Saulus nsil a nbabal tomwat anlelar
1 Saulus nyoding a nbal feti tomwatar rfen Stefanus. Ntabw nof a ne, rafuri soranyar na Yerusalem ma rsil a rbabal sir. Tomwatar monuk ne rakes rasam sir far yampren Yudea ma Samaria, ma lan mangsidkwar ma ramin dedesar Yerusalem. 2 Tomwatar ketnir ma ralele Ratu ne rtasing desar Stefanus ma rafonak i. 3 Nempa Saulus nareke ma nafyatak soranyar na Yerusalem, ma nasunge dasar ma nakei bate merwane far burit ma ral sir far sel dalam.
Filipus nafwibar Ibar Ngamone na Samaria
4 Mpe tomwat anlelar ma rakes-rasam sir a ne rafwibar Ibar Ngamone na mpenempen. 5 Ma Filipus nti kote sa na Samaria ma nafwibar ber tomwatar na iane feti, Yesus ye Rai Mangtebus. 6 Noak ma tomwatar a ne rdengar safe ma Filipus nafwibar, ma rsalan kabain mpasalnar ma i nose ne e dalmir lese ma rlangun safe ma nfalak a ne. 7 Fali rsalan smwangat yatkar ma rsung tomwatar a ne rbie mla fwayak fwoik sir. Ma mangamluktwar ma sabaloyar yadin rangamon. 8 Mpa tomwatar na kote ne rampumpuki desar sir.
Simon mangsafak
9 Na kote ne tomwat sa ngarany Simon. Nof luryain nose ni snyafkar nwayat ma tomwat Samariar rampriang, ma i nose felany far tomwat silayar sa. 10 Tomwatar monuk silai marumat ranaumat i ma rfalak, “Tomwate ye Ratu nal kuase ber i ma rtar feti mangkuase silai.” 11 Mpa rlarat i, fali ni snyafkar a ne dodo lo nwayat ma rampriang. 12 Nempa lere ye sir ralele Filipus fali nafwibar Ibar Ngamone na Ratu Ni farete dalam, ma na Yesus Rai Mangtebus. Ne nadiris bate merwane sir. 13 Simon koko i nalele nbal. Lama radiris monuk i e, i nlarat dedesar Filipus. Ma nampriang ma nsalan fanikar a mla kabain mpasalan silayar ma Filipus nose.
14 Mangsidkwar na Yerusalem rdengar feti tomwat Samariar rlangun Ratu Ni ngribatnir lo, mpa rsiduk Petrus ma Yohanes ma rti. 15 Lama rait iano e, mangsidkwar du a ne rsampayang ber tomwat Samariar a ne ma rfen ber Ratu Smwangtany. 16 Nof sir a ne to fen lese ma rfen ber Ratu Smwangtany a fuky fali betno radiris sir ror Tuhan Yesus ngarany. 17 Mpene radu a ne rsaup limnir a na tomwatar a ne, mpe Ratu nal Smwangtany ber sir.
18 Simon nsalan feti Ratu nal Smwangtany ber tomwatar noak ma mangsidkwar du a ne rsaup limnir a na sir. Mpa nose ma nal doit ber sir, 19 ma nfalak, “Myal kuase ne ber yakw nbal, nema farlan kswaup limangw na tomwatar e, Ratu nal Smwangtany ber sir a nbal.”
20 Nempa Petrus a nfalak ber i, “La ryebas ko mor nim dotyar a ne far neraka, mufliak feti nim doit a ne bise ma mswelir Ratu Ni kuase e? 21 Ratu nafai feti dalam to namlonry mpa to bise ma mlwarat na karyae ye. 22 Mpa mtwate nim salar, ma mswampayang ber Ratu, nema I nlure nim andaun yatkar a ne; 23 Yak kufai feti dalam maninik kam ma mdwaun lan kabain yatkar.”
24 Ne Simon nfalak, “Msyampayang ber Ratu nrela nema kabanir monuk ma mfyalak a ne to fen lese nbal ma diat yakw.” 25 Lama radu a rasaur safe ma rafai na Yesus ma rafwibar Ratu Ni ngribatnir, rbali sir far Yerusalem. Ma na nir mpampane ne sir rafwibar Ibar Ngamone na pnuar yadin na yampren Samaria.
Filipus nadiris mangonbain silayar sa nof Etiopia
26 Ne Ratu Ni malaekat sa nfalak ber Filipus, “Mpwote ko ma mpwan far balisya trangan, mulyole dalamtene ma nrunrur rof Yerusalem far Gaza.” Dalamtene ne lan ketnir ma rmpan rof. 27 Na dalamtene let e natungan nor tomwat sa. Tomwate ne mangonbanir sa i ma nomat rai bate nof Etiopiaa ni doit. Ma tomwate ye betno nsampayang na Yerusalem ma nbali i far ni nuse. 28 Ne nfangat kereta ma nbali i, ma na ni mpampane dalam e nbaca nabi Yesaya ni kitap. 29 Mpe Ratu Smwangtany a nfalak ber Filipus, “Mtwi mlwosir kereta ne!” 30 Ne i nti nlosir kereta ne ma nasaitling tomwate ne ma nbaca nabi Yesaya ni kitap. Mpe nenrat i, “Ko mufai kitap ne isiny e?”
31
Filipus nfangat kereta ma naflyori ayat ne isiny ber mangonbain ne (8:31)
“I ye farlan domba ma tomwatar ronry ma rfen.
I keta to nfalak ngribatnir sa nbal
farlan domba anaky ma rgunting fuluny e to liriny.
33 Ma rafbwere I ma to kekes rafdiat I.
Ma keta to kekes ma rasaur Ni dasdalam fali rfen I lo.*
34 Mpene mangonbain silai ne nfalak ber Filipus, “No mfwalak, nabi ma nfalak a ne snyain ise? Snyain i nre tomwat walyetar? 35 Mpa Filipus naflyonri safe ma nbaca ne ma nafwibar Ibar Ngamone na Yesus ntab nof ayat a ne. 36 Na dalamtene lety e, rtungan kloloku. Ne mangonbain silai ne nfalak, “Mswalan weye ne, bise ma mudiris yakw e?”
[ 37 Ne Filipus a nfalak, “Farlan mulele Yesus Kristus mor dalam kateman e, kudiris ko.” Ne nfalak, “Yak kulele, feti Yesus Kristus ye Ratu Anaky I.”]
38 Ne tomwat Etiopia ne nfalak ber mangomat kereta ne ma nary, ma radu a rtompur, ma Filipus nadiris i. 39 Lama rof kloloku ne, metryat e Ratu Smwangtany naflae Filipus, mpa mangonbain silai ne to nkeban Filipus lo. Mpe naloran ni mpampane nor dalam senange. 40 Farye ye, Filipus namin Asdod lo. I naloran ni mpampane ma nafwibar Ibar Ngamone na Yesus na pnuar monuk tila nait Kaisarea.