Petrus nfalyole na safema nadiris tomwatar ma to Yahudi sir
1 Mangsidkwar numur tomwat anlelar na yampren Yudea ni kateman, rdengar feti tomwatar ma to Yahudi sir rlangun Ratu Ni ngribatnir a nbal. 2 Noak ma Petrus nait Yerusalem, tomwat Yahudyar ma ralele Yesus ne rabangal ror i. 3 Ma rfalak, “Safema ko mtwi tomwatar ma to Yahudi ne nir dasar, ma mtwame mor sir?” 4 Mpe Petrus nfalyole safe-safe monuk nof luryain ber sir ma nfalak, 5 “Ler sa e yak kswampayang na pnu Yope, metryat e kswalan kabanir sa far maloly melabar ma rkete suswnir fat far das, ma rtolar rof langit na soungw lury. 6 Ne kswalan e, binatngar emnir fafat felnir mpane, binatngar ma rtalir, binatngar ma rlar ma mangkyar. 7 Ne kdwengar liliri ma nfalak, “Petrus, mpwote ko! Mkwet sir ma mune!” 8 Nempa kfwalak, ‘Tate Tuhan! To kune kabanir ma rarai ma ramoli sir.’ 9 Nempa liliri ne nfalak a nbali nof langit feti, ‘Safe ma Ratu nfalak feti bise ma mune ka kete mumoli sir.’ 10 Mpe ngrie ne nalangtely tila rkei rbali far langit. 11 Na lere ne nbal tomwatar tel ma rsiduk sir rof Kaisarea, rait das ma kumin a ne. 12 Ne Ratu Smwangtany nfalak ber yakw feti, kete mudaun sasaf ma mtwi motak. Ne tomwat anlelar nem ye, ma rof pnu Yope rlarat yakw nbal ma mti Kornelius ni das na Kaisarea. 13 Mpene Kornelius nasaur ber kam feti, malaekat nma ma nfatutu felany ber i na das dalam. Malaekat ne nfalak, ‘Mlwuan tomwate nti pnu Yope ma ntar merwan sa ngarany Simon ma rtar feti Petrus. 14 Keta i nafbotin ber ko feti felan farpe ma Ratu nalin ko mor nim das dalam myof mir salar.’ 15 Noak ma kutanuk e, sir rfen ber Ratu Smwangtany, feleles farlan ma nfen ber kit na ler Pentakosta. 16 Ne kunremi safe ma Tuhan Yesus nfalak, ‘Yohanes nal weye la nadiris tomwatar, nempa to dodo a nbal e Amangw nadiris a kmi. Iane kmi mfyen ber Ratu Smwangtany.’ 17 Ratu nal Ni Smwangtany a nbal ber tomwatar ma to Yahudi sir, feleles farlan ma nal ber kit noak ma talele Tuhan Yesus Kristus. Farlan Ratu nose farane e bise ma kose ktweri I e?” 18 Lama rdengar farane rtatutuk, ne rdangin Ratu ma rfalak, “Farlan farane ye, Ratu nal lety ber tomwatar ma to Yahudi sir nema rasesal nir salar ma ronri momorip dedesar!”
Tomwat anlelar na Antiokhia
19 Lama rfen Stefanus e rsiksa nbal tomwat anlelar, nwayat ma rakes rasam sir far mpenempen. Ketnir ramin Fenesia, ma ketnir a nbal ramin Siprus ma Antiokhia. Boloka farane sir rafwibar Ratu Ni ngribatnir ber lan tomwat Yahudyar. 20 Nempa nof sir a ne tomwat Siprusar ma Kirenar ketnir, rti Antiokhia ma rafwibar Ibar Ngamone na Tuhan Yesus ber tomwat Yunanyar. 21 Ratu Ni kuase norang sir nwayat ma tomwatar yadin ralele ma rlarat Tuhan. 22 Soranyar na Yerusalem rdengar ngrie ne mpa rsiduk Barnabas ma nti Antiokhia. 23 Lama nait a no nsalan e Ratu nal nimet silai ber tomwatar ne, mpa nsenang resi. Ne nsurat sir ma ka rlarat dedesar Tuhan ror dalmir kateman. 24 Barnabas ye tomwat ngamonar sa i ma nfen ber Ratu Smwangtany mla nalele resi Ratu. Iane nwayat ma tomwatar yadin rlarat Tuhan. 25 Mpene Barnabas nti Tarsus ma nanriak Saulus, 26 lama ntungan i, nor i far Antiokhia. Sir ror soranyar na iane ngarak dalam, mla raftutu tomwat ngayadin. Mpe na Antiokhia ye, tomwatar betno rafngare tomwatar ma ralele Yesus feti tomwat Kristenar. 27 Noak a ne nabyar ketnir rof Yerusalem rti Antiokhia. 28 Tomwatar sa nof sir ngarany Agabus. I nfen ber Ratu Smwangtany ma nfalak feti, keta lafar silai nsor monuk saryamprene. Ngrie ne nbotin noak Kaiser Klaudius nfarete. 29 Mpe Yesus Ni manglartar yoyouk lese ma rabutin mpane nir dotyar rlarat safe ma bise ral ma ronry ber soranyar ma ramin Yudea. 30 Sir rose farane, betno rsiduk Barnabas radu Saulus ma ronry dotyar a ne ber mangonbain gerejar na Yudea.