Saulus ntate ni salar
1 Noak a ne Saulus dedesar ma naftaut Yesus Ni manglatar ma nareke ma nfen sir. I nti nakmat mangsomp silai, 2 ma ntak surat kuase ma non ber ulnir na Yahudyar nir das sampayang na Damsyik, nema farlan ntungan bate nre merwane ma rmpan a rlarat Tuhan Ni dalamtene e nomat sir ma nor sir far Yerusalem.
3 Na dalamtene lety ma ketla nait Damsyik, metryat e snyain nof langit nbebar i. 4 Ne nfuf ma ndengar liliri ma nfalak, “Saulus, Saulus, safema mtwean Yakw?”
5 Saulus nenrat, “Tuhan, Ise Ko?” Ne nfalak, “Yakw ye Yesus, ma ko mtwean Yakw ne. 6 Mpwote ko ma mtwi kote dalam. Na iano la betno rfalak safe ma mose.”
7 Tomwatar ma rlarat Saulus a ne rampriang ma to rafai feti rose safe, fali rdengar liliri nempa to rsalan kekes. 8 Ne Saulus npote i ma namdiry ma nbelar matnir e to nakeban lo, mpa tomwatar ma raktem a ne rkolat i ma rti Damsyik. 9 I to nakeban lerar tel ma to ntame nenum a nbal.
10 Na Damsyik, Yesus Ni manglarat sa ngarany Ananias. I nsalan desar ma Tuhan natanuk nor i ma nfalak, “Ananias!” Ne nbali, “Yakw ye Tuhan!”
11 Ne Tuhan nfalak, “Mtwi Yudas ni das na dalamten ma ngarany Dalamten Malonri, ma munriak tomwat sa nof Tarsus ngarany Saulus. I lolone nsampayang a ne 12 ma na ni sampayang dalam e natrufe feti ko mtwi mukmat i ma mswaup limamy a na i, nema bise ma nakeban a nbali.”
13 Ne Ananias a nfalak, “Tuhan, tomwatar yadin rfalak na tomwate ne ni adat yatkar yadin ma nose ber Nim manglartar na Yerusalem. 14 Mpe lere ye i nma ma nonry surat kuase nof mangsompar ulnir ma nomat tomwatar monuk ma ralele Ko.”
15 Nempa Tuhan nfalak ber i, “Mtwi motak! Fali Yak kfwil i ma neluk Ningw mangsiduk, ma nafwibar na Yakw ber nus walyetar ma to Yahudi sir numur rayar ma tomwat Israelar. 16 Ma kfwatutu ber i feti keta nabare susar yadin fali Yakw-ngarangw.”
17 Ne Ananias nti das a ne ma nsaup limnir a na Saulus ma nfalak, “Waingw Saulus, Tuhan Yesus ma nafbotin I ber ko a na dalamtene ma mof a ne, I nluan ma kukmat ko, nema mukeban a mbwali ma mfwen ber Ratu Smwangtany.” 18 Nof a ne, kabar sa far ian kikit nbie nof Saulus matnir, mpa nakeban a nbali. Ne namdir ma radiris i. 19a Lama ntame monuk e, nmakoran a nbali.
Saulus nafwibar Ibar Ngamone na Damsyik
19b Saulus namin Damsyik lerar fir a ne nor Yesus Ni Manglartar. 20 Ntabw nof a ne i nti das sampangar, ma nafwibar feti Yesus ye Ratu Anaky. 21 Tomwatar monuk ma rdengar ibar a ne rampriang ma rfalak, “Tomwate ye ma nfen tomwatar ma rtar Yesus ngarany na Yerusalem nre? Ma nma ye ma nomat sir ma nor sir ber mangsomp silayar.” 22 Nempa nti a nti e Saulus ni kuase ma naftutu tomwatar ntafal ma namkoran. Iane nwayat ma tomwat Yahudyar ma ramin Damsyik to rbangal ral i fali nafdiat feti Yesus ye Rai Mangtebus. 23 Lerar fir a ne rsak, tomwat Yahudyar reng ma rfen Saulus. 24 Lere nronram e sir rajak dedesar na kote ni finru matnir monuk, nema bise ma rfen i. Nempa Saulus nafai nir rerengyar a ne. 25 Mpa nronram sa e, Saulus ni manglartar ror i ma rnau i a na keranjang dalam betno rtolar i rof tembok ni dyanele far burit. Tembok ne rose ma nbebar kote ne.
Saulus nbali i far Yerusalem
26 Lama Saulus nait Yerusalem e nti nakmat Yesus Ni manglatar ma nose ma nabut i nor sir, nempa sir monuk ramtaut fali to ralele feti i nalele Yesus lo. 27 Nempa Barnabas nlangun i ma nor i ber mangsidkwar ma nfalak ber sir feti Saulus ye ma nkeban Tuhan ma natanuk nor i na dalamtene lety ma nal far Damsyik. Ma nfalak a nbal feti i nbaran ma nal Yesus ngarany la naftutu na Damsyik. 28 Ne rlangun i ma raktem a ramin Yerusalem. Ma nbaran ma naftutu nor Tuhan Yesus Ngarany. 29 I natanuk a nbal nor tomwat Yahudyar ma ral Yunani lirin ma raktem a raale andaun, nempa sir rareke ma rfen i. 30 Lama tomwat anlel walyetar rafai ngrie ne, sir ror i far Kaisarea betno rof a ne far Tarsus. 31 Noak a ne soranyar ma ramin Yudea ni kateman, Galilea, ma Samaria rmorip ror dalmir senange fali to kekes a rose suse sir. Sir ralele Tuhan ror dalmir katemany fali Ratu Smwangtany nafkoran sir, mpa rtafal ma yadin.
Petrus nose kabain mpasalnar na pnu Lida ma Yope
32 Na ler sa e, Petrus nmpan a nlole ma naninuk soranyar na mpenempen. Ma nwelat a nbal pnu Lida ma nsalan tomwat anlelar na iane. 33 Na iano i natungan nor merwan sa ngarany Eneas. I narwa lan ain fali namlukut ngarkar walw e lo. 34 Ne Petrus a nfalak ber i, “Eneas, Yesus Kristus nafngamone ko. Mpa mpwote ko ma mususan nim arwan ain!” Ne Eneas npote desar i. 35 Tomwatar monuk na pnu Lida ma Saron rsalan feti nangamon lo, ne rbali sir ber Tuhan.
36 Na pnu Yope e batar sa ma ngarany Tabita, ma Yunani lirin nfalak a nbal feti Dorkas. I ye Yesus Ni manglartar sa. I dedesar ma nose kabain ngamonar ma ntulung tomwatar ma rawatan. 37 Noak a ne i nafanas ma nmat. Ma radiris i ma rfele i a na kamar na loteng. 38 Pnu Lida ne nlosir pnu Yope. Yesus Ni manglartar rdengar feti Petrus namin pnu Lida, mpa rluan tomwatar du ma rti rakmat i ma rfalak feti, ‘Musnyalik ma mwa ye fuky.’
39 Ne Petrus nti nor tomwatar du a ne. Lama rait e ror i far kamar na loteng. Bat somar monuk ma ramin a ne rkolu i ma rtasing. Sir rfatutu rabtyar ma rabit melaswar ma nsot noak ma nmorip.
40 Mpe Petrus nluan sir monuk ma rti burit, ne nsangitil ma nsampayang. Betno nfon mangmwate ne ma nfalak, “Tabita, mpwote ko!” Ne nbelar matnir. Lama nsalan Petrus e npote i ma namtoran. 41 Ne Petrus nomat limany ma ntulung i ma namdir. Mpene i ntar tomwat anlelar numur bat somar ma ramin a ne, ma nfatutu ber sir feti bate ne nmorip a nbali lo. 42 Ibar na ngri e ne namelir monuk na pnu Yope mpa tomwatar yadin ma ralele Tuhan. 43 Ne Petrus namin pnu Yope far dodo, na tomwat sa ni das, ngarany Simon. Simon ye ni karya e nose binatang kultir.