Paulus namin Tirus ma Kaisarea
1 Lama makes kam mor mangonbain gerejar na Efesus e, maflolwain mor kabal far nus Kos. Ma ni bobole ne mait nus Rodos, ma mof a ne far kote Patara. 2 Na iane, kam msalan kabal sa ma nose ma nti Fenisia. Mpe mfangat kabal a ne ma mti. 3 Noak ma kam lolone maflolwain kam mkeban nus Siprus na balisya bayal. Nempa kam maflolwain maloran far Siria ma mti mloi na kote Tirus, fali kabal ntolar kabanir a na kote ne. 4 Na iano kam mlole Yesus Ni manglartar ma mor sir minggu dalam. Ma Ratu Smwangtany nafbotin ber manglartar a ne ma rfalak ber Paulus nema kete nti Yerusalem. 5 Lama minggu dalam omp, maloran mamy mpampane. Ne manglartar monuk a ne ror sawnir angkir ror kam far kote burit. Na laran dasy kam msangitil ma msampayang. 6 Mpe matuli kam, ne mfangat kabal ma sir a ne rbali sir far nir dasar.
7 Ne maflolwain mof Tirus, tila mait Ptolemais. Na iano mti makmat tomwat anlelar ma mose salam ber sir ma mkoil sir nronram lese. 8 Ni bobole ne maflolwain a nbal ma mti mait Kaisarea. Ne mti makmat Filipus ma mamin ni das. Filipus ye mangafwibar Ibar Ngamone nof tomwatar itw ma rfil sir a na Yerusalem. 9 I anak batdarar fat ma Ratu nal kuase ber sir ma rafbotin snyurtar nof Ratu. 10 Noak ma kam lolone mamin lerar fir a na iane, nabyar sa nof Yudea nma ngarany Agabus. 11 I nma ma nakmat kam ma nal Paulus ni bebebe la nkete limany emany betno nfalak, “Ratu Smwangtany nfalak feti, keta tomwat Yahudyar ma ramin Yerusalem rkete tomwate ma ni bebebe ye farye. Betno ral i ber tomwatar ma to Yahudi sir.” 12 Mdengar farane e, maktem tomwatar ma ralele Yesus ma mamin Kaisarea ne mtak desar Paulus ma kete nti Yerusalem.
13 Nempa i nfalak, “Kete mtyasing farye, koli myose ma dalangw suse. Yakw ye knengar motak, ma rkete yakw, nre rfen yakw na Yerusalem fali klwarat Tuhan Yesus.” 14 Kam to mose mteri mal i a mpa to mfalak sasaf. Ma mfalak lan feti, ka weni Ratu nafdiat safe safe monuk ye nlarat Ni mpempeang. 15 Kam mamin iane lerar fir a ne, betno masusan mamy kabanir ma mti Yerusalem. 16 Ne maktem tomwatar ketnir ma ralele Yesus rof Kaisarea ne mti tomwatar sa ni das. Tomwate ne ngarany Manason, i nof Siprus ma nlarat Yesus dodo lo.
Paulus natungan nor Yakobus
17 Noak ma mait Yerusalem, soranyar na iane rlangun kam ror dalmir senange. 18 Ni bobole ne maktem Paulus mti makmat Yakobus, ma mangonbain gerejar monuk ma ramin iane nbal. 19 Lama Paulus nose salam ber sir e, i nasaur safe-safe monuk ma Ratu nose na ni karyae ne ber tomwatar ma to Yahudi sir. 20 Lama rdengar farane, rdangin Ratu. Ma rfalak ber Paulus, “Waingw, mswalan! Tomwat Yahudyar yadin ralele Yesus lo, ma sir ye rlarat dedesar Musa ni faretar. 21 Nempa sir rdengar feti ko muftutu tomwat Yahudyar monuk ma ramin nus walyetar nema kete rlarat Musa ni faretar. Ma ko mfwalak a nbal ma kete rsunat angkir ma kete rmorip a rlarat Yahudyar nir adat. 22 Ma rdengar feti ko mumin ye lo, mpa tose farpe? 23 Ni ngafele e, mlwarat safe ma mfalak ye. Tomwatar fat nof kam ye ryoding ber Ratu lo. 24 Mpa mor sir far Ratu Ni das silai ma miktem a miflerap tenmir. Ma mwal doit ma mbwayar nir snyompar nema bise ma rfakir ulmir.a Mose farane nema tomwatar monuk rafai feti safe ma rdengar na ko a ne to botuan, fali koko ko a nbal e mufmpwane Musa ni faretar. 25 Ma tomwatar ma to Yahudi sir ma ralele Yesus a ne, kam marengi tetetkar ber sir feti ka kete rane tnyamar ma rloik ber dewayar, kete rane tnyamar ma lolone darnir ma kete rane binatngar ma rmenrak a rfen sir, ma kete ranronr.”
26 Ni bobole ne Paulus nor tomwatar fat a ne raflerap tenir. Ne i nti Ratu Ni Das Silai ma nafbotin ber mangsompe feti bait lerar fir a nbal betno sir raflerap monuk tenir, nema bise ma leles mpane rloik nir snyompar.
Tentara Romar romat Paulus
27 Noak ma lerar itw a ne ketla omp, tomwat Yahudyar ketnir ma rof Asia rkeban Paulus na Ratu Ni Das Silai, mpa sir rajowe tomwat ngayadin ma romat i. 28 Ma rafwayak, “Hei tomwat Israelar! Mya ma tsalan! Tomwate ye ma naftutu tomwatar monuk na mpenempen ma rbangal tomwat Yahudyar kit, ma rlangas Musa ni faretar, ma rafbwere Ratu Ni Das Silai. Ma lere ye i nor a nbal tomwatar ma to Yahudi sir rti Ratu Ni Das Silai dalam ma rafaknise ain lelerap ye!” 29 Sir rfalak farane fali rsalan Trofimus tomwat Efesus a ne radu Paulus a rmpan na kote Yerusalem, ma rafliak feti Paulus nor i far Ratu Ni Das Silai lo.
30 Mpe nuse monuk mayoi mayai, nwayat ma tomwatar rtamyabur ma romat Paulus, ma rakei i rof Ratu Ni Das Silai far burit, ma rfolat monuk ni fofolat finrwar desar.” 31 Noak ma rengy ma rfen i, ibar a ne ti nait komandan feti tomwatar monuk mayoi mayai na Yerusalem. 32 Mpe komandan a ne nasnyalik ma nafburat suldadwar ulnir monuk numur nir suldadwar ma rti ain a ne. Noak ma tomwat ngayadin a ne rsalan komandan nor ni suldadwar, to rbabal Paulus lo. 33 Ne komandan a ne nti nlosir Paulus ma nomat i, ma nluan ma ral rewar du la rkete i, betno nenrat tomwatar feti tomwate ye ise i, ma ni sal safe. 34 Nempa tomwatar ketnir rafwayak farye, ma ketnir a nbal rafwayak farane. Ma rngelir resi mpa komandan to nafai feti safe ma terjadi. Mpe nluan ma ror i far markas. 35 Noak ma rait fnite, suldadwar a ne ka rabare Paulus fali tomwatar yadin rasikul sir ma rose ma rbabal i. 36 Ma tomwatar ma rlarat i a ne rafwayak, “Tfen i!”
Paulus ntak ma natanuk
37 Noak ma rose ma rti markas dalam, Paulus a nfalak ber komandan a ne, “Bise ma kfwalak kabanir sa e?” Ne suldadwar nir ulun ne nfalak, “Ali ko mufai Yunani lirin e? 38 Yakw kufliak feti ko ye tomwat Mesir ma bete ye mose mimiri ma mufla mor mangafene ribun fat far ain letkyape.” 39 Ne Paulus nfalak, “Yakw ye tomwat Yahudi, kof kote Tarsus. Kote ma namelir na nus Kilikia. Bise mwinrang ma kutanuk kor tomwat ngayadin a ne?”
40 Komandan a ne ninrang ma Paulus natanuk. Ne i nti namdir fnite betno nlobik liman ber tomwatar a ne. Noak ma rtatutuk e natanuk nor Ibrani lirin ber sir.