Ananias ma Safira
1 Tomwat sa ngarany Ananias, sawany Safira, radu a rfenri nir ompak lolan. 2 Radu a rfat ma lese ma rnau ompak kotaky a ne ketan, ma ral ketan ber mangsidkwar. 3 Nempa Petrus a nfalak ber i, “Ananias, safema mlwarat smwangat yatkar nir ulun, nwayat ma mlwepusuk Ratu Smwangtany, ma mnwau ompak kotak a ne rufuk ber ko? 4 Ompak a ne mfwenri nre to mfwenri e iane ko nime, ma farlan mfwenri e, doit a ne ko nime nbal. Ma safema mose farane? Ko to mlwepusuk kam nempa mlwepusuk Ratu!” 5 Noak ma Ananias ndengar Petrus nfalak farane, i nfuf ma nmat. Mpa tomwatar monuk ma rdengar ngrie ne ramtaut resi. 6 Ne tabweryar ketnir rma ma rpule i, betno ror i far burit ma rafonak i. 7 Fafa jamar tely a relak Ananias sawany nti dalam. Nempa i to nafai ngrie ne fuky. 8 Ne Petrus nenrat i, “Mpe ompak ma midu sawam a mfyenri ne e, kotaky monuk ye lo e?” Ne Ananias sawany a nfalak, “Au! Kotaky a ne.” 9 Mpa Petrus a nfalak ber i, “Safema midu sawam a mfyat ma lese ma miteman Ratu Smwangtany? Mswalan! Tomwatar ma rafonak sawam a ne rbali sir lo. Ma keta ror ko far burit a nbal.” 10 Metryat farye bate ne nfuf ma nmat na Petrus soun lury. Noak ma tabweryar a ne rti dalam e, rtungan ma nmat lo. Ne ror i far burit ma rafonak i nlosir sawany. 11 Mpe tomwat anlelar ma tomwatar monuk ma rdengar ngrie ne ramtaut resi.
Mangsidkwar a rose kabain mpasalnar
12 Mangsidkwar a ne rose kabain mpasalnar yadin ber tomwat ngayadin. Tomwat anlelar monuk dalmir lese ma rafburat sir dedesar a na Siflyoi Salomo. 13 Ma tomwatar ma to ralele Yesus to fen lese nbaran ma nafburat i nor tomwat anlelar ne. Nempa tomwatar monuk a ne ralang resi sir. 14 Ma nti a nti e bate merwane ma ralele Tuhan rtafal ma yadin sir. 15 Iane nwayat ma ror mangafansar far burit, ma rfele sir a na mpeluk ma kirar na dalamten kaumpwar nema Petrus nlanre e, ninuny diat sir. 16 Tomwatar yadin a nbal rma rof pnuar na Yerusalem serin baldu. Sir rma e ror mangafansar, ma tomwatar ma smwangat yatkar a rsung sir, mpa sir monuk a ne rangamon.
Rnau mangsidkwar a ne na sel
17 Mpe mangsomp silai numur ni manglartar reng ma rose kabar sa ber mangsidkwar a ne, fali dalmir maninik. Sir ye rof faburat Saduki. 18 Ne romat sir, betno rnau sir a na sel. 19 Nempa ni nronram e, malaekat a nbanril sel a ne ni fofoltar, betno nor sir far burit, ma nfalak ber sir, 20 “Mtyi mimdir Ratu Ni Das Silai ni latyompur ma mifwibar ber tomwat ngayadin safe-safe monuk ma Tuhan naftutu na momorip beberi.” 21 Mpe rlarat safe ma nfalak a ne ma ni bobolisin e rti Ratu Ni Das Silai ni latyompur ma raftutu na iane. To dodo a nbal e, mangsomp silai nor ni manglartar rluan mangtetak agamar ma rafburat sir ma rsidang. Sir a ne maken Yahudyar monuk. Mpe rluan tomwatar ma rti ral mangsidkwar a ne rof sel. 22 Nempa tomwatar ma rluan sir a ne rait sel e, to rtungan sir lo. Mpa rbali sir, ma rafbotin feti, 23 “Kam mti sel ma msalan e ni fofoltar raktem ma nangafel, ma mangajakar rajak a na fofolat. Nempa mbanril fofolat e, to kekes lo.” 24 Noak ma ulun ma najake Ratu Ni Das Silai ma mangsompar ulnir rdengar farane, rampriang ma raenrat sir feti safe diat mangsidkwar a ne. 25 Nempa merwan sa nma ma nfalak ber sir, “Mdyengar! Tomwatar ma mnyau sir a na sel a ne, ramin Ratu Ni Das Silai ni latyompur ma raftutu tomwat ngayadin!” 26 Mpene mangajakar na Ratu Ni Das Silai nir ulun nor ni tomwatar rti ral sir. Nempa to rfengarat sir, fali ramtaut feti keta tomwat ngayadin rakjai sir. 27 Ne ror mangsidkwar a ne far mangtetak agamar ma mangsomp silai ma renrat sir. 28 “Kam mose mteri desar a kmi ma kete miftutu tomwatar na Tomwate ne. Nempa kmi mifmwelir mir anftutu ne na Yerusalem ni kateman. Ma myose ma mfyasale kam na Tomwate ne ni mamate.” 29 Nempa Petrus ma mangsidkwar a ne rfalak, “Ka kam dedesar ma mlarat Ratu, ma to mlarat tomwatar. 30 Ratu ma emninrar nusninrar rsatngur ber I a ne, nafmorip a nbali Yesus ma msyangwalu mfyen I a ne. 31 Ratu nafdas I na seriny fian ma neluk Mangnrure ma Mangtebus, nema Israelar bise ma rtate nir salar ma Ratu nlure sir. 32 Kam ye ma maktem Ratu Samwangtany msalan kabanir monuk a ne. Ratu nal Smwangtany a ne ber tomwatar monuk ma rlarat Ni faretar.”
33 Noak ma mangtetkar rdengar farane rares desar, mpa rfat ma lese ma rfen mangsidkwar a ne. 34 Tomwat Farisyar sa nof mangtetkar a ne ngarany Gamaliel. I ye mangaftutu Musa ni faretar ma tomwatar yadin ralang i. I namdir ma nluan ma ror mangsidkwar a ne far burit a fuky, 35 betno nfalak ber mangtetak agamar ne, “Hei tomwat Israelar! Mdyaun fengamone keta myose safe ber tomwatar ye. 36 Luryain e, tomwat sa ngarany Teudas nma ma naboti feti mangonbain silayar sa i ma ni manglartar fafa raty fat. Nempa rfen i, ma ni manglartar a ne samele sabali sir terik ma omp monuk sir. 37 Lama Teudas nlie, tomwat sa nbotin a nbal noak ma ral monuk tomwatar ngarnir. I ngarany Yudas nof Galilea. I nwayat ma tomwatar yadin rbangal mangfaret Romar, mpa rfen i a nbal. Ma ni manglartar a ne samele sabali sir. 38 Mpa mdyengar ma kfwalak, msyalan lonri motak tomwatar ne ma kete myose sasaf sir. Farlan nir rerengyar nre langtwar a ne nof tomwate e, keta rlie. 39 Nempa farlan nof Ratu e, keta to bise myose mtyeri sir. Ma se nafai feti kmi ye ma mbyangal Ratu lo.” Mangtetkar a ne rlangun Gamaliel ni snyurat. 40 Mpa rtar mangsidkwar a ne ma raus a rbabal sir, ma rfalak ber sir feti kete raftutu na Yesus a nbal betno rtate sir. 41 Mangsidkwar a ne rti a rtate mangtetkar ror dalmir senange. Sir rafai feti Ratu nfil sir lo ma tomwatar rafbwere sir fali rlarat Yesus. 42 Ma lerar monuk e dedesar ma raftutu na Ratu Ni Das Silai ni latyompur ma tomwatar nir dasar, ma rafwibar Ibar Ngamone na Yesus feti, I ye Rai Mangtebus.