Herodes nluan ma rnau Petrus na sel
1 Noak a ne, rai Herodes nose ma nluan tomwatar ma romat tomwat anlelar ketnir ma rsiksa sir. 2 I nluan ma rfen Yohanes wainy Yakobus, ror smade. 3 Herodes nsalan feti ngrie ne nafsenange tomwat Yahudyar, mpa nluan a nbal ma romat Petrus na Yahudyar nir Ler Silai Roti ma To Ragi.a 4 I nau Petrus na sel betno nluan klopar fat ma ralikur sir ma rajake i. Nof klopar mpane ne suldadwar fafat. I nose farane fali nmpeang ma nsidang Petrus na tomwat ngayadin noak ma Ler Silai Roti ma To Ragi a ne omp. 5 Petrus namin sel dalam, nempa soranyar rsampayang dedesar ror dalmir kateman ber i.
Malaekat nalin kalin Petrus nof sel
6 Na nonram ne ral rewe besyar du ma rkete Petrus limnir ror suldadwar du ma rarwa. Ma suldadwar du rajak na fofolat. Ni bobole e Herodes nose ma nsidang Petrus na tomwat ngayadin. 7 Metryat e malaekat sa namdir nlosir Petrus ma snyain idak na sel dalam ne. Malaekat ne nawawan Petrus ma npangun i betno nfalak, “Mpote ko musnyalik!” Mpe nof a ne rewe ne nbie rof limnir. 8 Ne malaekat ne nfalak ber i, “Mkwete fetwalam ma mwolw sabatwemar.” Ne Petrus nose nlarat. Betno malaekat a nfalak, “Mfonak nim rabit melawas ma mlwarat yakw.” 9 Mpe Petrus nlarat malaekat ne far burit. Nempa to nafai feti safe ma malaekat nose ne botuan, nafliak feti natrufe. 10 Sir rlanre mangajak anir du betno rait fofolat besi ma nti kote. Fofolat ne koko i ntakbanril, ne radu a rti burit ma rmpan far dalamtene matan. Metryat e malaekat ne nti a ntate i.
11 Ne Petrus betno nfenai ma nfalak, “Hete! Botuan lo, Ratu naluan malaekat ma nma nalin yakw nof Herodes ni kuase ma ntate yakw nbal nof safe safe monuk ma Yahudyar rpeang ma diat yakw.”
12 Lama Petrus nfenai ngrie ne, i nti Maria ni das. Maria ye Yohanes enany. Yohanes ye ma rtar feti Markus. Na iane tomwatar yadin rabut sir ma rsampayang. 13 Lama nait e, ndelak fofolat lury. Ne kawar batar sa ngarany Rode nose ma nbanril fofolat. 14 Ne Petrus ntar nof burit, mpa kawar ne nserap liriny. Nempa i to nbanril fofolat fali nsenang resi ma nafla nbali far dalam, ma nafbotin ber tomwatar monuk feti Petrus namin burit. 15 Ne rfalak, “Ali mfukat e!” Nempa nfalak dedesar feti botuan i a ne Petrus. Ne rfalak, “Iane ni malaekat!” 16 Nempa Petrus ndelak fofolat dedesar. Mpa rti rbanril fofolat ne ma rsalan i. Sir rampriang desar ma ramngangebab. 17 Ne Petrus nau limany na sukan nema ramlin. Mpene nasaur ber sir felany farpe ma Tuhan nalin i nof sel. Betno nfalak, “Mifbotin ber Yakobus ma ninr soranyar a nbal.” Mpe nti burit ma nal far ain walyete.
18 Ni bobolisin e suldadwar ma rajak a ne mayoi mayai mla raenrat sir feti safe diat Petrus ye. 19 Ne Herodes naluru ma ranriak Petrus nempa to rtungan i. Mpa Herodes nenrat nareke suldadwar ma rajake Petrus ne, nempa to rafai sasaf mpa nluan ma rfen sir. Mpene Herodes nti a ntate Yudea ma nti Kaisarea ma namin iane.
Herodes nmat
20 Herodes narese desar tomwat Tirusar ma Sidonar. Mpa dalmir lese ma rabut sir ma rti rakmat i. Rait e rti rakmat Blastus baluan ma ralonge dalamy ma ntulung sir. Blastus ye mangonbain silayar sa ma nayatur Herodes ni istana. Sir rtak ma rangamon ror Herodes, fali sir ral tnyamar rof Herodes ni nuse.
21 Na ler sa e Herodes nfonak ni rabit melawas ngafele ma namtoran na rai ni kadere ma natanuk ber sir. 22 Lama rdengar Herodes natanuk e, rdangin i ma rafwayak, “I ye dewa ma natanuk, ma tomwate tate!” 23 Noak a ne nbal Tuhan Ni malaekat ntef i, fali to nose alang ber Ratu. Mpa nmat e kekewar rane i.
24 Mpe Ratu Ni ngribatnir ntafal ma namelir na mpenempen, ma tomwat anlelar rtafal ma yadin.
25 Lama Barnabas ma Saulus rsoru nir karyae e, rbali sir rof Yerusalem far Antiokia. Ne rti e ror Yohanes ma rtar feti Markus.