Paulus nti Makedonia ma Yunani
1 Lama mimiri na Efesus nater e, Paulus nafburat ni manglartar ma nafkoran dalmir. Betno ntul sir ma nti Makedonia. 2 I nmpan a nlole Makedonia ma nal snyurtar yadin la nafkoran tomwatar betno nti Yunani. 3 I namin iano doan bulnar tel betno nose ma naflolwain nor kabal far Siria. Nempa ndengar feti tomwat Yahudyar reng ma rfen i, mpa nfalak feti ni ngafele e i nti Siria nof Makedonia nbal. 4 I nti e nor tomwatar ketnir. Sir a ne Sopater, Pirus anaky nof Berea. Ma Aristarkhus ma Sekundus rof kote Tesalonika. Ma Gayus nof kote Derbe ma Timotius. Ma Tikhikus numur Trofimus rof provinsi Asia. 5 Sir ye rbalun Troas ma rdaf kama a na iano. 6 Lama Yahudyar nir ler silai Roti Ma To Ragi omp e, kam maflolwain mor kabal mof Filipi. Ma ni lerar lim betno mait Troas ma matungan mor sir ma rbalun a ne. Kam mamin iane minggu dalam.
Paulus nti naninuk soranyar na Troas
7 Na Sabtu ni nronram kam mafburat kam ma mane tnyam faburat. Paulus naftutu tomwat anlelar na iano terik nronram fetwalan, fali bobole e nti lo. 8 Kam mafburat kam a na dasar sa ni tingkat. Ain a ne idak fali rtutun damrar yadin. 9 Ma tabwery sa ngarany Eutikhus namtoran dianyele. I to boan nal matany tutumpe fali Paulus natanuk e dodo resi. Iane nwayat ma narwa oan desar mpa nfuf nof tingkat tiga ne far bab. Noak ma rfair i e, nmat lo. 10 Mpe Paulus ntompur far bab ma natlabar a npalam i ma nkoke i. Ne nfalak, “Kete mimtaut koli to nmat!” 11 Ne Paulus nbali i far tingkat tiga ne, ma napuse roti ma raktem rane. Lama rtame monuk e, natanuk far dodo a nbal titerik ma timur matan nangfuty, betno nti. 12 Ma tomwatar a ne rsenang resi ma ror a rbali tabweri ma nmorip a nbali ne far ni das.
Paulus nof Troas far Miletus
13 Mpe kam mose ma mti Asos. Nempa Paulus npeang ma nmpan nof da mpa nfalak ber kam ma mbalun mor kabal far Asos betno keta maktem a mfangat kabal mof iane.b 14 Noak ma maktem a matungan a na Asos, mor i far kabal, ma maktem a ma maflolwain far Metilene. 15 Mof a ne kam maflolwain a nbal. Ma ni bobole e mlanre nus Khios. Ni bengdu e mal far nus Samos ma ni bengtely e mait kote Miletus. 16 Paulus nfalak feti keta to nwelat Efesus, nema kete dodo i a na provinsi Asia fali nasnyalik ma nti Yerusalem ma nose ler silai Pentakosta.c
Paulus nal snyurat tinawar ber mangonbain gerejar ma rof Efesus
17 Iane nwayat ma Paulus nluan tomwatar sa nof Miletus ma nonr snyurat ber mangonbain gerejar na Efesus ma rma Miletusd. 18 Lama rait Miletus e, Paulus a nfalak ber sir, “Wangur mir kateman! Noak ma kumin Asia ye mifai ningw momorip nof luryain lo. 19 Noak ma kwarya ber Ratu e to dalangw medase ma biase ktwasing. Ma ktwungan anteman yadin nbal nof Yahudyar ma rose ma rfen yakw. 20 Boloka farane to kufengi ma kuftutu kabanir monuk ma uban ber a kmi na tomwat ngayadin ma na mir dasar. 21 Ma kswurat dedesar tomwat Yahudyar ma Yunanyar nema rtate nir salar ma ralele ninr Tuhan Yesus Kristus. 22 Ma lere ye ka ktwi Yerusalem klwarat safe ma Ratu Smwangtany nfalak ber yakw. Ma to kufai feti keta safe diat yak na iano. 23 Yak kufai lan feti keta kwoman suse ma ral yakw na sel, farlan ma Ratu Smwangtany nafbotin ber yakw lo na kotayar mpane. 24 Boloka farane to kfwaduli ningw momorip fen rufuk a nbal, lan feti bise ma ksworu ningw karyae ma Tuhan Yesus nal ber yakw ma kufwibar Ibar Ngamone na Ratu Ni ngamone ber tomwatar.
25 Yak klwole mir kateman ma kufwibar ber a kmi feti Ratu Ni kuase ma neluk Rai ma nfarete tomwatar. Nempa lere ye yak kufai feti keta to kutungan kor a kmi lo. 26 Mpa kfwalak ber a kmi, farlan nof a kmi ye tomwatar sa nmat ma nti naraka e, ka kete mfyasale yakw. 27 Fali to kufengi ma kufbotin na safe-safe monuk ma Ratu ntetak ber a kmi nema ka mifai. 28 Mpa ka mijake kmi numur soranyar monuk farlan mangajak domba ma najake ni dombayar, fali Ratu Smwangtany nfil a kmi lo ma myeluk mangajake ber sir. Ma Ratu Anaky nmat a ntebus sir lo nema reluk Ni tomwatar. 29 Yak kufai feti, lama ktwi e, keta tomwatar rma ma rakmat a kmi ma raftutu kmi ror nir anftutw lepuskwar. Sir a ne farlan aswalas mangaresar ma keta to rlompang kmi. 30 Ma keta tomwatar ketnir nof a kmi e, rbotin ror nir anftutw lepuskwar. Sir rareke ma rose farane la rfule tomwatar ma ralele Ratu nema rlarat sir. 31 Mpa mijak fengamone ma minremi! Ngarkar tel ma rsapat a ne, lere nronram e dedesar ma kswurat a kmi terik ma ktwasing.
32 Mpe lere ye kunrenre kmi ber Ratu ma najake kmi nema dedesar ma milele Ibar Ngamone na Ratu Ni dalam ngamone. Fali I Ni kuase ma nafkoran a kmi ma nal berkat ma nyoding a ne ber Ni soranyar. 33 Ma na ningw momorip e, to lain sa ma kumkeus doit nre mase nre rabit kof tomwatar. 34 Kmi mifai feti, koko yak kwarya ma kswelir ningw perluar mla tbwarngur ma rlarat yakw ne nir perluar a nbal. 35 Yak kal mpampanar ber a kmi lo na safe-safe monuk feti, tkarya fen silai farye la tulung tomwatar ma rawatan. Ma ka tanremi dedesar Tuhan Yesus Ni ngribatnir feti, ‘Ni ngafele tal ber tomwatar nlengan nof ma ral ber kit.’”