Paulus namin kote Korintus
1 Mpene Paulus nti a ntate kote Atena ma nti kote Korintus. 2 Na iano i natungan nor tomwat Yahudyar sa nof Pontus ngarany Akwila. Akwila ye radu sawan Priskila betno rof Italia rma fali Kaiser Klaudius nfarete ma tomwat Yahudyar monuk rbie rof Roma. Ne Paulus nwelat nir das. 3 Ma nor sir ma raktem a rkarya fali nir karyae feleles. Nir karyae ne rose befkar ma rfenri. 4 Na Yahudyar nir ler sanari mpane e, Paulus nti das sampayang ma naale andaun nor tomwat Yahudyar ma Yunanyar. I natanuk nareke nema ralele Yesus.
5 Noak ma Silas ma Timotius rof kote Makedonia rma e, Paulus nal mate lan ma nafwibar Ratu Ni ngribatnir ma nfalak ber tomwat Yahudyar feti Yesus ye Rai Mangtebus. 6 Nempa tomwat Yahudyar dedesar rbangal ma rarikan i. Mpa natetar ompak masun nof ni rabit ma nfatutu feti Ratu to nlangun sir. Ne nfalak, “Farlan safe-safe diat a kmi e ka kete mfyasale yakw ma koko kmi a mibare motak! Ntabw nof lere ye ktwi kufwibar Ratu Ni ngribatnir ber tomwatar ma to Yahudi sir.”
7 Mpe nbie nof a ne ma nti tomwat sa ngarany Titius Yustus ni das. Titius Yustus ye to Yahudi i nempa nsampayang dedesar ber Ratu ma ni das a namin das sampayang balisya. 8 Tomwatar sa ma nalele Tuhan Yesus ngarany Krispus. I neluk ulun na das sampayang ne. I nor ni dasdalam ralele Tuhan Yesus. Ma tomwat Korintusar yadin nbal rdengar ibar ma Paulus a nfalak ne ralele Tuhan Yesus, mpa radiris sir.
9 Ni nronram sa e Tuhan nma ma nfatutu felan ber Paulus ma nfalak, “Kete mumtaut, kete muter! Ma mufwibar dedesar Ningw ngribatnir. 10 Fali kor ko dedesar ma keta to tomwate fen lese ma nose yatak ko. Fali kfwil tomwatar yadin na kote ne lo ma rlarat Yakw.” 11 Mpa Paulus namin Korintus ngarak dalam lian ma naftutu Ratu Ni ngribatnir ber sir.
12 Nempa noak ma Galio nose gubernur na provinsi Akhaya, tomwat Yahudyar dalmir lese ma rbangal Paulus betno ror i ber Galio ma nsidang i. 13 Ma rfalak, “Tomwate ye naftutu tomwatar yadin ma rsampayang ber Ratu, nempa ni anftutwar a ne to feleles nor Musa ni tetetkar.
14 Noak ma Paulus nose ma natanuk, Galio nfalak ber sir, “Tomwat Yahudyar a kmi! Farlan mifbotin na ngriyatkar sa e keta klwangun mir ngrie ne. 15 Nempa lan kafreye na tnyangkwar, ma ngare numur yayatrwar ma mpyan a mlyarat, la misusan motak. Yak to kpweang ma kurus ngriar farane.” 16 Mpe Galio natian sir nof sidang dalam a ne. 17 Ne tomwatar monuk ne romat Sostenes ma nose ulun na das sampayang, betno rbabal i a na Galio soun lury nempa to nfaduli desar ngrie ne.
Paulus a nbali i far Antiokhia
18 Paulus namin kote Korintus lerar fir a ne, ne ntul soranyar na iane, ma nti kote Kengkrea. Na iano nfakir ulun fali nyoding ber Ratu lo.a Betno raktem Akwila ma Priskila raflolwain ror kabal far Siria. 19 Lama rait kote Efesus e, Paulus nti a ntate Priskila ma Akwila. Ma nti das sampayang ma naale andaun nor tomwat Yahudyar na iane. 20 Sir rtak ma namin iane far dodo nempa i to nlampir. 21 Boloka farane noak ma nti a ntate sir e nfalak, “Farlan Ratu nlarat e, la kbwali yak kmwa ye nbal.” Mpene nti a ntate kote Efesus. 22 Lama nait Kaisarea,b i nti Yerusalem ma ntul soranyar na iano, betno naloran far Antiokhia. 23 I namin iane far dodo, ne nti a nbal ma nlole yampren Galatia numur Frigia, ma nafkoran tomwat anlelar na iano.
Apolos namin kote Efesus ma Korintus
24 Noak a ne tomwat Yahudi sa nti Efesus. I ngarany Apolos nof kote Aleksandria. I nafai ma natanuk ma nafai resi Kitab Lelerap isin. 25 Ma tomwatar raftutu na Tuhan Yesus ber i lo, nwayat ma nbaran ma naftutu tomwatar fengamone desar na Yesus. Safo i nafai lan safe ma Yohanes naftutu tomwatar noak ma nadiris sir. 26 I ntafal ma nbaran ma naftutu na das sampayang. Noak ma Priskila ma Akwila rdengar ni anftutwar e, sir ror i far nir das. Na iano rfalyole fengamone Ratu Ni dalamtene ma ber i nema ntafal ma nafai. 27 Apolos nmpeang ma nti Akhaya, mpa soranyar na Efesus rarengi surat ber soranyar na Akhaya nema ka rlangun i fengafele. Noak ma Apolos nait Akhaya e, i ntulung tomwat anlelar yadin ma nafkoran sir. Mpe sir ye ma ralele Yesus lo fali Ratu nal nimet silai ber sir. 28 Apolos nbaran a nbal ma nabangal nor tomwat Yahudyar na tomwat ngayadin. Ma nal ayatar na Kitap Lelerap la nfatutu feti Yesus ye Rai mangtebus.