔ taŋga nɛ nasɩlɛ (700) nɛ sɔɔjanaa mba pacakɩ kpaŋnaŋ yɔ́ɔ kutokiŋ nɩɩlɛ (40.000) nɛ piyele pacamɩ Siirii ñɩma sɔɔjanaa ñʋʋdʋ Sovaakɩ nɛ ɛsɩ peeye. 19 Se, awiya wena Hadaadɛzɛɛrɩ cɔŋaɣnɩ a-yɔɔ yɔ, akɔma ana se Izirɛɛlɩ ñɩma wabɩ-wɛ lɛ, petisi nɛ pa nɛ wɛ peceɣ nɛ papɩsɩ paba tʋmlaɖaa. Piyele sɔɔndʋ kpa Siirii ñɩma nɛ patatasɩ sɩnaʋ Amoonii ñɩma.