Malaekat nluan Kornelius ma ntar Petrus
1 Na Kaisarea tomwatar sa ngarany Kornelius. I nose ulun ber suldadu kompi lese nof suldadwar ma rtar feti ‘Suldadw Italiar.’ 2 I ye tomwate ma nlarat dedesar Ratu ma nor ni das dalam rsatngur ber Ratu. I ntulung tomwat Yahudyar ma rawatan ma nsampayang dedesar ber Ratu. 3 Na ler da sa fafa jam tiga, Kornelius nsalan desar feti malaektar sa nma ma ntar i, “Kornelius!” 4 Ne i nfon malaekat ne ma namtaut ma nfalak, “Tuhan, safe ne?” Malaekat a nfalak, “Ratu nsaluk monuk nim sampangar ma nanremi nim dalam ngamone ne. 5 Mpa lere ye mlwuan tomwatar ketnir ma rti pnu Yope ma ral Simon ma rtar a nbal feti Petrus. 6 I namin tomwat sa ni das ma namin laran. Tomwate ne ngarany Simon ma ni karya e nose binatang kultir.” 7 Malaekat ne nfalak monuk e, nti a ntate i. Ne ntar ni mangkaryayar du numur suldadw sa ma nlarat dedesar Ratu nof tomwatar ma dedesar ror i. 8 Ma nasaur safe safe monuk ma malaekat nfalak a ne betno nluan sir ma rti pnu Yope.
Petrus nsalan kabanir sa ntompur nof langit
9
Petrus nsampayang na bubungan das (10:9)
Petrus Nsalan Binatngar Felnir Mpane Na Maloly Melabar Dalam (10:12)
Petrus nfalak Tuhan Ni snyurat ber Kornelius
17 Ne Petrus naenrat na dalamy feti safe ma nsalan a ne isiny farpe. Noak a ne tomwatar ma Kornelius nluan sir a ne rtungan Simon ni das ma rait fofolat fakar lo. 18 Ne rtar tomwatar sa ma renrat, “Ali Simon ma rtar feti Petrus ne namin ye e?” 19 Noak ma Petrus nadaun safe ma nsalan a ne, Ratu Smwangtany nfalak, “Hei Petrus, tomwatar tely ranriak ko. 20 Mpwote ko ma mtwompur far bab ma mlwarat sir, ma kete mudaun sasaf fali Yak kuluan sir ma rma ye.” 21 Ne Petrus ntompur far bab ma nfalak ber tomwatar ne, “Kmi minriak i a ne yakw ye lo. Mya ma myose safe ye?” 22 Mpe rfalak, “Suldadw Romar nir ulun sa ngarany Kornelius, nluan kam ma makmat ko. I ye tomwat ngamonar sa i ma namtaut Ratu, ma tomwat Yahudyar monuk ralang resi i. Malaekat lelerpar sa nluan i ma ntar ko ma mtwi ni das nema ndengar safe ma keta mfwalak. 23 Ne Petrus nfalak ber sir ma rarwa iane. Ma ni bobole ne betno Petrus nor tomwat anlelar ketnir rof pnu Yope raktem tomwatar a ne rti. 24 Ni bengdu e sir rait Kaisarea. Na iano Kornelius ma urany wainy numur tbwarnir rafburat sir ma rdaf Petrus ka. 25 Lama Petrus nait das, Kornelius nlangun i ma nsangitil a na soun lury. 26 Nempa Petrus nfair i ma nfalak, “Mumdir, fali yakw ye tomwat biase motak.” 27 Sir ratanuk ma rti dalam, ne Petrus nsalan tomwatar yadin rafburat sir lo. 28 Ne i nfalak ber sir, “Kmi mifai monuk lo nre, nof Yahudyar nir yayatrwar, kam to matbwarin mor tomwatar ma to Yahudi sir ma to mti nir dasar a nbal. Nempa Ratu nfatutu kabanir sa ber yakw ma nfalak feti kete kfwalak tomwatar ma to Yahudi sir a ne rarai. 29 Iane nwayat ma klwangun motak ma kmwa ye ma to ningw lol sasaf. Nema kufai feti safema mtyar yakw.” 30 Mpe Kornelius a nfalak, “Lerar fat ma rsapat a ne, na lere da jam tiga farye yak kswampayang na das. Metryat e merwan sa ma ni rabit namamas, namdir soungw lury. 31 Tomwate ne nfalak, ‘Kornelius, Ratu ndengar nim sampangar lo ma nanremi dalam ngamone ber ma rawatan. 32 Mpa mlwuan tomwatar ma rti pnu Yope ma rtar tomwat sa ma ngarany Simon Petrus. I namin Simon ni das. Simon ye ni karya e nose binatang kultir, ma ni das a namin laran.’ 33 Iane nwayat ma klwuan desar tomwatar ma rti rtar ko, mpe mwa e mor dalam senange. Mpa lere ye mabuty kam monuk na ye, na Ratu soun lury, nema mdengar monuk safe ma Ratu nsurat ko ma mfwalak ber kam.”
Petrus nafwibar Ibar Ngamone ber Kornelius ka
34 Mpene Petrus nfalak ber sir, “Yak kufai feti ni botuan e Ratu to nasalan souw. 35 Ratu nlangun tomwatar ma rof nusar monuk ma ramtaut I ma rose rlarat Ni mpempeang. 36 Kmi mifai Ibar nof Ratu ma nfalak ber Israelar feti farlan tomwatar ralele Yesus keta raktem Ratu rangamon a rbali. 37 Kmi mifai nbal safe safe monuk ma diat nus Yudea ni kateman, terik Galilea ntabw ma Yohanes naftutu feti tomwatar ka radiris sir. 38 Ka mifai nbal feti Ratu nfil Yesus tomwat Nazaret a ne, ma nal Smwangtany ma kuase silai ber I. Mpe I nal far mpenempen ma nose kabain ngamonar. I nafngamone tomwatar ma natian kalin smwangat yatkar nir ulun fali Ratu nor I. 39 Ma kam mfalak farye fali koko kam ma msalan safe-safe monuk ma nose na nus Yudea mla Yerusalem; Nempa famudi e rtikloi I a na katutun sangwalu. 40 Ma lerar tely e Ratu nafmorip a nbali I, ma nose tomwatar bise ma rsalan I. 41 Nempa tomwatar monuk to bise ma rsalan I, lan tomwatar ma nfil sir a ne. Mpe kam ye lo ma mtame menum mor I ntabw nof ma nmorip a nbali. 42 Ma nluan kam ma mafwibar Ibar Ngamone ne ber tomwat walyetar ma mafbotin feti Ratu nfil I lo ma neluk mangtetak ber mangmorpyar a mla mangmwatar. 43 Nabyar monuk rafbotin na Yesus feti ise ma nalele I, keta Ratu nlure ni salar fali Ni kuase.”
Tomwatar ma to Yahudi sir rfen ber Ratu Smwangtany
44 Petrus lolone natanuk e, tomwatar monuk ma rdengar ibar ne rfen ber Ratu Smwangtany. 45 Tomwat Yahudyar ma ralele Yesus ma rlarat Petrus, sir rampriang fali rsalan Ratu nal Smwangtany ber tomwatar ma to Yahudi sir a ne nbal. 46 Sir rdengar ma tomwatar ne rdangin Ratu ror liliri ma koko sir to rkaul ral. Mpa Petrus nfalak, 47 “No msyalan tomwatar ye, sir ronri Ratu Smwangtany farlan kam a nbal. Mpa ise bise nose nteri ma radiris sir.” 48 Mpene Petrus naluru ma radiris sir ror Yesus Kristus ngarany. Lama radiris monuk sir, rtak Petrus ma nor sir lerar fir na iane.