Paulus namin kote Efesus
1 Noak ma Apolos lolone namin kote Korintus, Paulus nlole monuk yampren Frigia ma Galatia ma nait kote Efesus. Na iane ntungan tomwatar ketnir ma ralele Yesus lo, 2 mpa nenrat sir, “Noak ma milele Yesus e Ratu nal Smwangtany ber a kmi lo nre lolone?” Ne rfalak, “Lolone, kam to mdengar Ratu Smwangtany a fuky.” 3 Ne Paulus nfalak ber sir, “Noak ma radiris a kmi e, mlyarat ise ni anftutu.” Ne rfalak, “Mlarat Yohanes ni anftutu.”
4 Ne nfalyole ber sir, “Yohanes nadiris tomwatar la nfatnyot feti rtate nir salar lo. Ma Yohanes nfalak a nbal ber sir feti i nma baluan nempa tomwat sa ma keta nlarat i ma nma ne ka ralele I, iane Yesus.”
5 Lama rdengar ngrie ne, rtak ma nal Tuhan Yesus ngarany la nadiris sir a nbal. 6 Noak ma Paulus nsaup limnir a na sir, ne rfen ber Ratu Smwangtany, ma ratanuk ror liliry ma to rkaul ral. Ma rafbotin snyurat nof Ratu nbal. 7 Sir monuk a ne fafa tomwate buti resin du.
8 Paulus nti dedesar das sampayang doan bulnar tel ma nbaran ma natanuk, ma naale andaun nor tomwatar na iane. I natanuk na Ratu ma Ni kuase ma neluk Rai ma nfarete tomwatar, ma nareke nema ralele. 9 Nempa nof sir a ne ketnir ma ulnir arwaluk. Sir to rpeang ma ralele Ratu, ma rarikan Tuhan Ni anftutwar na tomwat ngayadin. Iane nwayat ma Paulus nti a ntate sir ma nor ni manglartar rti Tiranus ni skole. Lerar monuk e sir raale andaun na iano. 10 I nose farane dedesar doan ngarkar du terik ma tomwat Yahudyar ma tomwat Yunanyar monuk na provinsi Asia rdengar Ratu Ni ngribatnir.
Skewa angkir
11 Ratu nal kuase ber Paulus ma nose kabain mpasalnar ma nlie nlengan. 12 Nwayat ma ni lenso nre maloli ma biase npaki ne, farlan ral ma rtait mangafansar e rangamon lo. Ma smwangat yatkar ma rsung tomwatar a ne rbie.
13 Noak a ne nbal mangasalan Yahudyar ketnir rmpan a rlole nuse ne ma ratian smwangat yatkar rof tomwatar. Sir rawese ma ral Tuhan Yesus ngarany la ratian smwangat yatkar ma rfalak, “Mor Yesus ngarany ma Paulus nafwibar ne, mbyie!” 14 Na iano Yahudyar nir mangsompe ulnir sa ngarany Skewa. Ni anak merwanar itw a ne biase rose farane nbal. 15 Na ler sa e rose ma ral Yesus ngarany la rafngamone tomwate ma smwangat yatak nsung i a ne. Ne smwangat yatak ne nfalak, “Yesus ma Paulus e kufai sir, ma kmi e mpear?” 16 Ne tomwate ma smwangat yatak nsung i a ne naputuk ma nakramas sir terik ma nir rabtyar a rtarbis ma ramngal, nwayat ma rafla rbie das a ne ramlus.
17 Tomwat Yahudyar ma Yunanyar monuk ma ramin Efesus rdengar ngrie ne ramtaut. Mpa rdangin Tuhan Yesus ngarany. 18 Tomwatar a ne yadin ma ralele Yesus lo. Sir a ne ma ryoding na tomwat ngayadin sonir lury feti luryain e sir rose snyafkar a nbal. 19 Tomwatar yadin ma rsafak a ne, rabutin nir buku snyafkar betno rapu na tomwatar sonir lury. Bukwar a ne kotkir monuk e, fafa doit perak ribun buty lim.a 20 I a ne nwayat ma Ratu Ni ngribatnir ntafal ma namelir nwayat ma tomwatar rtafal ma yadin ralele Tuhan.
Mimiri na Efesus
21 Lama ngriar ne omp, Paulus ntetak ma nti Makedonia ma Akhaya, betno naloran far Yerusalem. Ne nfalak, “Nof a ne ka ktwi Roma nbal.” 22 Ne nsiduk ni magkaryayar du ma rbalun far Makedonia, sir a ne Timotius ma Erastus. Ma i e lolone namin provinsi Asia. 23 Noak a ne, mimiri silai desar na Efesus fali Yesus Ni anftutwar. 24 Na kote ne tomwatar sa ngarany Demetrius, i ye ma nose kabanir nof perak. Ma nose kuil anak ber dewa limnriti Artemis. Ni karyae ne nrabut dotyar yadin ber ni mangkaryayar.b 25 Mpa ler sa e nafburat ni mangkaryayar numur mangkarya perak walyetar a nbal, betno nfalak ber sir, “Wangur mir kateman, mifai feti ninr karyae ye nrabut dotyar yadin ber kit. 26 Nempa koko kmi msyalan ma mdyengar safe ma Paulus nose ne. I natanuk la nwayat tomwatar yadin ma rlarat i. Ne nfalak feti, to uban ma rsampayang ber waltwar ma kit tose ne. Tomwatar ma ralele i to na lan Efesus ye nempa ketla nsor provinsi Asia. 27 Mpe nose farane nwayat ma tomwatar keta to rselir kabanir ma tose ne lo. To lan iane nempa keta tomwatar to rfaduli kuil Artemis, dewa limnriti silai ne. Safo doan ye tomwatar na provinsi Asia ma saryamprene ni kateman rsatngur ber i.”
28 Rdengar farane tomwatar rares ma rafwayak dedesar feti, “Artemis arwalu ko! Efesusar kit ninr dewa limnriti!” 29 Mpene mimiri ne nti nait kote ne dalam, mpa tomwatar monuk rtamyabur far das faburat dalam. Sir romat Gayus ma Aristarkhus ma rakei sir a nbal. Radu ye rof Makedonia, ma rorang Paulus na ni mpampane. 30 Paulus nose ma nti tomwat ngayadin ne nempa tomwat anlelar na iane rose rteri i. 31 Mangonbain silayar ketnir a nbal na provinsi Asia ma ratbwarin ror Paulus, raluan tomwatar ma rti rfalak ber i feti ka kete nti das faburat ne. 32 Mpene tomwatar ma rafburat sir na das faburat ne rngelir ma fwayak fwoik sir. Ketnir e rfalak farane, ma ketnir e rfalak farye. Fali to rafai feti safema rafburat sir na iano. 33 Ne tomwat Yahudyar rsuar tomwatar sa far lury ngarany Alexander mpa tomwatar rafliak feti i nwayat. Mpe nlobik limnir ma ntak tomwat ngayadin ne ma rtatutuk ma nose ma natanuk. 34 Nempa lama rafai feti Aleksander ye tomwat Yahudi i e, nir kateman rafwayak rngete, “Artemis arwalu ko, Efesusar kit ninr dewa!” Sir rafwayak farane ketla jamar du. 35 Nempa juru tulis kote ne ntampu nal tomwat ngayadin a ne ma nfalak, “Hei, Efesusar a kmi! Tomwatar monuk na mpenempen rafai feti kote ye nafyamping kuil ber dewa limnriti Artemis mangamin medase, ma ni walut lelerap ma ntompur nof langit. 36 To tomwate fen lese ma nulak ngrie ne mpa mnyau, ma myose kabanir e ka mdyaun fengamone fuky. 37 Kmi myor tomwatar du a ne mya lo, safo to ramnang ninr dewa limnriti ni kuil, ma to rafbwere i. 38 Mpa farlan Demetrius nor ni mangkaryayar ne rose ma rmangadu tomwatar sa, ni ngafele e ror ngrie ne far mangtetkar. La mangtetkar rurus sir na iano. 39 Ma farlan kabar sa to nordeng dalmir, ni ngafele e mtyi mikmat mangtetkar nema rtetak ngrie ne rlarat yayatwrar na kote ye. 40 Ma mangfaretar keta rsoi feti kit ye ma tose mimiri fali noak ma renrat kit feti safema ngrie ye nbotin e to tbali tal. 41 Lama juru tulis ne nfalak monuk farane, i nluan tomwat ngayadin ne ma rbali sir.